ایمز ٹی وی(کراچی) پاک بحریہ کے زیر انتظام کثیرالقومی بحری مشق امن 17 کا بین الاقوامی پرچم کشائی کی تقریب کے ساتھ باقاعدہ آغاز ہوگیا ہے، اس موقع پر ایڈمرل عارف اللہ حسینی کمانڈر پاکستان فلیٹ نے مشق امن زندہ باد پاکستان پائندہ باد کا نعرہ بھی لگایا۔

ترجمان پاک بحریہ کی جانب سے جاری بیان کے مطابق کثیر القومی بحری مشق امن 17 کا بین الاقوامی پرچم کشائی کی رنگا رنگ تقریب کے ساتھ آج باقاعدہ طور پر آغاز ہوگیا۔ مشق کی افتتاحی تقریب پاکستان نیوی بینڈ کی روایتی دھنوں کے ساتھ پاکستان نیوی ڈاکیارڈ میں منعقد ہوئی۔ امن17 میں شریک ممالک کے بحری جہازوں کے عملے ، مندوبین، سفراء اور پاکستان نیوی کے افسروں اور جوانوں کی ایک بڑی تعداد نے تقریب میں شرکت کی۔

اس موقع پر خطاب کرتے ہوئے کمانڈر پاکستان فلیٹ نے کہا کہ ہم سب یہاں امن و سلامتی کو یقینی بنانے کے مشترکا مقصدکے تحت جمع ہوئے ہیں تاکہ اس دنیا کو تمام انسانیت کے لیے امن کاگہوارہ بنایا جائے اور ترقی اور خوشحالی کو فروغ دیا جائے۔ ہمارا آئین بھی ہم سے اسی بات کا تقاضہ کرتا ہے۔ ہم سب کو ساتھ لے کر چلنے پر یقین رکھتے ہیں اور ہم سمجھتے ہیں اگر ساری دنیا متحد ہوجائے تو یہ ہم سب کے بہترین مفاد میں ہوگا۔ انہوں نے کہا کہ خطے میں ہونے والے جیو اسٹریٹیجک تغیرات کے باعث پاکستان کو کئی ایک چیلنجز کا سامنا ہے۔تاہم ان تبدیلیوں نے پاکستان کو بہت سے مواقع بھی فراہم کئے ہیںجو نہ صرف پاکستان بلکہ خطے میں ایک محفوظ ماحول کا تقاضا کرتے ہیں ۔

ایڈمرل حسینی نے کہا کہ پاک بحریہ نے بحر ہند کے تحفظ میں ہمیشہ اہم کردار ادا کیا ہے۔ خطے میں کلیدی کردار کا حامل ہونے کی وجہ سے پاکستان کی میری ٹائم فورسز دیگر بحری افواج کے ساتھ مل کرگہرے پانیوں میں منشیات کی تجارت، ہتھیاروں اورانسانی اسمگلنگ، دہشت گردی اور بحری قذاقی کے انسداد میں اہم کردار ادا کر رہی ہیں۔ خطے میں دیر پا امن کے قیام اور ان خطرات سے نمٹنے کے لئے ہمیں مشترکہ کاوشیں کرنے کی ضرورت ہے۔ انہوں نے کہا کہ پاک چین اقتصادی راہداری اور گوادر پورٹ کے مکمل طور پر فعال ہونے کی صورت میں یہ تعاون مزید اہمیت اختیار کرجائے گا۔ یہ اہم منصوبے نہ صرف ملکی اور علاقائی سطح پربلکہ خطے سے باہر بھی خوشحالی لانے کا سبب بنے گا۔ 

ایڈمرل حسینی نے کہا کہ کثیر القومی مشقیں امن17 خطے میں کام کرنے والی بحری فورسز کی جوابی کاروائی کی صلاحیتوں،حکمت عملی اورطریقہ کار میں بہتری لائیں گی۔ اس مشقوں کامقصد باہمی مفاہمت کا فروغ ہے جو رسمی اور غیر رسمی روابط کی بدولت مزید فروغ پائے گی۔  یہ مشقیں شرکاء کے مابین باہمی اور اشتراکی سیکیورٹی کے تصور کو مزید واضح کریں گی۔ پاکستان اوربالخصوص پاک بحریہ کو ان کاوشوں میں کلیدی کردار ادا کرنے پر فخر ہے۔

