Reporter SS
ایمز ٹی وی (اسپورٹس)اسپاٹ فکسنگ اسکینڈل میں معطل ہونے والے چوتھے کرکٹرشاہ زیب حسن نے اپنے اوپر لگائے گئے الزامات ماننے سے انکار کردیا ہے اور قانونی جواب دینے کیلئے ٹربیونل میں پیش ہونے کا فیصلہ کیا ہے۔ تفصیلات کے مطابق قومی کرکٹر شاہ زیب حسن نے فکسنگ میں ملوث ہونے پی سی بی کے تین الزامات کو مسترد کردیا ہے اور تحریری جواب تیار کرلئے ہیں جس کیلئے قانونی ماہرین کی بھی مدد لے لی گئی ہے۔
شاہ زیب حسن نے کہا کہ انہوں نے کسی کھلاڑی کو نہیں اکسایا ،جو جانتا تھا بتادیا،کیس سے متعلق بورڈ کی مدد کرنے کو تیار ہوں۔ شاہ زیب حسن آئندہ دو روز میں پی سی بی کو تحریری جواب جمع کرائیںگے۔ یاد رہے کہ پی ایس ایل اسپاٹ فکسنگ اسکینڈل میں شرجیل خان،خالد لطیف اور محمد عرفان کے بعد شاہ زیب حسن کو بھی پی سی بی نے معطل کردیا تھا اور الزام لگایا تھا کہ انہوں نے فکسنگ کیلئے کھلاڑیوں کو اکسایا۔
ایمز ٹی وی(اسپورٹس)ٹیسٹ کرکٹر سعید اجمل نے کہا ہے کہ میچ فکسنگ کر نے والے کھلاڑ یوں کو رولز کے مطابق سخت سزادینی چاہیے،کھلاڑیوں نے نہ صر ف اپنی عزت کو داؤ پر لگا یا بلکہ پاکستان کی بد نا می کا باعث بھی بنے ۔
میڈ یا سے بات چیت میں ٹیسٹ کر کٹر سعید اجمل نے کہا کہ پی ایس ایل دبئی میں نہیں بلکہ توقع رکھنی چاہئےکہ آ نے والا پی ایس ایل مکمل طور پر پاکستان میں ہو گا ۔
انہوں نے کہا کہ پی ایس ایل میں جن لوگوں پر میچ فکسنگ کے الزا مات ہیں یا جنہو ں نے جواریو ں سے رابطے کیے اس سے ملک کی بد نا می ہو ئی ہے۔
انہوں نے مزید کہا کہ وہ مکمل طور پر فٹ ہیں اور سلیکٹرز کی جانب سےچانس کےمنتظر ہیں ۔
ایمز ٹی وی(اسپورٹس) جنوبی افریقہ نے دوسرے ٹیسٹ میچ میں نیوزی لینڈ کو 8 وکٹوں سے شکست دے کر 3 میچوں کی سیریز میں 1-0 کی برتری حاصل کر لی ہے۔ نیوزی لینڈ نے جنوبی افریقہ کو جیت کیلئے 80 رنز کا ہدف دیا تھا جو اس نے 2 وکٹوں کے نقصان پر باآسانی حاصل کر لیا۔ جنوبی افریقہ کے کیشو مہاراج نے عمدہ باﺅلنگ کرتے ہوئے مجموعی طور پر 8 وکٹیں حاصل کیں اور بہترین کھلاڑی قرار پائے۔
تفصیلات کے مطابق ویلنگٹن میں کھیلے گئے ٹیسٹ میچ میں جنوبی افریقہ نے ٹاس جیت کر نیوزی لینڈ کو پہلے بیٹنگ کی دعوت دی تو پوری ٹیم پہلی اننگز میں 268 رنز بنا کر آﺅٹ ہو گئی۔ نیوزی لینڈ کی جانب سے ہینری نکولس نے سب سے زیادہ 118 رنز بنائے جبکہ دیگر بلے بازوں میں جیت روال نے 36، ٹام لیتھم نے 8، کین ولیم سن نے 2، نیل بروم نے 0، جیمز نیشام نے 15، بی جے واٹلنگ نے 34، کولن ڈی گرینڈہوم نے 4، ٹم ساﺅتھی نے 27، جیتن پٹیل نے 17 اور نیل ویگنر نے 2 رنز بنائے۔
جنوبی افریقہ کی جانب سے جے پی ڈومنی نے تباہ کن باﺅلنگ کرتے ہوئے 4 کھلاڑیوں کو پویلین کی راہ دکھائی جبکہ مورنی مورکل، کاگیسو ربادا اور کیشو مہاراج نے 2,2 وکٹیں حاصل کیں۔
