Reporter SS

ای سی او ممالک کو علاقائی اور عالمی تنظیموں کے ساتھ مل کر کام کرنا ہوگا

ایمزٹی وی(اسلام آباد) اقتصادی تعاون تنظیم کے اجلاس سے خطاب کرتے ہوئے ترکی اور ایران کے صدور نے خطے کی ترقی کے لئے علاقائی تعاون تنظیم کے اجلاس کو ضروری قراردیا ہے۔

علاقائی تعاون تنظیم کا 13 واں اجلاس اسلام آباد میں ہوا جس میں 8 ممالک کے سربراہان مملکت واعلیٰ حکام نے شرکت کی۔ اجلاس کی ابتدا میں وزیراعظم نواز شریف کو ای سی او سربراہ اجلاس کا صدرمنتخب کیا گیا۔ اس موقع پروزیراعظم نوازشریف کا کہنا تھا کہ علاقائی روابط کومضبوط بنانے کے لیے ای سی او اہم فورم ہے، اقتصادی تعاون تنظیم کا خطہ بے پناہ وسائل اور صلاحیتوں سے مالا مال ہے اوردنیا کی 52 فیصد تجارت اسی خطے کے ذریعے ہوتی ہے۔

ترک صدررجب طیب اردگان کا ای سی اوسربراہ اجلاس سے خطاب کرتے ہوئے کہنا تھا کہ ترکی نے علاقائی ترقی کے لیے مختلف منصوبے شروع کیے ہیں، علاقائی ترقی کے منصوبوں میں شرکت کے لیے رکن ممالک کو دعوت دیتا ہوں۔ ان کا کہنا تھا کہ خطے کی ترقی کے لیے علاقائی روابط بہت ضروری ہیں اورعلاقائی روابط کے فروغ کے لیے ترکی اپنا کردار ادا کررہا ہے، رکن ملکوں کوحقیقی ترقی کے لیے توانائی کے منصوبوں پرتوجہ دینے کی ضرورت ہے۔

ایران کے صدر حسن روحانی کا ای سی او اجلاس سے خطاب کرتے ہوئے کہنا تھا کہ 21 ویں صدی ایشیا کی ابھرتی ہوئی معیشت کا دورہے اورمستقبل میں مواصلاتی روابط سے یورپ اورایشیا منسلک ہوں گے۔ ای سی اواجلاس سے تنظیم کے طویل المدتی پروگرام پرعملدرآمد میں مدد ملے گی، مغرب تک رسائی کے لیے مشرقی مواصلاتی ذرائع موثراورمختصرترین ہیں، اقتصادی سرگرمیاں مغرب سے مشرق کی طرف منتقل ہو رہی ہیں کیونکہ ای سی او ممالک سے گزرنے والا راستہ مغرب کے لیے مختصر ترین روٹ ہے۔ اقتصادی تعاون تنظیم کے ممالک میں رابطوں کا فروغ مواصلاتی شعبے میں ترقی کا باعث بنے گا جب کہ روابط کا فروغ ایشیائی ممالک کے مستقبل اورترقی کی ضمانت ہے۔

تاجکستان کے صدر امام علی رحمانوف کا کہنا تھا کہ اقتصادی تعاون تنظیم جغرافیائی لحاظ سے بہت اہم ہے اور ای سی او فورم سے مختلف شعبوں میں تعاون کی نشاندہی ہو گی۔ ان کا کہنا تھا کہ مشترکہ بنیادی ڈھانچے کی ترقی اوربنیادی ضرورتوں پرتوجہ دینا ہوگی جب کہ رکن ملکوں کی ترقی تاجکستان کی پالیسی کا حصہ ہے۔ خطے میں قابل تجدید توانائی کے وسائل موجود ہیں، موسمیاتی تبدیلی سے نمٹنے کے لیے مشترکہ حکمت عملی کی ضرورت ہے جب کہ مستقبل کی ضروریات کے لیے پانی کے وسائل کو محفوظ بنانا ہو گا۔

