ایمز ٹی وی (نیوز ڈیسک) پاکستان میں تعلیمی شعبے میں کام کرنے والی تنظیم الف اعلان کا اپنی ایک تازہ رپورٹ میں کہنا ہے کہ پاکستان میں ڈھائی کروڑ بچے تعلیم سے محروم ہیں جن میں سے 50 فیصد سے زیادہ کا تعلق پنجاب سے ہے۔رپورٹ میں کہا گیا ہے کہ پاکستان میں پانچ سے 16 سال عمر کے بچوں میں سے صرف دو کروڑ 70 لاکھ بچےسکول جا رہے ہیں۔ایک بڑی تعداد ان کی ہے جو پیچھے رہ جانے کی بناء پر سکول نہیں جاتے ان بچوں کی تعداد ڈھائی کروڑ کے قریب ہے ، یہ بچے کسی طرح کے سکول میں نہیں جا رہے۔ نہ وہ مدرسے میں ہیں، نہ سرکاری سکول میں اور نہ نجی سکول۔ وہ کسی طرح کے سکول میں نہیں جا تے۔پنجاب میں تعلیم کی صورتِ حال کے بارے میں کہا گیا ہے کہ پچھلی کئی دہائیوں سے یہاں پالیسی، فنڈز اور توجہ کا فقدان رہا ہے۔ اب حالات بدرجہ بہتر ہو رہے ہیں ۔

ایمز ٹی وی (تجارت) حکومت کی جانب سے سی این جی پر جی ایس ٹی وصول کئے جانے کے خلاف سی این جی مالکان کی جانب سے عدالت میں درخواست دائر کی گئی جس میں موقف اختیار کیا گیا کہ حکومت صدارتی آرڈیننس کے تحت جنرل سیلز ٹیکس وصول نہیں کرسکتی، یہ اقدام غیر قانونی اور غیر آئینی ہے،عدالت حکومت کو جی ایس ٹی لینے سے نہ صرف روکے بلکہ اب تک لیا گیا تمام ٹیکس بھی واپس کرے۔جس کے بعد عدالت نے جی ایس ٹی کے نفاذ کا حکم معطل کر تے ہوئے وفاق اور اوگرا سے دو ہفتوں میں جواب طلب کر لیا۔

ایمز ٹی وی (فارن ڈیسک) اطلاعات کے مطابق شام کے شمالی شہر کوبانی میں کرد جنگجوؤں اور دولت اسلامیہ کے جنگجوؤں کے مابین دو دنوں کے نسبتاً پرسکون ماحول کے بعد ایک بار پھر سے شدید جھڑپیں شروع ہو گئی ہیں، ۔ واضح رہے کہ دولت اسلامیہ کے جنگجو اس شہر اور اس علاقے پر قبضے کے لیے کئی ہفتوں سے کوشاں ہیں۔دوسری طرف امریکی فوج نے کہنا ہے کہ اس کی فضائیہ نے کوبانی شہر کے اطراف میں اتوار اور پیر کے درمیان چھ بار فضائی حملے کیے۔تازہ لڑائی کی شرو عات اس وقت ہوئی جب ترکی نے کہا کہ وہ عراق کے کرد فوجی پیشمرگ کو سرحد عبور کرکے شام میں دولت اسلامیہ کے خلاف لڑنے کی اجازت دیں گے۔کوبانی کے شمالی علاقوں میں پیر کی رات شدید لڑائی شروع ہو گئی اور رات ہوتے ہی زبردست دھماکے شروع ہو گئے، جس کے بعد چھوٹے ہتھیاروں سے شدید گولی باری ہوتی رہی یہاں تک کہ اتحادی فوج کی جانب سے اس علاقے میں فضائی حملے شروع کر دیے گئے۔اس تازہ لڑائی کے نتیجے میں بہت سے لوگوں کاکہنا ہے کہ دولت اسلامیہ کے جنگجوؤں کو شہر کے نواح میں کئی قدم پیچھے ہٹنا پڑا ہے۔شام اور عراق کے بڑے علاقے پر دولت اسلامیہ کے تیزی سے قابض ہوجانے نے مغربی ممالک کو ہلا کر رکھ دیا اور انھیں فضائی حملے کی تحریک دی۔

ایمز ٹی وی (نیوز ڈیسک)غیر ملکی خبر رساں ادارے کے مطابق افریقی ممالک کے بعد دنیا کے دیگر ممالک میں پھیلنے والے اس خطرناک وائرس سے رواں سال اب تک 4 ہزار 500 سے زائد افراد لقمہ اجل بن چکے ہیں اور 10 ہزار سے زائد افراد اس سے متاثر ہوئے جن میں بڑی تعداد گیانا، لائبیریا اور سیرا لیون کے شہریوں کی ہے۔عالمی ادارہ صحت کے نمائندے نے نائجیریا کے رالحکومت ابوجا میں پریس کانفرنس کرتے ہوئے بتایا کہ 42 روز کی کوششوں کے بعد اس جان لیوا وائرس کو نائجیریا میں فی الحال شکست دی جاچکی ہے اور اس دوران وائرس سے متاثرہ کوئی نیا کیس سامنے نہیں آیا تاہم جب تک اس وائرس کو باقی متاثرہ ممالک سے پوری طرح ختم نہیں کیا جاتا وائرس کے دوبارہ پھیلنے کے امکانات رہیں گے۔

