Reporter SS

آئی ایم ایف نےکوروناوائرس کےباعث قرض فراہمی کی حد دوگنی کردی

واشنگٹن : آئی ایم ایف نےکوروناوائرس کےباعث قرض فراہمی کی حد دوگنی کردی ہے، جس کے بعد آئی ایم ایف کی قرض فراہمی کی حد آئندہ سال سے دس کھرب ڈالرہوجائے گی۔

تفصیلات کے مطابق آئی ایم ایف کورونا وائرس سے لڑنےکیلئے ممالک کی مدد کیلئے کوشاں ہیں ، جی ٹوئنٹی ممالک وزرائے خزانہ اورآئی ایم ایف کا مشترکہ اجلاس ہوا ، اجلاس میں کورونا وائرس کےنقصانات کےحوالےسےاہم فیصلے کئے گئے۔

کرسٹلینا جارجیوا نے بتایا کہ آئی ایم ایف نےقرض فراہمی کےحجم کوڈبل کر دیا ہے، جس کے بعد آئی ایم ایف کی قرض فراہمی کی صلاحیت اب دس کھرب ڈالر ہوگئی ہے، قرض فراہمی کانیا دورجنوری دوہزاراکیس سے ہوگا اورتین سال تک جاری رہےگا۔

ان کا کہنا تھا کہ آئی ایم ایف کےبورڈنےسی سی آرٹی کےبارےمیں ریفارمزکی منظوری بھی دی ہے، اس ریفارم کےتحت غریب ممالک فنڈ کوقرضوں کی واپسی کےبجائےسی سی آرٹی فنڈ میں رقم جمع کروائیں گے۔

آئی ایم ایف کی ایم ڈی نے مزید کہا کہ سی سی آرٹی فنڈ میں چالیس کروڑ ڈالر دستیاب ہیں اورآئی ایم ایف اس کوبڑھاکرایک ارب ڈالر کرناچاہتاہے۔

آئی ایم ایف کی ایم ڈی کرسٹلینا جارجیوا نےدرخواست دی ہےکہ جی نوئنٹی ممالک بائی لیٹرل قرضوں کےبارےمیں جلدفیصلہ کریں، عالمی معیشت کا پہیہ رک چکاہے، جی20کومشکل حالات سے دوچار ممالک کےلیےجلد فیصلہ کرناہوگا۔

پیٹرولیم مصنوعات کی فروخت میں 55 فی صد کمی

کراچی: ملک میں کرونا وائرس کے باعث پیٹرولیم مصنوعات کی فروخت میں نمایاں کمی واقع ہو گئی ہے، گزشتہ سال مارچ کے مقابلے میں پیٹرولیم مصنوعات کی فروخت میں 55 فی صد کمی آئی ہے۔

ڈیزل کی فروخت میں گزشتہ سال مارچ کے مقابلے میں 31 فی صد کمی ہوئی، فرنس آئل کی فروخت میں گزشتہ سال مارچ کے مقابلے میں 62 فی صد کمی ہوئی۔

مارچ کے آخری 15 روز میں پیٹرولیم مصنوعات کی فروخت میں 40 فی صد کمی ہوئی، مارچ کے آخری 15 روز میں پیٹرولیم مصنوعات کی فروخت 26 ہزار ٹن یومیہ رہی، رواں مالی سال کے پہلے 9 ماہ میں پیٹرولیم مصنوعات کی فروخت میں 13 فی صد کی کمی آئی۔

ادھر عالمی منڈی میں خام تیل کی قیمت 18 سال کی کم ترین سطح پر آ گئی ہے، ایشیائی منڈیوں میں خام تیل کی قیمت 21 ڈالر فی بیرل ہو گئی۔ ایشیائی منڈیوں میں خام تیل کی قیمت 20 ڈالر فی بیرل تک ٹریڈ ہوتے دیکھا گیا، تاہم آج خام تیل کی قیمت میں معمولی اضافہ دیکھا گیا، امریکی خام تیل کی قیمت میں 4.7 فی صد اضافے کے ساتھ 21 ڈالر فی بیرل ہو گئی۔

برینٹ خام تیل کی قیمت ڈیڑھ فی صد اضافے کے ساتھ 26 ڈالر 83 سینٹ فی بیرل ہوگئی ہے۔ آئل انڈسٹری ماہرین کےمطابق کرونا وائرس کے باعث عالمی سطح پر خام تیل کی عالمی طلب میں نمایاں کمی آئی ہے۔ سعودی عرب اور روس کے درمیان جاری قیمتوں کی جنگ بھی قیمت میں کمی کا باعث بن رہی ہے۔ ماہرین کا کہنا ہے کہ خام تیل کی قیمتوں میں کمی کے باعث آئل امپورٹنگ ممالک کے لیے کافی آسانی ہو جائےگی۔

