ایمز ٹی وی(اسپورٹس) وزیراعلیٰ خیبرپختونخوا پرویزخٹک نے پاکستان سپر لیگ (پی ایس ایل) 2017 کی فاتح ٹیم پشاور زلمی کے لیے 2 کروڑ روپے انعام کا اعلان کردیا۔
وزیراعلیٰ ہاؤس سے جاری ہونے والی پریس ریلیز کے مطابق پرویز خٹک نے پشاور زلمی کے مالک جاوید آفریدی کو ٹیلی فون کرکے مبارکباد دی اور ٹیم کی بہترین کارکردگی کی تعریف کی۔
پریس ریلیز کے مطابق وزیراعلیٰ پرویز خٹک نے پشاور زلمی کی ٹیم اور منیجمنٹ کو پشاور آنے کی دعوت بھی دی۔
اس سے قبل پشاور زلمی کے مالک جاوید آفریدی نے بھی اعلان کیا تھا کہ اگر ان کی ٹیم پاکستان سپر لیگ کی فاتح بننے میں کامیاب ہوگئی تو پوری ٹیم پشاور جاکر آرمی پبلک اسکول (اے پی ایس) کے ساتھ فتح کا جشن منائے گی۔
گذشتہ روز (5 مارچ کو) پاکستان سپر لیگ (پی ایس ایل) 2017 کے فائنل میں کوئٹہ گلیڈی ایٹرز کو 58 رنز سے شکست دے کر پشاور زلمی نے دوسری چمپیئن ٹیم بننے کا اعزاز حاصل کیا۔
پشاورزلمی کے کامران اکمل کو ٹورنامنٹ کا بہترین وکٹ کیپر قرار دیا گیا اور شاندار بلے بازی کرتے ہوئے سب سے زیادہ رنز بنانے پر میچ کا بہترین بلے باز اور ٹورنامنٹ کا بھی بہترین کھلاڑی قرار دیا گیا۔
دوسری جانب پشاورزلمی کے کپتان ڈیرن سیمی کو 'مین آف دی فائنل' کی ٹرافی اور 40 ہزار ڈالر انعام بھی دیا گیا۔
ایمز ٹی وی(اسپورٹس) پاکستان سپر لیگ ٹو فائنل کے لاہور میں انعقاد کو خوب سراہا جارہا ہے،وفاقی وزراء،قومی رہنمائوں اور بین الاقوامی شخصیات نے پشاور زلمی کو فتح پر مبارکباد دی ۔
مسلم لیگ ن کی رہنما مریم نواز نےپشاور زلمی کو جیت پر مبارک باد دی اور کہا کہ آج پاکستان کی فتح ہوئی،کچھ لوگوں کے نصیب میں رونا ہی لکھا ہے ،وہ روتے رہیں گے اور پاکستان آگے بڑھتا جائےگا۔
اپنے پیغام میں میئر لندن صادق خان نے کہا کہ انہیں پاکستان میں کرکٹ کی واپسی دیکھ کر بڑی خوشی ہوئی ،آج کسی کی شکست نہیں ہوئی ۔
وزیر دفاع خواجہ آصف نے پشاور زلمی کو جیت کی مبارک باد دیتے ہوئے کہا کہ زلمی کی فتح پورے پاکستان کی جیت ہے ،پی ایس ایل کے فائنل میں عوام کا جذبہ قابل دید رہا۔
وفاقی وزیر مملکت مریم اورنگزیب نے اپنے پیغام میں کہا کہ آج کے میچ سے پاکستان میں انٹرنیشنل کرکٹ بحالی کی طرف جائے گی ۔
چیئرمین تحریک انصاف عمران خان نے بھی پشاور زلمی کو جیت پر مبارک باد دی ہے ۔
امیر جماعت اسلامی سراج الحق نے پشاور زلمی کو پی ایس ایل فائنل جیتے پر مبارک دی اور کہا کہ کھیل اور سیاست کو الگ رکھنا چاہیے۔
وزیر اعلیٰ سندھ مراد علی شاہ نے پشاور زلمی کو مبارکباددیتے ہوئے کہا کہ یہ پاکستان کی جیت ہے ۔
