کراچی: ماہرہ خان کے بعدمارننگ شو کی میزبان اور اداکارہ صنم جنگ بھی کورونا وائرس کا شکار ہوگئیں۔
خوبرو اداکارہ نے اپنے کوویڈ ٹیسٹ میں مبتلا ہونےکی خبر فوٹوشیئرنگ ایپ انسٹاگرام کی پر دی۔
اپنی انسٹاگرام اسٹوری پرصنم جنگ نے کہا کہ" میں اپنے چاہنے والوں کو بتانا چاہتی ہوں کہ میرا کورونا وائرس کا ٹیسٹ مثبت آیا ہے لیکن اللہ کا شکر ہے کہ کورونا کی کوئی سنگین علامات ظاہر نہیں ہوئیں، اس کے باوجود میں نے خود کو بیٹی کے ہمراہ قرنطینہ کرلیا ہے۔
انہوں نے لوگوں سے اپیل کی کہ وہ کورونا وائرس کو سنجیدگی سے لیں، یہ بیماری کوئی افسانہ نہیں بلکہ حقیقت ہے لہذا اس سے بچنے کے لیے تمام احتیاطی تدابیر پر عمل کریں، ماسک پہنیں اور عوامی مقامات میں جانے سے گریز کرتے ہوئے گھروں میں محفوظ رہیں۔
صنم جنگ نے آخر میں اپنے مداحوں سے درخواست کی کہ وہ مجھے اور میری بیٹی کو دعاؤں میں یاد رکھیں۔
کراچی: نوجوانوں کے ہردلعزیزاردو ادب کے مشہورومعروف شاعر جون ایلیا کا 89واں یوم پیدائش آج منایا جارہا ہے۔
جون ایلیا 14 دسمبر 1931 کو بھارتی ریاست اتر پردیش کے علاقے امروہہ میں پیدا ہوئے۔انکا اصل نام سید جون اصغر تھا
ان کے والد علامہ شفیق حسن ایلیا اردو، عربی، فارسی، اور عبرانی زبان کے عالم تھے جبکہ اردو کےمعروف شاعر رئیس امروہوی اورنامور دانشور سید محمد تقی ان کے بڑے بھائی تھے۔
جون ایلیا خود کوبھی اردو، عبرانی، عربی او رفارسی زبانوں پردسترس حاصل تھی۔انھیں فلسفہ تاریخ ،منطق اور یورپی ادب پر وسیع عبور حاصل تھا۔
جون ایلیا کے شعری مجموعے گویا، شاید،گمان، یعنی اورلیکن کے نام سے شائع ہوئے جس کے بعد،حکومت پاکستان نے ان کی خدمات کے اعتراف کے طور پر 2000 میں انہیں صدارتی تمغہ برائے حسن کارکردگی عطا کیا
جون ایلیا نے 8 نومبر 2002 کو کراچی میں وفات پائی اور سخی حسن کے قبرستان میں آسودۂ خاک ہوئے۔
جون ایلیا کی شاعری خصوصاً محبوبہ کو مخاطب کر کے کی جانے والی شاعری نوجوانوں کو متوجہ کرتی ہے۔ سوشل میڈیا پر جون ایلیا کے چاہنے والوں کی تعداد لاکھوں میں ہے۔
کراچی: جامعہ کراچی میں گزشتہ روزایس او پیز کومدِنظررکھتے ہوئے تعلیمی سیشن 2021 ء کے بیچلرز پروگرام کے لئے داخلہ ٹیسٹ مختلف شعبہ جات میں قائم امتحانی مراکز میں انعقاد کیا گیا۔
بیچلرز پروگرام کے20 شعبہ جات میں داخلوں کے لئے9660فارم جمع کرائے گئے، جبکہ9114 امیدواروں نے داخلہ ٹیسٹ میں شرکت کی۔
