کوئٹہ: نامعلوم افراد نے بلوچستان کے علاقے بلیدہ میںجھونپڑی نما پرائیوٹ اسکول کو آگ لگادی

لیویز ذرائع کے مطابق گزشتہ شب نامعلوم افراد نے بلیدہ کے علاقے گلی کوچگ میں جھوپڑی میں قائم پرائیوٹ اسکول کو آگ لگادی جس کے نتیجے میں سامان جلاکر راکھ ہوگیا جبکہ ملزمان فرار ہونے میں کامیاب ہوگئے اطلاع ملنے پر لیویز اور فائر بر گیڈ نے موقع پر پہنچ کر آگ پر قابو پایا

، تعلیمی سرگرمیاں کمروں کی سہولت نہ ہونے کی وجہ سے جھونپڑیوں میں مقامی سماجی کارکن و رضاکار کی مدد سے تعلیم دی جاتی تھی
اسکول جلانے کے واقعے کو تعلیمی و سماجی حلقوں نے اسکول جلانے کے واقعے کی سخت مذمت کرتے ہوئے حکام بالا سے مطابلہ کیا کہ وہ تعلیم دشمنوں کا قلع قمع کرکے علاقے کو تباہی سے بچائے۔

اسلام آباد: احساس انڈرگریجویٹ اسکالرشپ پروگرام کیلئے درخواست وصولی کی تاریخ میں توسیع کردی گئی.

احساس انتظامیہ کے مطابق وزیر اعظم کی معاون خصوصی ڈاکٹر ثانیہ نشتر نے سال 2020-21 کے لئے 30 نومبر 2020 تک درخواستیں جمع کروانے کے لئے آخری تاریخ میں توسیع کا اعلان کیا ہے

ملک کی متعدد سرکاری یونیورسٹیوں میں داخلے میں کویڈ19کے باعث تاخیر کے پیش نظراحساس اسکالرشپ درخواستوں کی آخری تاریخ میں توسیع کی گئی ہے تاکہ زیادہ سے زیادہ انڈرگریجویٹ طلباء کو اس اسکالرشپ کےلئے موقع فراہم کیا جا سکے۔ 5 ستمبر 2020 کو آن لائن ایپلیکیشن پورٹل دوبارہ کھولنے کے بعد سے اب تک سسٹم میں 30،000 درخواستیں موصول ہوچکی ہیں۔

جاری کردہ بیان میں احساس انڈر گریجویٹ اسکالرشپ موجودہ حکومت کا ایک اہم پروگرام ہے جس کا مقصد ہے کم آمدنی سےوالے گھرانوں سے تعلق رکھنے والے طلباء کو اپنی تعلیم کے دوران وظائف مہیا کرنا ہے۔ ہائر ایجوکیشن کمیشن کے ذریعہ تسلیم شدہ پبلک سیکٹر کی 125 یونیورسٹیاں اس اقدام کا حصہ ہیں۔

احساس انڈرگریجویٹ اسکالرشپ کم آمدنی والے خاندانوں (45،000 روپے ماہانہ سے کم)سے تعلق رکھنے والے طلباء کی انڈرگریجویٹ تعلیم میں معاون ثابت ہوں۔ اہل طلبہ آن لائن اس پورٹل کے ذریعے درخواست دے سکتے ہیں ۔

اس سے قبل ، اسکالرشپ کی درخواستیں آن لائن جمع کروانے کی آخری تاریخ 30 اکتوبر ، 2020تھی۔

کیلیفورنیا: امریکی خلائی تحقیقی ادارے ’’ناسا‘‘ نے اپنے خلائی جہازوں سے ریکارڈ کی ہوئی مختلف خلائی آوازوں کا انتخاب ایک پلے لسٹ کی شکل میں ساؤنڈ کلاؤڈ پر جاری کردیا ہے۔

یہ آوازیں اگرچہ خوفزدہ کرنے والی تو نہیں لیکن عجیب و غریب ضرور ہیں جنہیں سن کر یوں لگتا ہے جیسے کوئی چیز ٹوٹ رہی ہو، کھڑکھڑا رہی ہو یا پھر کوئی خلائی مخلوق سیٹیاں بجا رہی ہو۔

ان میں مشتری کے دبیز بادلوں اور مریخی زلزلوں کی حقیقی آوازوں کے علاوہ چندرا ایکسرے خلائی دوربین، وائیجر اوّل خلائی جہاز اور پلانک سیارچے وغیرہ کے ریکارڈ کیے ہوئے ریڈیو سگنلز کو قابلِ سماعت آوازوں میں تبدیل کیا گیا ہے۔

