ایمزٹی وی(کراچی)پاکستان کی سب بڑی دفاعی نمائش آئیڈیاز2016 کا آغاز آج سے کراچی ایکسپو سینٹر میں ہو گا ، جو چار روز تک جاری رہے گی ۔

منتظمین کے مطابق نمائش کی تمام ترتیاریاں مکمل کرلی گئی ہیں ۔ نمائش کا افتتاح وزیر اعظم محمد نواز شریف کریں گے ۔ نمائش میں شرکت کے لیے صدر مملکت ممنون حسین مختصر دورے پر کراچی پہنچ گئے ہیں جبکہ وزیر اعظم نواز شریف آج کراچی پہنچ رہے ہیں ۔

صدرمملکت پاکستان کی تینوں مسلح افواج کے سربراہان ،چیئرمین جوائنٹ چیف آف اسٹاف کمیٹی، وفاقی وزیر دفاع ، وفاقی وزیر دفاعی پیداوار سمیت دیگر وفاقی وزراء نمائش میں شرکت کریں گے۔

نمائش میں 43 ممالک کے 90 وفود شرکت کر رہے ہیں، مجموعی طور پر 261 غیرملکی اور 157 پاکستانی فرمز شریک ہوں گی جب کہ 34 ممالک کی 418 فرمز نمائش میں اپنی مصنوعات پیش کریں گی ۔ نمائش میں الخالد ٹینک ، بیٹل ٹینک ، جے ایف 17 تھنڈر طیارے ، سپرمشاق ، کے 18 ائیرکرافٹ اور فاسٹ اٹیک کرافٹ میزائل بوٹس بھی رکھی گئی ہیں ۔

اس بار ایکسپو سینٹر کے 8 ہالزمیں نمائش کی جارہی ہے کیوں کہ گزشتہ نمائش کے مقابلے میں 9 ممالک زیادہ شرکت کررہے ہیں،نمائش میں14 ایم او یوز پردستخط کئے جائیں گے ۔ نمائش میں سی پیک کی افادیت کو بھی اجاگر کرنے کا فیصلہ کیا گیا ہے جس کے لئے خصوصی اسٹال قائم کیے گئے ہیں ۔

ایمزٹی وی(گلگت بلتستان)جنگ آزادی گلگت بلتستان کے ہیرو (ر) گروپ کپیٹن شاہ خان کی نماز جنازہ آج گلگت میں ادا کر دی گئی۔ نماز جنازہ کے بعد انہیں جنگِ آزادی کے دیگر ہیروز کے پہلو میں چنار باغ میں واقع یادگارِ شہدا کے قریب دفنا دیا گیا۔ نماز جنازہ معروف مذہبی ا سکالر الواعظ فدا علی ایثار نے پڑھائی۔

نماز جنازہ میں وزیر اعلیٰ گلگت بلتستان حافظ حفیظ الرحمن، فورس کمانڈر شمالی علاقہ جات میجر جنرل ثاقب محمود ملک، بیس کمانڈر کالا باغ کسور عباس نقوی، آئی جی پی گلگت بلتستان ظفراقبال اعوان ، ڈائریکٹر جنرل گلگت بلتستان اسکاوٹس فاروق اعظم، ہوم سیکرٹیری گلگت بلتستان احسان اللہ بھٹہ، صوبائی وزراء اعلیٰ سرکاری و عسکری قیادت سمیت عوام کی بڑی تعداد نے نماز جنازہ میں شرکت کی۔

مرحوم شاہ خان کو فوجی اعزاز کے ساتھ یادگار شہدا چنار باغ میں سپرد خاک کر دیا گیا۔

اس موقع پر زندگی کے مختلف شعبوں سے تعلق رکھنے والے افراد نے مرحوم کی عسکری اور سماجی خدمات کو خراج تحسین پیش کیا۔

ایمزٹی وی(تعلیم)چیف آف آرمی اسٹاف جنرل راحیل شریف گزشتہ روز اپنی مادر علمی گورئمنٹ کالج یونیورسٹی ( G.C University)پہنچے تو اس موقع پر یونیورسٹی کی فیکلٹی اور طالب علموں نے ان کا والہانہ استقبال کیا ۔
جی سی یونیورسٹی پہنچ کر آرمی چیف جب اپنی گاڑی سے اتر کر یونیورسٹی کی عمارت کی طر ف روانہ ہوئے تو وہاں موجود طالب علموں نے فرط جذبات میں آکر بے ساختہ ان کے نام کے نعرے لگانے شروع کردئیے اور تالیوں کی گونج کے ساتھ جنرل راحیل شریف کا والہانہ استقبال کیا .

