دبئی: ٹی ٹوئنٹی ورلڈکپ کے دوسرے سیمی فائنل میں آسٹریلیا اورپاکستان 11 نومبر کومدمقابل ہوں گے۔

آئی سی سی ٹی ٹوئنٹی ورلڈکپ میں پاکستان نے اسکاٹ لینڈ کو 72 رنز سے شکست دے کر ایونٹ میں پانچویں فتح سمیٹی۔ ٹورنامنٹ میں ناقابل شکست رہنے والی قومی ٹیم 11 نومبر (جمعرات) کو آسٹریلیا سے دوسرے سیمی فائنل میں مدمقابل ہوگی۔
پاکستان اور آسٹریلیا کے درمیان گزشتہ 5 ٹی ٹوئنٹی مقابلوں کی بات کی جائے تو دو میچ پاکستان اور دو میچ آسٹریلیا نے اپنے نام کیے ہیں جب کہ ایک میچ بغیر کسی نتیجے کے ختم ہوگیا تھا۔

اس سے قبل نیوزی لینڈ نے افغانستان کو شکست دے کر سیمی فائنل میں رسائی حاصل کی تھی اور بھارت کو ایونٹ سے باہر کردیا تھا۔ نیوزی لینڈ 10 نومبر کو ایونٹ کے پہلے سیمی فائنل میں انگلینڈ سے مدمقابل ہوگی۔

واضح رہے آئی سی سی ٹی ٹوئنٹی ورلڈکپ کا فائنل 14 نومبر بروز اتوار کھیلا جائے گا۔

لاہور: جونیئر ہاکی ورلڈ کپ شیڈول کا اعلان کردیا گیا۔

شیڈول کے تحت پاکستان اپنا پہلا میچ جرمنی کے خلاف 24 نومبر کو کھیلے گا۔

انٹرنیشنل ہاکی فیڈریشن (ایف آئی ایچ) کی جانب سے جونیئر عالمی کپ کے شیڈول کا اعلان کردیا گیا ہے، بھارت کے شہر بھوبنیشور میں 24 نومبر تا 5 دسمبر کے درمیان کھیلے جانے والے اس عالمی ایونٹ میں پاکستان سمیت 16 ٹیمیں شرکت کریں گی۔
16 ٹیموں میں میزبان ملک بھارت، پاکستان، جرمنی،بیلجیئم، ہالینڈ، سپین، ارجنٹائن، ملایشیا، ساوتھ افریقہ، چلی، کینیڈا، فرانس، پولینڈ، کوریا، امریکا اور مصر کی ٹیمیں شامل ہیں۔

ایف آئی ایچ شیڈول کے مطابق ٹیموں کو چار پول میں تقسیم کیا گیا ہے۔ پول اے میں ساوتھ افریقہ،ملایشیا،بیلجیئم،اورچلی شامل ہیں پول بی میں فرانس، انڈیا ، کینیڈااور پولینڈ پول سی میں ہالینڈ، سپین، کوریا اور امریکہ پول ڈی میں جرمنی، ارجنٹائن، پاکستان اور مصر شامل ہیں۔

پول ڈی میں پاکستان جونیئرز ہاکی ٹیم اپنا پہلا میچ جرمنی کے خلاف 24 نومبر کو کھیلے گی جب کہ 27 نومبر کو پاکستان مصر کے مدمقابل اعزاز کے حصول کے لئے نبرد آزما ہوگا۔ قومی ہاکی سکواڈ ارجنٹائن کے خلاف پول راؤنڈ کا اپنا آخری میچ28 نومبر کو کھیلے گا۔

دبئی: ٹی ٹوئنٹی ورلڈکپ کےدوسرےوارم اپ میچ میں بھارت اورآسٹریلیا آمنےسامنےہیں۔

وارم اپ میچ میں آسٹریلیا نے بھارت کو جیت کے لیے 153 رنز کا ہدف دیا ہے۔

دبئی میں ہونے والے آئی سی سی ٹی ٹوئنٹی ورلڈکپ کے وارم اپ میچ میں آسٹریلیا نے ٹاس جیت کر بھارت کےخلاف بیٹنگ کا فیصلہ کیااور مقررہ 20 اوورز میں 5 وکٹ کے نقصان پر 152 رنز بنائے۔

