ایمز ٹی وی (فارن ڈیسک ) میکسیکو کےاٹارنی جنرل جیسس میوریلو نے کہا کہ گینگ کے تین مبینہ اراکین نے دعویٰ کیا کہ بعض طلبا دم گھٹنے سے پہلے ہی سے ہلاک ہوئے تھے جبکہ دیگر کو انھوں نے گولی مار کر ہلاک کیا اور تمام لاشوں کو آگ لگا دی۔ گینگ کا کہنا تھا کہ یہ طلبا پولیس نے ان کے حوالے کیے تھے۔ یاد رہے کہ 26 ستمبر کو اگیوالا قصبے میں پولیس سے تصادم کے بعد 43 طلبا لاپتہ ہو گئے تھے ۔ لاپتہ ہونے والے طلبا کے لواحقین کا کہنا ہے کہ انھیں ایک دریا کے کنارے سے چھ بوریوں میں انسانی لاشیں ملنے کے بارے میں بتایا گیا ہے۔ بوری بند لاشیں اس علاقے سے ملیں ہیں جہاں پر طلبا لاپتہ ہوئے تھے طلبا کو ڈھونڈنے کے لیے اس سے پہلے کیے گئے سرچ آپریشن میں طلبا کے لاپتہ ہونے والے قصبے اگیوالا کے نواح میں ایک اجتماعی قبر ملی تھی لیکن وہاں سے ملنے والی لاشوں کی ابتدائی ٹیسٹ رپورٹ سے معلوم ہوا کہ ان میں لاپتہ طلبا کی لاشیں نہیں تھیں۔ اٹارنی جنرل جیسس میوریلو نے خبردار کیا ہے کہ لاشوں کی جلی ہوئی باقیات کی شناخت کرنا مشکل ہے اور حکام اس وقت تک ان طلبا کو لاپتہ تصور کریں گے جب تک ڈی این اے ٹیسٹ کے ذریعے ان لاشوں کی شناخت نہیں ہو جاتی۔ انھوں نے کہا کہ ان لاشوں کو پیٹرول، ٹائر اور آگ والی لکھڑیوں کے ساتھ 14 گھنٹوں تک جلایا گیا اٹارنی جنرل کے مطابق مشتبہ افراد کو اندازہ نہیں کہ انھوں نے کتنے طلبا کو پکڑا تھا لیکن ان میں سے ایک نے بتایا کہ ان طلبا کی تعداد 40 سے زیادہ تھی- لاپتہ طلبا زیرِ تربیت اساتذہ تھے جو غیر منصفانہ بھرتیوں کے خلاف احتجاج کرنے اور اپنے کالج کے لیے چندہ کرنے کے لیے اگیوالا گئے تھے لیکن پولیس کے ساتھ تصادم کے بعد غائب ہو گئے۔

ایمز ٹی وی (کراچی) کراچی کے علاقے لیاری میں قانون نافذ کرنے والے اداروں نے کارروائی کرتے ہوئے گینگ وار کے دو زخمی سمیت چار ملزمان کو گرفتار کر لیا ہے۔رینجرز کے مطابق لیاری کے علاقے علی محمد محلہ میں پولیس اور رینجرز نے چھاپہ مارا جس پر ملزمان کی جانب سے فائرنگ کی گئی۔ قانون نافذ کرنے والے اداروں سے مقابلے کے بعد چار ملزمان کو گرفتار کر لیا گیا۔ گرفتار ملزمان میں سے دو ملزم زخمی حالت میں گرفتار کیے گئے۔ گرفتار ملزمان کا تعلق گینگ وار سے ہے جبکہ ملزمان کے قبضے سے اسلحہ اور مسروقہ سامان برآمد کر لیا گیا۔

