ایمز ٹی وی (لاہور) گلشن اقبال پارک کے گیٹ پر ہونے والے خودکش حملے کا مقدمہ سی ٹی ڈی اہلکاروں کی مدعیت میں درج کرلیا گیا۔ سی ٹی ڈی اہلکارقیصر، محمد عمران، شاہد پرویز اور ارباب منظور کی مدعیت میں سانحہ گلشن پارک کا مقدمہ درج کرلیا گیا جس میں 70 سے زائد افراد جاں بحق اور 300 سے زائد زخمی ہوئے۔ مقدمے میں قتل، اقدام قتل اور دہشت گردی کی دفعات شامل کی گئی ہیں۔ ایف آئی آر کے متن کے مطابق شلوار قمیض میں ملبوس 4 مشکوک افراد گلشن اقبال پارک کے گیٹ نمبر 5 سے داخل ہوئے جو آپس میں باتیں کر رہے تھے، مشکوک افراد کی سرگرمیوں کو دیکھتے ہوئے پولیس اہلکار ان کے پاس گیا تو ان میں سے ایک مشکوک شخص نے جھولے کے قریب جاکر خود کو دھماکے سے اڑا لیا جب کہ دیگر 3 افراد بھی فرار ہوگئے۔

ایمز ٹی وی (راولپنڈی) آرمی چیف جنرل راحیل شریف کی زیر صدارت اہم اجلاس ہوا جس میں سربراہ پاک فوج نے خفیہ اداروں کو لاہور دھماکے کے ذمہ داروں کا پتہ لگانے کی ہدایت کی۔ آئی ایس پی آر کے مطابق لاہور کے گلشن اقبال پارک کے قریب خودکش حملے کے بعد آرمی چیف جنرل راحیل شریف کی زیرصدارت اعلی سطح کا اجلاس ہوا جس میں ڈی جی آئی ایس آئی لیفٹیننٹ جنرل رضوان اختر، ڈی جی ایم آئی سمیت دیگر نے شرکت کی۔ اجلاس کے دوران آرمی چیف کو لاہور دھماکے سے متعلق بریفنگ دی گئی۔ اس موقع پر سربراہ پاک فوج جنرل راحیل شریف نے ہدایت کی کہ خفیہ ادارے لاہور دھماکے کے ذمہ داروں کا پتہ لگائیں اور دہشت گردوں اور ان کے سہولت کاروں کو جلد از جلد پکڑا جائے۔ ان کا کہنا تھا کہ وحشی درندوں کو اپنی زندگی اور آزادی کا خاتمہ نہیں کرنے دیں گے اور معصوم لوگوں کے قاتلوں کوانصاف کے کٹہرے میں لائیں گے۔