امام علی رحمانوف نے کہا کہ رکن ملکوں میں مناسب شراکت داری پر بھی توجہ کی ضرورت ہے اور ترقی کے ثمرات عوام تک پہنچانے کے لیے مشترکہ کوششیں کرنا ہوں گی، مشترکہ حکمت عملی سے قدرتی آفات کے نقصانات کو کم کیا جاسکتا ہے۔ انہوں نے کہا کہ افغانستان اور خطے کے مسائل کے حل کے لیے مکمل تعاون کریں گے، ترقی کے اہداف کے حصول کے لیے وژن 2025 پر عملدرآمد کرانا ہو گا، ای سی او ممالک کو علاقائی اور عالمی تنظیموں کے ساتھ مل کر کام کرنا ہوگا۔ وسط ایشیائی ممالک کی راہداری کے لیے افغانستان انتہائی اہم ملک ہے اور افغانستان میں امن وامان پورے خطے کے مفاد میں ہے

ایک میچ کیلئے اپنی زندگی خطرے میں نہیں ڈال سکتا

کوئٹہ گلیڈی ایٹرز کے کھلاڑی لیوک رائٹ نے فائنل میچ کیلئے لاہور نہ آنے کا اعلان کیا تو پاکستانیوں نے سوشل میڈیا پر انہیں آڑے ہاتھوں لے لیا اور شدید تنقید کا نشانہ بنایا جس پر لیوک رائٹ بھی میدان میں آ گئے ہیں اور ایسا جواب دیدیا کہ آپ بھی سوچ میں پڑ جائیں گے۔

”جب عمران خان لاہور میں فائنل کے انعقاد کو پاگل پن قرار دے رہے ہیں تو میں کیسے جا سکتا ہوں“

تفصیلات کے مطابق کوئٹہ گلیڈی ایٹرز پلے آف مرحلے میں پشاور زلمی کو شکست دے کر فائنل میں پہنچ چکی ہے تاہم لیوک رائٹ، ٹائمل ملز اور کیوین پیٹرسن نے لاہور نہ آنے کا اعلان کیا ہے۔ لیوک رائٹ کا کہنا تھا کہ وہ سیکیورٹی خدشات کے باعث لاہور نہیں آئیں گے، میری فیملی ہے اور میں ایک میچ کیلئے اپنی زندگی خطرے میں نہیں ڈال سکتا۔

It's with a heavy heart I will not be coming to Lahore. I have a young family and for me a game of cricket is just not worth the risk 1/3
— Luke Wright (@lukewright204) February 28, 2017

اس اعلان کے بعد برطانوی کرکٹر کو پاکستانیوں کی جانب سے شدید تنقید کا نشانہ بننا پڑا اور لوگوں نے طرح طرح کے پیغامات کے ذریعے اپنے جذبات کا اظہار کیا۔ ایک صارف نے لکھا کہ ”لاہور میں لاکھوں لوگ رہتے ہیں اور ہمارے بھی خاندان ہیں، ہم پرامن قوم ہیں اور تم یہ دیکھو گے۔“

لیوک رائٹ بھی اس پیغام پر چپ نہ رہ سکے اور جواب دیتے ہوئے کہا کہ”اس پیغام کے ساتھ تو آپ کچھ زیادہ پرامن نہیں لگتے۔“

ریلے روسو نے پی ایس ایل کو الوداع کہہ دیا

ایمزٹی وی(اسپورٹس)کوئٹہ گلیڈ ی ایٹر کے کھلاڑی ریلے روسو نے بھی لاہور آکر فائنل میچ نہ کھیلنے کا اعلان کردیا ہے ۔

سماجی رابطے کی ویب سائٹ ٹوئٹر پر اپنے پیغام میں انہوں نے اعلان کیا جن لوگوں کو لاہور میں فائنل کے حوالے سے میرے فیصلے کا نہیں پتہ انہیں افسردہ دل سے بتا نا چاہتا ہوں کہ میں پی ایس ایل کے فائنل میچ میں شرکت نہیں کر رہا ۔

انہوں نے کہا کہ کوئٹہ گلیڈ ی ایٹر کے مداح سب سے زیادہ زیادہ عاجزی پسند اور پرجوش ہیں ،مجھے سپورٹ کرنے اور وقت دینے کے لیے تمام مداحوں کا شکریہ کرتا ہوں۔

اس سے قبل کوئٹہ گلیڈ ی ایٹر کے کیون پیٹرسن اور لیوک رائٹ نے بھی فائنل میچ نہ کھیلنے کا اعلان کیا تھا ۔واضح رہے کہ اس سے قبل نجی نیوز چینل نے دعویٰ کیا تھا کہ ریلے روسو نے پاکستان آکر میچ کھیلنے کے لیے رضا مندی ظاہر کردی ہے ۔