ایمز ٹی وی (فارن ڈیسک )وزیر اعظم نواز شریف چین کے دورے پر ہیں جہاں چین اور پاکستان کےدرمیان دو طرفہ معاہدوں پر دستخط ہوئے ان میں کوئلے کی کان کنی، ہائیڈرو پاور پراجیکٹس، کوئلے سے بجلی پیدا کرنے کے معاہدے، اور شمسی توانائی کے معاہدے شامل ہیں۔ اس کے علاوہ اقتصادی اور فنی تعاون کے معاہدے ہوئے۔ جن میں انیس دو طرفہ معاہدوں کی مالیت چار ارب ڈالر ہے۔ ان معاہدوں میں سے34ارب ڈالر توانائی اور متعلقہ منصوبوں جبکہ 11 ارب ڈالر بنیادی ڈھانچے کی ترقی کے منصوبوں پر خرچ ہوں گے۔ وزیر اعظم پاکستان میاں نواز شریف نے کہا کہ ان کا چین کا دورہ پاکستان میں بجلی کے بحران کو حل کردے گا۔ ان کا کہنا تھا کہ حکومت بجلی کے بحران کو مستقل طور پر حل کرنا چاہتی ہے۔ میاں نواز شریف نے کہا کہ پاکستان چین معاشی راہداری پراجیکٹ خطے کی قسمت بدل دے گا۔ انھوں نے امید ظاہر کی کہ نئے پراجیکٹس سے ترقیاتی کاموں میں تیزی آئے گی۔ وزیر اعظم ایشیا اور بحرالکاہل اقتصادی تعاون کے اجلاس میں شرکت کے لیے چین گئے ہوئے ہیں اپنے دورے میں رائی کوٹ سے اسلام آباد تک 440 کلومیٹر طویل قراقرم ہائی وے دوم کی تعمیر، کراچی لاہور موٹر وے، حویلیاں ڈرائی پورٹ، کراس بارڈر آپٹیکل فائبر کیبل سمیت دیگر معاہدے بھی کریں گے۔ بجلی کے منصوبوں کی تعمیر کا تجربہ رکھنے والے ڈاکٹر ثمر مبارک مند کہتے ہیں کہ ان منصوبوں میں سب سے اہم نکتہ ان بجلی گھروں کو ایندھن کی فراہمی ہے: ثمر مبارک مند کے مطابق اپنے لیے ضرورت کی بجلی پیدا کرنے کے لیے بجلی گھر تو پاکستان میں پہلے بھی موجود ہیں، اصل مسئلہ ایندھن کا ہے جو نہ پہلے سے نصب شدہ بجلی گھروں کے لیے دستیاب ہے اور نہ نئے بجلی گھروں کے لیے دستیاب ہو گا۔

ایمز ٹی وی (اسلام آباد) اسلام آباد کے ڈی چوک پر آزادی دھرنے كے شركا سے خطاب كرتے ہوئےتحریک انصاف کے چیرمین عمران خان نے كہاکہ اب ہمیں موجودہ الیكشن كمیشن سے نہیں بلکہ سپریم کورٹ سے انصاف كی توقع ہے، سپریم كورٹ ایک ایسا كمیشن بنائے جو 30 روز میں تحقیقات كرے، سپریم كورٹ كے پاس جسٹس (ر) ناصر اسلم جیسی شخصیات ہیں جو دھاندلی كی منصفانہ تحقیقات كرسكتی ہیں، اگر انتخابات میں دھاندلی ثابت نہ ہوئی تو ہم اپنا دھرنا ختم كردیں گے اور اگر ثابت ہوجائے تو نواز شریف استعفیٰ دیں گے۔انکا کہنا تھا کہ حکمران عوام كے پیسے كو بیدردی سے خرچ كر رہے ہیں، رائیونڈ کی پولیس كا سالانہ خرچہ 50 كروڑ روپے ہے جبکہ آصف زرداری كے حالیہ دورہ چین پر بھی پاكستانیوں كے ڈھائی كروڑ روپے خرچ ہوئے کیونکہ سندھ حكومت نے انہیں دورے كے لئے ہوائی جہاز سركاری خرچے پر فراہم كیا لیکن تحریک انصاف كی حكومت عوام كا پیسہ عوام پر خرچ كرے گی، گورنر ہاؤسز كی دیواریں گرا دیں گے اور تحریک انصاف كے گورنر اور وزرائے اعلیٰ سادگی اختیار كریں گے۔ انہوں نے کہا کہ دنیا بھر میں پیٹرولیم مصنوعات كی قیمتوں میں كمی ہوئی مگر پاكستان میں اس حساب سے كمی نہیں كی گئی، پیٹرول اور ڈیزل كی قیمتیں ہمارے خوف سے نیچے آئیں تاہم ان میں ابھی اور بھی كمی ہونی چاہئے۔عمران خان کا کہنا تھا کہ نواز شریف اور آصف زرداری كے 300 ارب ڈالر بیرون ملک میں ہیں اوردونوں ملک کے دوسرے اورتیسرے ا امیر ترین آدمی ہیں لیكن یہ خود ٹیكس نہیں دیتے، نواز شریف جب 4 سال پہلے اچھے موڈ میں تھے تو 5 ہزار روپے ٹیكس دیا لیکن جب بیرون ملک مقیم تھے تو ایک روپیہ بھی ٹیكس نہیں دیا، كیا اس دوران وہ اپنی تمام فیکٹریاں بھی اپنے ساتھ لے گئے تھے۔ پیپلز پارٹی کے شریک چیرمین آصف زرداری پوچھتے ہیں كہ دھرنے کے لئے پیسہ كہاں سے آتا ہے تو انہیں بتا دوں كہ دھرنے كے لئے پیسہ عوام دیتے ہیں جبکہ بیرون ملک پاكستانی بھی پیسہ اكٹھا كر رہے ہیں۔انھوں نے کہا ابھی تو وارم اپ چل رہا ہے جب کہ اصل دھرنا 30 نومبر کے بعد شروع ہوگا انہوں نے کہا کہ انسانوں كے سمندر كے لئے آزادی فنڈ میں 5 كروڑ روپے اكٹھے ہوچكے ہیں۔