واضح رہے کہ آواز کو سفر کرنے کےلیے مادّی واسطے کی ضرورت ہوتی ہے، یہی وجہ ہے کہ آواز کی لہریں خلا میں سفر نہیں کرسکتیں۔ البتہ برقی مقناطیسی لہریں (الیکٹرو میگنیٹک ویوز) بڑی سہولت سے، تین لاکھ کلومیٹر فی سیکنڈ کی رفتار سے، سفر کرسکتی ہیں۔

کراچی: ثانوی تعلیمی بورڈ کراچی نے میٹرک بورڈ سے الحاق شدہ اسکولوں کی رجسٹریشن 21-2020اور نئے اسکول کی رجسٹریشن کےلئے درخواست فارم جمع کرانے کانیا شیڈول جاری کردیاہے۔

تفصیلات کے مطابق بورڈ کے سیکرٹری سید محمد علی شائق نے اسکولوں کے سربراہان سے کہا ہے کہ نئے شیڈول کے مطابق فارم بورڈ آفس کے متعلقہ اکاؤنٹس سیکشن سے سکیرٹری بورڈ کے نام فارم کی قیمت کی مالیت کے پے آرڈر کے ذریعے حاصل کرکے 13 نومبر 2020 تک بغیر لیٹ فیس کے اپنے اتھارٹی لیٹر اور شناختی کارڈ کی فوٹو کاپی کے ساتھ جمع کرواسکتے ہیں جبکہ پہلے سے الحاق شدہ اسکول اپنی رجسٹریشن رسید کی فوٹو کاپی کے ساتھ جمع کروائیں گے

اس ضمن میں واضح کیا گیاہے کہ 16 نومبر 2020 سے شیڈول کے مطابق لیٹ فیس کے ساتھ فارم وصول کئے جائیں گے اور بغیر لیٹ فیس کی وصولی کی تاریخ میں کسی بھی قسم کی توسیع نہیں کی جائے گی

کراچی: وزیر تعلیم و محنت سندھ سعید غنی نے کہا ہے کہ کوووڈ کے باعث پاکستان نہیں دنیا بھر میں میں تعلیم کو نقصان ہوا ہے اور تعلیمی ادارے 6 ماہ سے زائد عرصہ تک بند رہے۔اب اسکول کھلے ہیں لیکن کچھ نہیں معلوم نہیں کہ دوبارہ کب اسکول بند ہو جائیں گے اور کتنے عرصے کے لئے بند ہوں گے،

تعلیم کے شعبے میں بھی مسائل ہیں اور ہم ان مسائل کو حل کرنے میں مسلسل لگے ہوئے ہیں۔ ایک اور سوال کے جواب میں سعید غنی نے کہا کہ تعلیمی اداروں میں ایس او پیز پر عمل درآمد دیگر شعبوں کی نسبت بہتر ہورہا ہے اور اگر کسی اسکول میں ایس او پیز فالو نہیں ہوتی تو اس اسکول کو وارننگ دی جاتی ہے اور اگر کسی اسکول سے کوووڈ کے کسیز نکلتے ہیں تو ہم ان اسکول کو سیل کررہے ہیں۔ اس سلسلے میں قائم کمیٹیاں اسکولوں کے دورے کر رہی ہیں اور ہمیں تفصیلات اب بھی مل رہی ہوتی ہیں ۔

سعید غنی نے کہا کہ ہمارے اساتذہ اور افسران کو یہ دیکھنا ہوگا کہ ہم صرف این جی اوز کے بل بوتے پر صوبے کے 40 ہزار سے زائد اسکولوں کو نہیں چلا سکتے ہیں۔ انہوں نے کہاکہ ہمارے اساتذہ اور افسران کو سوچنا ہوگا کہ اگر کوئی این جی او کی ایڈمنسٹریشن اس طرح کے اسکول چلا سکتی ہے تو کیوں وہ ہمارے سرکاری اسکولوں کا مورال بلند نہیں کرسکتے۔

کراچی: اخوت فاؤنڈیشن کے تحت نارائن جگ ناتھ وائڈیا (این جے وی) گورنمنٹ ہائیر سیکنڈری اسکول میں ٹیبلیٹ کی تقسیم کے حوالے سے تقرہب منعقد کی گئی۔ جس میں اندرون سندھ سےآئے 135 طلبہ وطالبات کوکو ٹیبلیٹ دیا گیا ۔ تقریب کے مہمان ِ خصوصی وزیر تعلیم سندھ سعید غنی تھے۔

