ایمزٹی وی(تعلیم)پاک ترک اسکول نیٹ ورک کے طلبہ ، اساتذہ اور عملے نے اسلام آباد میں احتجاجی مظاہرہ کیا اور پاک ترک اسکولز کے عملے کے ویزوں میں توسیع کا مطالبہ کیا ۔

احتجاجی مظاہرے میں طلبہ کے والدین بھی شریک تھے انہوں نے مطالبہ کیا کہ حکومت ترک اسکولز کے عملے کے ویزوں میں توسیع کرے ورنہ احتجاج جاری رہے گا۔

ایمزٹی وی(کوئٹہ) صوبائی دارالحکومت میں سیکیورٹی خدشات کے پیش نظر ایک ماہ کے لئے دفعہ 144 نافذ کر دی گئی ہے جب کہ موٹرسائیکل کی ڈبل سواری پر پابندی ہوگی۔

ذرائع کے مطابق محکمہ داخلہ بلوچستان نے سیکیورٹی خدشات کے پیش نظر کوئٹہ میں ایک ماہ کے لئے دفعہ 144 نافذ کرکے اسلحے کی نمائش پر پابندی عائد کر دی گئی ہے۔ اس کے علاوہ کوئٹہ میں ایک ماہ کے لئے موٹر سائیکل کی ڈبل سواری پر بھی پابندی عائد کر دی گئی ہے جب کہ جلسے جلوسوں اور دھرنوں پر بھی پابندی ہوگی۔

محکمہ داخلہ بلوچستان کی جانب سے شہر میں دفعہ 144 اور ڈبل سواری پر پابندی کا باقاعدہ نوٹیفکیشن بھی جاری کردیا گیا ہے جس میں بتایا گیا ہے کہ شہر میں جاری حالیہ دہشت گردی، تخریب کاری کے واقعات اور ٹارگٹ کلنگ کی روک تھام کے لئے پابندی عائد کی گئی ہے، پابندی کا اطلاع فوری طور پر ہوگا۔

واضح رہے کہ گزشتہ چند ماہ کے دوران کوئٹہ میں تخریب کاری کے متعدد واقعات رونما ہو چکے ہیں جن میں سول اسپتال حملہ، پولیس ٹریننگ سینٹر حملہ اور درگاہ شاہ نورانی پر حملہ بھی شامل ہیں۔

ایمزٹی وی (تعلیم)وزیراعلی سندھ سید مراد علی شاہ نے لاڑکانہ کے نجی کیڈٹ کالج کے طالبعلم پر مبینہ تشدد کا نوٹس لیتے ہوئے کہا کہ اس پر تشدد ثابت ہوا تو ذمہ داروں کے خلاف سخت ایکشن لیا جائے گا۔

استاد کا بہیمانہ تشدد سے طالب علم مفلوج

ذرائع کے مطابق وزیراعلی سندھ سید مراد علی شاہ نے سیکریٹری یونیورسٹی اینڈ بورڈز کو معاملے کی انکوائری کا حکم دے دیا اور ہدایات جاری کیں کہ طالب علم کے علاج کا بندوبست کیا جائے۔وزیراعلی سندھ نے ہدایت کی ہے کہ معاملے کی شفاف تحقیقات کرکے جلد رپورٹ دی جائے۔

اس کے علاوہ مراد علی شاہ نے صوبائی سیکریٹری تعلیم سے بھی صورتحال پر تفصیلی رپورٹ طلب کرلی اور ساتھ ہی سیکریٹری صحت کو طالب علم کو دیکھ کر پاکستان یا امریکا میں علاج کرانے کی ہدایات بھی جاری کیں۔

ایمزٹی وی(تعلیم) لاڑکانہ میں قائم نجی کیڈٹ اسکول میں تعلیم حاصل کرنے والے آٹھویں جماعت کے طالب علم کو استاد نے مبینہ طور پر اس بے دردی سے مارا کہ وہ دماغی طور پر معذور ہوگیا۔

متاثرہ بچے کے والد کے مطابق ان کا بیٹا محمد احمد حسین چھ بہنوں کا اکلوتا بھائی ہے اور اس کو خود بھی معلوم نہیں کہ اس کے استاد نے اس پر وحشیانہ تشدد کیوں کیا، جس سے وہ معذور ہوگیا۔

انھوں نے بتایا کہ وہ ہونہار طالب علم ہے اور امتحانات میں بہترین نمبر لے کر پاس ہوتا رہا ہے، انھوں نے کہا کہ استاد کی جانب سے ان کے ہونہار بچے پر تشدد کی وجہ سمجھ سے بالا تر ہے۔

رپورٹ کے مطابق نجی کیڈٹ کالج کے ایک استاد نے محمد احمد حسین کو اس بری طرح سے مارا پیٹا کہ اس کا جسم سوج گیا اور سر پر چوٹیں آنے کی وجہ سے دماغ کو آکسیجن کی سپلائی بند ہوگئی، جس کی وجہ سے ہنستا مسکراتا احمد حسین دماغی طور پر معذور ہوگیا۔

