بانی پی ٹی آئی سردیوں کے بعد گرمیاں جیل میں گزاریں گے، منظور وسان

پیپلزپارٹی کے رہنما منظور وسان کا کہنا ہے کہ بانی پی ٹی آئی سردیوں کے بعد گرمیاں جیل میں گزاریں گے۔

پیپلزپارٹی کے رہنما منظور وسان کا کہنا ہے کہ پیپلزپارٹی جمہوریت پسند پارٹی ہے عوام کے ساتھ ہیں اور رہیں گے۔

انہوں نے کہا کہ 26ویں آئینی ترمیم سے عدلیہ اور عوام سمیت کسی کا نقصان نہیں۔

منظور وسان نے کہا کہ پنجاب کے علاقوں میں دریائے سندھ سے چھ نئی نہریں نکالنے کے مخالف ہیں۔

واضح رہے کہ یکم اکتوبر کو منظور وسان نے پیشگوئی کرتے ہوئے کہا تھا کہ مجھے محسوس ہورہا ہے بانی پی ٹی آئی کچھ عرصہ مزید جیل میں رہیں گے، بانی پی ٹی آئی اسلام آباد اور مری کی ٹھنڈی ہواؤں میں پھنس چکے ہیں۔

ان کا کہنا تھا کہ بانی پی ٹی آئی احتجاج کروا کر اپنے لئے ریلیف لینا چاہتے ہیں، مگر ریلیف دینے والے بھی بڑے پکے ہیں وہ پریشر میں نہیں آئیں گے، وزیراعلی کے پی نے بھڑکیں مارکر بانی پی ٹی آئی اور پارٹی کو نقصان پہنچایا ہے۔

منظور وسان نے پیشگوئی کی تھی کہ حکومتی سسٹم چلے گا، مگر چہرے تبدیل ہونگے، شہباز شریف سمجھدار آدمی ہیں موجودہ حالات میں اگر کچھ کمال دکھاگئےتو بچ جائیں گے۔

کراچی ڈویژن ریلوے میں عملے کی مبینہ غفلت اور لاپرواہی کے باعث ٹرینوں کی روانگی کا نظام درہم برہم ہوگیا۔

تفصیلات کے مطابق ریلوے ٹرین آپریشن بری طرح متاثر ہونے کے باعث ٹرینوں کی آمدورفت میں تاخیر معمول بن گئی ہے، محکمہ کا سارا نظام چوپٹ ہوگیا۔

قراقرم ایکسپریس کی تاخیر کی وجہ سے اندرون ملک جانے والی گاڑیاں تاخیر کا شکار ہوگئیں، پشاور جانے والی خیبرمیل کی روانگی میں2گھنٹے 30منٹ تاخیر سامنے آئی ہے۔

اسلام آباد جانے والی پریمیم ٹرین گرین لائن بھی ڈیڑھ گھنٹے تاخیرکے بعد روانہ ہوئی جبکہ سکھر ایکسپریسکو بھی ڈیڑھ گھنٹے تاخیر سے روانہ کیا گیا۔

ریلوے ذرائع کے مطابق پشاور جانے والی خیبر میل 2گھنٹے تاخیر اور اسلام آباد جانے والی پریمیم ٹرین گرین لائن میں 2گھنٹے تاخیر ہوئی ہے۔

ٹرینوں کی کئی کئی گھنٹے تاخیر کے باعث مسافروں کو شدید مشکلات کا سامنا کرنا پڑرہا ہے، ٹرینیں گھنٹوں تاخیر اور منسوخ ہونے کی وجہ سے مسافروں اور محکمہ کو مالی نقصان کا سامنا ہے۔

اس کے علاوہ پاک بزنس اور کراچی ایکسپریس بھی 2سے3 گھنٹے تاخیر سےروانہ ہوئی، گرین لائن پریمیم ٹرین کو روک کر سرسید ایکسپریس کو روانہ کردیا گیا، مسافر ٹرینوں کی روانگی میں تاخیر پر شدید احتجاج کررہے ہیں۔