داخلہ ٹیسٹ کے دوران وائس چانسلر جامعہ کراچی پروفیسر ڈاکٹر خالد محمود عراقی نے رجسٹرارجامعہ کراچی پروفیسر ڈاکٹر عبدالوحید،رئیسہ کلیہ فنون وسماجی علوم پروفیسر ڈاکٹر نسرین اسلم شاہ،انچارج ڈائریکٹوریٹ آف ایڈمیشنزجامعہ کراچی ڈاکٹر صائمہ اختر،پروفیسر ڈاکٹر انیلاامبر ملک،پروفیسر ڈاکٹر ثمینہ سعید،رئیسہ کلیہ علوم پروفیسر ڈاکٹر ناصر ہ خاتون،ڈاکٹر معیزخان اورڈاکٹر سید عاصم علی کے ہمراہ مختلف امتحانی مراکز کا دورہ کیا ۔
داخلہ ٹیسٹ کے لئے جامعہ کراچی کے مختلف شعبہ جات میں 30 امتحانی مراکز قائم کئے گئے تھے۔
اس موقع پرپروفیسر ڈاکٹر نصرت ادریس، ناظم مالیات جامعہ کراچی طارق کلیم،ممبرسنڈیکیٹ جامعہ کراچی صاحبزادہ معظم قریشی، انچارج ٹرانسپورٹ یونٹ جامعہ کراچی ڈاکٹرقدیرمحمدعلی،ناظم امتحانات ڈاکٹر سید ظفر حسین اور سینئر میڈیکل آفیسر جامعہ کراچی ڈاکٹر سیدعابد حسن بھی موجود تھے۔
ڈاکٹر صائمہ اختر نے شیخ الجامعہ کو بتایا کہ داخلہ ٹیسٹ میں شرکت کرنے والے تمام امیدواروں کا تھرمل گن سے ٹمپریچر چیک کرنے کے بعد کمرہ امتحان میں بیٹھنے کی اجازت دی گئی۔شیخ الجامعہ نے داخلہ ٹیسٹ کے کامیاب انعقاد پر تمام اساتذہ،انتظامی عملے اور سیکیورٹی گارڈز کی کاوشوں کو سراہا
۔واضح رہے کہ داخلہ ٹیسٹ کے نتائج جامعہ کراچی کی ویب سائٹ پر14 دسمبر2020 ء کو شام 7:00 بجے اَپ لوڈ کردیئے جائیں گے جبکہ طلبہ داخلہ ٹیسٹ کے نتائج اپنے پورٹل پر بھی دیکھ سکیں گے۔
لاہور: کورونا کے باعث سرکاری اسکولوں میں امتحان لینے کا طریقہ کار جاری کر دیا گیا ہے۔ پروموشن کیلئے پچاس فیصد نمبر ہوم ورک اور پچاس فیصد ایم سی کیوز ٹیسٹ کے شامل کیے جائیں گے۔
میڈیارپورٹس کے مطابق محکمہ اسکول ایجوکیشن نےسرکاری سکولوں میں طلبہ کے ٹیسٹ اور پاس کرنے کی نئی پالیسی تیار کرلی ہے۔
نئی پالیسی کے مطابق پنجاب ایگزامنیشن کمیشن (پیک )سوالات کا آ ئٹم بینک تیار کرے گا۔
پیک، تیسری سے آٹھویں جماعت کے امتحان کیلئے ایم سی کیو زپیپر فراہم کرے گا۔ اول اور دوئم کلاس کے بچوں سے زبانی سوالات پوچھے جائیں گے۔سوالات کے درست جواب دینے پر بچوں کو اگلی جماعت میں پروموٹ کردیا جائے گا۔
تمام کلاسز کو 100 ایم سی کیو زسوالات دیئے جائیں گے۔ایم سی کیوز کے ہر سوال کے 2 نمبر ہونگے۔امتحانات لینے کے حوالے سے اساتذہ کو فروری ،مارچ میں تربیت دی جائے گی۔
سوالیہ پیپر بذریعہ ای میل اسکولوں کو بھجوائے جائیں گے۔ نتائج کے حوالے سے بچوں کو رپورٹ کارڈ بھی جاری کیا جائے گا۔
کراچی: شیخ الجامعہ سندھ پروفیسر ڈاکٹر فتح محمد برفت کی زیر صدارت ڈینز و ایڈمیشن ٹیکنیکل کمیٹی کا آن لائن اجلاس منعقد ہوا۔