متاثرہ بچے کے والد کا کہنا ہے کہ کراچی کے ایک معروف ہسپتال کے ڈاکٹروں نے اس کے علاج کیلئے اپنی سی کوششیں کرکے دیکھ لی ہے تاہم ان کا کہنا ہے کہ ان کے بیٹے کا علاج صرف امریکہ میں ممکن ہے۔

ایمزٹی وی (کراچی)سندھ حکومت کی جانب سے عدالتی حکم پر راؤ انوار کوگزشتہ رات ایس ایس پی کے عہدے پر بحال کردیا گیا جس کا باضابطہ نوٹی فکیشن بھی جاری کردیا گیا جو وزیراعلیٰ سندھ مراد علی شاہ کی منظور کے بعد جاری کیا گیا اور انہیں پولیس ہیڈ کوارٹر میں رپورٹ کرنے کی ہدایت دی گئی ہے تاہم انہیں کسی ضلع میں تعینات نہیں کیا گیا جس کا فیصلہ جلد ہی کرلیا جائے گا۔

واضح رہے راؤ انوار نے بطور ایس ایس پی ملیر سندھ اسمبلی میں اپوزیشن لیڈر اور ایم کیو ایم پاکستان کے رہنما خواجہ اظہار کے گھر پر چھاپہ مار کر انہیں گرفتار کرکے اپنے ساتھ لے گئے تھے جب کہ وزیراعلیٰ سندھ کی مداخلت کے بعد انہیں رہائی مل گئی تھی تاہم صوبائی حکومت نے انہیں ایس ایس پی ملیر کے عہدے سے 16 ستمبر کو معطل کیا تھا، راؤ انوار نے اپنی معطلی کو سندھ ہائی کورٹ میں چینلج کردیا تھا۔

ایمزٹی وی(کراچی) ایم کیو ایم پاکستان کے کنوینر ڈاکٹر فاروق ستارنے کہاہے کہ ایم کیوایم میں قیادت کی کوئی اسامی خالی نہیں، ہمارا کسی کے ساتھ اتحاد نہیں ہورہا، یہ سب کہانیاں ٹیبل اسٹوری ہیں، نہ سامنے کے دروازے سے کسی کو قیادت دینی ہے،نہ ہی کسی کوبیک ڈور سے آفر کرنی ہے، ایم کیو ایم کی قیادت ایم کیو ایم کے اندر سے ہی نکلے گی اور مردم شماری کے بعد ایم کیو ایم سندھ کا وزیراعلیٰ کراچی سے لائے گی۔

محمودآباد ٹاؤن کے جنرل ورکرزاجلاس سے خطاب کرتے ہوئے فاروق ستار نے کہاکہ اگرہم متحدہیں توٹاک شومیں ایم کیوایم کیخلاف منفی پروپیگنڈے بھی رک جائیں گے،ایم کیوایم کے جلسے اوردھرنے ثابت کردیں گے کہ ایم کیوایم ایک ہے،جولوگ سمجھتے ہیں کہ ایم کیو ایم بکھررہی ہے انھیں بتادیناچاہتے ہیں کہ ایم کیوایم بکھر نہیں رہی بلکہ نکھررہی ہے،ایم کیوا یم ایک ہے اورایک رہے گی۔
فاروق ستار نے کہا کہ25دسمبر کوایم کیو ایم پاکستان کے زیراہتمام عظیم الشان جلسہ عام ہوگا، محمود آباد کی بہنیں، بیٹیاں جلسہ گاہ کو بھردیں گی، ایم کیوایم پاکستان میں بڑے بڑے جلسے کرے گی اوراپنے ہی جلسوں کے ریکارڈ توڑے گی،اگر دھرنا دینا پڑا تو ایک دھرنا دینا ہوگا، جلسوں اور دھرنوں کے ذریعے ریفرنڈم کروانا ہوگا اور اپنا حق لینا ہوگا۔

فاروق ستارنے کہا کہ ہمارے لاپتہ ساتھی زندہ ہیں اور وہ اپنے لوگوں کے درمیان آکر ملیںگے،یہ سب ہمارے اتحاد سے ممکن ہوگا، ہمارے بیشتر کارکنان اوراسیروں پرجھوٹے مقدمات بنائے گئے ہیں ان کورہاکیاجائے اور لاپتہ کارکنوں کوبازیاب کرایا جائے، ہمارے ساتھیوں کے قاتل بھی گرفتار کیے جائیں، اب گراؤنڈ میں اترنے کا وقت آرہاہے، عوام و کارکنان تیار ہو جائیں۔
جنرل ورکرزاجلاس میں محمودآباد ٹاؤن کی مختلف یوسیز، منظور کالونی، اختر کالونی ودیگر علاقوں کے ذمے داران و کارکنان نے بڑی تعداد میں شرکت کی۔