اس موقع پر صوبائی وزیر نے طلبہ و طالبات میں ٹیبلیٹ تقسیم کئے اور بچوں کی کارکردگی کو سراہا۔ اخوت فاؤنڈیشن کے تحت این جے وی اسکول کو جس طرح چلایا جارہا ہے اور یہاں اندرون سندھ سے بھی بچوں اور بچیوں کو جس طرح تعلیم دی جارہی ہے وہ قابل ستائش ہے

سعید غنی نے کہا کہ کوووڈ کے باعث پاکستان سمیت دنیا بھر میں تعلیم کا بہت نقصان ہوا ہے اور 6 ماہ سے زائد تعلیمی ادارے بند ہونے کے باعث طلبہ و طالبات کو شدید پریشانی کا سامنا رہا ہے۔انہوں نے کہا کہ اخوت فاؤنڈیشن کے تحت این جے وی اسکول میں اندرون سندھ کے 135 طلبہ و طالبات کو پہلے مرحلے میں آن لائن تعلیم کی غرض سے مفت ٹیبلیٹ دئیے گئے ہیں جبکہ دوسرے مرحلے میں ان کو پروگرام 1400 بچوں کو جو اس اسکول میں تعلیم حاصل کررہے ہیں ان کو جبکہ تیسرے مرحلے میں اندرون سندھ کے مختلف اضلاع میں طلبہ و طالبات کو مفت ٹیبلیٹ کی فراہمی کا پروگرام ہے۔

انہوں نے کہا کہ آن لائن تعلیم کے حوالے سے سندھ حکومت بھی مائیکرو سوفٹ کے ساتھ مل کر کام کررہے ہے اور ہم نے صوبے کے لاکھوں طلبہ و طالبات کو رجسٹر کرلیا ہے اور باقی مانندہ کو بھی جلد رجسٹر کیا جارہا ہے۔ انہوں نے کہا کہ یہ حقیقت ہے کہ پورے صوبے کے 100 فیصد طلبہ و طالبات کو ہم آن لائن تعلیم نہیں دے سکتے، جس کی وجہ انٹرنیٹ کی عدم دستیابی سمیت دیگر مسائل ہیں تاہم اگر ہم 60 سے 70 فیصد طلبہ و طالبات کو اس سہولت سے فائدہ پہنچا سکیں تو یہ ایک بہتر اقدام ہوگا

اس موقع پر سیکرٹری تعلیم سندھ احمد بخش ناریجو، ڈائریکٹر اخوت فاؤنڈیشن نذیر تونیو، پرنسپل این جے وی اسکول امتیاز بھگیو، پی آر مینجمنٹ اخوت عائشہ آفریدی، سہیل اکبر شاہ، تنزیل رضا اور دیگر نے بھی خطاب کیا۔

کراچی سی ایس ایس کے امتحان کی تیاری کےلئے فریئر ہال میں سی ایس ایس کارنر قائم کردیا گیا ہے۔ سی ایس ایس کے امتحان میں شرکت کرنے والے افراد کے لئے یہاں مفت کورسز کا انتظام کیا گیا ہےامتحان کی تیاری کے لئے کورسز مفت کتابیں اور دیگر مواد فراہم کیا جائیگا جبکہ موجودہ، سابق بیورو کریٹس، سفارتکار اور سینئر افسران شرکا کی مدد کریں گے ،

اس حوالے سےایڈمنسٹریٹر کراچی افتخار علی شالوانی نے کہا ہے کہ سی ایس ایس کے امتحان کی تیاری کے لئے فریئر ہال میں سی ایس ایس کارنر قائم کردیا گیا ہے جبکہ آئندہ ہفتے المرکز اسلامی فیڈرل بی ایریا میں بھی سی ایس ایس کارنر کا آغاز ہوجائے گا،
ان خیالات کا اظہار انہوں نے فریئر ہال میں سی ایس ایس کارنر کا افتتاح کرنے کے بعد میڈیا کے نمائندوں سے بات چیت کرتے ہوئے کیا۔

اس موقع پر ڈائریکٹر جنرل پارکس طحہ سلیم، سینئر ڈائریکٹر کوآرڈی نیشن مسعود عالم سمیت سینئر افسران اور سی ایس ایس کے امتحان میں بیٹھنے والے طالب علموں کی بڑی تعداد بھی موجود تھی۔