واضح رہے کہ ٹرین کا سفر دنیا بھر میں آمدو رفت کا سستا اور محفوظ ترین ذریعہ ہے، ایک رپورٹ کے مطابق انڈیا میں لگ بھگ ڈھائی کروڑ شہری یومیہ بنیادوں پر ریل گاڑیوں میں سفر کرتے ہیں۔

اس کے علاوہ جاپان کا شمار بھی ایسے ممالک میں ہوتا ہے جہاں دو کروڑ افراد فسر کرتے ہیں حالانکہ وہاں کی آبادی کا تناسب پاکستان بہت کم ہے، اس کے برعکس پاکستان میں روزانہ صرف ایک لاکھ 78ہزار افراد ہی ٹرین پر سفر کرتے ہیں۔

واشنگٹن : وزیر خزانہ محمد اورنگ زیب نے کہا ہے کہ آئندہ مقامی اور عالمی مارکیٹ سے اپنی شرائط پر قرضے لیں گے۔

یہ بات انہوں نے واشنگٹن میں پاکستانی سفارت خانے میں پریس کانفرنس سے خطاب کرتے ہوئے کہی، انہوں نے کہا کہ عالمی اداروں کو ترقی پذیر ممالک کیلئے کلائمیٹ فنانسنگ میں رعایت دینی ہوگی۔

ان کا کہنا تھا کہ بے نظیر انکم سپورٹ پروگرام میں وقت کے ساتھ جدت لائی جارہی ہے، بے نظیر انکم سپورٹ پروگرام وقت کی ضرورت تھا اور اب بھی ہے۔

عالمی مالیاتی ادارے کے حوالے سے سوال کے جواب میں انہوں نے بتایا کہ امریکا میں ورلڈ بینک اور آئی ایم ایف نمائندوں سے ملاقاتیں کیں آئی ایم ایف کے ساتھ بہت تعمیری بات چیت ہوئی ہے۔

ان کا کہنا تھا کہ ملاقاتوں میں پاکستان میں مہنگائی میں کمی اور بنیادی شرح سود میں کمی کو سراہا گیا، تمام اداروں نے پاکستان کو مکمل تعاون کی یقین دہانی کرائی ہے۔

وزیر خزانہ نے کہا کہ امریکا میں سعودی وزیر خزانہ سمیت دیگر ممالک سے بات چیت مثبت رہی، اس سال غیر ملکی پاکستانیوں کی طر ف سے ترسیلات زر چونتیس ارب ڈالر تک پہنچ جائیں گے۔

وزیرخزانہ محمد اورنگزیب نے کہا کہ امریکا میں بزنس کمیونٹی پاکستان میں سرمایہ کاری کرنا چاہتی ہے، تمام ریٹنگ ایجنسیاں بھی کہہ رہی ہیں کہ پاکستان درست معاشی سمت پر گامزن ہے۔

ان کا کہنا تھا کہ معیشت کی بہتری کیلئے ہمیں مشکل فیصلے کرنا ہوں گے، کوشش ہوگی کہ آئی ایم ایف کا آخری پروگرام ہو، ورلڈ بینک پاکستان کو قرض نہیں ،گرانٹ دے گا،

وزیرخزانہ نے کہا کہ نان فائلرز کو گاڑی اور جائیداد خریدنے پر پابندی کیلئے قانون سازی کی ضرورت ہے، معیشت کے ڈی این اے کو تبدیل کرنا ہوگا جس میں درآمدات پر انحصار کم ہو۔

انہوں نے بتایا کہ پی آئی اے اور اسلام آباد ایئرپورٹ سب سے پہلے نجی شعبے کے حوالے کررہے ہیں، آئی ٹی اور زراعت میں 90 فیصد سے زیادہ تعلق صرف پاکستان سے ہے۔