فاروق ستار پنڈال میں آئے تو عوام نے گل پاشی کی اور نعرے لگاکر ان کاپرتپاک استقبال کیا۔ کارکنان کاجوش وخروش دیدنی تھا۔ اجلاس میں خواتین ورکرزنے بھی بڑی تعدادمیں شرکت کی۔ کارکنان مختلف ٹولیوں اور ریلیوں کی شکل میں پنڈال میں پہنچتے رہے جس کے باعث دیکھتے ہی دیکھتے پنڈال میں جگہ کم پڑ گئی، اس موقع پرایم کیوایم کاروایتی نظم وضبط دیکھنے میں آیا۔

ایمزٹی وی(کراچی) حکومت سندھ نے چہلم حضرت امام حسینؓ کے موقع پر شہر بھر میں موٹرسائیکل کی ڈبل سواری پر 2 روز کے لیے پابندی عائد کرنے کا اعلان کیا ہے جس کا نوٹیفکیشن بھی جاری کردیا گیا ہے۔

محکمہ داخلہ کی جانب سے جاری نوٹی فکیشن کے مطابق ڈبل سواری پر پابندی 20 اور 21 کو ہوگی جو چہلم کے موقع پرشہر میں امن وامان کی صورتحال کو برقراررکھنے کے لیے لگائی گئی ہے۔
نوٹی فکیشن کےمطابق بزرگ، صحافی، خواتین، بچے اور قانون نافذ کرنے والے اداروں کے اہلکار ڈبل سواری پر پابندی سے مستثنیٰ ہوں گے۔

پولیس حکام نے عوام سے ڈبل سواری پر پابندی کی پاسداری کی اپیل کرتے ہوئے کہا کہ پابندی کی خلاف ورزی کرنے والوں کے خلاف قانونی کارروائی کی جائے گی۔

ایمزٹی وی(راولپنڈی)پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل راحیل شریف نے سلیمانکی سیکٹر کا دورہ کیا جہاں انہوں نے فوجی افسران، جوانوں اور جنگی ہیروز سے ملاقاتیں کیں اور جنگ میں لڑنے والے سابق فوجیوں اور رینجرز اہلکاروں کے ساتھ دن گزرا جب کہ اس موقع پر انہوں نے میجر شبیر شریف شہید کی قبر پر پھولوں کی چادر چڑھائی ۔

ترجمان پاک فوج کے مطابق آرمی چیف جنرل راحیل شریف نے مادر وطن کے لیے جان قربان کرنے والوں کو خراج عقیدت پیش کرتے ہوئے کہا کہ ماضی کے ہیروز کی طرح پاک فوج کسی بھی چیلنج کے لیے تیار ہے، پاک فوج اپنے کسی بھی چیلنج سے نمٹنے کے لیے آزمائی گئی ہے جس نے ہمیشہ ہر چیلنج کا ڈٹ کر مقابلہ کیا۔ انہوں نے کہا کہ پاک فوج سب سے زیادہ سخت جان فوج بن چکی ہے جو اپنی جنگی مہارت کی وراثت اور روایات رکھتی ہے۔

جنرل راحیل شریف کا کہنا تھا کہ پاک فوج نے دہشت گردی کے خلاف بے مثال کامیابیاں حاصل کی ہیں اور اب بھی پاک فوج جنگی صلاحیتوں سے لیس اور روایتی جنگ کے لیے تیار ہے۔

ایمزٹی وی(آزاد کشمیر) گزشتہ رو ز شاعر مشرق علامہ محمد اقبال کے مزار پر حاضری اور لاہور پر یس کلب کے دورہ کے موقع پرصحافیوں سے گفتگو کرتے ہوئے صدر آزاد کشمیر سردار مسعود خان نے کہا ہے کہ بھارت کی پاکستان مخالف دشمنی ڈھکی چھپی نہیں، بھارت کنٹرول لائن پر جان بوجھ کر حالات خراب کررہا ہے ۔

صدر آزاد کشمیر سردار مسعود خان نے کہا کہ پاکستان کشمیر کا مقدمہ سفارتی سطح پر بہتر طور پر لڑرہا ہے عالمی طاقتیں مسئلہ کشمیر کو حل کرانے کیلئے کردار ادا نہیں کر رہیں ۔انہوں نے کہا کہ بھارتی جارحیت کا مقصد سی پیک منصوبے کو نقصان پہنچانا ہے۔مسئلہ کشمیر کا حل صرف رائے شماری سے ممکن ہے۔

انہوں نے کہا بھارت70سال سے مقبوضہ کشمیر پر ناجائز طور پر قابض ہے اور کشمیر یوں کی آواز کو دبانے کی ناکام کوشش کر رہا ہے مگر و ہ اپنے عزائم میں کسی صورت کامیاب نہیں ہوگا اور آخر کار کشمیر کو آزاد کر نا ہی پڑ یگا
پاک فوج بھارت کو کنٹرول لائن پر منہ توڑ جواب دے رہی ہے اور بھارت کو بلا اشتعال فائر نگ کا سلسلہ بند کر نا ہوگا۔ انہوں نے کہا کہ حکومت پاکستان اور یہاں کے عوام سمیت تمام سیاسی و مذہبی جماعتیں آزادی کی تحر یک میں کشمیر یوں کیساتھ ہیں.