ایمز ٹی وی(اسپورٹس) پاکستان سپر لیگ کا فائنل پشاور زلمی نے جیت لیاتاہم جشن پورے پاکستان نے منایا، پاکستان میں انٹر نیشنل کرکٹ بحال ہوگئی، ملک بھر میں مداحوں نے جشن منایا ،آتش بازی کی اورمٹھائیاں تقسیم کی گئیں۔
پشاور زلمی کی جیت کے ساتھ ہی شاندار پی ایس ایل کا اختتام ہوگیا، پی ایس ایل کا فائنل لاہور میں ہوا مگر پُرجوش پورا پاکستان دکھائی دیا ۔
سوات میں پشاور زلمی کی جیت پر مٹھائیاں تقسیم کی گئیں، نوشہرہ میں شہریوں نے بڑی اسکرین پرفائنل میچ دیکھا۔
قبائلی علاقے کرم ایجنسی میں نوجوانوں نےفائنل میچ دیکھنےکےلیےلوڈشیڈنگ کےخلاف پریس کلب کےباہراحتجاجی مظاہرہ کیا۔
بدین میں بھی پی ایس ایل کا جنون عروج پر ہے اور کرکٹ شائقین نےبڑی اسکرین پر فائنل دیکھا، حیدرآباد کےمختلف علاقوں میں پی ایس ایل کا فائنل دکھانےکےلئےاسکرینیں لگائی گئیں۔
باچاخان چوک پرکوئٹہ گلیڈی ایٹر اورپشاور زلمی کے سپورٹرز نے کرکٹ کے عشق میں ڈوب کرخٹک ڈانس پیش کیا ۔
ایمز ٹی وی(اسپورٹس) پشاور زلمی کے کپتان ڈیرن سیمی کا کہنا ہے کہ وہ پاکستانیوں کے چہروں پر مسکراہٹیں بکھیرنا چاہتے تھے ۔
انہوں نے بتایا کہ ان کے پاکستان آکر کھیلنے میں شاہد آفریدی نے اہم کردار ادا کیا۔ ڈیرن سیمی کو مین آف دی فائنل کا ایوارڈ بھی دیا گیا۔
ادھرپی ایس ایل ٹو کی رنر اپ ٹیم کوئٹہ گلیڈی ایٹرز کے کپتان سرفراز احمد کا کہنا ہے کہ ان کے پانچ کھلاڑی شروع میں ہی آوٹ ہوگئے جو ہار کی وجہ بنی۔ انہوں نے اچھے کھیل پر پشاور زلمی کو مبارکباد بھی دی۔
ایمز ٹی وی(اسپورٹس) کوئٹہ گلیڈی ایٹر اور پشاور زلمی کے درمیان پاکستان سپر لیگ کا فائنل بھارت میں سب سے زیادہ آن لائن دیکھا گیا۔
پاکستان سپر لیگ کا فائنل دنیا بھر میں دیکھا گیا، لیکن سب سے زیادہ آن لائن بھارت میں دیکھا گیا، آن لائن کرکٹ کی ویب سائٹس کے مطابق بھارت میں پی ایس ایل کا فائنل اٹھائیس فیصد آن لائن دیکھا گیا۔
ویب سائٹس کے مطابق پاکستان میں اکیس فی پی ایس ایل کا فائنل آن لائن دیکھا گیا ، برطانیہ ، یورپ اور دیگر ممالک میں بھی کوئٹہ گلیڈی ایٹر اور پشاور زلمی کا فائنل آن لائن دیکھا گیا۔
ایمز ٹی وی (اسپورٹس) پشاورزلمی پاکستان سپر لیگ ٹو کا فاتح بن گیا ،کوئٹہ گلیڈی ایٹرز کی ٹیم مسلسل دوسری مرتبہ فائنل میں پہنچ کر بھی کامیابی حاصل نہ کر سکی ،حریف ٹیم کے لئے نرم چارہ ثابت ہو ئی اور حتمی مقابلے میں58رنز سے شکست اس کا مقدر بنی۔