آسٹریلیا کی جانب سے اسٹیون اسمتھ 57، مارکس اسٹونس41 اور گلیون میکسویل 37 رنز بناکر سرفہرست رہے۔

ڈیوڈ وارنر صرف ایک رن بناسکے، مچل مارش کھاتہ کھولے بغیر پویلین واپس لوٹے، کپتان ایرون فنچ بھی صرف 8 رنز ہی بناسکے۔

بھارت کی جانب سے روی چندر ایشون نے 2، بھنیشور کمار ، جڈیجا اور راہول چاہر نے ایک ایک وکٹ حاصل کی۔

ابو ظہبی: ٹی ٹوئنٹی ورلڈکپ میں انگلینڈنےنیوزی لینڈکوجیت کےلیے 164 رنزکاہدف دیاہے۔

ابو ظہبی میں ہونے والے آئی سی سی 20 ٹوئنٹی ورلڈ کپ کے وارم اپ میچ میں نیوزی لینڈ نے انگلینڈ کے خلاف ٹاس جیت کر بولنگ کا فیصلہ کیا۔

ٹم ساؤتھی کی پہلی ہی گیند پر انگلینڈ کے اوپننگ بیٹس مین جیسن روئے کلین بولڈ ہوگئے۔

ڈیوڈ میلان 11 اور آئن مورگن صرف 10 رنز بناکر آؤٹ ہوگئے۔ جوز بٹلر نےانگلینڈ کو سہارا دیا اور 51 گیندوں پر 73 رنز بنا کر نمایاں رہے۔ جونی بیئر اسٹو نے 30 اور سام بلنگز نے 27 رنز بنائے۔ انگلینڈ نے 6 وکٹ کے نقصان پر 163 رنز بنالیے۔

نیوزی لینڈ کے ایش سودھی 3 وکٹیں لینے میں کامیاب ہوئے۔

اسلام آباد: چیف جسٹس نے کہا ہے کہ سندھ حکومت میں ایک وائس چانسلر لگانے کی بھی صلاحیت نہیں ہے۔

سپریم کورٹ میں پیپلز میڈیکل یونیورسٹی نواب شاہ کے وائس چانسلر کی تقرری سے متعلق فیصلے پر عملدرآمد کیس کی سماعت ہوئی۔

سماعت میں چیف جسٹس پاکستان گلزار احمد نے ریمارکس دیے کہ صوبہ سندھ کی بدقسمتی ہے کہ ایک وائس چانسلر بھی نہیں لگایا جا سکا، اصل مسئلہ یہ ہے اپنا بندہ لگانا چاہتے ہیں، سندھ حکومت میں ایک وائس چانسلر لگانے کی بھی صلاحیت نہیں ہے، سپریم کورٹ کے حکم کے بعد کمیٹی نئے رولز نہیں بنا سکتی۔

عدالت نے دو ماہ میں یونیورسٹی کے وائس چانسلر کی تقرری کا حکم دیتے ہوئے کہا کہ عدالتی حکم پر عمل نہ کرنے کی صورت میں سخت کارروائی ہوگی۔

اس موقع پردرخواست گزار ڈاکٹر شمس الدین کے وکیل نے بتایا کہ آج امیدواران کے انٹرویو کئے جا رہے ہیں۔

واضح رہےسپریم کورٹ میں ڈاکٹر شمس الدین نے تقرری کے عمل میں شامل ہونے کیلئے درخواست دائر کر رکھی ہے۔ عدالت نے 14 اکتوبر 2020 کو پیپلز یونیورسٹی کے وائس چانسلر کی تقرری کاحکم دیتے ہوئے اس کام کیلئے پہلے دیے گئے اشتہار کے تحت کارروائی مکمل کرنے کی ہدایت کی تھی۔

کراچی: سندھ بھر کے تعلیمی بورڈز سے میٹرک ای گریڈ میں پاس کرنے والے ہزاروں طلبہ سرکاری کالجوں میں داخلے کیلئے نااہل قرار دے دیئے گئے۔

تفصیلات کے مطابق میٹرک بورڈ کراچی سے جنرل گروپ میں ای گریڈ سے پاس ہونیوالے 4 ہزار سے زائد طلبہ کا مستقبل داؤ پر لگ گیا ہے

