ایمزٹی وی (صحت /کراچی ) ڈائو یونیورسٹی آف ہیلتھ سائنسز کے قائم مقام وائس چانسلر پروفیسرمسعود حمید خان نے سول ہسپتال کراچی میں کام کرنے والے پوسٹ گریجویٹ ڈاکٹرزکے وظیفے کے معاملے پر پیرکو ڈائو میڈیکل کالج میں پوسٹ گریجویٹ ڈاکٹرز کے ساتھ ایک میٹنگ کی جس میں انکے وظیفہ کی صورتحال کے بارے میں آگاہ کیا۔

اس میٹنگ میں پروفیسر مسعود حمید خان نے پوسٹ گریجویٹ ڈاکٹروں کو بتایا کہ ڈائو یونیورسٹی آف ہیلتھ سائنسز نے اس معاملے پر متعدد بار سندھ کے وزیراعلیٰ کے سیکریٹری برائے جامعات کے ذریعے محکمہ صحت اور محکمہ خزانہ کو یاددہانی کرائی کہ پوسٹ گریجویٹ ڈاکٹروں کے وظیفے میں اضافہ شدہ وظیفے کی رقم کی ادائیگی کو ممکن بنائیں۔

تاہم ابھی تک باوجود متعدد بار یاددہانیوں کے ابھی تک کوئی مثبت جواب نہیں دیا گیا۔ اس موقع پر پروفیسر مسعود حمید خان نے پوسٹ گریجویٹ ڈاکٹروں کوہڑتال پر جانے سے گریز رہنے کو کہااور بتایا کہ ڈائو یونیورسٹی اس معاملے میں مسلسل کوشاں ہے اور جلد ہی کوئی مثبت نتیجہ حاصل ہوگا۔

ایمز ٹی وی (صحت /کراچی ) ڈپٹی میئر کراچی ڈاکٹر ارشد عبداللہ وہرہ نے محکمہ مالیات اور محکمہ ہیلتھ اینڈ میڈیکل سروسزکے سربراہان کو ہدایت کی ہے کہ کے ایم سی اسپتالوں کے نرسنگ اسٹاف کے ترقیوں اور یوٹیلیٹی الائونس کی ادائیگی کے معاملات ترجیحی بنیادوں پر حل کئے جائیں۔ یہ بات انہوں نے پیر کی سہ پہر اپنے دفتر میں کے ایم سی اسپتالوں کی جوائنٹ نرسز ایکشن کمیٹی کے ایک وفد اور کے ایم سی افسران کے ساتھ ایک اجلاس کی صدارت کرتے ہوئے کہی۔

اجلاس کے دوران نرسز ایکشن کمیٹی کے نمائندوں نے اپنے مسائل سے ڈپٹی میئر کراچی کو آگاہ کیااور بتایا کہ انہیں یوٹیلیٹی الائونس ادا نہیں کیا جا رہا ہے جبکہ اسٹاف کی اپ گریڈیشن کے علاوہ نرسوں کے وظیفے کی ادائیگی کا مسئلہ بھی درپیش ہے۔ ڈپٹی میئر نے مشیر مالیات کو ہدایت کی کہ فوری طور پر نرسنگ اسٹاف کو یوٹیلیٹی الائونس کی ادائیگی کے لئے مارچ کی تنخواہ میں اس الائونس کا اضافہ کیا جائے۔

ایمز ٹی وی (تعلیم /نوابشاہ) شہید بینظیر بھٹو یونیورسٹی ضلع شہید بینظیر آباد کے سینڈیکیٹ کا تیرواں اجلاس وائس چانسلر ارشد سلیم کی زیر صدارت منعقد ہوا۔ جس میں ایم۔ این۔ اے ڈاکٹر عذرا فضل پیچوہو، ایڈیشنل سیکریٹری تعلیم مسز عزیز فاطمہ، ھائر ایجوکیشن کمیشن کے نمائندہ وائس چاںسلر قائد عوام یوںیورسٹی ڈاکٹر عبدالکریم بلوچ، وائس چاںسلر لیاری یوںیورسٹی ڈاکٹر اختر بلوچ، بیرسٹر چوہدری جمیل، شادی خان لاڑک، غلام رسول خاصخیلی، ڈاکٹر لیاقت زرداری، ڈاکٹر طیبہ ظریف، مولوی عبدالطیف ننگراج رؤف لغاری، آفتاب زرداری اور دیگرممبران نے شرکت کی۔

سینڈیکٹ میں متفقہ طور پر مالی سال 2016-2017 کے سالانہ بجٹ، یونیورسٹی کیمپس کی تعمیراتی کاموں کے اخراجات اور ملازمین کے گروپ انشورنس کی سہولت اور اساتذہ کے لئے پی ایچ ڈی اور ایمٖ فل الائونس دینے کی منظوری دی گئی۔ سنڈیکیٹ سے متفقہ طور پر شہید بینظیر بھٹو یونیورسٹی میں اپنی خدمات دینے والے چھوٹے بڑے تمام ملازمین اور ان کے خاندان کو میڈیکل کی سہولیات دینے کا فیصلہ کیا گیا۔

