ایمزٹی وی(لاہور)پاکستان پیپلز پارٹی نے وسطی پنجاب کی تنظیمی کمیٹی کا اعلان کرتے ہوئے قمر زمان کائرہ کو صدر مقرر کردیا ہے۔
بلاول ہائوس لاہور میں پیپلز پارٹی کی کو آرڈینیشن کمیٹی وسطی پنجاب کا اجلاس چیئرمین بلاول بھٹو زرداری کی زیر صدارت ہوا ۔ اجلاس میں بلاول بھٹو نے قمر زمان کائرہ کو پیپلز پارٹی وسطی پنجاب کا صدر بنادیا جبکہ ندیم افضل چن کو وسطی پنجاب کا سیکرٹری جنرل مقرر کردیا۔ علاوہ ازیں اجلاس میں مصطفیٰ نواز کھوکھر کو سیکرٹری اطلاعات مقرر کردیا گیا۔

اس موقع پر پیپلز پارٹی وسطی پنجاب کے نو تعینات صدر قمر زمان کائرہ کا کہنا تھا کہ اعتماد کا اظہار کرنے پر بلاول بھٹو کا شکر گزار ہوں ، وہ جمہوری انداز میں پارٹی کو آگے لے کر بڑھ رہے ہیں۔ مشکل وقت آتے ہیں روایت ختم نہیں ہوتی ،پارٹی میں مشاورتی عمل جاری ہے پیپلز پارٹی کو پنجاب میں دوبارہ فعال کریں گے۔

ایمزٹی وی(تعلیم/کراچی)ثانوی تعلیمی بورڈ کراچی کے چیئرمین ڈاکٹر سعید الدین نے کہا ہے کہ اصل امیدوار کی جگہ کسی اور کو امتحان میں شرکت کرتے ہوئے پکڑا گیا تو اصل امیدوار کو ضابطہ کے تحت دو سال کیلئے کسی امتحان میں شرکت سے روکا جا سکتا ہے ۔

یہ بات انہوں نے گزشتہ روز ابراہیم علی بھائی گورنمنٹ گرلز سیکنڈری اسکول بلاک اے نارتھ ناظم آباد اور ونڈ سر پبلک ہائی اسکول بلاک ایچ نارتھ ناظم آباد سیکنڈری اسکول سرٹیفکیٹ پارٹ ٹو (میٹرک) کے سائنس اور جنرل گروپس کے ضمنی امتحانات برائے سال 2016کے تحت ہونے والے امتحانات کے مختلف امتحانی مراکز کے اچانک دورے کے بعد اساتذہ اور طلبہ سے خطاب کرتے ہوئے کیا۔

ایمزٹی وی (کراچی)جامعہ کراچی کے ڈائریکٹر ایوننگ پروگرام پروفیسرڈاکٹرعابدحسنین کے مطابق شیخ الجامعہ کی منظوری سے ایوننگ پروگرام کے طلبہ جنہوں نے اپنی ٹیوشن اورامتحانی فیس تاحال جمع نہیں کرائی ہےان کی 80فیصد لیٹ فیس معاف کردی گئی ہے

اعلامیہ کے مطابق ۔وہ اپنی بقیہ 20 فیصد لیٹ فیس بمع ٹیوشن اورامتحانی فیس 15 دسمبر تک کیش یا پے آرڈر کی صورت میں جامعہ کراچی میں قائم یوبی ایل اورحبیب بینک کی کیمپس برانچز میں دوپہر 3تاشام 6بجے تک جمع کرادیں۔

ایمز ٹی وی ( ٹیکنالوجی) لاس اینجلس آٹو شو میں ڈائیور جینٹ 3 ڈی ایک خوبصورت نئے "سپر بائیک" ڈیزائن ڈیگر کومیدان میں لایا ہے ۔

