ایمزٹی وی(اسلام آباد) ایوی ایشن ماہرین نے پی آئی اے کی پرواز پی کے 661 کے تباہ ہونے میں انسانی غلطی کے امکان کو مسترد نہیں کیا اور ان کا ماننا ہے کہ ”انجن کی خرابی کے باعث طیارہ تباہ نہیں ہونا چاہئے تھا کیونکہ یہ اس کے بعد بھی آپریٹو انجن کے ذریعے اڑنے کے قابل تھا۔“
ائیرمارشل (ریٹائرڈ) شاہد لطیف نے اس بات پر زور دیا ہے کہ طیارے کو تباہی سے بچایا جا سکتا تھا۔

ان کے مطابق اگر طیارے کا ایک انجن خراب ہو گیا تھا تو یہ اس کے باوجود اڑ سکتا تھا اور اسے ایمرجنسی لینڈنگ کیلئے قریبی ہوائی اڈے کی جانب موڑا جا سکتا تھا۔ ان کا کہنا ہے کہ ”جیسا کہ ہم جانتے ہیں طیارے کا ایک انجن خراب ہوا تھا۔ طیارے کے پائلٹ کو اسے بحفاظت اتار لینا چاہئے تھا۔ طیارے کو ایمرجنسی لینڈنگ کے لئے مناسب رن وے کی بھی ضرورت نہیں ہوتی۔ طیارے کے پائلٹ کو ہنگامی حالات کو مناسب طریقے سے سنبھالنا چاہئے تھا۔“

انہوں نے کہا کہ یہ حادثہ پائلٹ کی غلطی کے باعث پیش آیا کیونکہ وہ ہنگامی حالات کا مناسب طریقے سے سامنا نہیں کر سکے۔ انہوں نے مزید کہا کہ پائلٹ اور کو پائلٹ کے درمیان ہم آہنگی نہ ہونا بھی حادثے کی ایک وجہ ہے۔ ناگزیر حالات میں طیارے کی تباہی پر روشنی ڈالتے ہوئے ان کا کہنا تھا کہ ”اگر کوئی طیارہ ہوا میں آگ پکڑ لے اور جل جائے تو اسے ناگزیر حالات کہا جائے گا۔“
پاکستانی نژاد برطانوی ایوی ایشن ماہر ملک ریاض اعوان کا کہنا ہے کہ اگرچہ یہ پاکستان میں ائیرکریش کا پہلا واقعہ ہے تاہم کسی بھی دعوے سے قبل بہت سی چیزوں کو مسترد کرنے کی ضرورت ہے۔ انہوں نے کہا کہ ”کسی طوفان یا آسمانی بجلی کے طیارے سے ٹکرانے کے امکان کو یکسر مسترد کرنا ہو گا۔ طیارے کے پائلٹ کی جانب سے بھیجا جانے والے آخری پیغام بھی بہت اہم ہے۔“

دو انجن والے طیارے کا ایک انجن کے ساتھ پرواز کرنے کے دعوے کی تصدیق کرتے ہوئے انہوں نے کہا کہ ”پائلٹ کو صرف تھروٹل اور ایندھن کی فراہمی کو کنٹرول کرنا ہوتا ہے۔“ ان کا کہنا تھا کہ طیارے حادثے کی تحقیقات مہینوں پر محیط ہوتی ہے اور اس میں لوڈنگ کے معاملے کو بھی چیک کرنا چاہئے کیونکہ نامناسب لوڈنگ کشش ثقل پر اثرانداز ہوتی ہے اور حادثے کا سبب بھی بن سکتی ہے۔انہوں نے دعویٰ کیا کہ اگر طیارے کا ایندھن ختم بھی ہو جائے تو یہ اس کے بعد 20 منٹ تک پرواز کر سکتا ہے۔

ائیربلیو طیارہ حادثہ متاثرین کی تنظیم (اے سی اے اے) اور بھوجا ائیر کریش فیملیز ایسوسی ایشن نے حادثے کی شفاف تحقیقات کا مطالبہ کرتے ہوئے کہا ہے کہ یہ تحقیقات سول ایوی ایشن اتھارٹی کے زیر اثر نہیں ہونی چاہئیں۔