فائنل میچ کا ٹاس کوئٹہ گلیڈی ایٹرزکے کپتان سرفراز احمد نے جیتا اور پشاور زلمی کو بیٹنگ کی دعوت دی ،پشاور نے مقررہ20اوورز میں148رنز بنائے اور کوئٹہ کی ٹیم کو میچ جیتنے کےلئے 149رنز کا ہدف دیا جس میں کامران اکمل40،ڈیرن سامی28،مارلن سیموئل 19، ڈیوڈ ملن کے17رنز شامل تھے۔
کوئٹہ گلیڈی ایٹرزبیٹسمین 149رنز کے ہدف کے تعاقب میں جلد بازی کا شکار نظر آئے اور پہلی وکٹ ایک رن کے مجموعے پروین وائیک کی صورت میں،دوسری وکٹ5کے مجموعےپرانعام الحق کی صورت میں،تیسرے وکٹ13رنزپراحمد شہزادکی صورت میں،چوتھی وکٹ 29رنزپر سرفراز احمد کی شکل میںجبکہ آدھی ٹیم صرف 37رنز کے مجموعے پرپویلین پہنچ چکی تھی۔
پشاور زلمی کے بالرز نے کوئٹہ گلیڈی ایٹرز کے بیٹسمینوں کو کسی موقع پر سنبھلنے کا موقع نہیں دیا اور وقفے وقفے سے کوئٹہ گلیڈی ایٹرز کی وکٹیں حاصل کرتے رہے اور16اعشاریہ3اوورز میں ہی کوئٹہ کی ٹیم کو90رنز پر ڈھیر کر دیا،کوئٹہ کے کپتان سرفراز احمد22،سین ارون24اورانور علی20رنز بنا کر ہی قابل ذکر رہے جبکہ دیگر کوئی بیٹسمین ڈبل فیگر میں داخل نہ ہو سکا۔
پشاور زلمی کی جانب سے محمد اصغر نے3،حسن علی اور وہاب ریاض نے2،2وکٹیں حاصل کیں جبکہ محمد حفیظ نے سرفراز احمد کی قیمتی وکٹ حاصل کی۔آج کے میچ میں شائقین کرکٹ نے شاہد خان آفریدی کی شدت سے کمی محسوس کی تاہم ان کی ٹیم فائنل میچ کی فاتح رہی اور پاکستان سپر لیگ ٹو کی چیمپئن بن گئی۔
اس سے قبل پشاور زلمی نے پہلے بیٹنگ کرتے ہو ئےکوئٹہ گلیڈی ایٹرزکو میچ جیتنے کے لئے149رنز کا ہدف دیا،پشاور کےکامران اکمل40رنز کے ساتھ ٹاپ اسکورر رہے۔
کوئٹہ گلیڈی ایٹرز کی جانب سےریاض امرت نے عمدہ بالنگ کا مظاہرہ کرتے ہو ئےپشاور زلمی کے3بیٹسمینوں کو پویلین کی راہ دکھائی،حسن خان نے 2اورمحمدنواز نے ایک وکٹ حاصل کی۔کوئٹہ کے انور علی سب سے مہنگے بالر ثابت ہو ئے انہوں نے4اوورز میں43رنز دئے جبکہ انکے حصے میں کوئی وکٹ نہ آسکی،ان کے آخری اوور میںڈیرن سیمی نے دو بلندو بالا چھکے لگائے۔
ایمزٹی وی(تعلیم) آوازانسٹیٹیوٹ آف میڈیا اینڈ مینجمنٹ کے زیر اہتما م طلبا و طالبات کی رہنمائی کے لئے "میڈیااور اخلاقیات" کے موضوع پر ایک خصوصی لیکچر کاانعقاد کیا گیا۔ لیکچر کے مہمانِ خصوصی سینئر صحافی اور تجزیہ کار مظہر عباس کو مدعو کیا گیاتھا۔
اس موقع پر مہمان ِ خصوصی مظہر عباس کا کہنا تھا کہ طلباو طالبات کو ایسے انسٹیٹیوٹ فراہم کئے جائیں جہاں انہیں تدریس کے ساتھ ساتھ عملی طور پر تیار کیا جائے۔
میڈیا اور اخلاقیات کے حوالے سے ان کا کہناتھا کہ اچھے صحافیوں کے لئے نیوز سینس ہونا ضروری ہے خبر سننے سے پہلے اس کو دیکھنا ضروری ہوتا ہے