ایمز ٹی وی (فارن ڈیسک) وزیراعظم میاں محمد نواز شریف نے بیجنگ میں چینی صدر شی جن پنگ اور وزیراعظم لی کی چنگ سے ملاقاتیں کیں جس میں دو طرفہ تعلقات اور خطے کی صورت حال پر تفصیلی تبادلہ خیال کیا گیا۔ ملاقات کے دوران دونوں ممالک کے درمیان اقتصادی اور فنی تعاون سمیت 21 معاہدوں اور مفاہمت کی یاداشتوں پر دستخط ہوئے،چینی ہم منصب سے ملاقات کے بعد میڈیا سے گفتگو کرتے ہوئے وزیراعظم نواز شریف کا کہنا تھا کہ ملک میں دھرنوں کی وجہ سے جو کام رہ گیا ان معاہدوں سے ان میں روح آ جائے گی، ہماری حکومت ملک سے بجلی کا بحران ختم کرنے کے لئے پر عزم ہے، دورے سے پاکستان میں توانائی کا مسئلہ حل کرنے میں مدد ملے گی اور توانائی کا مسئلہ حل ہونے سے ملک میں ترقی اور خوشحالی آئے گی۔ ان کا کہنا تھا کہ پاکستان اور چین کے درمیان اقتصادی راہداری منصوبہ دونوں ممالک کے درمیان مضبوط دوستی کی عکاس ہے، یہ منصوبہ خطے کی تقدیر بدل دے گا، اس سے روزگار کے مواقع پیدا ہوں گے اور ملک سے غربت کا خاتمہ ہو گا۔ وزیراعظم نواز شریف نے کہا کہ پاکستانی عوام چینی وزیراعظم کے دورہ پاکستان کی منتظر ہے اور پاکستان ون چائنا پالیسی کی حمایت کرتا ہے۔واضح رہے کہ پاکستان اور چین کے درمیان توانائی اور اقتصادی راہداری منصوبے سمیت 21 معاہدوں اور مفاہمت کی یاداشتوں پر دستخط ہو گئے ہیں۔

ایمز ٹی وی( فارن ڈیسک ) لائبیریا میں ایبولا کے نئے کیسز میں کافی حد تک کمی واقع ہونے کی تصدیق ہوئی ہے- مغربی افریقہ میں ایم ایس ایف کا عملہ ہزاروں کی تعداد میں ہے اس لیے اس خیراتی ادارے کو ابیولا کے حوالے سے سب سے زیادہ معلومات رکھنے والا ادارہ سمجھا جاتا ہے۔ ایبولا کے تقریباً 14000 مریضوں میں لگ بھگ 5000 ہلاک ہوئے ہیں۔ لائبیریا میں ایبولا کے کیسز میں کمی صحت کے کارکنوں کے لیے ایک موقع ہے کہ وہ اپنی کارروائیاں تیز کریں۔ لیکن انھوں نے گنی میں ایبولا کے کیسز میں ہونے والے اضافے کی طرف اشارہ کرتے ہوئے کہا کہ اس بیماری کے پھیلاؤ میں دوبارہ ’تیزی‘ آ سکتی ہے- کریس سٹوکس نے کہا کہ اس بیماری پر قابو پانے کے لیے ضروری ہے کہ اس سے لائبیریا، گنی اور سرائیلون میں فوری طور پر نمٹا جائے۔ مغربی افریقہ میں گذشتہ گیارہ ماہ سے پھیلنے والی وبائی بیماری میں لائبیریا سب سے زیادہ متاثر ہوا جہاں زیادہ اموات ہوئیں لیکن اب وہاں مقامی طبی حکام نے بھی کہا ہے کہ ایبولا کے مریضوں میں کمی واقع ہوئی ہے۔

ایمز ٹی وی (فارن ڈیسک) صدر براک اوباما نے دولتِ اسلامیہ کے خلاف لڑائی میں عراقی سکیورٹی فورسز کی قوت بڑھانے کے لیے عراق میں مزید 1500 غیر جنگجو فوجی بھیجنے کی منظوری دی ہے۔