یہ موٹر سائیکل لوگوں کی توجہ اپنی جانب مبذول کروا رہی ہے لیکن اصل میں اس کی خوبصورتی نہیں بلکہ اس کی تیاری میں استعمال ہونیوالا مواد ہے جو اس موٹر سائیکل کو خاص بناتا ہے ۔ ڈیگر کا ڈھانچہ 3 ڈی پرنٹڈ ہے ۔

پرنٹنگ کے عمل کیلئے ایک ایسا کاربن فائبر ڈھانچہ تیار کیا گیا ہے جس کے بارے میں ڈائیور جینٹ 3 ڈی کا دعویٰ ہے کہ روایتی موٹر سائیکل مواد سے اس کا 50 فیصد کم وزن ہے ، یوں سڑک پر موٹر سائیکل کی کارکردگی کہیں زیادہ بہتر ہو

جائیگی ۔

یہ موٹر سائیکل مکمل طور پر 3 ڈی پرنٹڈ نہیں ہے ۔ اس کی سب سے اہم چیز یعنی انجن کاواساکی کا ایچ 2 ہے ۔ اس وقت ڈائیورجینٹ کی توجہ اسکے ڈھانچے کی 3ڈی پرنٹنگ ٹیکنالوجی پر مرکوز ہے ۔

ڈائیورجینٹ 3ڈی اس سے پہلے اپنی 3 ڈی پرنٹڈ سپر کار دی بلیڈ کی وجہ سے مشہور تھا جسے پچھلے سال پیش کیا گیا تھا۔

ایمزٹی وی(کراچی)لائن آف کنٹرول اور ورکنگ باؤنڈری پر جنگ بندی کی خلاف ورزی کے بعد بھارتی افواج نے سمندری حدود کی خلاف ورزی بھی شروع کر دی ہے لیکن بھارتی آبدوز کی پاکستانی سمندری حدود میں داخل ہونے کی کوشش پاک بحریہ نے ناکام بنا دی۔

ترجمان پاک بحریہ کی جانب سے جاری بیان میں کہا گیا ہے کہ بھارتی آبدوز نے پاکستانی سمندری حدود میں داخل ہونے کی کوشش کرتے ہوئے اپنی موجودگی کوبھی خفیہ رکھنے کی کوشش کی لیکن پاک بحریہ کے فلیٹ یونٹس نے بھارتی آبدوز کا تعاقب کیا اور بھارتی آبدوز کی پاکستانی حدود میں داخل ہونے کی کوشش کو ناکام بناتے ہوئے بھارتی آبدوز کو پیچھے دھکیل دیا۔

ترجمان پاک بحریہ کا کہنا ہے کہ بھارتی بحریہ آبدوزوں کو پاکستان کے خلاف تعینات کر رہی ہے لیکن پاک بحریہ جارحیت کا منہ توڑ جواب دینے کی بھرپور صلاحیت رکھتی ہے اور بحری سرحدوں کے دفاع کے لئے پاکستان نیوی ہر لمحہ تیار ہے

ایمز ٹی وی ( ٹیکنالوجی) واٹس ایپ سے اب کال ہی نہیں وڈیوکال بھی کی جاسکتی ہے ، ایپلی کیشن اپ ڈیٹ کریں مگر ہوشیاری کے ساتھ اور واٹس ایپ پر موصول کوئی انوی ٹیشن کھولیں نہ ذاتی معلومات شیئر کریں ورنہ ہیکرز کے نرغے میں آسکتے ہیں ۔

15 نومبر کو واٹس ایپ پر وڈیو کال کا فیچر متعارف کرائے جانے کے بعد یوزرز کو واٹس ایپ پر ایک میسج موصول ہورہا ہے،جس میں وڈیو کال کے لیے ایپلی کیشن اپ ڈیٹ کرنے کا کہا جاتا ہے۔

اس لنک پر کلک کرتے ہی ایک نیا پیج سامنے آتا ہے جس میں ویری فیکیشن کرانے کے ساتھ یہی میسج 4دوستوں کو بھیجنے کا کہا جاتا ہے۔