حادثے کی جلد از جلد رپورٹ کی تیاری کی ضرورت پر زور دیتے ہوئے ان کا کہنا تھا کہ وہ سول ایوی ایشن کے معاملے میں کیرئیرز اور ریگولیٹرز کے روئیے سے بہت مایوس ہیں۔ انہوں نے کہا کہ گزشتہ 6 سال کے دوران ملک بھر میں کئی حادثات ہوئے جن کے نتیجے میں 350 انسانی جانیں ضائع ہوئیں۔ انہوں نے کہا کہ ”حالیہ حادثے نے سول ایوی ایشن کے ملکی سیکٹر میں لاگو معیاری آپریٹنگ کے طریقہ کار کے نظام میں خامیوں کو ایک بار پھر عیاں کر دیا ہے۔“

ایمزٹی وی(اسلام آباد)وزیراعظم کے معاون خصوصی برائے امور خارجہ طارق فاطمی سے امریکی سینیٹر جان مکین نے ملاقات کی ہے جس میں پاک افغان تعلقات ،ورکنگ باﺅنڈری اور ایل او سی پر کشیدگی کے حوالے سے بات چیت کی گئی ۔

ترجمان دفتر خارجہ کی جانب سے جاری بیان میں کہا گیا کہ ملاقات میں طارق فاطمی نے خطے کی سیکیورٹی صورتحال سے بھی جان مکین کو آگاہ کیا۔ان کا کہنا تھا کہ شمالی وزیر ستان میں دہشت گردوں کے خلاف بلا امتیاز کارروائیاں کی ہیں ۔

اس موقع پر سینیٹر جان مکین نے دہشت گردوں کے خاتمے کے لیے پاکستان کی کوششوں کو سراہا ۔انہوں نے کہا کہ خطے میں امن کے قیام کے لیے امریکہ پاکستان کے ساتھ تعاون جاری رکھے گا ۔جان مکین نے ملٹری کمانڈکی تبدیلی پر بھی مبارکباد دی ۔طارق فاطمی نے سینیٹر جان مکین کو پاکستان آنے کی دعوت بھی دی ۔

ایمز ٹی وی( تجارت) وزیر اعظم کے خصوصی معاون و وزیر مملکت وسرما یہ کاری بورڈ کے چیئر مین مفتاح اسماعیل نے کہاہے کہ حکومت کاروبار آسان بنانے اور سرما یہ کاری کے فروغ کے لیے اقدامات کر رہی ہے ، سی پیک منصوبے کے تحت مقامی صنعتکاروں کو بھی غیر ملکیوں کے برابرمراعات دی جائیں گی ۔

امید ہے توانائی کے منصوبے بروقت مکمل ہوں گے اور 2017کے آخر تک لوڈشیڈنگ سے مکمل نجات مل جائے گی، ان خیالات کا اظہارانہوں نے راولپنڈی چیمبر آف کامرس اینڈ انڈسٹری کے دورے کے موقع پر تاجروں کے اجلاس سے خطاب کرتے ہوئے کیا ،اپنے خطاب میں مفتاح اسماعیل نے کہا کہ سی پیک منصوبے سے پاکستان کی معیشت کی سمت متعین ہو گی اور یہ ایشیا میں تجارت اور سیاحت کا محور بن جائے گا، سرمایہ کاری بورڈ اور تاجر برادری کے درمیان تعلق و رابطہ مزید بڑھانے کی ضرورت ہے ، برآمدات میں کمی ہمارے لیے تشویشناک ہے ،تاجر برادری کے تحفظات کا احساس ہے ۔

ہماری کوشش ہے کہ معلومات شفاف رکھی جا ئیں اور تاجر برادری کے ساتھ رابطے تیز کیے جائیں ۔اس سے پہلے صدر چیمبر راجہ عامر اقبال نے اپنے خیر مقدمی خطاب میں وزیر مملکت وسرما یہ کاری بورڈ کے چیئر مین مفتاح اسماعیل کا چیمبر آمد پر شکریہ ادا کیا، صدر چیمبر نے انہیں راولپنڈی چیمبر کی جاری سرگرمیوں اور آئندہ کے پروگراموں کے بارے میں مختصر بریفنگ دی ،راجہ عامر اقبال نے مطالبہ کرتے ہوئے کہا کہ راولپنڈی پاکستان کا چوتھا بڑا شہر ہے ۔