علاوہ ازیں انہوں نے مزید کہا کہ اگر کوئی خبر اخبارات میں غلط چھپ جائے تواخبارات اسکی وضاحت پیش کرتے ہیں لیکن بدقسمتی سے ٹیلی وژن پر یہ کلچرپروان نہیں چڑھا کہ کسی غلط خبر پرمعذرت کی جائے ۔
.لیکچر کے اختتام پرآواز انسٹیٹوٹ کی جانب سے مظہر عباس کو شیلڈ سے نوازا گیا جس کے بعد انہوں نے انسٹیٹیوٹ کے ویب چینل ایمزٹی وی کا خصوصی دورہ بھی کیا
ایمز ٹی وی(لاہور) وزیر اعلیٰ پنجاب شہباز شریف بھی کرکٹ کے رنگ میں رنگ گئے ، انہوں نے قذافی سٹیڈیم میں چوکوں اور چھکوں کی پریکٹس شروع کر دی ۔
وزیراعلیٰ شہبازشریف نے شائقین کرکٹ کا جوش او ر ولولہ بڑھانے کیلئے قذافی سٹیڈیم میں کرکٹ کھیلنے کی پریکٹس شروع کر دی جہاں انہوں نے سفید شلوار قمیض اور وائٹ کیپ میں ملبوس ہو کر خوب شارٹس لگائے ۔پہلی گیند پر سٹریٹ ڈرائیو لگایا اور دوسری ہی گیند پر چھکا لگا کر گیند کو باؤنڈری سے باہر کر دیا ۔
کچھ گیندوں پر وہ اپنی وکٹ کا دفاع کرتے ہوئے بھی نظر آئے اور سٹریٹ ڈرائیو بھی لگائے جبکہ آف سائیڈ پر ملنے والی گیندوں پر خوب زور دار اور بھرپور ٹائمنگ والے شارٹس بھی کھیلے
ایمز ٹی وی(اسلام آباد) پاكستان پیپلزپارٹی نے فوجی عدالتوں كی بحالی كی مخالفت كر دی جب کہ آصف زرداری نے پارٹی کے قانونی ماہرین کو فوجی عدالتوں کےقیام کی صورت میں اس سے متعلق قانونی مسودے کی تیاری کی ہدایت کردی۔
پیپلزپارٹی کی جانب سے فوجی عدالتوں کی مدت میں توسیع کے حوالے سے آل پارٹیز کانفرنس منعقد کی گئی جس میں 13 سیاسی جماعتوں كے سربراہان اور نمائندگان نے شركت كی جن میں پی ایم ایل (ق) كے چوہدری شجاعت، جے یوآئی (ف) كے مولانا فضل الرحمن، قومی وطن پارٹی كے آفتاب شیرپاؤ، اے این پی كے غلام بلور، جماعت اسلامی كے سراج الحق، عوامی مسلم لیگ کے شیخ رشید اورنیشنل پارٹی کے میر حاصل بزنجو سمیت دیگر شامل تھے۔
آصف زرداری اور بلاول بھٹو زرداری كے علاوہ پیپلزپارٹی کی جانب سے قومی اسمبلی میں حزب اختلاف سید خورشید شاہ، سینیٹ میں قائد حزب اختلاف اعتزاز احسن، سینیٹ كے سابق چیرمین اور قانونی ماہر فاروق نائیك، سینیٹر شیری رحمن، نیئر حسین بخاری اور فرحت اللہ بابر سمیت دیگر شریک تھے۔ اے پی سی كا ایجنڈا فوجی عدالتوں كی بحالی، نیشنل ایكشن پلان پر عملدرآمد، قبائلی علاقوں كے لیے اصلاحات اور پختونوں كی ملك كے مختلف علاقوں میں پروفائلنگز كے معاملات شامل تھے۔