نیوزی لینڈ کے 268 رنز کے جواب میں جنوبی افریقہ نے پہلی اننگز کا آغاز کیا تو اوپنرز اچھا آغاز فراہم کرنے میں ناکام رہے تاہم تیمبا باووما اور کوانٹن ڈی کوک نے ذمہ دارانہ بلے بازی کرتے ہوئے ٹیم کی ڈوبتی کشتی کو سہارا دیا اور پوری ٹیم 359 رنز بنا کر 91 رنز کی برتری حاصل کرنے میں کامیاب ہو گئی۔ کوانٹن ڈی کوک نے سب سے زیادہ 91 رنز بنائے جبکہ تیمبا باووما نے 89، سٹیفن کوک نے 3، ڈین ایلگر نے 9، کاگیسو ربادا نے 9، ہاشم آملہ نے 21، جے پی ڈومنی نے 16، فاف ڈوپلیسس نے 22، ویرنون فلینڈر نے 37، کیشو مہاراج نے 1 اور مورنی مورکل نے 40 رنز بنائے۔
نیوزی لینڈ کی جانب سے کولن ڈی گرینڈہوم اور نیل ویگنر نے 3,3 کھلاڑیوں کو پویلین کی راہ دکھائی اور ٹم ساﺅتھی نے 2 وکٹیں حاصل کی جبکہ جیتن پٹیل اور جیمز نیشام نے ایک، ایک کھلاڑی کو آﺅٹ کیا۔
کیویز بلے بازوں نے دوسری اننگز میں مزید بدتر کارکردگی کا مظاہرہ کیا اور 91 رنز کے خسارے کے ساتھ شروع ہونے والی دوسری اننگز کا خاتمہ 171 کے مجموعی سکور پر ہو گیا اور یوں جنوبی افریقہ کو جیت کیلئے صرف 80 رنز کا ہدف مل گیا جو چوکرز نے صرف 2 وکٹوں کے نقصان پر حاصل کر لیا۔
جنوبی افریقہ کے کیشو مہاراج نے عمدہ باﺅلنگ کرتے ہوئے پہلی اننگز میں 2 کھلاڑیوں کو پویلین کی راہ دکھائی جبکہ دوسری اننگز میں 6 شکار کئے جس پر انہیں میچ کا بہترین کھلاڑی قرار دیا گیا۔
جنوبی افریقہ نے اس جیت کے ساتھ ہی تین میچوں کی سیریز میں 1-0 کی برتری حاصل کر لی ہے جبکہ سیریز کا تیسرا اور فیصلہ کن میچ 25 مارچ سے 29 مارچ تک ہیملٹن میں کھیلا جائے گا۔ سیریز کا پہلا میچ بارش کے باعث بغیر کسی نتیجے کے ختم ہو گیا تھا۔
ایمزٹی وی(اسلام آباد) امریکا میں پاکستان کے نئے سفیر اعزاز احمد چوہدری کا کہنا ہے کہ افغانستان کا عسکری نہیں سیاسی حل درکار ہے جس کے لئے پاکستان اور امریکا مل کر کردار ادا کر سکتے ہیں۔
اعزاز چودھری نے واشنگٹن میں پاکستانی سفارتخانے میں پہلی پریس کانفرنس کی جس میں ان کا کہنا تھا کہ نئی امریکی انتظامیہ کے لئے پاکستان کا پیغام واضح ہے کہ ہم مل کر افغانستان میں دیرپا امن کے لئے کام کرنا چاہتے ہیں۔ ان کا کہنا تھا کہ افغانستان میں امن پاکستان کے استحکام کے لئے ضروری ہے۔
امریکا میں تعینات پاکستانی سفیر کا کہنا تھا کہ پاک افغان سرحد کے دونوں اطراف دہشت گردوں کی نقل و حرکت روکنے کے لئے سرحد کی نگرانی ضروری ہے۔
ایمز ٹی وی(صحت) آسٹریلوی سائنسدانوں نے ثابت کیا ہے کہ نیوزی لینڈ میں پایا جانے والا ’’مانوکا شہد‘‘ ہر قسم کے جرثوموں (بیکٹیریا) کو ہلاک کرسکتا ہے جب کہ ان میں وہ بیکٹیریا بھی شامل ہیں کسی بھی اینٹی بایوٹک دوا سے ختم نہیں ہوتے۔