اسے سی پیک منصوبے کے تحت صنعتی زونز کا حصہ بنایا جائے ،خطہ پوٹھوار میں فارماسیوٹیکل ، سیمنٹ ،پولٹری اور ماربل کی صنعت تیزی سے ترقی کر رہی ہے ضرورت اس امر کی ہے کہ ان مجوزہ صنعتی زونز میں چینی کمپنیوں کے ساتھ جوائنٹ ونچر کیے جائیں اور مقامی کمپنیوں کو بھی وہی مراعات دی جائیں تاکہ مسابقت کی فضا قائم رہے ، انہوں نے کاروبار آسان کرنے کے حوالے سے تجویز دی کہ صوبوں اور وفاق کے درمیان سیلز ٹیکس، سروسز، کسٹم ڈیوٹیوں اور دیگر معاملات میں تنازعات کے حل کے لیے چیمبر ز کو سرمایہ کاری بورڈ میں نمائندگی دی جائے ۔

ایمزٹی وی(اسلام آباد)وفاقی وزیر برائے انفارمیشن ٹیکنالوجی انوشہ رحمان نے کہا ہے کہ عمران خان کی بدتہذیبی کی مثالیں تو کئی بار دیکھ چکے ہیں لیکن آج جو بدتہذیبی کی مثال انہوں نے قائم کی وہ بے مثال ہے۔ عمران خان شارٹ کٹ میں شیروانی پہننا چاہتے ہیں۔
تفصیلات کے مطابق میڈیا سے گفتگو کرتے ہوئے انوشہ رحمان نے کہا کہ عمران خان نے عدالت میں آج جو بدتہذیبی کی مثال قائم کی وہ بے مثال ہے۔ عمران خان نے عدالت میں کہا کہ کمیشن بنا تو بائیکاٹ کریں گے ، پی ٹی آئی کا یہ رویہ افسوسناک اور شرمناک ہے ، عدالت جب بھی بلائے گی ہم آئیں گے۔
انہوں نے کہا کہ وزیراعظم نے آج اپنے وکلاءکے ذریعے یہ پیغام پہنچایا کہ کمیشن بنانا ہے تو قبول ہے اور اگر خود کیس سننا چاہتے ہیں تو بھی قبول ہے۔ عمران خان تو شائد بھول گئے کہ کیس تھا کیا، وہ تو ٹرک بھر کر ثبوت لا رہے تھے، وہ کہاں گئے؟ جو فوٹو کاپیاں انہوں نے لگائیں کیا وہ شہادتیں تھیں؟ ہم نے عمران خان کے تمام الزامات کا بھرپور جواب دیا۔

انوشہ رحمان نے کہا کہ وزیراعظم کے وکیل نے دستاویزات اور قانون کی روشنی میں واضح کیا کہ مریم نواز کسی صورت بھی وزیراعظم کے زیر کفالت نہیں ہیں جبکہ یہ بھی ثابت کیا کہ وزیراعظم کی تقاریر میں کوئی تضاد نہیں تھا۔ وزیراعظم کے وکیل نے سپریم کورٹ میں کہا کہ وزیراعظم کی تقریر سیاسی تھی تو عمران خان نے اسے جھوٹ قرار دیاحالانکہ سیاسی تقریر کا مطلب یہ نہیں ہوتا کہ جھوٹ ہے، اس کا مطلب یہ تھا کہ وہ سیاسی عام فہم تھی اور اس میں کوئی تکنیکی پہلو نہیں تھا۔

عمران خان کے نزدیک سیاست جھوٹ ہو گی لیکن ہمارے نزدیک یہ عبادت ہے ۔ یہ نہ پاکستان کے عوام کو مانتے ہیں نہ اداروں کو مانتے ہیں ، ”اوئے فلاں، اوئے فلاں“ کہہ کر اداروں کی تضحیک کرتے ہیں ۔ ہم کام کرنا چاہتے ہیں لیکن ایک شخص کی ہٹ دھرمی ملک کو روک رہی ہے۔ مسلم لیگ (ن) کو عدالتوں کو پورا اعتماد ہے اور عدالت جب بھی بلائے گی ہم آئیں گے۔

ایمز ٹی وی(تجارت) لاہور اور گردونواح میں دھند نے ڈیرے ڈال دیئے اور حد نگاہ 30میٹرتک جاپہنچی ، لیسکو نے بجلی کا نظام بچانے کیلئے انوکھا طریقہ اپنایا اور گرڈ سٹیشن ہی بند کردیئے۔

جس کی وجہ سے لاہور کا بڑا حصہ بجلی سے ہی محروم ہوگیا۔

تفصیلات کے مطابق لیسکو حکام نے دھند کی وجہ سے پیداہونیوالی نمی کے باعث ممکنہ طورپر پہنچنے والی خرابی سے ترسیلی نظام کو بچانے کے لیے گرڈ سٹیشن ہی بند کردیئے جس کی وجہ سے صوبائی دارلحکومت کے اکثرعلاقے رات گئے سے بجلی سے محروم ہیں۔

