ایمزٹی وی(تعلیم)سیلانی ویلفیئر ٹرسٹ کے زیر اہتمام ہیڈ آفس کے آڈیٹوریم میں (BECS) بیسک ایجوکیشن کمیونٹی اسکولز کے اساتذہ میں 3لاکھ مفت نورانی قاعدے کی تقسیم کی تقریب کا انعقاد کی گیا۔ تقریب سے خطاب کرتے ہوئےوزیر مملکت برائے تعلیم بلیغ الرحمن نے کہا ہے کہ تعلیم کا شعبہ صوبائی حکومتوں کی ذمہ داری ہونے کے باوجود وفاقی حکومت نے یکساں نصاب تعلیم کیلئے اتفاق رائے سے قومی نصاب کو نسل قائم کردی ہے تاکہ تمام صوبوں میں قومی نظریہ کے مطابق نصاب تشکیل دیا جاسکے ،اس حوالے سے پہلا نصاب تعلیم 2017 میں مکمل کیا جائے گا۔

جبکہ پہلی جماعت میں نورانی قاعدے کی تعلیم لازمی ،پرائمری میں قرآن پاک ناظرہ کی تعلیم ثانوی اور اعلیٰ ثانوی درجوں میں قرآن پاک کا ترجمہ بھی پڑھایاجائے گا اور جلد قانون کے ذریعے سرکاری اسکولوں کے علاوہ نجی اسکولوں میں بھی قرآنی تعلیم کو لازمی قرار دیا جائے گا۔ وفاقی حکومت نے جامعات کی گرانٹس کی رقم میں رواں سال میں 91 ارب روپے تک کا اضافہ کیا ہے۔ اس موقع پر سیلانی ویلفیئر ٹرسٹ کے سرپرست اعلیٰ مولانا محمد بشیر فاروق قادری نے استحکام پاکستان اور ملک کوتعلیم کے نور سے منور کرنے والوں کیلئے دعا کی جبکہ اس موقع پر سیلانی ویلفیئرٹرسٹ کی مینجمنٹ کمیٹی کے ارکان بھی موجود تھے۔ وفاقی وزیر کو وڈیو کے ذریعے سیلانی ویلفیئر ٹرسٹ کی فلاحی سرگرمیوں سے آگاہ کیا گیا۔

وفاقی وزیر مملکت بلیغ الرحمٰن نے کہا کہ سیلانی ویلفیئر ٹرسٹ کا شمار پاکستان کے ممتاز قابل فخر فلاحی اداروں میں ہوتا ہے ،مولانامحمد بشیر فاروق قادری اور ان کی ٹیم اچھا کار خیر انجام دے رہی ہے ۔ تعلیم کا حکم ہمیں ہمارا مذہب دیتا ہے صوبائی حکومتیں اپنے بجٹ کا 25 فیصد حصہ تعلیم کے فروغ پر خرچ کر رہی ہیں اس کے باوجود ہم خواندگی کے اہداف حاصل کرنے سے دور ہیں، وفاقی حکومت بنیادی تعلیم کیلئے بیسک ایجوکیشن کمیونٹی اسکولز (BECS) کے ذریعے اس وقت ملک بھر میں 10لاکھ بچوں کوگھروں کے نزدیک پرائمری تعلیم دینے میں سرگرم عمل ہے ،ان اسکولوں کے اساتذہ کو معمولی سا اعزازیہ دیا جاتا ہے ،یہ اساتذہ قوم کا فخر ہیں

ایمزٹی وی(اسلام آباد) سپریم کورٹ نے پنڈی بھٹیاں میونسپل کمیٹی حافظ آباد کے بلدیاتی انتخابات میں جنرل وارڈ نمبر 18 میں ووٹوں کی دوبارہ گنتی کرنے کافیصلہ کالعدم کردیا۔چیف جسٹس انور ظہیر جمالی کی سربراہی میں 2 رکنی بینچ نے جنرل وارڈ نمبر18 میں ریٹرننگ افسر کی طرف سے دوبارہ گنتی کے بعد جاری کیے گئے نتیجے کوکالعدم قرار دیتے ہوئے پہلی گنتی میں زیادہ ووٹ لینے والے امیدوار کو کامیاب قرار دے دیا۔