محکمہ کالج ایجوکیشن کے ذرائع نے بتایا کہ ای گریڈ میں پاس طلبہ صرف پرائیویٹ کالجوں میں داخلہ لے کر تعلیم کا حصول ممکن بناسکیں گے جو غریب طلبہ پر اضافی بوجھ ہوگا کیونکہ سندھ حکومت نے سرکاری کالجوں کے طلبہ کی رجسٹریشن اور انرولمنٹ کی مد میں رقم کی ادائیگی کی ذمہ داری لے رکھی ہے۔

ذرائع نے بتایا کہ وزیر تعلیم سید سردار علی شاہ اور سیکریٹری کالج ایجوکیشن کے احکامات پر صوبہ سندھ میں نئے سینٹرلائزڈ داخلہ پالیسی کے حوالے سے صوبے بھر میں ٹریننگ سیشنز کا آغاز کر دیا گیا ہے، جس میں واضح کر دیا گیا ہے کہ ای گریڈ میں میٹرک پاس کرنیوالے طلبہ داخلے کے اہل نہیں ہوں گے۔ دوسری جانب والدین اور طلبہ نے محکمہ کالج ایجوکیشن کے اس اقدام کو ظالمانہ اور نا انصافی پر مبنی قرار دیا ہے۔

واضح رہے رواں ہفتے کراچی میں میٹرک سائنس گروپ کے متوقع نتائج میں میں ای گریڈ حاصل کرنے والے طلبہ کی تعداد بھی ہزاروں میں بتائی جا رہی ہے، جس کے بعد صرف کراچی میں تقریباً 10 ہزار سے زائد طلبہ کے سرکاری کالجوں میں داخلے سے محروم رہ جانے کا اندیشہ ہے، جبکہ سندھ کے دیگر اضلاع میں ای گریڈ سے پاس ہونیوالوں کی ممکنہ تعداد بھی ہزاروں میں بتائی جاتی ہے۔

کراچی: علیگڑھ مسلم یونیورسٹی اولڈ بوائز ایسوسی ایشن کے4رکنی وفدنےگورنرہاؤس میں صوبہ سندھ کےگورنرعمران اسماعیل سےملاقات کی ۔

وفد کے اراکین میں ایسوسی ایشن کے صدر جاوید انوار، نائب صدر کموڈور (ر) سلیم صدیقی، جنرل سیکریٹری محمد ارشد خان اور ایگزیکیٹو ممبر فرخ نظامی شامل تھے ۔

ملاقات کا مقصد حکومت اور تعلیمی اداروں کے مابین خلیج کو کم کرکے خوشگوار تعلقات کو فروغ دینا اور تعلیمی سرگرمیوں کو مضبوط بنانا تھا ۔

اس کے علاوہ تمام اسٹیک ہولڈرز کے مابین تعاون اور تفہیم کی فضاء قائم کرکے تعلیمی و تدریسی سرگرمیوں میں اضافہ کرنا بھی شامل تھا ۔

گورنر سندھ نے اپنے تعاون کی یقین دہانی کراتے ہوئے دو طرفہ تعلقات کو بہتر بنانے پر زور دیا ۔ انہوں نے اعلیٰ معیارکی تدریسی خدمات کےحوالےسے سرسید یونیورسٹی کے با اثر اور نمایاں کردار کو سراہا ۔

کراچی: سندھ کابینہ نےٹیچنگ اینڈ نان ٹیچنگ اسٹاف بھرتی کی پالیسی تجویزکی منظوری دیدی ہے۔

تفصیلات کے مطابق وزیراعلیٰ سندھ سید مراد علی شاہ کےزیرِ صدارت سندھ کابینہ کااجلا س ہوا۔

اجلاس میں اساتذہ کی بھرتی کے لئےرواں سال ہونےوالے آئی بی اے سکھر ٹیسٹ کے حوالے سے بریفنگ دی گئی۔

اجلاس میں بریفنگ کے دوران بتایاگیا کہ اساتذہ کی بھرتی کے لئے آئی بی اے سکھر نے ٹیسٹ منعقد کرائے گئے۔