آئی ٹی اور زراعت کا آئی ایم ایف پروگرام کے ساتھ کوئی تعلق نہیں، پاکستان کے زرمبادلہ کے ذخائر11 ارب ڈالر سے اوپر جا چکے ہیں۔

خیبر پختونخوا کی حکومت نے انقلابی قدم اٹھا لیا ہے اور صوبے کے عوام کی زندگی کو مالی تحفظ دینے کی تیاریاں کر لی ہیں۔

خیبر پختونخوا حکومت کے مشیر بیرسٹر سیف نے کہا ہے کہ صوبائی حکومت نے یونیورسل ہیلتھ کوریج کے بعد عوم کو لائف انشورنس فراہم کرنے کا منصوبہ منظور کیا ہے اور اس فلاحی اسکیم کا مقصد غریب اور کمزور طبقے کو مالی تحفظ فراہم کرنا ہے۔

بیرسٹر سیف نے کہا کہ صوبے کی 49 فیصد آبادی خط غربت سے نیچے زندگی گزار رہی ہے۔ جب بھی کسی گھر میں موت ہوتی ہے تو ایک فرد کی موت پورے خاندان کو مالی بحران میں مبتلا کر دیتی ہے۔ جانی نقصان کی تلافی نا ممکن مگر حکومت نے متاثرہ خاندانوں کی معاونت کے لیے بڑا فیصلہ کیا ہے۔

انہوں نے بتایا کہ 60 سال سے زائد عمر کے افراد کی فوتگی پر خاندان کو 5 لاکھ کی مالی امداد دی جائے گی جب کہ 60 سال سے کم عمر افراد کی موت پر ورثا کی 10 لاکھ تک مالی معاونت کی جائے گی۔

بیرسٹر سیف نے کہا کہ یہ منصوبہ کے پی میں فلاحی ریاست کے قیام کی جانب ایک اور اہم سنگ میل ثابت ہوگا۔ انہوں نے بتایا کہ حکومت صوبائی سطح پر انشورنس کمپنی کے قیام کی تجویز پر بھی غور کر رہی ہے۔

اسلام آباد: وزیر اعظم شہباز شریف نے اسٹاک مارکیٹ میں پوائنٹس کی تاریخی سطح عبور کرنے پر قوم کے نام اہم پیغام جاری کر دیا۔

وزیر اعظم نے اسٹاک مارکیٹ میں 90 ہزار پوائنٹس کی تاریخی سطح عبور کرنے پر قوم کو مبارکباد دیتے ہوئے کہا کہ اسٹاک مارکیٹ میں بتدریج اضافہ سرمایہ کاروں کے اعتماد کی عکاسی ہے۔

شہباز شریف نے کہا کہ 14 سال بعد اسٹاک مارکیٹ میں ایسا اضافہ معاشی ٹیم کی انتھک محنت کا نتیجہ ہے، بجلی صارفین کے ریلیف کیلیے آئی پی پیز سے معاہدوں پر نظر ثانی شروع ہو چکی ہے جبکہ آئی ایم ایف سے 7 ارب ڈالر کی لانگ ٹرم فسیلٹی معیشت میں بہتری لے کر آئے گی۔

انہوں نے کہا کہ پاکستان کو ڈیفالٹ کے دہانے پر پہنچانے والوں کے خواب چکنا چور ہوگئے، عوام سے عہد کیا تھا ملک کو مجرمانہ غفلت کی بھینٹ نہیں چڑھنے دوں گا، ہم نے سیاست کی قربانی دے کر ریاست بچائی۔

ان کا کہنا تھا کہ آج اللہ کے فضل و کرم سے پاکستان میں ہر محاذ پر بہتری آئی ہے، پر امید ہوں آئندہ چند روز میں معاشی بہتری میں مزید خوشخبریاں ملیں گی۔