عدالت نے قرار دیاکہ ریٹرننگ افسرکے پاس یہ اختیار نہیں کہ ایک دفعہ انتخابی نتیجہ مرتب ہونے کے بعد دوبارہ گنتی کرائے اور نیا نتیجہ جاری کرے،ایک دفعہ نتیجہ مرتب ہوجانے کے بعد دوبارہ گنتی کا اختیار الیکشن ٹربیونل کے پاس چلاجاتاہے۔

علاوہ ازیں ملتان میں مخصوص نشستوں پر لیبرسیٹ کے لیے امیدوار ثنا اللہ کے کاغذات نامزدگی کی منظوری کے خلاف درخواست کی سماعت کرتے ہوئے عدالت نے الیکشن روکنے کی درخواست مستردکردی۔ عدالت نے امیدوار ثنا اللہ کے کا غذات نامزدگی منظورکرنے کے ریٹرننگ افسرکے فیصلے کیخلاف درخواست باقاعدہ سماعت کے لیے منظور کرکے فریقین کو نوٹس جاری کر دیے۔ وکیل نے عدالت کو بتایاکہ امیدوار ثنا اللہ نے اثاثے چھپائے ہیں لیکن ریٹرننگ افسر نے ثبوت کے باجود انھیں الیکشن لڑنے کی اجازت دی ہے۔

ایمزٹی وی(اسلام آباد)عدالت عظمیٰ نے نان نفقے سے متعلق ایک مقدمے کی سماعت کرتے ہوئے آبزرویشن دی ہے کہ محض طلاق کہنے سے بیوی کو طلاق نہیں ہو جاتی، قانون کے مطابق پراسس مکمل کرنے کے بعد ہی طلاق موثر ہو گی۔

چیف جسٹس انورظہیرجمالی کی سربراہی میں ڈویژن بینچ نے بیوی کو خرچہ ادا کرنے کا ہائی کورٹ کا فیصلہ برقرار رکھتے ہوئے درخواست گزار کا یہ موقف مسترد کردیا کہ انھوں نے 1992 میں لندن میں بیوی کو طلاق دے دی تھی۔دریں اثنانان نفقے سے متعلق مقدمے کی سماعت کرتے ہوئے چیف جسٹس نے کہاکہ نہ تو انگلش لا اور نہ ہی ملک کے قوانین کے تحت طلاق دینے کاپراسس مکمل کیاگیا،قانون شہادت کے تحت متعلقہ فورم پر طلاق کے گواہ پیش کیے جاتے ہیں۔

جسٹس قاضی فائزعیسٰی نے کہاکہ بیان حلفی دے کرطلاق کو ریکارڈ پرلایاجاسکتا تھا۔چیف جسٹس نے کہا کہ محض بیوی کویہ کہنا کہ آج سے تومیری بیوی نہیں تو طلاق ہوجائے گی درست نہیں،عدالت نے بیوی کوخرچہ دینے کاہائیکورٹ کا فیصلہ برقرار رکھتے ہوئے فیصلے کیخلاف درخواست خارج کردی۔

ایمزٹی وی(بلوچستان) کوسٹل ہائی وے پر بس اور ٹرک کے درمیان تصادم کے نتیجے میں 5 افراد جاں بحق جب کہ 15 سے زائد زخمی ہوگئے۔

ذرائع کے مطابق پسنی میں کوسٹل ہائی وے پر تیز رفتار بس مخالف سمت سے آنے والے ٹرک سے ٹکرا گئی، جس کے نتیجے میں 5 افراد موقع پرہی جاں بحق جب کہ 15 سے زائد افراد زخمی ہوگئے۔

امدادئی ٹیموں نے جائے وقوعہ پر پہنچ کر زخمیوں کو سول اسپتال گوادر منتقل کردیا جہاں انہیں طبی امداد فراہم کی جارہی ہے جب کہ لاشوں کو ضابطے کی کارروائی کے بعد ورثا کے حوالے کردیا گیا۔