For those still unsure its with a sad heart that I must announce that i will not be taking part in the final.
— Rilee Rossouw (@Rileerr) March 1, 2017

پی ایس ایل کے فائنل سے پہلے ڈرافٹنگ کا فیصلہ

ایمزٹی وی(اسپورٹس)پاکستان سپر لیگ (پی ایس ایل)کے لاہور میں ہونے والے فائنل کے8 غیر ملکی کھلاڑیوں کو منتخب کرنے کیلئے جمعہ کو دوبارہ ڈرافٹنگ کرنے کا فیصلہ کرلیا گیا ہے۔

میڈیا ذرائع کے مطابق پی ایس ایل فائنل کیلئے دوبارہ ڈرافٹنگ جمعہ کو ہوگی اور 50 سے زائد غیرملکی کھلاڑی ڈرافٹنگ میں شریک ہونگے۔

فائنل کھیلنے والی دونوں ٹیمیں 8 کھلاڑیوں کی ڈرافٹنگ کریں گی۔واضح رہے کہ لاہور میں فائنل میں 5 مارچ کو کھیلے جانیوالے پی ایس ایل کے فائنل کیلئے کوئٹہ گلیڈی ایٹرز کے غیر ملکی کھلاڑیو ں نے پاکستان آنے سے منع کردیا تھا ۔

آرمی چیف کی ترک فوج کے سربراہ سے ملاقات

ایمزٹی وی(راولپنڈی)چیف آف آرمی اسٹاف جنرل قمر جاوید باجوہ سے ترک چیف آف جنرل اسٹاف جنرل ہولوسی اقر سے ملاقات ہوئی ہے جس میں علاقائی سلامتی سے متعلق امور پر تبادلہ خیال کیا گیا ۔

آئی ایس پی آر کی جانب سے جاری بیان میں کہا گیا ہے کہ ترک چیف آف جنرل اسٹاف نے جی ایچ کیو کا دورہ کیا جہاں انہوں نے یاد گار شہدا پر پھول چڑھائے اور فاتحہ خوانی کی ۔

اس موقع پر جنرل قمر جاوید باجوہ کا کہنا تھا کہ دونوں ممالک کی فوجوں کے درمیان تعاون مزید بہتر ہونا چاہیے ،بہترفوجی تعلقات کے نتیجے میں خطے میں سیکیورٹی کے بہتر اثرات مرتب ہونگے ۔

اس موقع پر جنرل ہولوسی اقر نے دہشت گردی کے خلاف جنگ میں پاک فوج کی قربانیوں کو سراہا اور آپریشن رد الفساد کی بھی تعریف کی ۔

پاکستان کے عوام کی ضرورت امن و امان اور ترقی ہے، وزیر داخلہ

ایمزٹی وی(اسلام آباد)وفاقی وزیرداخلہ چوہدری نثار نے پی ایس ایل فائنل کی کیلئے مکمل یقین دہانی کراتے ہوئے کہا کہ فائنل کیلئے تمام سکیورٹی ادارے ایک پیج پر ہیں اور ملک میں کرکٹ میچ ہونے سے پاکستان کی عزت بڑھے گی۔

تفصیلات کے مطابق وفاقی وزیرداخلہ چوہدری نثار نے بیان جاری کرتے ہوئے کہا کہ ملک میں ہر صورت کرکٹ ہوگی۔فائنل کیلئے فول پروف سکیورتی انتظامات کیے جارہے ہیں۔ پاکستان کے عوام کی ضرورت امن و امان اور ترقی ہے۔

انہوں نے عمران خان پر سخت تنقید کرتے ہوئے کہا کہ ہر چیز پر سیاست اور پوائنٹ اسکورنگ کرنا نامناسب ہے،نااہلی کی مثالیں قائم کرنے والے الزام تراشی پر اتر آئے ہیں۔ چوہدری نثار نے مزید کہا کہ پاکستان میں حکومت کرنا مشکل ترین کام ہے ،ایک طرف مسائل ہے تو دوسری طرف عوامی توقعات ہوتی ہیں۔

یاد رہے کہ آرمی چیف جنرل قمر جاوید باجوہ پہلے ہی لاہورمیں 5 مارچ کو ہونے والے پی ایس ایل فائنل کیلئے مکمل تعاون کی یقین دہانی کراچکے ہیں۔

عمران خان کے بیان پر پی ٹی آئی کی وضاحت

ایمزٹی وی(اسلام آباد)عمران خان کی جانب سے لاہور میں پاکستان سپر لیگ کا فائنل کرانے کی مخالفت پر پی ٹی آئی نے وضاحتیں دینی شروع کر دی ہیں۔