لیسکو حکام کاکہناتھاکہ دھندکی شدت کم ہوتے ہی بجلی بحال کردی جائے گی ۔
بجلی کی بندش کی وجہ سے تاج پورہ ، سمن شادمان ، ٹاﺅن شپ ، مغل پورہ ، وحدت روڈ ، اچھرہ سمیت دیگرعلاقے بجلی سے محروم ہیں۔

ایمزٹی وی(اسلام آباد)پاناما لیکس کیس میں کمیشن بنانے سے متعلق فریقین کا موقف سننے کے بعد سپریم کورٹ نے کمیشن بنانے کے بجائے کیس کی سماعت جاری رکھنے اور فریقین کے دلائل مکمل ہونے تک کیس کو سننے کا فیصلہ کر لیا ۔

میڈ یا رپورٹس کے مطابق سپریم کورٹ کے پانچ رکنی بینچ نے چیف جسٹس انور ظہیر جمالی کی سربراہی میں پاناما لیکس کیس کی سماعت کی ۔جس میں عدالت عظمیٰ نے کمیشن بنانے کے حوالے سے فریقین کا موقف سنا ۔

اس موقع پر تحریک انصاف کے وکیل نعیم بخاری نے کہا کہ پاناما پیپرز کی تحقیقات کے لیے عدالتی کمیشن بنا تو اس کا بائیکاٹ کریں گے ،ہم نے اپنا کیس بنا دیا عدالت اس پر فیصلہ دے ۔ادھر چیف جسٹس نے وزیراعظم کے وکیل سے پوچھا کہ آپ کو کیا ہدایات ملی ہیں جس پر سلمان بٹ نے کہا کہ وزیراعظم کا نام پاناما پیپرز میں نہیں آیا اور اب تک وزیر اعظم کے خلاف کوئی ثبوت نہیں ملا ،عدالت کمیشن بنانے یا نہ بنانے سے متعلق جو بھی فیصلہ کر لے قبول ہو گا ۔

جب وزیراعظم کے بچوں کے وکیل اکرم شیخ سے پوچھا گیا تو انہوں نے کہا کہ ہمیں کمیشن بنانے پر کوئی اعتراض نہیں ہے البتہ کمیشن کے دائرہ کار پر اعتراض ہو سکتا ہے ۔فریقین کے دلائل سننے کے بعد چیف جسٹس آف پاکستان انور ظہیر جمالی نے کہا کہ مفاد عامہ کے کیس میں عدالت پر بھاری ذمہ داری عائد ہوتی ہے ،سپریم کورٹ کیس جاری رکھتے ہوئے پورے دلائل سنے گی ۔

عدالت عظمیٰ نے کیس کی سماعت جنوری کے پہلے ہفتے تک ملتوی کر دی ، اب یہ کیس سپریم کورٹ کا نیا بینچ سنے گا ۔واضح رہے کہ چیف جسٹس آف پاکستان انور ظہیر جمالی کی مدت ملازمت 31دسمبر تک ہے ۔

ایمز ٹی وی(تجارت) جاپانی سرمایہ کاروں کے لیے ایشیا کے 20 ممالک پاکستان سہر فہرست ہے، کراچی میں منعقد ہونے والی 2روزہ جاپان بزنس نمائش 2016کو بھرپور پزیرائی حاصل ہوئی۔

جیٹرو کے کنٹری ڈائیریکٹر اوساموہسا کا کہنا تھا کہ جاپانی سرمایہ کاروں کے پاکستان ہمیشہ سے ترجیح رہا ہے، جاپانی سرمایہ کاروں کے لیے ایشیا کے 20 ممالک پاکستان سر فہرست ہے ۔

طویل عرصے سے جاپانی سرمایہ کاروں کی توجہ پاکستان میں آٹو موبائل سیکٹر پر تھیں تاہم اب ان کی نظریں فاسٹ موونگ کنزیومر گڈز پر مرکوز ہیں ۔

نمائش میں جاپانی ثقافت کے رنگوں نے آنے والوں کے لئے خوشگوار ماحول پیدا کیا، نمائش میں لوگوں نے جاپانی مارکیٹ اور جاپانی مصنوعات کے بارے میں خاصی دلچسپی لی اور جاپانی مارکیٹ میں پاکستانی برانڈز کے لئے مواقعوں کے حوالے سے معلومات حاصل کیں۔