ایمزٹی وی(اسلام آباد) وزیراعظم نواز شریف کی زیرصدارت وفاقی کابینہ کا اجلاس آج ہورہا ہے جس میں وزیراعظم پائیدار ترقی کے اہداف کا پروگرام پانچ روپے کے سکے کے ڈیزائن تبدیلی اور دس روپے کا نیا سکہ متعارف کرانے کی منظوری دی جائے گی ۔

ذرائع کے مطابق اجلاس میں کابینہ کمیٹی برائے تنظیم نو کے فیصلوں کی توثیق کی جائے گی ۔ وزیراعظم پائیدار ترقی کے اہداف کا پروگرام منظوری کیلئے پیش کیا جائے گا

ٹیکس قوانین ترمیمی آرڈیننس 2016 بھی منظوری کیلئے وفاقی کابینہ کے اجلاس میں پیش کیا جائے گا ۔ پٹرولیم مصنوعات پر سیلز ٹیکس کی شرح کے تعین کا معاملہ بھی کابینہ اجلاس کے ایجنڈے میں شامل ہے۔

ایمزٹی وی(تعلیم)صوبہ سندھ کی جامعات کی خودمختارانہ حیثیت بحالی کے لیے سندھ بھر کی پبلک سیکٹر جامعات کے اساتذہ آج ہڑتال کریں گے اور درس و تدریس معطل رہے گی۔سندھ یونیورسٹیز لا 2013 میں کی گئی ترامیم کے خلاف سندھ کی جامعات تین سال سے جدوجہد کررہی ہیں

فیڈریشن آف آل پاکستان اکیڈمک اسٹاف ایسوسی ایشنز (فپواسا)سندھ کے صدر ڈاکٹر میر شاہنوازتالپرکے مطابق سندھ حکومت کی جانب سے اساتذہ کے نمائندوں سے کیے گئے معاہدے کے خلاف مختلف جامعات میں افسران کی براہِ راست تقرری سے جامعات میں اساتذہ،افسران اورملازمین میں بے چینی پھیل گئی ہے اورتمام اساتذہ ایسوسی ایشنزکایہ مشترکہ مطالبہ ہے کہ حکومت ِ سندھ ایسی تمام تقرریاں واپس لے ۔

اساتذہ میں اس بات پر بھی غم وغصّہ پایاجاتاہے کہ حکومتِ سندھ اپنے اعلان کے باوجود مختلف جامعات کو مالی گرانٹ دینے سے گریز کررہی ہے ،سندھ کی جامعات کو حکومت عارضی اور غیر مستقل بنیادوں پر چلانے کی کوشش کررہی ہے جو اس صوبے کی جامعات کے لیے ایک انتہائی نقصان دہ عمل ہے ۔

فیڈریشن کے صدر ڈاکٹر میر شاہنواز تالپر نے کہا کہ سندھ کی جامعات کے اساتذہ نے متحد ہوکر یہ فیصلہ کیا ہے کہ جامعات کی خود مختاری کے خلاف ہر اقدام کی بھر پور مخالفت کی جائے گی۔

فپواسا سندھ کے سیکریٹری جنرل ڈاکٹر شکیل فاروقی نے کہا کہ سندھ کی جامعات میں کلیدی عہدوں پر برا جمان ریٹائرڈ افراد نہ صرف سندھ کی جامعات پر بوجھ ہیں بلکہ حاضر سروس اساتذہ اور افسران دونوں کی ترقیوں میں رکاوٹ ہیں۔ انہوں نے مطالبہ کیا کہ جامعہ کے ہر انتظامی عہدے کو جامعات کے سلیکشن بورڈ کے ذریعے باقاعدہ اشتہار کے بعد اور قاعدے اور ضابطے کے تحت پر کیا جائے

ایمزٹی وی(تعلیم) جامعہ کراچی آفیسرزویلفیئرایسوسی ایشن کےچیف الیکشن آفیسر محمداکرم کے مطابق ایسوسی ایشن کے انتخابات اکتوبر کے پہلے ہفتے میں ہونگے۔ شرکت کے خواہشمند الیکشن آفیسر سے 5ستمبر تک رجو ع کریں۔