سیاسی جماعتوں کے كہنے پر آصف زرداری نے فوجی عدالتوں كے قیام كی صورت میں اس كے لیے قانونی مسودہ فوری تیار كرنے كی ذمہ داری سینیٹر فاروق نائیك كو سونپی۔ انہوں خورشید شاہ اور اعتزاز احسن کو ہدایت دی كہ وہ اس قانون مسودے كی تجاویز دیگر سیاسی پارٹیوں كو مہیا كریں۔ فاٹا اصلاحات سے متعلق آصف زرداری نے كہا كہ قبائلی علاقوں میں اصلاحات سب سے پہلے پیپلزپارٹی نے شروع كیں اور اصلاحات كے عمل كا راستہ ہموار كیا، ہم نے ایف سی آر كی اصلاحات كی بات كی كہ وہاں سیاسی پارٹیاں آزادانہ طور پر كام كر سكیں اور اس كے لیے پولیٹیكل پارٹیز آرڈر 200 # كو فاٹا تك توسیع دی۔
آصف زرداری نے فاٹا اصلاحات پر فوری عملدرآمد كا مطالبہ کرتے ہوئے کہا کہ ان اصلاحات پر عملدرآمد میں 5 سال كی تاخیر حكومت كی غیرسنجیدگی ظاہر كرتی ہے اور قبائلی علاقوں كے عوام كی آنكھوں میں دھول جھونكنا ہے۔ سابق صدر نے نیشنل ایكشن پلان كی مختلف شقوں پر عملدرآمد نہ كرنے كی بھی مذمت كی اور مطالبہ كیا كہ جو لوگ اس كے ذمہ دار ہیں ان كا احتساب كیا جائے۔
كانفرنس كے بعد زرداری ہاؤس كے باہر میڈیا سے بات كرتے ہوئے سینیٹر فرحت اللہ بابر نے فوجی عدالتوں سے متعلق پیپلزپارٹی كے تحفظات پر بات كرتے ہوئے كہا کہ صرف دہشت گرد تنظیموں اور گروپوں كا سرسری ذكر ناكافی ہے اور فوجی عدالتوں كے غلط استعمال كو روكنے كے لیے جو شرائط ہیں ان كو بھی بیان كیا۔ انہوں نے كہا كہ فوجی عدالتیں كریمنل جسٹس سسٹم میں اصلاحات كے مسئلے سے توجہ ہٹانے كے لیے قائم كی جارہی ہیں اور یہی وجہ ہے كہ پیپلزپارٹی فوجی عدالتوں كی مخالفت كررہی ہے۔
فاٹا اصلاحات پر پارٹی كی پالیسی بیان كرتے ہوئے فرحت اللہ بابر نے كہا كہ فاٹا میں صدر كا حكم اور ایف سی آر برطانوی نظام كا حصہ ہے اور ریفارم كے پیكیج میں اس كالونیل ڈھانچے میں ختم كرنے میں ناكامی ہوئی ہے، ایف سی آر كے متبادل رواج ایكٹ كو ابھی تك سامنے نہیں لایا گیا اور پارٹی نے مطالبہ كیا كہ رواج ایكٹ كو پارلیمنٹ كے سامنے لیا جائے تاكہ پارلیمنٹ فاٹا میں قانون سازی كر سكے
ایمز ٹی وی(لاہور) پولیس نے سیشن عدالت کے باہرموجود 3 نوجوانوں کے اسکول بیگزسے اسلحہ برآمد کیا ہے۔
لاہورکی سیشن عدالت کے باہرگاڑیوں کی پارکنگ کے لیے مختص جگہ پر3 نوجوان اسکول بیگزلٹکائے موجود تھے، پولیس نے شک ہونے پران کی تلاشی لی تواسکول بیگ سے اسلحہ نکلا، پولیس نے تینوں نوجوانوں کو اسلام پوره پولیس اسٹیشن منتقل کردیا۔
پولیس کے سامنے نوجوانوں کے باپ واجد نے بیان دیا کہ وہ بچوں کے ہمراہ قتل کیس میں پیشی کےموقع پراسلحہ لیکرآیا تھا اوراس کے بچے اسلحہ پارکنگ میں لے کرکھڑے تھے، برآمد ہونے والا اسلحہ لائسنس یافتہ ہے. پولیس نے بھی اسلحی قانونی ہونے کی تصدیق کردی ہے