اوساموہساکی کا کہنا تھاکہ پاکستان ایک پرکشش مارکیٹ ہے اور جیٹرو کے سروے کے مطابق جاپانی کمپنیاں پاکستان میں کاروبار کو مزید فروغ دینے کے لئے تیار ہیں، 80سے زائد جاپانی کمپنیاں پاکستان میں کام کر رہی ہیں۔

یاد رہے کہ جاپانی میئر نے کراچی کو محفوظ، دلچسپ اور پرکشش شہر قرار دے دیا جاپان کے شہر کی بی چوکے میئر یاماموتو ماسانوری نے کہا کہ کراچی کے بارے میں منفی تاثر اور متعلقہ حکام کی طرف سے کراچی کا دورہ نہ کرنے کی ہدایات کے باوجود انہوں نے یہاں آنے کو ترجیح دی۔

ایمزٹی وی(اسلام آباد) جماعت اسلامی کے امیر سراج الحق نے کہا ہے کہ افسوس ہے 74 دنوں میں اس کیس کا فیصلہ نہیں ہوا اور کرپشن کے اس سمندر کے ساتھ ہم 2017ءمیں بھی داخل ہو رہے ہیں۔ نئے چیف جسٹس کا 15 دن پہلے نوٹیفکیشن جاری کر کے موجودہ چیف جسٹس کو پیغام دیا گیا کہ آپ یہ کیس نہ سنیں ۔ میرا موقف یہی ہے کہ کمیشن بنے اور 25 دن میں فیصلہ ہو کیونکہ فیصلہ ہونا ضروری ہے، اس کو قیامت تک لے جانا نامناسب ہے ۔

تفصیلات کے مطابق میڈیا سے گفتگو کرتے ہوئے سراج الحق نے کہا کہ اگر دال میں کچھ کالا کلا نہیں تھا تو کیا تھا؟ لیکن افسوس ہے کہ 74 دنوں میں کیس کا فیصلہ نہیں ہو سکا اور کرپشن کے اس سمندر کے ساتھ ہم 2017ءمیں بھی داخل ہو رہے ہیں۔ حکومت کا خوف ہے لیکن سن لیں، ہم 2017ءمیں بھی کرپشن کا پیچھا کریں گے ۔

انہوں نے کہا کہ کمیشن کا مطالبہ تمام جماعتوں کا متفقہ تھا اور اگر کمیشن پہلے بن جاتا تو 74 دن ضائع نہ ہوتے۔ جب تک کس جاری ہے وزیراعظم کو اختیارات استعمال نہیں کرنے چاہئیں، ہم سب کا احتساب چاہتے ہیں اور یہ انصاف کا تقاضہ ہے ۔

سراج الحق کا کہنا تھا کہ کرپشن کے خلاف جماعت اسلامی نے سب سے پہلے علم اٹھایا ہے، ٹرین مارچ کیا، 4 بل اسمبلی میں پیش کئے، سب سے پہلے عدالت میں پٹیشن جمع کرائی اور عوام کو اکٹھا کرنے کیلئے سب سے زیادہ جلسے کئے کیونکہ کرپشن اور پاکستان ایک ساتھ نہیں چل سکتے۔ انہوں نے کہا کہ سب کا انصاف چاہتے ہیں کیونکہ انصاف کا تقاضہ ہے کہ چور اور لٹیرے حکومت میں ہیں یا اپوزیشن میں، ان کا احتساب ہونا چاہئے، لیکن جو بڑا ہے اور سب سے زیادہ ذمہ دار ہے وہ وزیراعظم ہے اور ان کا ٹولہ اور خاندان ہے، سب سے پہلے سپریم کورٹ ان کا احتساب کرے کیونکہ جب تک ان کا احتساب نہ ہوا انصاف کا بول بالا نہیں ہو سکتا اور کرپشن ختم نہیں ہو سکتی۔ قانون، آئین اور اخلاق کا تقاضا ہے کہ سب سے زیادہ ذمہ دار کا سب پہلے احتساب ہو، اس کے بعد جن جن کا نام پانامہ پیپرز میں ہے ان کا احتساب قوم کی آواز اور مطالبہ ہے ۔

ایمز ٹی وی(مانیٹرنگ ڈیسک) جاپان کے سائنس دان نے ایسا کوٹ تیار کیا ہے جو شمسی توانائی سے بجلی بنا کر اسمارٹ فون، ٹیبلٹ سمیت دیگر آلات کو بیٹری ختم ہونے کے باوجود کبھی بند نہیں ہونے دے گا۔