ایڈمنسٹریٹر کراچی افتخار علی شالوانی نےکہا کہ کراچی کے نوجوان سی ایس ایس امتحان میں کامیابی کے لئے اس سہولت سے فائدہ اٹھائیں کیونکہ اس موقع پر سینئر افسران اور بیوروکریٹس اپنے تجربات کی روشنی میں شرکا کو امتحان کی تیاری کرائیں گے جس سے شرکا کو بہت زیادہ فائدہ ہوگا۔
انہوں نے کہا کہ آئندہ ہفتے سے بلدیہ عظمیٰ کراچی کے المرکز اسلامی عائشہ منزل فیڈرل بی ایریا میں بھی سی ایس ایس کارنر کا آغاز کیا جا رہا ہے جس کے لئے رجسٹریشن کا عمل جاری ہے ، ہماری کوشش ہے کہ کراچی کے ہر علاقے میں رہنے والے اس سہولت سے زیادہ سے زیادہ فائدہ اٹھائیں، ایڈمنسٹریٹر کراچی افتخار شالوانی نے مزید کہا کہ سی ایس ایس امتحان میں شرکت کے خواہش مند طالب علم اپنی رجسٹریشن کے لئے فریئر ہال میں پارکس ڈپارٹمنٹ کے دفتر سے رابطہ کرسکتے ہیں جبکہ المرکز اسلامی میں بھی اس حوالے سے ڈیسک قائم کردی گئی ہے ۔

واضح رہے کہ سی ایس ایس کارنر میں اب تک 40 سے زائد طلبا کی رجسٹریشن ہوچکی ہے اور یہ عمل جاری ہے ، سی ایس ایس کورس کی کلاسز روزانہ شام 5 بجے شروع ہوں گی۔ ایڈمنسٹریٹر کراچی افتخار علی شالوانی بھی ہر پندرہ روز میں کلاس لیں گے جبکہ سابق بیوروکریٹس، سفارتکار اور سینئر افسران کورس میں شریک طالب علموں کی معاونت اور رہنمائی کے لئے دستیاب رہیں گے۔

لاہور:  انسٹیٹیوٹ آف پبلک ہیلتھ نے داخلہ 2020أ2021 کاشیڈول جاری کردیا۔

جاری کردہ شیڈول کےمطابق بی ایس آنر ز میڈیکل لیب ٹیکنالوجی 2020-21 کےداخلہ فارم انسٹی ٹیوٹ سے دفتری اوقات میں حاصل کئے جا سکتے ہیں،مکمل شدہ فارم وصول کرنے کی آخری تاریخ 10 نومبر ہے ۔

لاہور: پنجاب انفارمیشن ٹیکنالوجی بورڈ کے ہائر ایجوکیشن ڈیپارٹمنٹ پنجاب کیلئے وضع کردہ آن لائن کالج ایڈمیشن سسٹم کے تحت 22 ستمبر سے ابتک پنجاب کے 700 سے زائد سرکاری کالجوں میں ایف اے ، ایف ایس سی و دیگر شعبوں میں داخلوں کیلئے 2لاکھ سے زائد درخواستیں موصول ہو چکی ہیں۔

ایف اے کیلئے 71 ہزار، آئی سی ایس 46ہزار، پری انجینئرنگ 19ہزار،پری میڈیکل 44 ہزار اورآئی کام کیلئے 11ہزار سے زائد طلبانے اپلائی کیا۔ پری میڈیکل میں داخلے کیلئے 69فیصد درخواستیں طالبات جبکہ کمپیوٹر سائنس کیلئے 60فیصد درخواستیں لڑکوں نے جمع کرائیں۔

لاہور : لاہور بورڈ آف انٹرمیڈیٹ اینڈ سیکنڈری ایجوکیشن نے میٹرک کے ضمنی امتحانات کے لیے ڈیٹ شیٹ تیار کرلی گئی جس کے مطابق امتحانات کا آغاز 7 نومبر سے ہوگا

جاری کردی ڈیٹ شیٹ کے مطابق پہلے روز ہیلتھ اینڈ فزیکل ایجوکیشن ،جنرل سائنس کے مضامین کا امتحان ہوگا ۔امتحانات 17نومبر تک جاری رہیں گے ۔

واضح رہےکورونا وائرس پروموشن پالیسی کے مطابق صرف دسویں جماعت کے امتحان ہونگے ، نویں جماعت کے امتحان نہیں ہونگے ۔طلبا کے پریکٹیکلز بھی منعقد نہیں کئے جائیں گے ۔