ایسا کرنے سے واٹس ایپ تو اپ ڈیٹ نہیں ہوتا لیکن آپ ہیکرز کے نرغے میں ضرور آجاتے ہیں ،اس لیے واٹس ایپ پر وڈیو کال کے لیے ایپلی کیشن کو اپنے موبائل فون پر گوگل پلے اسٹور یا ایپ اسٹور سے اپ ڈیٹ کریں اورہیکرز سے محفوظ رہیں۔

ایمزٹی وی (ٹیکنالوجی) مائیکروسافٹ نے رنگ اندھے یا کلربلائنڈنیس کے شکارافراد کے لیے ایک انوکھی ایپ بنائی ہے جس کے ذریعے وہ مختلف رنگوں کے درمیان فرق کرسکیں گے۔

یہ ایپ آئی فون کے لیے بنائی گئی جس میں ایک ٹرانسلیٹر بھی ہے۔ اسے ’’کلر بائنوکیولرس‘‘ کا نام دیا گیا ہے جو ایک فری آئی او ایس ایپ ہے ۔ اس میں موجود فلٹر، رنگوں کو مرض کی 3 اقسام کے لحاظ سے تصاویر کو بدلتا ہے اور انہیں اپنی جانب سے خاص رنگ دیتا ہے تاکہ کلر بلائنڈ کے شکار اسے بہتر طور پر دیکھ سکیں۔

ایپ ان لاکھوں افراد کے لیے یہ ایک اہم ٹول ہے جس کی بدولت وہ دنیا کو بھرپوررنگوں کے ساتھ دیکھ سکتے ہیں۔ ایشیا کو مختلف رنگوں کے شیڈز میں اس طرح دکھایا جاتا ہے تاکہ اس مرض کی شکار خواتین کچے اور پکے ہوئے گوشت کے درمیان فرق کرسکیں۔ اس ایپ میں موجود فلٹر کھینچی جانے والی تصویر کے رنگوں کو 3 انداز میں تبدیل کرسکتی ہے جن میں سرخ سبز، سبزسرخ، اور نیلا پیلا شامل ہیں کیونکہ کلربلائنڈنیس کی 3 اقسام انہی کیفیات کو بیان کرتی ہیں۔ اسے بنانے والے انجینیئر اوورٹون خود کلر بلائینڈ ہیں جو خزاں اور موسمِ بہار کے پتوں کے درمیان کوئی فرق محسوس نہیں کرسکتے۔

اس بنانے والوں کے مطابق اب رنگ اندھے افراد پھول شناخت کرسکتے ہیں، میچنگ کے کپڑے اور میک اپ پسند کرسکتے ہیں اور اگر کوئی فرق ہوتا ہے تو اسکرین پر ٹیکسٹ کے ذریعے اطلاع دی جاتی ہے۔

ایپ خاص کیفیت میں مبتلا افراد کے لیے رنگوں کی شناخت میں مدد دے گی کیونکہ وہ سبز اور پیلے کے درمیان تمیز نہیں کرسکتے۔ سیٹنگ کے لحاظ سے یہ ایپ سرخ اور سبز سیبوں کی تصویر میں سےسرخ سیب کو گلابی دکھاتی ہے جس سے فرق ظاہر ہوجاتا ہے۔ یہ ایپ مائیکروسافٹ کے گیراج بچ ڈے مقابلے میں تیار کی گئی تھی اوراسے ڈاؤن لوڈ کرکے کسی بھی اسکرین والے فون کے ساتھ باآسانی استعمال کیا جاسکتا ہے جس کا فائل سائز صرف 14.6 ایم بی ہے۔

ایمز ٹی وی ( ٹیکنا لوجی) ماہرینِ فلکیات کی ایک بین الاقوامی ٹیم نے ’’آسٹروسیسمولوجی‘‘ نامی طریقہ استعمال کرتے ہوئے کائنات کا سب سے گول ستارہ دریافت کرلیا ہے جو زمین سے 5 ہزار نوری سال دور ہے یعنی اس سے آنے والی روشنی کو ہم تک پہنچنے میں پانچ ہزار سال لگ جاتے ہیں۔