ایمز ٹی وی (اسلام آباد) وزیر اعظم نواز شریف نے انسداد پولیو کے لیے آرمی چیف جنرل راحیل اور وزرائے اعلیٰ کی خدمات لینے کا فیصلہ کیا ہے، وزیراعظم نواز شریف نے انسداد پولیو کے حوالے سے خود میدان میں آنے کا فیصلہ کیا ہے۔ وزیراعظم 24 اکتوبر کو عالمی پولیو ڈے کے موقع پر اہم اعلانات کریں گے اور وزیر اعظم نے ملک بھر میں انسداد پولیو کے لیے آرمی چیف اور وزرائے اعلیٰ کی خدمات لینے کا فیصلہ کیا ہے، وزیر اعظم اس حوالے سے آرمی چیف اور وزرائے اعلیٰ کو خط لکھیں گے۔ وزیر اعظم نے نیشنل پولیو ٹاسک فورس کا اجلاس 1سال بعد بلانے کے بجائے ہر 3 ماہ بعد بلانے کا فیصلہ بھی کیا گیا ہے ، جبکہ شورش زدہ علاقوں میں پولیو کے خاتمے کےلئے کابینہ کی خصوصی کمیٹی بنانے کا فیصلہ بھی ہو گیا ہے، خصوصی کمیٹی وزیر داخلہ ، وزیر دفاع اور وزیر قومی صحت پر مشتمل ہوگی۔ ذرائع کے مطابق وزیر اعظم نے ایک اور بین الوزارتی اعلیٰ سطحی رابطہ کمیٹی بنانے کا بھی فیصلہ کیا ہے، کمیٹی وزیر قومی صحت کی سربراہی میں پولیو پروگرام کے لیے وسائل کی فراہمی یقینی بنائے گی۔ وزیر اعظم نے موثر پولیو مہم کے لیے احتساب کا عمل شروع کرنے کا بھی فیصلہ کیا ہے ، پولیو مہم کے لیے تھرڈ پارٹی مانیٹرنگ کا نظام بھی متعارف کرایا جائےگا۔

ایمز ٹی وی (کراچی) کراچی میں میڈیا سے بات کرتے ہوئے متحدہ قومی موومنٹ کے پارلیمانی لیڈر رشید گوڈیل کا کہنا تھا کہ خورشید شاہ نے مہاجرقوم کو گالی دی جو اب واپس نہیں ہوسکتی، مہاجر کوئی ننگے بھوکے پاکستان نہیں آئے بلکہ اپنا گھر بار چھوڑ کر آئے تھے جبکہ ہجرت سنت رسول ہے کوئی گالی نہیں اسے گالی کہنے والوں پر توہین رسالت کا قانون لاگو ہونا چاہئے۔ رشید گوڈیل نے کہا کہ بھارت نے بھی آزادی کے بعد بھی نئے صوبے بنائے لیکن وہاں کسی نے نہیں کہا کہ یہ ہماری ماں ہے اسے تقسیم نہیں ہونے دیں گے۔رشید گوڈیل نے کہا کہ نئے صوبوں کے قیام سے اختیارات کی منتقلی نچلی سطح تک ہوگی، صوبے بننے سے وسائل تقسیم ہوتے ہیں کوئی زمین نہیں اور صوبے کسی کے دادا پردادا کی جاگیر نہیں،پنجاب سندھ، خیبرپختونخوا اور بلوچستان کے نام لسانی ہیں یہاں وڈیرے آج بھی روٹی کپڑا مکان کی بات کرتے ہیں لیکن عوام کو بھوک،کفن اور قبرہی ملی جبکہ ہمیں سندھ میں حق حکمرانی ملا تو ہم نے کام کرکے دکھایا۔ ان کا کہنا تھا کہ الطاف حسین نے پارٹی بنائی تو طوفان آگیا، کالے انگریزوں نے پاکستان کو اپنی جاگیر سمجھ لیا ہے یہاں پر کچھ عناصر مہاجروں کے ساتھ زیادتی کررہے ہیں۔