تفصیلات کے مطابق سائنسی دنیا میں نت نئی تخلیق کا سلسلہ جاری ہے، جس تیزی کے ساتھ دنیا کی آبادی میں اضافہ ہورہا ہے اُسی تیزی کے ساتھ ٹیکنالوجی کی دنیا میں بھی نئی نئی ایجادات کا سلسلہ بھی جاری ہے۔

انسانی زندگی کو آسان کرنے اور ہروقت رابطہ رکھنے کے لیے پہلے پہل موبائل فون ایجاد کیا گیا تاہم ٹیکنالوجی کی دنیا نے ترقی کرتے ہوئے اسے جدید سے جدید ترین سہولیات سے آراستہ کیا یہی وجہ ہے کہ اب اسمارٹ فون صارف صرف ایک کلک پر دنیا بھر میں رہنے والے کسی بھی شخص سے انٹرنیٹ کے ذریعے باآسانی رابطہ کرسکتا ہے۔

اسمارٹ فونز کی ایجادات کے ساتھ ہی صارفین کو اس کی چارجنگ جلد ہونے کی شکایات کا سامنا ہے، اس ضمن میں دنیا بھر کے سائنس دان مسئلے کا حل نکالنے کے لیے کوشاں ہیں جس کے لیے وہ نت نئے تجربات بھی کرتے رہتے ہیں۔

جاپان کے ایک سائنس دان نے ایسا کوٹ ایجاد کیا ہے جو سورج کی روشنی کو جذب کر کے موبائل فون و دیگر برقی آلات چارج کرنے کی صلاحیت رکھتا ہے، اس کوٹ میں 2 عدد سیل لگائے گئے ہیں جو سولر سسٹم کا کام سرانجام دیتے ہیں۔

شمسی توانائی سے برقی آلات کو چارج کرنے والے اس کوٹ کو جونیا وٹنا نے خصوصی طور پر ڈیزائن کیا ہے جو اچھوتے اور غیر معمولی لباس تیار کرنے کے حوالے سے کافی شہرت رکھتے ہیں، اس کوٹ کو ایف ڈبلیو 16 کا نام دیا گیا ہے۔

کوٹ میں خصوصی طور پر ایک مائیکرو یو ایس بی پورٹ نصب کی گئی ہے جو موبائل فون کی چارجنگ کے لیے کارآمد ہے جب کے اس کی قیمت پاکستانی روپے کے حساب سے 25 ہزار روپے مقرر کی گئی ہے۔

ایمزٹی وی(اسلام آباد) سپریم کورٹ نے پانامالیکس کی سماعت خود ہی جاری رکھنے کافیصلہ سناتے ہوئے جنوری2017ء کے پہلے ہفتے تک ملتوی کردی ، چیف جسٹس کی ریٹائرمنٹ کی وجہ سے آئندہ سماعت کیلئے نیا بینچ تشکیل دیاجائے گاجومقدمے کی ازسرنوسماعت کرے گا۔

چیف جسٹس کی سربراہی میں سپریم کورٹ کے پانچ رکنی بینچ نے پانامالیکس کیس کی سماعت کی ۔دوران سماعت فریقین نے کمیشن کی تشکیل اپنا اپنا موقف پیش کیا، وزیراعظم اور ان کے بچوں نے کمیشن کی تشکیل کامعاملہ عدالت پر چھوڑ دیا جبکہ پی ٹی آئی اور شیخ رشید نے کمیشن کی تشکیل کی مخالفت کی ۔ فریقین کے دلائل سننے کے بعد چیف جسٹس نے فی الحال خود یعنی سپریم کورٹ میں ہی سماعت جاری رکھنے کافیصلہ کیا اور ریمارکس دیئے کہ ہمیں فیصلہ سنانے میں کوئی رکاوٹ نہیں ۔

عدالت نے اپنے ریمارکس میں واضح کیاکہ چیف جسٹس ریٹائرڈ ہورہے ہیں اور چھٹیاں آرہی ہیں لہٰذا کیس کی سماعت جنوری کے پہلے ہفتے تک ملتوی کی جاتی ہے ۔ چیف جسٹس نے کہاکہ وہ ریٹائرہورہے ہیں ، فل کورٹ ریفرنس کے بعد بینچ کا حصہ نہیں بن سکتے لہٰذا نئے چیف جسٹس نیا بینچ تشکیل دیں گے جس کے روبروکیس کی ازسرنوسماعت کی جائے گی ۔