اجلاس میں کہا گیا کہ عالمی وبا کورونا وائرس کی وجہ سے یونیورسٹی میں ہونے والے تعلیمی نقصانات کا ازالہ کیا جائیگا، جس کیلئے ایک جامعہ حکمت عملی مرتب کی گئی ہےجس کے تحت سیکنڈ سیمسٹر کے تمام بیچز کی آن لائن کلاسز 22 جنوری 2021ء تک چلانے اور موسم سرما کی چھٹیاں معطل کرنے سمیت اہم فیصلے کیے گئےہیں۔
سیکنڈ سیمسٹر کے امتحانات بھی آن لائن لیے جائیں گے، جو 25 جنوری 2021ء سے 12 فروری 2021ء تک جاری رہیں گے۔ اجلاس میں یہ فیصلہ بھی کیا گیا کہ تعلیمی سال 2021ء کے تحت نئے تعلیمی سال کی کلاسیں 15 فروری 2021ء سےشروع کی جائیں گی۔
شیخ الجامعہ سندھ ڈاکٹر ُا کی زیر صدارت ہونے والے آن لائن اجلاس میں رجسٹرار ڈاکٹر امیر علی ابڑو کے علاوہ مختلف شعبوں کے ڈینز اور ایڈمیشن ٹیکنیکل کمیٹی کے اراکین نے شرکت کی۔
اجلاس میں بیچلر و ماسٹر ڈگری پروگرامز میں داخلے کیلئے داخلہ کی تاریخ میں مزید ایک ہفتے کی توسیع کرنے کی بھی منظور دی گئی جس کے تحت داخلے کے خواہشمند اب 18 دسمبر 2020ء تک آن لائن فارم جمع کرا سکیں گے۔
اجلاس میں بات چیت کرتے ہوئے شیخ الجامعہ سندھ ڈاکٹر برفت نے کہا کہ جامعہ سندھ میں زیر تعلیم طلباء کا مستقبل انہیں عزیز ہے، اس لیے کوشش کرکے ان کا قیمتی وقت بچایا جائیگا اور انہیں بروقت ڈگریاں تفویض کی جائیں گی۔ انہوں نے اس عزم کا اعادہ بھی کیا کہ کورونا کی وجہ سے غیر معمولی حالات کے باوجود یونیورسٹی کو تعلیمی کیلنڈر پر لایا جائیگا۔
کراچی: سندھ مدرستہ الاسلام یونیورسٹی اور امریکی قونصلیٹ کراچی کے درمیان تعلیم اور تحقیق کے میدان میں باہمی تعاون کرنے پر اتفاق کیا گیا۔
گذشتہ دنوں دونوں حکام کے درمیان آن لائن میٹنگ منعقد کی گئی جس میں ایس ایم آئی یو کے وفد کی قیادت وائس چانسلر پروفیسر ڈاکٹر مجیب الدین صحرائی میمن کررہے تھے۔
جبکہ امریکی حکام کی جانب سے پبلک افیئرز افیسر ایمی کرسچینز، کلچرل افیئرز افیسر جان ریٹیگن اور ڈپٹی کلچرل افیسر کیمرون تھامس شاہ نے اجلاس میں شرکت کی۔
اجلاس میں دونوں طرف سے مختلف معاملات پر اکیڈمک ریسرچ اور ایکسچینج پروگرام اور امریکی جامعات اور ایس ایم آئی یو کے درمیان تعلقات کو مزید بنانے پر اتفاق کیاگیا۔
امریکی قونصل خانے کے حکام نے اس بات کا یقین دلایا کہ سندھ مدرستہ الاسلام یونیورسٹی کے اساتذہ اور طالبعلموں کے فائدے کیلئے ہر ممکن تعاون کیا جائے گا۔انہوں نے امریکا میں کئی اسکالرشپس پروگرامز کے بارے میں آگاہ بھی کیا۔ انہوں نے ایس ایم ائی یو کے طالبعلموں کی حوصلہ افزائی کی کہ وہ امریکا میں ریسرچ اور تعلیم کے مواقع سے بھرپور فائد ہ حاصل کریں۔