ایمز ٹی وی (فارن ڈیسک) ایم کیو ایم حیدرآباد کے زونل کمیٹی، سیکٹرز کمیٹیوں کے ارکان اور دیگر ذمہ داران سے ٹیلی فونک گفتگو کرتے ہوئےمتحدہ قومی موومنٹ کے قائد الطاف حسین نے کہا ہے کہ میں سندھ کے غریب ہاریوں، کسانوں اور دیگرغریب سندھیوں کو ظالم وڈیرں کے ظلم اور جبر کی زنجیروں سے آزاد کرانا چاہتا ہوں اسی لئے سندھ کے وڈیرے غریب سندھیوں کو سندھ کے نام پر ایم کیوایم کے خلاف بھڑکا رہے ہیں لیکن اب کوئی بھی طاقت مجھے سندھ کے حقوق کی جدوجہد سے نہیں روک سکتی۔انھوں نے کہا کہ ایم کیوایم نے غریبوں کا صرف نعرہ نہیں لگایا بلکہ پاکستان کی تاریخ میں پہلی مرتبہ غریب ومتوسط طبقے سے تعلق رکھنے والے افراد کو منتخب کرکے اسمبلیوں میں بڑے بڑے جاگیرداروں اور وڈیروں کے برابر بٹھایا اور بتایا کہ اگرعزت جاگیرداروں اور وڈیروں کی ہے تو غریب ومتوسط طبقے کی بھی ہے۔متحدہ قومی موومنٹ کے قائد نے کہا کہ ایم کیو ایم کی اس جدوجہد کے نتیجے میں جب سندھ کے غریب ہاری، کسان، نوجوان اور غریب عوام تیزی سے ایم کیوایم کے قریب آنے لگے اور ایم کیوایم کے قافلے میں شامل ہونے لگے تو سندھ کے وڈیروں کو یہ خوف ہوگیا کہ اگر ایم کیو ایم اسی طرح سندھ بھر میں پھیلتی رہی تو سندھ بھر کے تمام غریب ہاری اور نوجوان وڈیروں کی قید سے آزاد ہوجائیں گے اسی لئے سندھ کے وڈیروں نے غریب سندھیوں کو سندھ کے نام پر بھڑکانا شروع کردیا ہے۔

ایمز ٹی وی (کراچی) سندھ اسمبلی اجلاس سے قبل میڈیا سے گفتگو کرتے ہوئےوزیراطلاعات سندھ شرجیل میمن کا کہنا ہے کہ سندھ کی تقسیم کو قبول نہیں کرتے اور اس پر اب نہ بات ہوگی اور نہ ہی کوئی بحث، عوام نے ہمیں کارکردگی کی بنیاد پر دوبارہ ووٹ دیا جبکہ ضیاالحق دور سے لے کر مشرف دور تک صوبے میں کوئی کام نہیں ہوا۔ ملک کو اگر آگے لے جانا ہے تو بات چیت کے سوا کوئی چارہ نہیں ہے۔ وزیراطلاعات سندھ کا کہنا تھا کہ صوبے کو ماضی میں نظرانداز کیا گیا اور یہاں بسنے والے عوام کے حقوق غصب کئے گئے لیکن اب اس طرح نہیں ہوگا جبکہ اتحادی جماعت کی جانب سے بعض تلخ بیانات کا جواب تلخ باتیں کر کے نہیں دے سکتا، شرجیل میمن کا کہنا تھا کہ انہوں نے کہا کہ ملکی مسائل دیرینہ ہیں جنہیں جلد حل ہونا چاہیئے تاہم پارٹی قیادت نے مفاہمتی پالیسی اختیار کرتے ہوئے سخت بیان بازی سے روکا ہے۔

ایمز ٹی وی (اسلام آباد) ترجمان دفتر خارجہ تسنیم اسلم نے ہفتہ وار بریفنگ میں ایران کی جانب سے دہشت گردی کے الزامات کو مسترد کرتے ہوئے کہا ہےکہ دہشت گردوں کے خلاف آپریشن میں پاکستان کا اپنا مفاد ہے اور ہماری مسلح افواج دہشت گردوں کے خلاف برسرپیکار ہیں جبکہ ایران میں دہشت گردی کے لیے پاکستان سے کسی دہشت گرد کے جانے کے کوئی شواہد نہیں ملے اور نہ ہی ایران کی جانب سے اس سلسلے میں کوئی ثبوت فراہم کیے گئے لہٰذا دہشت گردی کی تمام کارروائیاں ایران کے اندر ہی ہوئی ہیں۔ انہوں نے کہا کہ پاکستان اور ایران ہمسائے اور دہشتگردی سے متاثر ہیں ایسے ماحول میں ہمیں ایران کے ساتھ تعاون کی ضرورت ہے۔
لائن آف کنٹرول اور ورکنگ باؤنڈری پر بلااشتعال فائرنگ اور گولہ باری پر ترجمان کا کہنا تھا کہ سرحدی کشیدگی پرعالمی برادری بھی تشویش کا شکار ہے جبکہ بھارت کی اس جارحیت میں اب تک 12 افراد شہید ہوچکے ہیں جب کہ عالمی برادری تشویش سے آگاہ کردیا گیا ہے۔ 
کالعدم تحریک طالبان سے متعلق سوال پر ترجمان دفتر خارجہ نے شاہد اللہ شاہد کی پاکستانی حدود میں ہونے سے لاعلمی کا اعلان کیا ہے۔