ایمز ٹی وی (اسپیشل رپورٹ) جینیاتی معذوری ڈاون سنڈروم سے دوچار خاتون حبہ ال شرفۃ فلسطین کی ایک غیر سرکاری تنظیم کے ایک اسکول کی سابق طالبہ ہیں اور اب اسی اسکول میں ذہنی معذور بچوں کی استانی بن گئی ہیں۔ 26 سالہ حبہ ال شرفۃ فلسطین کی پہلی استانی ہیں جو خود بھی ذہنی معذوری سے دوچار ہیں لیکن انھوں نے اپنےخوابوں کو پورا کرنے کے لیے سخت محنت اور لگن دکھائی ہے۔آج وہ فلسطین کے ذہنی معذور بچوں کے لیے ایک امید ہیں جو اب بھی تعلیم اور کام کی جگہوں پر پسماندہ ہیں۔

متاثر کن استانی حبہ غزہ کی پٹی کے علاقے میں واقع ایک اسکول میں ڈاون سنڈروم سے دوچار بچوں کی بحالی اور انھیں تعلیم دینے میں مدد کر رہی ہیں، جہاں ان بچوں کو تعلیم، رقص ، دستکاری اور کھیلوں کے ذریعے سکھایا جاتا ہے۔ رپورٹ کے مطابق فلاحی تنظیم رائٹ ٹو لیو سینٹر 1992 سےقائم ہے اس مرکز میں لگ بھگ 400 بچے زیر تعلیم ہیں ۔ اطلاعات کےمطابق حبہ ال شرفۃ طالب علموں سے قریب ہیں اور وہ اپنی زندگی کے تجربات کو دیکھتے ہوئے ذہنی معذور بچوں کی ضروریات کو سمجھنے اور انھیں پورا کرنے کے قابل ہیں۔

اسی طرح جب اسکول کے باہر طلبہ اپنی استانی حبہ کے ساتھ کھیلوں میں حصہ لیتے ہیں تو ان بچوں کا اپنی غیر معمولی استانی کے ساتھ ایک خاص لگاؤ نظر آتا ہے۔ دنیا بھر میں جب ان کی تعلیم کا سوال آتا ہے تو معذور بچے زیادہ پسماندہ گروپوں میں سے ہیں لیکن حبہ ال شرفۃ جیسے لوگوں کی حیرت انگیز صلاحیتیں اور کام کرنے کا لگن معذور طلبہ کو عام بچوں کی طرح جینے کا موقع فراہم کرتی ہیں۔

ڈاون سنڈروم ایک جینیاتی حالت ہے، جو جسم میں کروموزوم کی بے قاعدگیوں سے ہوتی ہے عام طور پر یہ بیماری سیکھنے کی معذوری اور مخصوص جسمانی خصوصیات کے ساتھ ظاہر ہوتی ہے لیکن سیکھنے کی معذوری کی سطح ہر فرد کے لیے مختلف ہو سکتی ہے۔

ایمزٹی وی (اسلام آباد) وزیراعظم نوازشریف طبی معائنے کے بعد لندن سے وطن واپس پہنچ گئے جہاں نور ایئر خان ایئربیس پر وزیرخزانہ اسحاق ڈار سمیت دیگر نے ان کا استقبال کیا جس کے بعد وزیراعظم نے پاناما لیکس پر انکوائری کمیشن کے لیے آج پارٹی رہنماؤں کو بھی مشاورت کے لیے طلب کرلیا ہے۔ذرائع کے مطابق وزیراعظم نوازشریف کے وطن واپس پہنچنے کے بعد وزیراعظم ہاؤس میں وزیر خزانہ اسحاق ڈار اور وزیراعظم کی صاحبزادی مریم نواز نے وزیراعظم سے ملاقات کی جس میں اسحاق ڈار نے وزیراعظم کو پاناما لیکس کے معاملے پر سیاسی جماعتوں سے رابطوں پر آگاہ کیا۔ لندن سے پاکستان روانگی کے موقع پر میڈیا سے بات کرتے ہوئے وزیراعظم نواز شریف کا کہنا تھا کہ پاکستان کی بھاری اکثریت ملک میں دھرنوں کی سیاست نہیں چاہتی اور چاہتی ہے کہ پاکستان ترقی کرے اور آگے بڑھے لیکن بدقسمتی سے 90 کی دہائی والی سیاست شروع ہوگئی لیکن میں نہ مانوں والی سیاست 90 کی دہائی میں ہی دفن ہوچکی ہے۔ وزیراعظم کا کہنا تھا کہ کئی لوگوں کو میرے لندن میں آنے میں سازش نظر آرہی تھی لیکن میں چیک اپ کے لئے آیا جو مکمل ہوگئے اوراب واپس اپنے وطن جارہا ہوں، میرے لندن آنے کے بعد پیشگوئیاں کرنے والوں سے ہی پوچھا جائے کہ انہوں نے ایسا کیوں کیا۔ ان کا کہنا تھا کہ پاناما لیکس میں مجھ پرکوئی الزام نہیں لگا لیکن پھربھی اس پر کمیشن بن جائے گا، 1972 سے ہمارا خاندان مشکلات کا شکار رہا، ہمارے کئی کارخانے ذوالفقارعلی بھٹو نے اقتدار میں آنے کے بعد نیشنلائز کردیئے تھے۔ ذرائع کا کہنا ہےکہ وزیراعظم نے آج اسلام آباد میں پارٹی رہنماؤں اور رفقائے کار کو بلالیا ہے جہاں وہ ان سے ملاقات کریں گے جب کہ اس دوران وہ پاناما لیکس سے متعلق کمیشن پر مشاورت اور لائحہ عمل بھی طے کریں گے۔