اجلاس میں بیوٹیفکشن پلان اور انتظامی طور پر کیے گئے اقدامات کی تعریف کی گئی اس موقع پر ایم این اے ڈاکٹر عذرا فضل پیچوہو نے کیمپس کا دورہ کیا اور نئے تعمیر شدہ آرٹس بلاک کا افتتاح کیا اور جاری تعمیراتی کاموں پراطمینان کا اظہار کیا۔

ایمز ٹی وی ( صحت /کراچی) نیورولوجی ایویرنس اینڈ ریسرچ فائونڈیشن کے صدر پروفیسرمحمد واسع شاکر نے کہا ہے کہ پاکستان میں مرگی کے مریضوں کی تعداد 20لاکھ سے تجاوز کرچکی ہے جن میں سے اکثریت کو علاج معالجے کی سہولیات میسر نہ ہونے کے باعث معذوری اور غیر یقینی مستقبل کا سامناہے بدقسمتی سے وفاقی اور صوبائی حکومتیں مرگی کے مرض پر قابو پانے کے لیے خاطر خواہ اقدامات نہیں کر رہیں ، مرگی کے علاج کے لیے ادویات اکثر ناپید ہوجاتی ہیں جبکہ جو ادویات میسرہوتی ہیں ان کی قیمت انتہائی زیادہ ہے ، حکومت کو چاہیے کہ وہ مرگی کے علاج کے لیے ادویات کی فراہمی کو یقینی بنائے ۔ وہ مرگی کے عالمی دن کی مناسبت سے کراچی پریس کلب میں پریس کانفرنس سے خطاب کر رہے تھے ۔

اس موقع پر دماغی امراض کے ماہر پروفیسر عارف ہریکر اور نیورولوجی ایویرنس اینڈ ریسرچ فائونڈیشن کے سیکریٹری ڈاکٹر عبد المالک بھی موجود تھے ۔ پروفیسر محمد واسع نے کہا کہ حکومتی بے حسی کے سبب مرگی قابل علاج ہونے کے باوجود اس سے متاثرہ افراد میں معذوری بڑھ رہی ہے اورمرگی سے متاثرہ افراد کی اکثریت موت کے منہ میں چلی جاتی ہے ، انہوں نے کہا کہ سری لنکا جیسے ممالک کی حکومتوں نے اس بیماری کی روک تھام کے لیے ٹاسک فورس قائم کر لی ہیں،بھارت نے مرگی کے مریضوں کے لیے ووکیشنل ٹریننگ سینٹر بنائے ہوئے ہیں تاکہ متاثرہ مریضوں کو معاشرے کا کارآمد شہری بنایا جائے۔

ایمز ٹی وی (تعلیم /حب) گورنر بلوچستان و چانسلر محمد خان اچکزئی منگل کو لسبیلہ یونیورسٹی آف واٹر اینڈ میرین سائنسس اوتھل پہنچیں گے جہاں پر وہ دوسری کانوکیشن میں مہمان خاص کی حیثیت سے شرکت کرینگے اور یونیورسٹی کے طلباء وطالبات میں ڈگریاں اور گولڈن میڈل تقسیم کرینگے اس سلسلے میں لسبیلہ یونیورسٹی اوتھل میں تیاریوں کو حتمی شکل دے دی گئی ہے۔

کانوکیشن کی تقریب سے گورنر بلوچستان محمد خان اچکزئی ،وائس چانسلر لسبیلہ یونیورسٹی ڈاکٹر دوست محمد بلوچ ودیگر خطاب بھی کرینگے ۔

ایمز ٹی وی(انٹرٹینمنٹ)بالی ووڈ کے سپراسٹار سلمان خان کورین فلم ’اوڈ ٹو مائی فادر‘ کے ریمیک میں کام کریں گے اور اس فلم کی ہدایت علی عباس ظفر کریں گے۔بھارتی میڈیا کے مطابق فلم کی کہانی کو ہندوستان ثقافت و روایات کے مطابق ڈھالا جائے گا اور اس کا پس منظر برصغیر کی کہانی پر مبنی ہوگا۔

فلم کی کہانی ایک ایسے آدمی کی ہوگی جو بچپن میں تقسیم کا درد جھیلتا ہے پر اپنے خاندان کو ہمیشہ ساتھ رکھنے کا وعدہ کرتا ہے، اس وعدے کو پورا کرنے میں اسے60 سال لگ جاتے ہیں اور 60 سال میں کتنا کچھ بدل جاتا ہے، یہی فلم میں دکھایا جائے گا۔

یاد رہے کہ ہدایت کار علی اس سے قبل سلمان کی فلم ’سلطان‘ کی ہدایت کاری کرچکے ہیں۔

ایمز ٹی وی ( تعلیم / جام شورو) لیاقت یونیورسٹی آف میڈیکل اینڈ ہیلتھ سائنسز جام شورو کے رجسٹرار ڈاکٹر روشن علی بھٹی کے اعلانیہ کے مطابق لمس یونیورسٹی کا 16واں کانووکیشن 25فروری کو دس بجے منعقد ہوگا۔