مرکزی ترجمان فواد چودھری کہتے ہیں کہ عمران خان کرکٹ کے مخالف ہیں، نہ پی ایس ایل کے مگر ایسے پی ایس ایل کا کیا فائدہ جو کرفیو لگا کر تیس ہزار سکیورٹی اہلکاروں کے سائے میں کرایا جائے؟پی ٹی آئی کے مرکزی ترجمان فواد چودھری نے واضح کیا کہ پنجاب اسمبلی میں پی ایس ایل رکوانے کی قرارداد پارٹی پالیسی کے منافی تھی۔قرارداد تو واپس لے لی گئی ہے مگر فواد چودھری نے بتا دیا ہے کہ عمران خان پی ایس ایل کا فائنل دیکھنے نہیں آئیں گے۔

تعلیم کے زریعے جمہوری حقوق کا حصول

ایمز ٹی وی(تعلیم / کوئٹہ) مسلم لیگ کے سینیٹر نوابزادہ میر نعمت اللہ خان زہری نے کہا کہ قلم و کتاب ہی چیلنجز سے نمٹنے کے ہتھیار ہیں صرف تعلیم ہی سے جمہوری حقوق کا حصول ممکن ہے۔

بلوچستان کے عوام آج شروع ہونے والے تعلیمی سال کی کامیابی کیلئے اپنے بچوں کو اسکولوں میں داخل کرائیں تعلیم حاصل کئے بغیر پسماندگی کا خاتمہ ممکن نہیں ۔

صوبے میں معیاری تعلیم کے فروغ میں یونین کونسل کی سطح مقامی اساتذہ اپنی ذمہ داریاں ادا کرتے ہوئے کردار ادا کریں۔ بلوچستان حکومت تعلیم اور صحت کے شعبوں پر خصوصی توجہ دے رہی ہے خطیر رقم مختص کرکے تعلیم کے حصول کی راہ میں رکاوٹیں ختم کردی گئی ہیں ۔

میٹرک کے امتحانات سے قبل تربیتی ورکشاپ کا انعقاد

ایمزٹی وی (تعلیم /بہاولپور) تعلیمی بورڈ بہاولپورکے زیر اہتمام یکم مارچ سے شروع ہونیوالے سالانہ امتحان میٹرک 2017ء کو صاف شفاف اور فول پروف بنانے بارے مختلف اقدامات اور ہدایات کو امتحانی انسپکٹرز تک پہنچانے کیلئے ورکشاپ کا انعقاد کیاگیا ۔

جس میں میں ضلع بہاولپور سے تعلق رکھنے والے موبائل انسپکٹر ز اور اسپیشل اسکواڈ ممبران اور ڈسٹری بیوٹر ز نے شرکت کی۔ چیئرمین تعلیمی بورڈ بہاولپور پروفیسر رانا مسعود اخترنے انسپکٹر ز کو تاکید کی کہ سکیورٹی پر نظر رکھی جائے اور کوئی موبائل انسپکٹر امتحانی مرکز میں اپنا سیل فون لے کر نہیں جائیگا۔

امتحانی مراکز کے ارد گرد دفعہ 144نافذ ہوگی۔ انہوں نے بتایا کہ بہاولپور بورڈ کے تینوں اضلاع میں 218امتحانی مراکز قائم کیے گئے ہیں۔ میٹرک پارٹI-(9th) اور پارٹII-(10th) کے کل امیدوارن کی تعداد 164491ہے۔

صاف پانی کی فراہمی کے لئے منصوبہ بندی

ایمز ٹی وی (آزاد کشمیر)صدر آزاد جموں و کشمیر سردار مسعود خان نے مولانا سعید یوسف کی قیادت میں ملاقات کرنے والے وفد سے گفتگو کرتے ہوئے کہا کہ وزیراعظم کی قیادت میں حکومتی ٹیم نے آزاد کشمیر کے تمام پسماندہ علاقوں کی ترقی ، شاہرات کی بہتر ی ، پختگی ، صحت کی سہولیات اور عوام کو پینے کے صاف پانی کی فراہمی کے لئے منصوبہ بندی کر لی ہے ۔ ملاقات کے دوران آزاد کشمیر کے مسائل پر بھی تبادلہ خیال کیا گیا ۔

Page 1867 of 2388