اس موقع پروائس چانسلر پروفیسر ڈاکٹر مجیب الدین صحرائی میمن نے کہا کہ امریکی قونصل خانے کی جانب سے جنوبی ایشیا کے تاریخی اور قدیم ادارے کے ساتھ تعاون کرنے کے اقدام کی تعریف کی۔
انہوں نے یہ تجویز بھی پیش کی کہ امریکن قونصل خانہ امریکی پروفیسرز کو ایس ایم آئی یو سے ملانے میں اپنا کردار ادا کرے۔ اجلاس میں اس بات پر اتفاق کیا گیا کہ مستقبل میں مزید رابطے قائم کرنے کیلئے ایس ایم آئی یوکی جانب سے ایک فوکل پرسن بھی مقرر کیا جائے گا۔
کراچی: جامعہ کراچی میں تعلیمی سیشن 2021 ء کے ماسٹرز پروگرام کے لئے داخلہ ٹیسٹ ہفتہ کے روز صبح 11:00 بجے کلیہ فنون وسماجی علوم جامعہ کراچی کے مختلف شعبہ جات میں قائم امتحانی مراکز میں منعقد ہوا۔
ماسٹرز پروگرام میں داخلوں کے لئے550فارم جمع کرائے گئے، جبکہ500 سے زائد امیدواروں نے داخلہ ٹیسٹ میں شرکت کی۔
رجسٹرارجامعہ کراچی پروفیسر ڈاکٹر عبدالوحید، انچارج ڈائریکٹوریٹ آف ایڈمیشنزجامعہ کراچی ڈاکٹر صائمہ اختر،رئیسہ کلیہ فنون وسماجی علوم پروفیسر ڈاکٹر نسرین اسلم شاہ،پروفیسر ڈاکٹر انیلاامبر ملک،پروفیسر ڈاکٹر ثمینہ سعید اورڈاکٹر سید عاصم علی نے امتحانی مراکز کا دورہ کیا۔
انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر نے بتایاکہ شیخ الجامعہ پروفیسر ڈاکٹر خالد محمود عراقی کی ہدایت پر تمام امتحانی مراکز پر سینیٹائزر،فیس ماسک اور تھرمل گن کی موجودگی کو یقینی بنایاگیاہے۔
داخلہ ٹیسٹ میں شرکت کرنے والے تمام امیدواروں کا تھرمل گن سے ٹمپریچر چیک کرنے کے بعد کمرہ امتحان میں بیٹھنے کی اجازت دی گئی۔
واضح رہے کہ داخلہ ٹیسٹ کے نتائج جامعہ کراچی کی ویب سائٹ پر13 دسمبر2020 ء کو اَپ لوڈ کردیئے جائیں گے جبکہ طلبہ داخلہ ٹیسٹ کے نتائج اپنے پورٹل پر بھی دیکھ سکیں گے۔
کراچی: جامعہ کراچی میں تعلیمی سیشن 2021 ء کے بیچلرزپروگرام کے لئے داخلہ ٹیسٹ 13 دسمبر2020 ء کو لئے جائیں گے،داخلہ ٹیسٹ میں کل 10210 امیدوارشریک ہوں گے،جس میں بیچلرز پروگرام کے 9660 امیدوار شامل ہیں۔داخلہ ٹیسٹ کے لئے جامعہ کراچی کے مختلف شعبہ جات میں امتحانی مراکز قائم کئے گئے ہیں۔
داخلہ ٹیسٹ میں شرکت کرنے والے امیدواروں کو ہدایت کی جاتی ہے کہ وہ صبح 10:00 بجے اپنے اصل شناختی کارڈ اور ایڈمٹ کارڈ کے ساتھ اپنے متعلقہ امتحانی مرکز پر حاضری کو یقینی بنائیں۔تفصیلات کے مطابق بیچلرز پروگرام میں اپلائیڈ کیمسٹری اینڈ کیمیکل ٹیکنالوجی،اپلائیڈ فزکس،بائیوٹیکنالوجی،بزنس ایڈمنسٹریشن،کیمیکل انجینئرنگ،کامرس،کمپیوٹر سائنس،کرمنالوجی، ایجوکیشن، انوائرمینٹل اسٹڈیز،فوڈ سائنس اینڈ ٹیکنالوجی،انٹرنیشنل ریلیشنز،ماس کمیونیکشن،پیٹرولیم ٹیکنالوجی،پبلک ایڈمنسٹریشن،ایجوکیشن،اسپیشل ایجوکیشن(بی اے آنرز) اورٹیچرز ایجوکیشن(بی ایڈآنرز) میں داخلوں کے لئے انٹری ٹیسٹ 13 دسمبر 2020 ء کو لیا جائے گا۔
انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق شیخ الجامعہ پروفیسر ڈاکٹر خالد محمود عراقی کی ہدایت پر داخلہ ٹیسٹ کے انعقاد سے قبل تمام امتحانی مراکز میں جراثیم کش اسپرے کردیئے گئے ہیں۔تمام امتحانی مراکز پر سینیٹائزر،فیس ماسک اور تھرمل گن کی موجودگی کو یقینی بنایا گیاہے۔تھرمل گن سے ٹمپریچر چیک کرنے کے بعد طلبہ کو کمرہ امتحانی میں بیٹھنے کی اجازت دی جائے گی۔
تمام طلبہ کو ہدایت کی جاتی ہے کہ وہ کووڈ 19 ایس اوپیز کو مد نظر رکھتے ہوئے،سینیٹائزر،پانی کی بوتلیں اور دیگر ضروری سامان اپنے ہمراہ لائیں۔
علاوہ ازیں طلباوطالبات اور ان کے والدین کی سہولت کے پیش نظر جامعہ کراچی کے سلورجوبلی اور مسکن گیٹس پر پوائنس(بسوں) کی موجودگی کو یقینی بنایا جائے گا جو طلبہ کو امتحانی مراکز تک پہنچانے اور واپس گیٹس تک پہنچانے کی سہولت فراہم کریں گے۔
اسلام آباد: اسلام آباد میں آئی بی سی سی کے چیئرمین ڈاکٹر شہزاد جیوا کی زیرِ صدارت وفاقی وزیر تعلیم شفقت محمود کی ہدایت پر آئی بی سی سی کی اسٹیئرنگ کمیٹی کا اجلاس ہوا ۔اجلاس میں سیکریٹری آئی بی سی سی غلام علی شاہ ملاح بھی اجلاس میں شریک تھے۔
اجلاس میں سیشن 2021 میں لیے جانے والے میٹرک اور انٹر کے سالانہ امتحانات کے حوالے سے فیصلہ کیا گیا کہ امتحانات اب مئی کے بجائے جون کے مہینے میں ہونگے تاکہ میٹرک اور انٹر کے طلباکو تدریس کا مزید موقع میسر آسکے جبکہ کالجوں میں انٹر سال اول اور جامعات میں داخلوں میں تاخیر سے بچنے کے لیے پہلے مرحلے میں دسویں اور بارہویں جماعت کے پرچے لیے جائیں جبکہ دوسرے مرحلے میں نویں اور گیارہویں جماعتوں کے طلبہ امتحانات دیں گے۔
اسٹیئرنگ کمیٹی کے اجلاس میں فیصلہ کیا گیا گیا کہ چاروں کلاسز کے ہر پرچے کا دورانیہ ڈیڑھ گھنٹے ہوگا جبکہ تمام مضامین کے پرچے مکمل طور پر ایم سی کیوز کی صورت میں لیے جائیں گے۔
اجلاس میں یہ بھی فیصلہ کیا گیا کہ کوویڈ کے پیش نظر میٹرک اور انٹر کی سطح پر عملی امتحانات نہیں لیے جائیں گے اور عملی امتحانات کے سوالات اور مارکس بھی نظری امتحانات میں ہی ضم ہوں گے۔
اجلاس میں بعض تعلیمی حلقوں کی جان سے محض سائنس اور کامرس کے اختیاری مضامین کے پرچے لینے کی تجویز مسترد کردی اس تجویز میں کہا گیا تھا کہ اس سال میٹرک اور انٹر کے پرچے صرف اختیاری مضامین سے لیے جائیں اور اس فیصلے سے جامعات کو بھی آگاہ کردیا جائے تاکہ وہ انٹری یا رجحان ٹیسٹ اسی بنیاد پر لیں تاہم اس تجویز سے اتفاق نہیں کیا گیا اور فیصلہ کیا گیا کہ تمام مضامین کے پرچے لیے جائیں گے۔