کمانڈر پاکستان فلیٹ نے امن مشقوں میں شرکت کرنے والی بحری افواج کو خوش آمدید کہا اور امید ظاہر کی کہ ان کی ایک ساتھ موجودگی سے مشترکہ تعاون اور بھائی چار ہ مزید فروغ پائے گا جس سے تنازعات میں کمی آئے گی اور باہمی اتفاق پید ا ہوگا جس کی بدولت دیرپا امن کے قیام میں مدد ملے گی۔ انہوں نے خطے میں قیام امن کے لئے پاکستان کے عزم کی حمایت پر امن مشقوں میں شریک ممالک کا شکریہ بھی ادا کیا۔

پاکستان نیوی2007 سے ہر دو سال بعد امن مشقیں منعقد کرتی ہے ۔ان مشقوں کا آغاز پاکستان بحریہ کی کاوشوں سے ہوا جن کا مقصد تمام بحری افواج کو ایک پلیٹ فارم پر جمع کرنا تھا۔حالیہ امن مشقیں اس سلسلے کی پانچویں کڑی ہیں۔ان مشقوں کے شرکاءکی تعداد میں مسلسل اضافہ ہو رہا ہے۔اس برس 36 ممالک کے بحری جہاز، ہوائی جہاز، اسپیشل آپریٹنگ فورسز، آبزرور ز اور اسپیکرز ان مشقوں میں شرکت کر رہے ہیں۔ بحری مشقوں کے علاوہ امن مشقوں کا ایک اہم پہلوتین روزہ انٹرنیشنل میری ٹائم کانفرنس بھی ہے جو نیشنل میری ٹائم پالیسی ریسرچ سینٹر کے زیر اہتمام منعقد کی جاتی ہے۔  

ایمز ٹی وی(اسپورٹس) جنوبی افریقہ سری لنکا کو وائٹ واش کرنے کے ساتھ ہی آئی سی سی کی ون ڈے رینکنگ میں پہلی پوزیشن پر آگئی ۔ 

تفصیلات کے مطابق سری لنکا کو 5ایک روزہ میچوں کی سیریز میں وائٹ واش کرنے والی جنوبی افریقہ کی ٹیم کی پوزیشن مزید مضبوط ہو گئی جو رینکنگ میں پہلے نمبر پر آگئی ہے ۔

کپتان اے بی ڈویلیرز نے اپنے بیان میں کہا ہے کہ ”ہم آئی سی سی کی ون ڈے رینکنگ میں پہلے نمبر پر آنے کے بعد بے حد خوش اور پرجوش ہیں “۔ ٹیم میں دو سال پہلے گزرنے والے ورلڈ کپ سے قبل مشکل صورت حال تھی مگر ہم نے ٹیم کو دوبارہ مضبوط کرنے اور ون ڈے کرکٹ میں اچھی کارکردگی کا تسلسل برقرار رکھنے کیلئے سخت محنت کی جس کا پھل ملا ہے “۔

اس سے قبل نومبر 2014ءمیں جنوبی افریقہ کی ٹیم ون ڈے رینکنگ میں پہلی پوزیشن پر تھی جس کے بعد بھارت نے سری لنکا کو 0-5سے وائٹ واش کرنے کے بعد پہلی پوزیشن پر قبضہ کر لیا تھا اور پھر اس کے بعد یہ اعزاز آسٹریلیا نے جنوبی افریقہ کو 1-4سے ہرانے کے بعد حاصل کیا تھا ۔

ایمز ٹی وی(اسپورٹس) پی ایس ایل میں شریک کھلاڑیوں کے مشتبہ افراد سے رابطوں کا انکشاف ہوا ہے ۔ملوث کھلاڑیوں کے خلاف کارروائی کا آغاز پی سی بی نہیں بلکہ آئی سی سی کے انٹرنیشنل انویسٹی گیٹرز نے کیا ۔

ذرائع کے مطابق کئی کھلاڑیوں نےسٹے بازوں کو خراب کارکردگی کا یقین دلایا تھا ۔کچھ کھلاڑیوں نے سٹے بازوں کی پیشکش کو قبول کیا اور کچھ کھلاڑیوں نے سٹے بازوں کی پیشکش سن کر بتایا نہیں جن کھلاڑیوں کو واپس وطن بھیجا گیا انہوں نے سٹے بازوں کی پیشکش کو قبول کیا۔