جنرل راحیل شریف کی پروقار شخصیت سے متاثر ہو کر کچھ طالب علم ان کو قریب سے دیکھنے کے لیے آگے آر ہے تھے جنہیں آرمی چیف کے سیکیورٹی اسٹاف اور یونیورسٹی انتظامیہ کی جانب سے روکا جارہا تھا ۔

اس دوران یونیورسٹی انتظامیہ کی جانب سے کچھ بچوں کو پکڑ کر پیچھے دھکیلنے کی کوشش کی گئی تو آرمی چیف جنرل راحیل شریف نے فوری طور پر ایک اہلکار کو مخاطب کرتے ہوئے کہا ”ارے ،بابا جی چھوڑ دو ان بچوں کو “۔آرمی چیف کے منہ سے یہ الفاظ سن کر وہاں موجود طالب علموں میں جوش اور بھی بڑھ گیا اور انہوں نے با آواز بلند آرمی چیف کے نعرے لگائے ۔

ایمزٹی وی(کراچی) عدالتی حکم پر گلشن معمار لیبر اسکوائر کی عمارت ناجائز قابضین سے خالی کرانے کے لئے انتظامیہ کے اہلکار پہنچے۔ عمارت پر سیلاب متاثرین نے قبضہ کیا ہوا ہے۔

انسداد تجاوازت سیل کے عملے کے ساتھ پولیس کی بھاری نفری لیبر اسکوائر پہنچی لیکن متاثرین نے عمارت خالی کرنے سے انکار کر دیا۔ ان کا کہنا تھا کہ متبادل رہائش ملنے تک وہ عمارت خالی نہیں کریں گے۔

عمارت پر قابض آبادی کی خواتین نے احتجاج کرتے ہوئے ٹائر جلائے۔ قابضین کے وفد اور ضلعی انتظامیہ کے مذاکرات بھی ہوئے جو ناکام ہو گئے۔ اسسٹنٹ کمشنر منگھو پیر کا کہنا ہے کہ قابضین کو 24 نومبر تک عمارت خالی کرنے کی مہلت دے دی گئی ہے۔ انہوں نے مزید بتایا کہ 80 فیصد عمارت خالی کرا لی ہے بقیہ 20 فیصد بھی جلد خالی کرا لیں گے۔

دوسری جانب، قابضین نے عمارت خالی کرنے انکار کرتے ہوئے مطالبہ کیا ہے کہ پہلے انہیں متبادل جگہ فراہم کی جائے۔

ایمزٹی وی(مانیٹرنگ ڈیسک)آرمی چیف جنرل راحیل شریف کی مدت ملازمت ختم ہونے سے چند دنوں قبل آصف علی زرداری نے جلد ہی ملک میں واپس آنے کا گرین سگنل دے دیا ۔ سابق صدر اور پیپلز پارٹی کے شریک چیئر مین آصف علی زرداری نے کہاہے کہ میں عنقریب پاکستان میں آجاﺅں گا ۔
۔
واضح رہے کہ پیپلز پارٹی کے شریک چیئر مین اور سابق صدر آصف علی زرداری نے ایک جلسے کے دوران متنازعہ بیان دیتے ہوئے کہا تھا کہ بلے کو دودھ نہیں پینے دینا ۔اس بیان پر سیاسی تجزیہ نگاروں اور مبصرین نے آصف علی زرداری کو تنقید کا نشانہ بنا یا تھا۔

سیاسی تجزیہ نگاروں نے آصف علی زرداری کے اس بیان کی تشریح کرتے ہوئے کہا تھا کہ انہوں نے یہ بیان آرمی چیف جنرل راحیل شریف اور پاک فوج کے خلاف دیا تھا ۔یہ بیان دینے کے کچھ دن بعد آصف علی زرداری علاج کے سلسلے میں امریکہ روانہ ہو گئے ۔

مبصرین نے خیال ظاہر کرتے ہوئے کہا کہ آرمی چیف جنرل راحیل شریف کی مدت ملازمت ختم ہونے سے محض چند دن قبل آصف علی زرداری نے ملک واپس آنے کا گرین سگنل دے دیا جو کہ معنی خیز بات ہے ۔واضح رہے کہ آرمی چیف جنرل راحیل شریف کی مدت ملازمت 29نومبر کو ختم ہو رہی ہے ۔

ایمزٹی وی(کراچی)شہر قائد میں چہلم حضرت امام حسین کے جلوس اور مجالس کا سکیورٹی پلان تشکیل دے دیا گیا ہے جس کے تحت 5ہزار سے زائد پولیس اہلکار تعینات ہونگے۔ جلوس کے راستے کو بم ڈسپوزل اسکواڈ سے بھی چیک کرایا جائے گا۔

کراچی میں چہلم حضرت امام حسین کا مرکزی جلوس نشتر پارک سے دوپہر ایک بجے برآمد ہوگا۔ جلوس کی سکیورٹی کے لئے 5 ہزار اہلکار تعینات ہونگے۔آئی جی سندھ کے مطابق مجالس اور جلوسوں کے روٹس کی نگرانی، سوئپنگ اور اسکیننگ کے لئے ہر ممکن اقدامات کئے جائیں گے۔