پاکستان اسٹاک مارکیٹ میں کاروباری ہفتے کے آخری دن زبردست تیزی دیکھی گئی۔ ہنڈریڈ انڈیکس 90 ہزار کی تاریخی سطح عبور کر گیا۔

کریکشن کے بعد انڈیکس ایک ہزار سینتالیس پوائنٹس اضافہ کے ساتھ نواسی ہزار نو سوتیرانوے پوائنٹس پر بند ہوا۔ دوران کاروبار ہندریڈ انڈیکس میں سولہ سو اڑتالیس پوائنٹس تک کا زبردست اضافہ دیکھا گیا۔

ماہرین کا کہنا ہے کہ حکومتی معاشی پالیسیوں کی وجہ سے سرمایہ کاروں کو اعتماد ملا ہے، متوقع شرح سود میں کمی سے انسٹیٹیوشن خریداری میں اضافہ ہوا ہے جس سے مارکیٹ میں تیزی دیکھی جا رہی ہے۔

اسلام آباد : وزیراعلیٰ خیبرپختونخوا علی امین گنڈا پور چیف جسٹس یحییٰ آفریدی کی تقریب حلف برداری میں شریک ہوں گے۔

تفصیلات کے مطابق پاکستان تحریک انصاف ( پی ٹی آئی ) کے سیکریٹری اطلاعات شیخ وقاص اکرم نے سماجی رابطے کی ویب سائٹ ایکس پر اپنے بیان میں لکھا ‘ علی امین صوبے کے سربراہ کی حیثیت سے تقریب حلف برداری میں شرکت کریں گے۔

شیخ وقاص اکرم کا کہنا تھا کہ پی ٹی آئی چھبیس ویں ترمیم اورچیف جسٹس کی تعیناتی کے طریقہ کارکوغیرآئینی مانتی ہے، تاہم جب تک سپریم کورٹ ان ترامیم پرفیصلہ نہ دےتب تک یہ’لاآف دی لینڈ‘۔

خیال رہے نامزد چیف جسٹس یحییٰ آفریدی کی تقریب حلف برداری آج گیارہ بجے ایوان صدر میں ہوگی۔

صدر آصف زرداری نامزد چیف جسٹس سے حلف لیں گے، تقریب میں وزیراعظم اور سروسزچیفس شریک ہوں گے۔

ایوان صدر میں حلف برداری کے دعوت نامے جاری کردیے گئے ہیں، ارکان پارلیمنٹ کو بھی دعوت نامے جاری کیے گئے ہیں۔

واضح رہے خصوصی پارلیمانی کمیٹی نے جسٹس یحییٰ کے نام کی منظوری دی تھی ، وفاقی وزیر قانون اعظم نذیرتارڑ نے بتایا تھا کہ پارلیمانی کمیٹی نے جسٹس یحییٰ کو دو تہائی اکثریت سے نامزد کیا۔

بعد ازاں صدر مملکت آصف علی زرداری نے سپریم کورٹ کے جج جسٹس یحییٰ کی بطور چیف جسٹس آف پاکستان تعیناتی کی منظوری دی۔

جسٹس یحییٰ کی تعیناتی 26 اکتوبر سے 3 سال کیلئے کی گئی اور تعیناتی کی منظوری آئین کے آرٹیکل 175 اے (3)، 177 اور 179 کے تحت دی۔

لاہور : اسکولوں کے اوقات کار میں تبدیلی کردی گئی، 28 اکتوبر سے اسکول صبح کتنے بجے کُھلیں گے؟

تفصیلات کے مطابق لاہورمیں ایئرکوالٹی انڈیکس 150ہونے کے باعث اسکولوں کے اوقات میں تبدیلی کردی گئی۔

محکمہ تحفظ ماحول پنجاب نے فضائی آلودگی میں اضافے کے پیش نظر اقدامات کی ہدایات جاری کردی ہے، جس میں کہا ہے کہ لاہور میں 28 اکتوبرسے 31 جنوری تک اسکول صبح 8:45 سے پہلے شروع نہ کیے جائیں۔