ذرائع کا یہ بھی کہنا ہے کہ کراچی کنگز کے شاہ زیب حسن کے موبائل فون کا ڈیٹا حاصل کیا گیا۔پی ایس ایل کی افتتاحی تقریب سے پہلے سٹے بازوں کا گروہ کھلاڑیوں کے ہوٹل میں نظر آیا۔پی ایس ایل میں کھلاڑیوں کے خلاف کارروائی آئی سی سی کے گرینڈ آپریشن کا حصہ ہے۔شاہ زیب حسن اورمحمد عرفان کو فیلڈ سے بلا کر پوچھ گچھ کی گئی۔

شرجیل خان اور خالد لطیف گزشتہ روز پاکستان پہنچ چکے ہیں . پاکستان کرکٹ بورڈ نے شرجیل خان اور خالد لطیف کو شوکاز جاری کرکے 7دنوں میں جواب طلب کر لیا گیا۔

اسلام آباد یونائیٹڈ کے محمد عرفان کو آج کسی وقت وطن واپس بھیجے جانے کا امکان ظاہر کیا جا رہا ہے۔ کوئٹہ گلیڈی ایٹرز کےذوالفقار بابر کو بھی وطن واپس بھیجے جانے کا امکان ہے۔

 ایمز ٹی وی(اسپورٹس) پاکستان سپر لیگ (پی ایس ایل) میں شامل شرجیل خان، خالد لطیف اور محمد عرفان کے بعد پی سی بی نے تحقیقات کا دائرہ کار وسیع کر دیا ہے اور 22 مزید کھلاڑیوں کے نام سامنے آ گئے ہیں۔

تفصیلات کے مطابق کرپشن اسکینڈل سامنے آنے کے بعد کراچی کنگز کے شاہ زیب حسن اور کوئٹہ گلیڈی ایٹرز کے ذوالفقار بابر کے خلاف بھی تحقیقات کا آغاز کر دیا گیا ہے۔ ذرائع کے مطابق گزشتہ روز کراچی کنگز کے میچ کے دوران شاہ زیب حسن کو فیلڈ سے بلا کر پوچھ گچھ کی گئی جبکہ ان کے موبائل فون کا ڈیٹا بھی حاصل کر لیا گیا ہے۔

ذرائع کا کہنا ہے کہ کوئٹہ گلیڈی ایٹرز کے ذوالفقار بابر کے خلاف بھی تحقیقات کا دائرہ کار وسیع کر دیا گیا ہے اور قوی امکان ہے کہ مزید کھلاڑیوں کے نام بھی سامنے آ سکتے ہیں۔

ایمز ٹی وی(اسپورٹس) جنوبی افریقہ نے سری لنکا کو 5ایک روزہ میچوں کے آخری میچ میں 88رنز سے شکست دیکر سیریز 0-5سے اپنے نام کرلی ہے۔ اس کے ساتھ لنکن ٹیم کو سیریز میں وائٹ واش کرکے ون ڈے رینکنگ میں پہلی پوزیشن پر آگئی ہے۔

جنوبی افریقہ نے ون ڈے کرکٹ کی تاریخ میں 24ویں مرتبہ اننگز میں 350پلس اسکور بنا کر نیا عالمی ریکارڈ قائم کر دیا ہے۔ پروٹیز نے سری لنکا کے خلاف آخری ون ڈے میں384 رنز کا مجموعہ ترتیب دے کر بھارت کا زیادہ مرتبہ اننگز میں350 پلس اسکور بنانے کا ریکارڈ توڑ دیا ہے۔

ہوم سائیڈ کی جانب سے اوپننگ بیٹسمین ہاشم آملا نے154 اور کوائنٹن ڈی کاک نے109 رنز اسکور کیے۔ جواب میں لنکن ٹیم مقررہ 50اوورز میں 8وکٹ پر 296رنز اسکور کرسکی، ٹیم کی جانب سب سے زیادہ اسیلا گناراٹنے 114رنز اسکور کیے، پروٹیز بولرز کی جانب سے کرس مورس نے 4وکٹیں حاصل کیں۔