بلند عمارتوں پر اسنائپرز کی تعیناتی اور نشترپارک کے اطراف واچ ٹاورز کے ذریعے کڑی نگرانی کی جائے گی۔چہلم حضرت امام حسین کے لئے پولیس نے ٹریفک پلان بھی ترتیب دے دیا ہے۔ ٹریفک کو ایم اے جناح روڈ پر داود پوتا روڈ سے سولجر بازار کی طرف موڑا جائے گا۔ناظم آباد سے آنے والے ٹریفک کو لسبیلہ سے نشتر روڈ کی طرف بھیجا جائے گا۔ لیاقت آباد سے آنے والے شہری پیپلز چورنگی سے کوریڈور تھری استعمال کر سکیں گ

ایمزٹی وی(لاہور) پاکستان پیپلز پارٹی کے سینئر رہنما اور سینیٹر اعتزاز احسن کا کہنا ہے کہ قطری شہزادے کے عدالت میں پیش ہونے تک حکومت کی جانب سے پیش کردہ ان کا خط ردی کا ٹکرا ہے

لاہور میں میڈیا سے بات کرتے ہوئے سینیٹر اعتزاز احسن کا کہنا تھا کہ پاناما لیکس کیس میں ثبوت حامدخان نے نہیں شریف فیملی نے پیش کرنے ہیں کہ انہوں نے جائیداد کس ذرائع سے بنائی، اس کیس میں اب حکومت کی جانب سے نئی نئی باتیں سامنے آرہی ہیں

وزیراعظم نواز شریف کے قومی اسمبلی کے بیان میں قطری شہزادے کا نام تک نہیں تھا لیکن پتہ نہیں یہ قطری شہزادہ یکدم کہاں سے نمودار ہو گیا۔ پاناما کیس کے حوالے سے نہ پی ٹی آئی نے کوئی رابطہ کیا اور نہ ہی مشورہ مانگا تاہم اگر مشورہ مانگا گیا تو ضرور دوں گا۔

اعتزاز احسن نے کہا کہ جس طرح یوسف رضا گیلانی اور راجہ پرویز اشرف بطور وزیراعظم عدالت میں پیش ہوئے، پامانا لیکس کیس میں بھی وہی ہونا چاہیئے اور نوازشریف کوبھی عدالت میں پیش ہوناچاہیئے۔ ان کا کہنا تھا کہ شریف خاندان کے بیانات میں بہت تضاد ہے، حسین نواز نے خود کہا تھا کہ قطر سے کسی نے مدد نہیں کی لیکن اب قطری شہزادے کا خط منظر عام پر آ گیا ہے۔

بلاول بھٹو زرداری کے مطالبات بلکل جائز ہیں جس پر پیپلزپارٹی کبھی بھی ہوٹرن نہیں لے گی لہذا اب وزیراعظم کے پاس فرار کی کوئی راہ باقی نہیں ہے۔

ایمزٹی وی(لاہور) چئیرمین پیپلز پارٹی بلاول بھٹو زرداری کا کہنا ہے کہ پاناما بل کی منظوری کے بغیر عدالتیں شریف برادران کا احتساب نہیں کر سکتیں اس لئے حکومت سے 4 مطالبات منوانے کے لئے سب ہمارا ساتھ دیں۔

سماجی رابطے کی ویب سائٹ پر اپنے ٹویٹ میں بلاول بھٹوزرداری کا کہنا تھا کہ جب تک پاناما لیکس پر ہمارا قانونی بل پارلیمنٹ منظور نہیں کرتی تو اس وقت تک کسی کارروائی کا فائدہ نہیں ہوگا، پاناما بل کی منظوری کے بغیر عدالتیں شریف برادران کا احتساب کرنے کے قابل نہیں ہو سکتیں اس لئے حکومت سے 4 مطالبات منوانے کے لئے سب ہمارا ساتھ دیں۔

دوسری جانب بلاول بھٹو زرداری نے پنجاب میں اپنا قیام بڑھانے کا فیصلہ کیا ہے، بلاول ہاوس لاہور میں پارٹی کنونشنز کا سلسلہ 5 روز تک جار ی رہے گا، 30 نومبر کو پیپلزپارٹی کے یوم تاسیس کی مرکزی تقریب بلاول ہاوس میں ہوگی اور مرکزی کنونشن میں چاروں صوبوں سے پارٹی عہدیداران، رہنما اور کارکن شریک ہوں گے جب کہ اس موقع پر پنجاب، خیبر پختونخوا اور بلوچستان کے ضلعی عہدیداروں کے انٹرویوز بھی لئے جائیں گے۔

ایمزٹی وی(تعلیم/ سندھ)شاہ عبداللطیف یونیورسٹی شکارپور کے کیمپس میں کمپیوٹر سائنس، انفارمیشن ٹیکنالوجی ،بزنس ایڈمنسٹریشن اور دیگر شعبوں کے پری انٹری ٹیسٹ منعقد کیے گئے۔

اس موقع پر وا ئس چانسلر پروفیسر ڈاکٹر لطف اللہ منگی نے کیمپس کا دورہ کیا اور میڈیا کو بتایاکہ ٹوٹل 136 طلبہ اورطالبات نے انٹری ٹیسٹ میں حصہ لیا ہے جن کے نتائج جلد سامنے لائے جائینگے