اسمبلی کلاس رومز میں کروائی جائے اور آؤٹ ڈورسرگرمیاں معطل کرنے کی ہدایت کی گئی ہے۔

محکمہ تحفظ ماحول پنجاب نے کہا ہے کہ عوام اسموگ سے بچنے کے لیےلازمی طورپر ماسک اوردیگر حفاظتی تدابیر اختیار کریں، گھروں کی کھڑکیاں دروازے بند رکھیں اور زیادہ دیر کھلی جگہوں پر نہ رہیں۔

31جنوری 2025 تک کے لیے لاہورمیں ہر قسم کی آتشبازی پر پابندی عائد کردی گئی ہے، مریم اورنگزیب کا کہنا ہے کہ حفاظتی اقدامات شہریوں کواسموگ کےمنفی اثرات سے بچانےکیلئےہیں

راولپنڈی میں کھیلے جانے والے تیسرے اور فیصلہ کن ٹیسٹ میچ میں انگلینڈ نے ٹاس جیت کر پہلے بیٹنگ کا فیصلہ کیا۔

راولپنڈی ٹیسٹ میں انگلینڈ کی پہلی وکٹ 56 رن پر گری، زیک کرالی 29 رنز بنا کر نعمان علی کی گیند پر صائم ایوب کے ہاتھوں کیچ آئوٹ ہوئے۔

مجموعی اسکور جب 70 ہوا تو ساجد خان نے اولی پوپ کو تین رنز پر ایل بی ڈبلیو آئوٹ کر دیا۔ تیسری وکٹ جوروٹ کی گری انہوں نے 5 رنز بنائے وہ ساجد خان کے ہاتھوں ایل بی ڈبلیو آئوٹ ہوئے۔

انگلش ٹیم کا اسکور جب 98 پر پہنچا تو بین ڈکٹ 52 رنز بنا کر نعمان علی کی گیند پر ایل بی ڈبلیو آئوٹ ہو گئے، 98 ہی کے اسکور پر پانچویں وکٹ گری، ہیری بروک 5 رنز بناکر ساجد خان کا شکار بنے۔
کھانے کے وقفے تک انگلینڈ نے پانچ وکٹوں کے نقصان پر 110 رنز بنائے۔ کھانے کے وقفے کے بعد انگلینڈ کا اسکور جب 118 ہوا تو بین اسٹوکس 12 رنز بنا کر ساجد خان کی گیند پر آغا سلمان کے ہاتھوں کیچ آئوٹ ہو گئے۔

225 کے مجموعی اسکور پر انگلینڈ کی 7 ویں وکٹ گری،

انگلش ٹیم نے 7 وکٹوں پر اب تک 225 رنز بنا لیے ہیں۔ ساجد خان نے 4 اور نعمان علی نے 3 کھلاڑیوں کو آئوٹ کیا۔

پاکستان کی ٹیم میں کوئی تبدیلی نہیں کی گئی ہے، ٹاس کے موقع پر قومی ٹیم کے کپتان شان مسعود نے کہا کہ ٹاس جیت کر ہم بیٹنگ ہی کرتے۔

مسعود نے کہا کہ ٹاس کبھی پلان کے مطاق ہوجاتا ہے کبھی نہیں، ہمیں اچھی کرکٹ کھیلنی ہے، انہوں نے کہا کہ ہماری تیاری ہے اور اس کے مطابق کھیلیں گے، ا نگلینڈ کے خلاف کھیلنا اچھا تجربہ ہے۔

انگلینڈ ٹیم کے کپتان نے کہا کہ ایک اچھی وکٹ لگ رہی ہے،اچھی کارکردگی کامظاہرہ کریں گے،واضح رہے کہ پہلا ٹیسٹ انگلینڈ نے جیتا تھا اور دوسرا ٹیسٹ پاکستان نے جیتا تھا۔

