ایمزٹی وی(قصور)کور کمانڈر لاہور لیفٹیننٹ جنرل صادق علی نے فوج اور سول انتظامیہ کی زیر نگرانی قصور شہر میں جاری مردم شماری مہم کا جائزہ لینے کیلئے سینس کنٹرول ہیڈ کوارٹر قصورکا دورہ کیا۔ جہاں انہیں خانہ شماری اور مردم شماری کے حوالے سے اب تک کی مرحلہ وار پیشرفت کے بارے میں مفصل بریفنگ دی گئی۔ بعدازاں کور کمانڈر، قصور شہر کے مختلف وارڈز میں گئے اور مردم شماری ٹیموں اور شہریوں سے گفت و شنید کی اور مہم کے حوالے سے ان کا نقطہ نظر اور ردعمل معلوم کیا۔ انہوں نے دوران مہم عام شہریوں کے تعاون کو بے حد سراہا اور شکریہ ادا کیا اور مردم شماری کے اغراض و مقاصد اور یکساں قومی ترقی کے حوالے سے مردم وخانہ شماری کو بہت اہم قرار دیا۔' کور کمانڈر نے سول اور قومی اداروں کے باہمی اشتراک سے کامیابی سے جاری اس مہم اور اس مہم میں حصہ لینے والی ٹموں کی کارکردگی کی تعریف کی۔ دورے کے دوران اہم سول اور فوجی افسران ان کے ہمراہ تھے۔

ایمزٹی وی(لاہور)سابق آرمی چیف جنرل (ر) اسلم بیگ نے بھارتی آرمی چیف کی دھمکی کو بڑھک قرار دیتے ہوئے کہا ہے کہ بھارت کو جارحیت کی قیمت کا بخوبی علم ہے۔ میڈیا ذرائع کے مطابق جنرل (ر) اسلم بیگ نے کہا ہے کہ بھارت کو جارحیت کی قیمت کا بخوبی علم ہے اس لئے بھارتی آرمی چیف کی دھمکی بڑھک سے زیادہ کچھ بھی نہیں ہے۔ انہوں نے کہا کہ بھارتی فوجیوں کی ہلاکت میں پاکستان ملوث نہیں جبکہ بھارت کشمیریوں کا حق خود ارادیت تسلیم کرے۔

ایمزٹی وی(کراچی) چیرمین تحریک انصاف عمران خان کا کہنا ہے کہ 10 ارب روپے کی پیش کش کرنے والے کا نام اس لئے نہیں بتا سکتا کیونکہ وہ لاہور کا رہائشی ہے اگر اس کا نام لے لیا تو پھر شریف خاندان اسے انتقامی کارروائی کا نشانہ بنائے گا۔ کراچی پہنچنے پر میڈیا سے بات کرتے ہوئے عمران خان کا کہنا تھا کہ نوازشریف کا وزیراعظم رہنے کا اخلاقی جواز ختم ہوگیا، جب پاناما کا انکشاف ہوا تھا اسی دن انہیں استعفیٰ دے دینا چاہیئے تھا، نواز شریف نے یوسف رضا گیلانی کو کہا تھا کہ تحقیقات تک استعفیٰ دے دیں لیکن خود کرسی سے چپکے ہوئے ہیں اور یہ کرسی سے اس وجہ سے چپکے ہوئے ہیں کیونکہ قطری کے ساتھ اربوں روپے کے معاہدوں سے کمیشن آنا ہے، اسی پیسے کی وجہ سے نواز شریف اپنی عزت اور غیرت کھو بیٹھے ہیں۔ 10 ارب کی پیش کش کے حوالے سے عمران خان کا کہنا تھا 10 ارب تو ابتدائی پیش کش تھی، آفر لانے والے کا کہنا تھا کہ پیش کش 10 ارب روپے سے بڑھ بھی سکتی ہے، پیش کرنے والے کا نام اس لئے نہیں بتا سکتا کیونکہ وہ لاہور کا رہائشی ہے اور اگر اس کا نام لے لیا تو پھر شریف خاندان اسے انتقامی کارروائی کا نشانہ بنائے گا، جس دن عدالت میں بلایا گیا تو 10 ارب روپے کی پیش کش کرنے والے کے لئے تحفظ کا مطالبہ کروں گا اور دبئی سے جس کے ذریعے پیش کش کی گئی اس کا نام بھی بتاؤں گا۔ چیرمین تحریک انصاف نے کہا کہ ڈان لیکس کمیشن کی پوری تفصیل سامنے آئے لیکن انہوں نے اصل لوگوں کو بچا کر کسی اور کو قربانی کا بکرا بنا دیا، یہ اسی طرح ہے کہ نیب بڑے مگرمچھوں کو معاف کر دیتی ہے اور چھوٹے پٹواریوں کو پکڑلیتی ہے۔ ان کا کہنا تھا کہ المیہ یہ ہے کہ ملک کا سب سے بڑا ڈاکو وزیراعظم ہے اور کرکٹرز کو کہتے ہیں کہ آپ نے اسپاٹ فکسنگ کیوں کی۔ ایک سوال کے جواب پر عمران خان کا کہنا تھا کہ آصف زرداری کو کیا کہوں، جب آصف زرداری کرپشن کے خلاف کھڑا ہوجائے تو یہ قیامت کی نشانی ہے۔

ایمزٹی وی(راولپنڈی)ڈان لیکس پر حکومت کی تحقیقاتی رپورٹ مسترد کرنے کے بعد پاک فوج نے معاملے کی خود تحقیقات کرنے پر سنجیدگی سے غور کرنا شروع کردیا۔ پاک فوج ڈان لیکس کی خود تحقیقات کرنے پر سنجیدگی سے غور کررہی ہے کیونکہ پاک فوج کے خیال میں رپورٹ میں پوری حقیقت سامنے نہیں آئی اور فوج معاملے کی مکمل تحقیقات کروانا ضروری سمجھتی ہے۔ ذرائع کے مطابق ڈان لیکس کی تحقیقاتی رپورٹ میں پرویز رشید کو بری الذمہ قراسر نہیں دیا گیا تھا تاہم پاک فوج ڈان لیکس کے معاملے پر قوم کے سامنے مکمل سچ لانا ضروری سمجھتی ہے۔