یورپین جرنل آف کلینیکل مائیکروبائیالوجی اینڈ انفیکشس ڈزیزز میں شائع ہونے والی ایک رپورٹ میں بتایا گیا ہے کہ مانوکا شہد (Manuka Honey) میں قدرتی طورپرغیرمعمولی جراثیم کش صلاحیت پائی جاتی ہے اور یہ ’’ایم آر ایس اے‘‘ کہلانے ان خطرناک جرثوموں تک کو بہ آسانی ہلاک کرسکتا ہے جن میں اینٹی بایوٹکس (جراثیم کش دواؤں) کے خلاف مزاحمت مسلسل بڑھتی جارہی ہے اور آج کوئی بھی دوا ان پر اثرانداز نہیں ہوتی۔
سائنسدانوں کا کہنا ہےکہ اپنی اسی مزاحمت کی بناء پر یہ بیکٹیریا اس وقت عالمی طب کے اہم ترین مسائل میں شامل ہوچکے ہیں اور مانوکا شہد ان جرثوموں تک کو آسانی سے ہلاک کردیتا ہے البتہ اب تک حتمی طور پر یہ معلوم نہیں ہوسکا کہ اس شہد میں ایسی کونسی چیز شامل ہوتی ہے جو اسے غیرمعمولی طور پر جراثیم کش خصوصیات کا مالک بناتی ہے۔
ہر قسم کے اصلی شہد میں جراثیم کش خصوصیات پائی جاتی ہیں اور سائنسدانوں کا کہنا ہے کہ ان میں ایسے خامرے (اینزائمز) موجود ہوتے ہیں جو جرثوموں کو ہلاک کرنے میں اہم کردار ادا کرتے ہیں۔
ایمزٹی وی (اسلام آباد)کینیڈا میں تعینات پاکستانی ہائی کمشنر طارق عظیم سے بھارت کے ہائی کمشنر وکاس سوراپ نے ملاقات کی جس میں سفارتی ذمہ داریوں اور باہمی دلچسپی کے امور پر تبادلہ خیال کیا گیا، طارق عظیم نے بھارتی وزیرخارجہ سشماسوراج کی صحت سے متعلق بھی دریافت کیا ۔
پاکستانی ہائی کمشنر طارق عظیم سے بھارتی سفیر وکاس سوراپ نے ملاقات کی ، وکاس سوراپ کینیڈا میں بھارت کے نئی ہائی کمشنر تعینات ہوئے ہیں ۔طارق عظیم نے وکاس سوراپ کا کینیڈا میں خیر مقدم کیا اور بھارتی وزیر خارجہ سشما سوراج کی صحت کے متعلق دریافت کیا ۔ ملاقات میں سفارتی ذمہ داریوں اور باہمی دلچسپی کے امور پر تبادلہ خیال کیا گیا ۔
اس موقع پر وکاس سوراپ نے کہا کہ 2015میں نریندر مودی کے ہمراہ دورہ لاہور سے گہری یادیں وابستہ ہیں ۔
ایمز ٹی وی(مانیٹرنگ ڈیسک) اگر آپ دفتر میں بیٹھے ہیں اور اپنے سیل فون پر دوران گفتگو اپنی بات دوسروں کو سنانے سے بچانا چاہتے ہیں تو اس کے لیے ایک الیکٹرانک ماسک تیار کرلیا گیا ہے۔
اعلیٰ ٹیکنالوجی کے اس شاہکار ماسک کے ذریعے گفتگو باہر نہیں جاتی کیونکہ یہ آپ کی آواز جذب کرلیتا ہے اس طرح ساتھ بیٹھے شخص تک آپ کی آواز نہیں جاتی اور یوں ساری بات چیت خفیہ رہتی ہے۔ یہ آپ کے فون کو بلیوٹوتھ کے ذریعے ملاتا ہے اور اس میں کانوں میں آواز کے لیے ہیڈفونزبھی ساتھ آتے ہیں۔
اب جب بھی آپ پرائیوٹ کال کریں تو اس ماسک کو منہ پرلگائیں اور اس کے اندر موجود نرم پیڈز آواز کو جذب کرلیں گے اور ساتھ ہی اس کے باہر موجود اسپیکر سے موسیقی خارج ہونے لگے گی جو آپ کی آواز کی تنسیخ کردے گی۔
اسے ’’ہش می‘‘ کا نام دیا گیا ہے جسے گلے کے گرد لپیٹ کر رکھا جاسکتا ہے۔ اس کے دونوں سروں پر مقناطیس لگے ہیں جو آپ کے ہونٹوں کے سامنے آکر منہ کو چھپالیتے ہیں تاہم اس طرح بات کرنا عجیب لگتا ہے لیکن اس کی افادیت شاید وہی بتاسکیں گے جنہیں اس ڈیوائس کی ضرورت ہے۔