اس ستارے کو کیپلر خلائی دوربین نے دریافت کیا تھا یہ اپنے محور پر بہت آہستگی سے گردش کررہا ہے اور سائنسدانوں کا کہنا ہے کہ اسی وجہ سے یہ ’’مکمل کرے‘‘ (perfect sphere) کی شکل میں بھی ہے۔

یاد رہے کہ ستارے، سیارے اور سیارچے بظاہر بالکل گول ضرور نظر آتے ہیں لیکن وہ مکمل طور پر گول نہیں ہوتے کیونکہ اپنے محور پر (لٹّو کی طرح) گردش کی وجہ سے وہ اپنے استواء (درمیانی حصے) پر قطبین کے مقابلے میں زیادہ چوڑے ہوتے ہیں۔ یہ مثال ہمارے سورج، زمین اور چاند پر بھی صادق آتی ہے جو اپنی تیز رفتار محوری گردش کی وجہ سے استواء پر قدرے پھیلے ہوئے ہیں جب کہ قطبین پر نسبتاً پچکے ہوئے ہیں۔ نظامِ شمسی کے باقی سیاروں، سیارچوں اور کائنات میں دوسرے ستاروں کا معاملہ بھی یہی ہے۔ یہ بات ایک سائنسی اصول کے طور پر تسلیم کی جاتی ہے کہ کسی ستارے، سیارے یا سیارچے کی محوری گردش جتنی زیادہ ہوگی وہ اپنے قطبین پر اتنا ہی زیادہ پچکا ہوا اور استواء پر اسی قدر پھیلا ہوا بھی ہوگا۔ اس کے برعکس وہ اپنے محور پر جتنی آہستگی سے گھوم رہا ہوگا وہ اتنا ہی زیادہ ’’مکمل کرے‘‘ کی شکل میں بھی ہوگا یعنی قطبین اور استواء پر اس کا قطر تقریباً یکساں ہوگا۔ ’’کیپلر‘‘ نامی اس ستارے کی جسامت ہمارے سورج کے مقابلے میں دُگنی ہے لیکن اپنے محور پر گھومنے کی اس کی رفتار ہمارے سورج کے مقابلے میں صرف ایک تہائی (3 گنا کم) ہے۔ بتاتے چلیں کہ ہمارا سورج اپنے محور پر ایک گردش 27 دن میں پوری کرتا ہے۔

یونیورسٹی آف گوٹنجن، جرمنی کے ماہرین کی قیادت میں جاپان، متحدہ عرب امارات، امریکا اور برطانیہ کے سائنسدانوں پر مشتمل ایک عالمی تحقیقی ٹیم نے ’’آسٹرو سیسمولوجی‘‘ نامی تکنیک استعمال کرتے ہوئے اس ستارے سے آنے والی روشنی کا تجزیہ کیا اور اس میں محوری گردش کی رفتار معلوم کی تو پتا چلا کہ یہ تقریباً 81 دنوں میں اپنے محور پر ایک پورا چکر لگاتا ہے۔

اس کے اوسط قطر کو دیکھتے ہوئے (جو 30 لاکھ کلومیٹر ہے) ماہرین کا کہنا ہے کہ یہ گردشی رفتار عملاً بہت ہی کم ہے جس کی وجہ سے اس کے قطبین اور استواء کے درمیان قطر کا فرق صرف 6 کلومیٹر ہے۔ سورج اگرچہ جسامت میں اس سے نصف ہے لیکن وہ بھی اپنے استواء پر قطبین کے مقابلے میں 20 کلومیٹر زیادہ چوڑا ہے۔ زمین کی بات کریں جو تقریباً 24 گھنٹوں میں اپنی ایک محوری گردش مکمل کرتی ہے تو استواء پر اس کا قطر بھی قطبین کے مقابلے میں 42 کلومیٹر زیادہ ہے۔