ایمزٹی وی(تعلیم)اعلٰی ثانوی تعلیمی بورڈ نےانٹرپری میڈکل کے نتائج کےحوالے سے اعلان کیاہےانٹربورڈ پری میڈیکل کے نتائج تیار ہیں، کنٹرولنگ اتھارٹی کی اجازت سے ایک سے 2روزمیں نتائج کااعلان کردیا جائیگا۔

ناظم امتحانات عمران چشتی نے ایک اعلامیے میں کہا ہے کہ اسٹیئرنگ کمیٹی کے مطابق 15ستمبرتک رزلٹ کااعلان کرناہے انٹر کے امتحانات 2016 میں سوا2لاکھ بچےشریک ہوئے جبکہ 10ستمبرتک پری انجینئرنگ کے نتائج کابھی اعلان کردیاجائیگا ضبط کی گئیں کاپیوں کےحوالےسے ان کا کہناتھا کہ جو95کاپیاں اینٹی کرپشن کے پاس ہیں ان کا رزلٹ مشاورت سے روکایاسنایا جائیگا۔

ایمزٹی وی(اسلام آباد) سعودی عرب کے نائب ولی عہد اور وزیر دفاع شہزادہ محمد بن سلمان نے اپنے مختصر دورہ پاکستان میں جی ایچ کیو جاکر آرمی چیف جنرل راحیل شریف سے ملاقات کی۔

پاک فوج کے شعبہ تعلقات عامہ آئی ایس پی آر نے سعودی وزیر دفاع کے دورہ پاکستان کے ایجنڈے پر روشنی ڈالتے ہوئے کہا کہ شہزادہ محمد بن سلمان نے آرمی چیف جنرل راحیل شریف سے آدھے گھنٹے ملاقات کی۔اس دوران خطے خاص طور پر مشرق وسطیٰ کی سیکیورٹی، دفاعی تعاون سمیت دیگر باہمی دلچسپی کے امور زیر بحث آئے۔

یمن کے خلاف جنگ کا حصہ بننے سے انکار کے باوجود پاکستان کے سعودی عرب کے ساتھ سیکیورٹی تعاون کے معاہدے موجود ہیں جن کے تحت ایک ہزار کے قریب پاکستانی فوجی مشیران وہاں اپنی خدمات انجام دے رہے ہیں۔

اسلام آباد سے روانگی کے بعد سعودی نائب ولی عہد کی جانب سے وزیر اعظم نواز شریف کے نام شکریہ کا پیغام بھیجا گیا اور کہا گیا کہ اسلام آباد اور ملٹری ہیڈ کوارٹرز میں گزارے گئے چند گھنٹے دونوں ممالک کے درمیان اسٹریٹجک تعلقات کی گہرائیوں کی اہمیت کو اجاگر کرتے ہیں۔

ایمزٹی وی(تعلیم/ کراچی)ثانوی تعلیمی بورڈ کراچی نے رجسٹریشن فارم کی تاریخ کا اعلان کردیا۔ اعلامیہ کے مطابق ایسے طلبہ وطالبات جو (نویں اور دسویں باہم) سالانہ امتحانات2016 اور اس سے پہلے کے پرچوں میں فیل ہوگئے تھے اور دوبارہ سپلیمنٹری امتحانات 2016میں شریک ہونا چاہتے ہیں تووہ اپنے رجسٹریشن اور پرمیشن فارمز30اگست سے 9ستمبر تک بغیر لیٹ فیس کے بورڈ کی متعلقہ برانچوں نیشنل بینک،حبیب بینک،عسکری کمرشل بینک اوریونائیٹڈ بینک کی بورڈ آفس کی برانچوں سے حاصل کرکے وہیں جمع کروا سکتے ہیں۔

شیڈول کے مطابق فارمز19سے 23ستمبر تک200روپے ، 26سے 30ستمبر 500روپے ،3سے 7اکتوبر تک1000روپے ، 10سے 14اکتوبر تک 1200روپے اور 17اکتوبر سے مزید احکامات تک 1500 روپے لیٹ فیس کے ساتھ وصول کیے جائیں گے۔