منعقدہ ٹیسٹ میںپی ایس ٹی کی32510 اسامیوں کیلئے 184209 امیدواروں نے ٹیسٹ دیا جس میں 11549 پاس ہوئے جبکہ جے ای ایس ٹی کی کل 14039 اسامیاں ہیںجس کے لئے 164319 امیدواروں نے ٹیسٹ دیا جس میں 1385 پاس ہوئے

تحریری ٹیسٹ میں مجموعی طور پر 55 فیصد کم سے کم مارکس رکھی گئی تھیں۔اس طرح 14662 جے ای ایس ٹی اور 28179 پی ایس ٹی منتخب ہوئے۔

بریفنگ کے دوران کابینہ کوتجویزدی گئی کہ خواتین کےلئےپاسنگ مارکس 55 فیصد سےکم کر کے 50 فیصد،خصوصی افراد کیلئے 55 فیصد مارکس کم کرکے 33 فیصد اور اقلیتیوں کے لئے تجویز ہے کہ 55 فیصد مارکس سے کم کرکے 50 فیصد کی جائے،اگر، خصوصی افراد کیلئے 33 فیصد پاسنگ مارکس ہوتی ہیں تو خصوصی افراد 618 جے ای ایس ٹی اور 911 پی ایس ٹی منتخب ہوجائینگے۔

اسی طرح اگر اس طرح 50 فیصد پر 875 جے ای ایس ٹی اور 1699 پی ایس ٹی منتخب ہوجائینگے

جے ای ایس ٹی 14039 کی اسامیوں کو17000 تک بڑھانے کی تجویز دی گئی ہے بریفنگ میں یہ بھی کہا گیا ہے کہ پی ایس ٹی یونین کاؤنسل کی بنیاد پر اور جے ای ایس ٹی تعلقہ بنیاد پر مقرر کئے جائیں۔

سندھ کابینہ اجلاس میں وزیر اعلیٰ سندھ مراد علی شاہ نےٹیچنگ اینڈ نان ٹیچنگ اسٹاف بھرتی کی پالیسی منظورکرتےہوئے کہا ہےکہ اساتذہ کی تربیت بہترین طریقے سے کی جائے۔

لاہور: پنجاب بھرکےکالجزکےلئےگیارہویں جماعت کیلئےداخلوں کاشیڈول جاری کردیاگیاہے

شیڈول کے مطابق امیدوار 25 اکتوبر سے8دسمبر تک بغیرکسی جرمانےکےداخلے جمع کرواسکتےہیں

گورنمنٹ کالج یونیورسٹی لاہورنے انٹرمیڈیٹ داخلہ پالیسی تبدیل کردی

جبکہ9 سے 23 دسمبر تک جرمانے کے ساتھ داخلے جمع کرائے جاسکیں گے۔

2لاکھ88ہزار617طلبہ کی بڑی تعداد سرکاری کالجز میں داخلوں سے محروم رہے گی۔

جاری کردی شیڈول کا اطلاق تمام تعلیمی بورڈز پر ہوگا۔

لاہور: گورنمنٹ کالج یونیورسٹی لاہور نےانٹرمیڈیٹ داخلہ پالیسی تبدیل کرنے کا فیصلہ کر لیا۔

وائس چانسلر پروفیسر ڈاکٹر اصغر زیدی کاکہناہے رواں سال داخلے صرف میٹرک کے نتائج کی بنیاد پر نہیں ہونگے بلکہ انٹرمیڈیٹ پروگرامز میں داخلوں کیلئے ٹیسٹ لیا جائے گا۔

وائس چانسلر نے کہا میرٹ داخلہ ٹیسٹ اور انٹرویوز کی بنیاد پر مرتب کیا جائے گا، داخلہ ٹیسٹ اور انٹرویوز جی سی یونیورسٹی خود تیار کرے گی،یہ پہلی مرتبہ ہے کہ جی سی یو انٹرمیڈیٹ میں داخلے میٹرک نتائج کے بجائے ٹیسٹ کی بنیاد پر کرے گی ،داخلہ ٹیسٹ جی سی یونیورسٹی میں 23 اور 24 اکتوبر کو لیا جائے گا۔انٹرویوز 27 اور 28 اکتوبر کو ہونگے ۔