ان تمام معلومات کو مدنظر رکھتے ہوئے سائنسدانوں کا کہنا ہے کہ کیپلر اب تک دریافت ہونے والا ’’سب سے گول‘‘ (most spherical) قدرتی جسم بھی ہے۔ البتہ ان کا کہنا ہے کہ اس کے اتنے زیادہ گول ہونے کی وجہ صرف اور صرف اس کی سست رفتار محوری گردش کو قرار نہیں دیا جاسکتا بلکہ شاید اس کے قلب (کور) سے پیدا ہونے والے مقناطیسی میدان کا بھی اس میں کچھ نہ کچھ کردار ضرور ہے۔ ان کا کہنا ہے کہ شاید اس ستارے کا قلب اور بیرونی پرتیں ایک دوسرے سے لاتعلق رہتے ہوئے گردش کررہی ہیں لیکن ابھی اس بارے میں حتمی طور پر کچھ نہیں کہا جاسکتا ہے۔

ایمزٹی وی(تعلیم/ کراچی)صوبائی وزیر تعلیم جام مہتاب حسین ڈھر نے سکھر ڈویژن کے ورکس اینڈ سروسز محکمے کے حکام کو ہدایت کرتے ہوئے کہا ہے کہ سکھر ڈویژن میں جن اسکولوں کی عمارتوں کی چھتیں خطرناک حالت میں موجود ہیں، انہیں فوری طور پر تبدیل کرکے وہاں درس و تدریس کا عمل شروع کیا جائے ،یہ سندھ حکومت کی اولین ترجیحات میں شامل ہے

انہوں نے افسران کوکہا کہ جن اسکولوں کی عمارتیں مکمل ہو چکی ہیں ان کا فوری طور پر پی سی فور بنا کر دیا جائے تاکہ ان اسکولوں کی ایس این ای بناکر وہاں فرنیچر فراہم اور اساتذہ کو مقرر کیا جائے ۔

انہوں نے ورکس اینڈ سروسز کے افسران پر برہمی کا اظہار کرتے ہوئے کہا کہ اسکولوں کی عمارتیں غیر معیاری کام کے باعث دو سال کے اندر ہی خراب ہو رہی ہیں جس سے صوبے کی تعلیم اور معیشت کو بڑا نقصان پہنچ رہا ہے ۔ اب ان معاملات کے متعلق اجلاس طلب کرنے کے بجائے فوری طور پر کارروائی کی جائیگی ۔

انہوں نے مزید کہا کہ تعلیم کی بہتری کے لیے محکمہ تعلیم کو دو حصوں پرائمری و سیکنڈری اور کالج سیکشن میں تقسیم کیا گیا ہے تا کہ تعلیم میں بہتری آسکے ۔ اس موقع پر کمشنر سکھر ڈویژن محمد عباس بلوچ نے بتایاکہ اوور سائٹ کمیٹیاں بنائی گئی ہیں جن کی نگرانی متعلقہ ڈپٹی کمشنرزاور اسسٹنٹ کمشنر زکر رہے ہیں ۔

پاک ترک اسکولوں کے حوالے سے ان کا کہنا تھا کہ صوبہ سندھ میں پاک ترک اسکولوں کو بند نہیں کیا جارہا صرف ان اسکولوں کی انتظامیہ کو تبدیل کیا جارہا ہے

قبل ازیں میڈیا سے بات چیت کرتے ہوئے صوبائی وزیر تعلیم نے کہا کہ محکمے کے 17اہلکاروں کے خلاف کرپشن سے متعلق ثبوت ملے ہیں جنہیں ضروری قانونی کارروائی مکمل کرنے کے بعد سروس سے فارغ کردیاجائیگا ۔ ایک سوال کے جواب میں واضح کرتے ہوئے انہوں نے بتایا کہ صوبہ سندھ میں پاک ترک اسکولوں کو بند نہیں کیا جارہا، جبکہ صرف ان اسکولوں کی انتظامیہ کو تبدیل کیا جارہا ہے