پینٹاگون نے مزید کہا کہ صدر براک اوباما نے عراق میں مزید فوج بھیجنے کا فیصلہ عراق کی حکومت کی درخواست پر کیا گیا۔۔

پینٹاگون کی طرف سے جاری ایک بیان کے مطابق امریکی فوجی عراق میں کئی سینٹر قائم کریں گے جہاں عراقی فوج کے نو اور کرد پیشمرگاہ کے تین بریگیڈ کو تربیت دے جائے گی۔

وائٹ ہاؤس کے ترجمان جوش ارنسٹ کا کہنا ہے کہ امریکی فوج جنگ میں حصہ نہیں لیں گے لیکن وہ دولتِ اسلامیہ کے خلاف لڑائی میں عراقی فورسز کو مدد فراہم کرنے اچھی پوزیشن میں ہوگی-

انھوں نے مزید کہا کہ وائٹ ہاؤس شام اور عراق میں دولتِ اسلامیہ کے خلاف آپریشنز کے لیے کانگریس سے 5.6 ارب امریکی ڈالر کی رقم بھی مانگے گی۔

گذشتہ دنوں برطانوی وزیر دفاع مائیکل فیلون نے کہا تھا کہ یہ مشن عراقی فوج کی تربیت تک ہی محدود رہے گا اور عراقی لڑاکا دستوں کی جنگ میں قیادت نہیں کرے گا۔

عراق کے نئے وزیر اعظم حیدر العبادی پر شمالی اور مغربی علاقوں میں اپنی عملداری بحال کرنے کے لیے دباؤ بڑھ رہا ہے۔

ایمز ٹی وی (فارن ڈیسک) امریکی فوج کا لاکھوں ڈالر مالیت کا اسلحہ اور سامان افغانستان میں خردبرد یاپھر چوری ہو چکا ہے۔اس بات کا انکشاف امریکی دفاعی ادارے پینٹاگون کی ایک رپورٹ میں کیا گیا ہے ،رپورٹ کے مطابق 2010 ءسے افغانستان میں جو فوجی چھاﺅنیاں اور فوجی بیسز بند ہوئیں وہاں موجود بڑی تعداد میں سامان نہیں مل سکا۔ اسی طرح 2006 ءسے 2010 ءتک ایک لاکھ 74 ہزار سے زائد مختلف سامان جس میں اسلحہ بھی شامل ہے، غائب ہوا جس کی مالیت 430ملین ڈالر سے زائد بنتی ہے۔رپورٹ میں یہ بھی کہا گیا ہے کہ صرف مئی 2014ءمیں ہی 23 فیصد سامان برآ مد ہوسکا ہے۔واضح رہےکہ امریکی وزارت دفاع کے انسپکٹر جنرل کی جانب سے پیش کی گئی رپورٹ میں اس نقصان کے ازالے کے لیے تجاویز بھی دی گئی ہیں۔

ایمز ٹی وی (فارن ڈیسک) ہرسال کی طرح اس سال بھی 15محرم الحرام پر خانہ کعبہ کو غسل دیا گیا، غسل دینے کی روح پرور تقریب میں گورنر مکہ نے خانہ کعبہ کو آب زم زم اور عرق گلاب سے غسل دیا گیا ۔ تقریب میں گورنر مکہ، حرمین شریفین انتظامیہ کے سرابرہ شیخ عبدالرحمان السدیس، شاہی خاندان کے افراد اور مختلف مسلم ممالک کی سفارتی شخصیات سمیت مشائخ نے بھی بڑی تعداد میں شرکت کی، اس موقع پر خانہ کعبہ کی اندرونی دیواروں کو عرق گلاب اور دیگر خوشبوﺅں میں بھیگے سفید کپڑے سے غسل دیا گیا جب کہ فرش کو آب زم زم اور عرق گلاب بہا کر کھجور کے پتوں کی مدد سے تیار کردہ جھاڑو سے صاف کیا،واضح رہے کہ خانہ کعبہ کو ہر سال 15 محرم الحرام اور یکم شعبان المعظم کو غسل دیا جاتا ہے۔

ایمز ٹی وی (کراچی) سندھ ہائی کورٹ میں دائر درخواست کی سماعت جسٹس سجاد علی شاہ کی سربراہی میں دورکنی بینچ نے کی، سماعت کے بعد عدالت نے کے ایم سی کو ندی نالوں پر سے تجاوزات کا خاتمہ اورصفائی کرکے 19 نومبر تک رپورٹ جمع کرانے کی ہدایت کی۔ درخواست میں موقف اختیارکیا گیا تھا کہ ندی نالوں کی صفائی نہ ہونے اور ان پر تجاوزات کے باعث بارش ہونے کی صورت میں شہر میں کئی دنوں تک پانی کھڑا رہتا ہے۔