اسلام اباد : چیئرمین پیپلزپارٹی بلاول بھٹو زرداری دعویٰ کیا ہے کہ مجھے نہیں معلوم تھا کہ جسٹس منصور علی شاہ چیف جسٹس نہیں بنیں گے۔

تفصیلات کے مطابق چیئرمین پیپلز پارٹی بلاول بھٹو زرداری نے بی بی سی کو انٹرویو میں جسٹس منصور علی شاہ کے حوالے سے کہا کہ مجھے نہیں معلوم تھا کہ چیف جسٹس منصور علی شاہ نہیں بنیں گے ، 26ویں آئینی ترمیم جیسا اتنا بڑا کام کسی اور چیف جسٹس کی موجودگی میں ممکن نہیں تھا۔

پیپلز پارٹی چیئرمین کا کہنا تھا کہ سال 2008 میں ہم آئے تھے کیا اسوقت نہیں کہا کہ دھاندلی ہوئی ہے ، 2008 میں بھی دوتہائی اکثریت چھینی گئی پھر بھی ہم نے آئین سازی کی، ضیا الحق نے آئین سازی کی کیا اس کو عدالت نے اختیاردیا تھا یا نہیں۔

انھوں نے کہا کہ پی ٹی آئی والے کہتے ہیں فارم 47 اور ہم کہتے تھے یہ سلیکٹڈ تھے، میں نا فارم 47والا ہوں اور نا سلیکٹڈ والا ہوں، آئین سازی سےمتعلق پیپلزپارٹی پر فوج کی ایما پرلگنےوالا الزام جھوٹا ہے۔

بلاول کا کہنا تھا کہ چارٹر آف ڈیموکریسی کےنکات پر عملدرآمد اسٹیبلشمنٹ نہیں والدہ کے کہنے پر کئے، میرےوالد کی زبان کاٹی گئی ، ساڑھے 11سال جیل میں رکھا گیا ، کیا ہم نے حکومت میں آکر ان کے ساتھ ایسا کچھ کیا۔

عمران خان کے حوالے سے انھوں نے کہا کہ بانی پی ٹی آئی آج وہ بھگت رہا ہے جو اس نے خود کیا ہے ، افسوسناک ہے پاکستان کی سیاست اس رخ پر چل رہی جو بانی پی ٹی آئی چاہ رہا تھا۔

ملک میں پولیو وائرس کا ایک اور کیس سامنے آ گیا۔ نیشنل ریفرنس لیب نے خیبرپختونخوا سے پولیو کیس کی تصدیق کر دی۔ رواں سال کے پولیو وائرس کیسز کی تعداد 40 ہو گئی۔

ذرائع کے مطابق پولیو وائرس کا کیس کوہاٹ سے رپورٹ ہوا ہے متاثرہ بچے میں وائلڈ پولیو وائرس ٹائپ ون کی تصدیق ہوئی ہے۔ پولیو سے متاثرہ بچے کی عمر ڈھائی سال ہے۔ پولیو کیس کوہاٹ کی تحصیل درہ آدم خیل سے سامنے آیا ہے اور کیس کی جینیاتی تشخیص کا عمل جاری ہے۔

رواں سال کوہاٹ سے پولیو وائرس کا دوسرا کیس رپورٹ ہوا ہے۔کوہاٹ سے پہلا پولیو وائرس کیس گذشتہ ماہ سامنے آیا تھا۔

رواں سال کوہاٹ سے چار پولیو پازیٹیو سیوریج سیمپلز رپورٹ ہوئے ہیں۔ رواں سال بلوچستان سے 20 پولیو کیس رپورٹ ہو چکے ہیں جب کہ رواں سال سندھ 12، کے پی سے 6 پولیو کیسز رپورٹ ہوئے ہیں، رواں سال پنجاب ایک، اسلام آباد سے ایک پولیو کیس رپورٹ ہوا ہے