کانووکیشن میں گورنر سندھ و جامعات کے چانسلر محمد زبیر صدارت کرینگے جبکہ وزیر اعلی سندھ سید مراد علی شاہ مہمان خاص ہونگے

کانووکیشن کی تقریب میں لمس یونیورسٹی کے کامیاب ہونے والے طلبہ وطالبات کو گولڈ میڈل ،سلور میڈل اور اسناد دی جائیں گی۔

ایمز ٹی وی( تعلیم / کراچی) وفاقی وزیر برائے منصوبہ بندی و ترقی احسن اقبال نے پیر کے روز داؤد یونیورسٹی آف انجینئرنگ اینڈ ٹیکنالوجی کے تمام شعبہ جات کے طلباء کی جانب سے بنائے جانے والے پروجیکٹ کی نمائش کا افتتاح کیا ۔ داؤد یونیورسٹی کے طلباء نے توانائی ، آئل گیس فیلڈ ، بجلی کی بچت اور دیگر اہم عوامل کو اُجاگر کرنے کیلئے پروجیکٹ بنائے جنہیں وفاقی وزیر احسن اقبال نے انتہائی سراہا ۔ وفاقی وزیر نے نمائش کے تمام اسٹالز کا دورہ کیا اور پروجیکٹ کا معائنہ کرنے کے ساتھ طلباء سے پروجیکٹ کے بارے میں تبادلہ خیال کیا ۔

وائس چانسلر داؤد یونیورسٹی ڈاکٹر فیض اللہ عباسی ، پرو وائس چانسلر ڈاکٹر پیر روشن دین شاہ راشدی ، اکیڈمک کوآرڈینٹر ڈاکٹر دوست علی خواجہ ، قائم مقام رجسٹرار کیپٹن (ر) سید وقار حسین شاہ ، تمام شعبوں کے چیئرپرسنز وفاقی وزیر احسن اقبال کے ہمراہ تھے۔ پروجیکٹ نمائش اور ایونٹ کے انتظامات چیئرپرسن الیکٹرونک انجینئرنگ ڈاکٹر ثمرین عامر نے کئے ۔ بعد ازاں وفاقی وزیر نے طلباء اور فیکلٹی ارکان سے خطاب کیا ۔

ابتدائی کلمات میں وائس چانسلر ڈاکٹر فیض اللہ عباسی نے وفاقی وزیر احسن اقبال کا داؤد یونیورسٹی آمد پر شکریہ ادا کیا ۔ اس موقع پر خطاب کرتے ہوئے وفاقی وزیر احسن اقبال نے کہا کہ تعلیم کے شعبے میں بہتری لانا ہماری اولین ترجیح ہے ، ریسرچ اینڈ ڈویلپمنٹ پر خصوصی توجہ دے رہے ہیں ، غیر ملکی یونیورسٹیز سے معاہدے کررہے ہیں جس کے شعبہ تعلیم پر بڑے مثبت اثرات مرتب ہوں گے ، داؤد یونیورسٹی کے طلباء کی محنت و لگن نے بے حد متاثر کیا ہے جن کا کچھ کر گزرنے کا جذبہ قابل تعریف ہے ۔

وفاقی وزیر احسن اقبال نے شعبہ تعلیم میں حکومتی اقدامات کا تذکرہ کرتے ہوئے کہا کہ 2010ء سے 2013 ء تک ہائر ایجوکیشن کا بجٹ ایک سو ارب روپے تھالیکن پچھلے تین برسوں میں ہماری حکومت نے اسے 215؍ ارب روپے کردیا جو 100؍ فیصد سے بھی زیادہ کا اضافہ ہے ۔ ہمار ے پروگرام ویژن 2025ء کے تحت ہائر ایجوکیشن کو مختلف شعبوں میں بڑھایا جارہاہے ، آئندہ تین برسوں میں پاکستان کے ہر ضلع میں یونیورسٹی کیمپس بنایا جائے گا تاکہ کسی بھی پسماندہ علاقے کا رہائشی صرف اس وجہ سے ہائر ایجوکیشن سے محروم نہ رہے کہ وہ بڑے شہر میں تعلیم کے ساتھ ہاسٹل کے اخراجات برداشت نہیں کرسکتا تھا ۔

ہر نوجوان جو ہائر ایجوکیشن کا حقدار ہے اسے اس کے گھر کے دروازے پر ہائر ایجوکیشن یونیورسٹی کیمپس کی صورت میں دستیاب ہوگی ۔ وفاقی وزیر کی تقریر کے اختتام پر ڈاکٹر ثمرین عامر نے شعر پڑھا جس کا جواب دیتے ہوئے معزز مہمان احسن اقبال نے اقبال کا شعر پڑھا۔