کراچی : بین الاقوامی ریموٹ کنٹرولڈ جہاز سازی کے مقابلے کے ابتدائی راؤنڈ میں پاکستان کے غلام اسحق خان انسٹی ٹیوٹ آف انجینئرنگ نے دوسری پوزیشن حاصل کرلی۔
ٹیم کے مینیجر شارق حمید نے کامیابی کا کریڈٹ اپنے اساتذہ اور ٹیم ممبرز کو دیا ہے
امریکن انسٹی ٹیوٹ آف ایروناٹکس اینڈ ایسٹرو ناٹکس(AIAA)ریموٹ کنٹرولڈ جہاز سازی کا عالمی مقابلہ ڈیزائن، بِلڈ، فلائی(DBF Competition)کے نام سے ہر سال کے مخصوص مشن کے تحت منعقد کرتا ہے۔جس میں دنیا بھر سے انجینئرنگ یونیورسٹیز شرکت کرتی ہیں۔جن کو پہلے مرحلے میں اپنے پروجیکٹ کا پروپوزل اور60صفحات پر مشتمل ٹیکنیکل رپورٹ جمع کرانی ہوتی ہے۔امریکن انسٹی ٹیوٹ آف ایروناٹکس اینڈ ایسٹرو ناٹکس(AIAA) تمام پروپوزلز کا جائزہ لیکر مقابلے کے لیے اہل پروجیکٹس کا اعلان کرتا ہے۔
منظور شدہ پروجیکٹس امریکا میں منعقدہ مقابلے میں اپنے تیار کردہ جہازوں کی کارکردگی کا عملی مظاہرہ کرتے ہیں۔پاکستان سے صرف غلام اسحق خان انسٹی ٹیوٹ آف انجینئرنگ سائنس اینڈ ٹیکنالوجی کی ٹیم گذشتہ دس سالوں سے اس مقابلے میں حصّہ لے رہی ہے۔
انسٹی ٹیوٹ کی ٹیم اس سال اِن وکٹس(INVICTUS)کے نام سے اس بین الاقوامی مقابلہ جہاز سازی میں حصہ لے رہی ہے۔ہر سال کی طرح اس سال بھی دنیا بھر سے سینکڑوں یونیورسٹیز نے مقابلے کے لیے اپنے پروجیکٹ جمع کرائے۔جن میں سے ایک سو پندرہ(115)پروجیکٹس کو منظور کیا گیا۔جس میں غلام اسحق خان انسٹی ٹیوٹ کی ٹیم اِن وکٹس(INVICTUS)کے پروجیکٹ نے دوسری پوزیشن حاصل کی۔جو یقیناََ پاکستان کے لیے بڑے اعزاز کی بات ہے۔
ٹیم اِن وکٹس (INVICTUS) کے مینیجر اور غلام اسحق خان انسٹی ٹیوٹ کے ہونہار طالبعلم شارق حمید نے بتا یا کہ یوں تو گذشتہ سال بھی ہمارے انسٹی ٹیوٹ کی ٹیم نے برا عظم ایشیا میں بہترین پوزیشن حاصل کی تھی۔لیکن اس سال ہمیں کووڈ۔19کی وجہ سے بہت مشکلات کا سامنا کرنا پڑا۔لیکن ہمارے ہر ٹیم ممبر نے اسکو ایک چیلنج سمجھ کر قبول کیا۔ہمارے اساتذ ہ نے ہمارے ساتھ بہت تعاون کیا۔خدا کے فضل و کرم،والدین کی دعاؤں اور انسٹی ٹیوٹ کی سرپرستی کی بدولت ہماری ٹیم نے دنیا بھر سے منتخب ہونے والے ایک سو پندرہ(115) پروجیکٹس میں دوسری پوزیشن حاصل کی۔جو ہمارے لیے، ہمارے انسٹی ٹیوٹ اور ہمارے ملک پاکستان کے لیے بہت اعزاز کی بات ہے۔ہمیں امید ہے کہ ہم فائنل مقابلے میں بھی اسی طرح اپنے ملک کا نام روشن اور اس کے پرچم کو سر بلند کریں گے۔