ایمز ٹی وی(صحت) پاکستان میں ذیابیطس کا مرض وبائی صورت اختیار کررہاہے۔دنیا کے دیگر ممالک کے مقابلے میں پاکستان میں ذیابیطس کا شکار حاملہ خواتین کی تعداد بہت زیادہ ہے ۔اس سے بچنے کےلئے صحت مند طرز زندگی اپنائی جائے اور اچھی غذاکے ساتھ ورزش کو معمول بنایا جائے ۔
ان خیالات کا اظہاربین الاقوامی ماہرین امراض ذیابطیس نے دواساز ادارے اور ذیابیطس ایسو سی ایشن آف پاکستان کے زیراہتمام مقامی ہوٹل میں منعقدہ چوتھی بین الاقوامی ذیابیطس کانفرنس کے اختتامی سیشن سے خطاب کے دوران کیا۔
کانفرنس سے سر مائیکل ہرسٹ ، پروفیسر نیم ایچ چو، پروفیسر پیٹر شوارزاور پروفیسر ایمیریٹس نے بھی خطاب کیا۔ بین الاقوامی ماہرین نے کہا کہ پاکستان میں ذیابیطس کے مریضوں کی تعداد میں تیزی سے اضافہ ہورہا ہے۔
انٹرنیشنل ڈایابیٹس فیڈریشن کے ساتویں ایڈیشن اٹلس کے مطابق پاکستان میں ذیابیطس کے مریضوں کی موجودہ تعداد تقریباً ستر لاکھ ہے ۔
ایمز ٹی وی(اسپورٹس) قومی ایتھلیٹ نادیہ نذیربیٹے کے ہمراہ بہاولنگر کے قریب ٹریفک حادثے میں جاں بحق اور شوہر شدید زخمی ہو گیا ۔
میڈیا زرائع کے مطابق ایتھلیٹ نادیہ نذیر اپنے شوہر اور 5 سالہ بیٹے کے ہمراہ بہاولنگرسے لاہور آرہی تھیں کہ انکی کار بے قابو ہو کر ٹرالی کے نیچے جا گھسی جس کے نتیجے میں میاں بیوی اور انکا 5سالہ بیٹا خذیقہ شدید زخمی ہوئے جنہیں ہسپتال منتقل کیا گیا مگر ماں بیٹا جانبر نہ ہو سکے ۔حادثہ کا شکار نادیہ نذیر کے شوہر کو تشویشناک حالت میں لاہور کے جنرل ہسپتال منتقل کر دیا گیا ہے۔
ساہیوال کی رہائشی نادیہ نذیر اسلامک گیمر کے تربیتی کیمپ میں شامل تھیں ۔وہ 400میٹر ہرڈلز چمپئن بھی تھیں جبکہ اسلامی اور سیف گیمز میں بھی پاکستانی کی نمائندگی کر چکی ہیں ۔واپڈا سے تعلق رکھنے والی وہ نیشنل ایتھلیٹس کی تیاری کر رہی تھیں۔
انہیں 2010ءمیں واپڈا کی جانب سے شاندار کھیل کا مظاہرہ کرنے پر تیز ترین ایتھلیٹ کے اعزازاور بینظیر بھٹو شہید ایوارڈ سے نوازا گیا تھا ۔
ایمزٹی وی (ڈیرہ غازی خان)ڈیرہ غازی خان میں نامعلوم ملزمان نے رینجرز کی گاڑی پر فائرنگ کر دی تاہم جوابی فائرنگ سے 3حملہ آوروں کو زخمی حالت میں گرفتار کر لیا گیا ہے ۔
میڈیا ذرائع کے مطابق ڈیرہ غازی خان میں سرچ آپریشن کے دوران رینجرز حکام نے مشکوک افراد کو رکنے کا اشعارہ کیا جنہوں نے فائرنگ کر دی اور فرارہوگئے تاہم رینجرز جوانوں کی جوابی فائرنگ سے 3حملہ آور زخمی ہو گئے جنہیں گرفتار کر لیا گیا ہے تاہم ان کے دیگر ساتھی فرار ہونے میں کامیاب ہو گئے جن کی تلاش کیلئے سرچ آپریشن جاری ہے ۔
ذرائع کا کہنا ہے کہ ملزمان کی فائرنگ سے رینجرز اہلکار محفوظ رہے ، واقعے کے بعد علاقے کو محاصرے میں لیکر سرچ آپریشن شروع کر دیا گیا ہے ۔