امریکا مہلک ترین اور نئے کرونا وائرس کا مرکز بن چکا ہے

نیویارک : امریکا مہلک ترین اور نئے کرونا وائرس کا مرکز بن چکا ہے، اب تک امریکا میں 4056 افراد ہلاک ہو چکے ہیں۔

غیر ملکی خبر رساں ادارے کی رپورٹ کے مطابق امریکا میں کرونا وائرس کی ہلاکت خیزی تیزی سے بڑھتی جا رہی ہے اور امریکا میں بھی نیویارک میں جان لیوا وبا نے سب سے زیادہ تباہی مچائی ہے جہاں اب تک 1550 لوگ ہلاک ہوچکے۔

دوسری طرف امریکا میں ایک روز میں 62 نئے کیسز رپورٹ ہونے کے بعد متاثرہ افراد کی تعداد 1لاکھ 88 ہزار 592 ہوگئی ہے۔

امریکی خبر رساں ادارے کی رپورٹ کے مطابق ریاست متحدہ ہائے امریکا میں یکم اپریل کی صبح ہی وائرس میں مبتلا تین مزید افراد لقمہ اجل بن گئے جس کے بعد ہلاکتوں کی مجموعی تعداد 4056 ہوگئی۔

ڈاکٹروں کے مطابق امریکا میں لاکھوں افراد کے متاثر ہونے کے باعث اسپتالوں میں حفاظتی سامان بھی ختم ہوگیا ہے۔

میڈیا رپورٹس کے مطابق ریاست نیویارک میں 75 ہزار 983، نیو جرسی میں 18 ہزار 696، کیلیفورنیا میں 8 ہزار 548، میچیگن میں 7615، فلوریڈا میں 6741 جبکہ دیگر ریاستوں میں بھی ہزاروں کی تعداد میں مریض موجود ہیں۔

خیال رہے کہ کچھ دیر قبل امریکی نائب صدر مائیک پنس کرونا ٹاسک فورس کی پریس کانفرنس سے خطاب کر رہے تھے، انھوں نے بتایا کہ ہم 51 ممالک سے طبی آلات منگوا رہے ہیں، پورے ملک میں وینٹی لیٹرز کی کمی کو پورا کیا جا رہا ہے۔

مائیک پنس نے کہا امریکیوں سے درخواست ہے ہمیں 30 روز اور دیں، ہم لوگوں نے ہمت نہیں ہارنی، تمام امریکی صدارتی گائیڈ لائنز پر عمل درآمد کریں، امریکا میں اب تک1.1 ملین کرونا ٹیسٹ ہو چکے ہیں، نجی لیبارٹری نے 15 منٹ میں کرونا ٹیسٹ کرنے والی مشین بنائی ہے۔ انھوں نے طبی آلات کی ترسیل کے لیے نیشنل گارڈز کے استعمال کا عندیہ بھی دیا۔

سلطنت عمان میں کرونا وائرس کا 72 سالہ مریض زندگی کی بازی ہار گیا

مسقط: سلطنت عمان میں کرونا وائرس کا 72 سالہ مریض زندگی کی بازی ہار گیا، یہ عمان میں کرونا وائرس سے ہونے والی پہلی موت ہے۔

عمان کی وزارت صحت کی جانب سے جاری کردہ بیان میں کہا گیا ہے کہ 72 سالہ کرونا وائرس کا مریض عمان کے اسپتال میں زیر علاج تھا جو منگل کے روز دم توڑ گیا۔

وزارت صحت کے مطابق یہ عمان میں کرونا وائرس سے ہونے والی پہلی موت ہے۔ ملک بھر میں اس وقت 210 افراد میں کرونا وائرس کی تصدیق ہوئی ہے جو مختلف اسپتالوں میں زیر علاج یا قرنطینہ میں ہیں۔

عمان میں ایک روز قبل 90 کے قریب ہوٹلز مالکان نے اپنے ہوٹلز وزارت صحت کے حوالے کیے ہیں تاکہ وہاں قرنطینہ سمیت دیگر طبی سہولیات قائم کی جاسکیں۔

فی الحال ان ہوٹلز کے کمرے اسکالر شپ پر موجود غیر ملکی طلبا کو رہائش کے لیے دیے جارہے ہیں جو ہاسٹلز بند ہوجانے کی وجہ سے مشکلات کا شکار ہیں، طلبا کو ان کمروں میں رہائش دینے کا فیصلہ وزارت سیاحت نے کیا ہے۔

عمان سمیت دنیا بھر میں کرونا وائرس کے متاثرہ افراد کی تعداد 8 لاکھ 58 ہزار سے تجاوز کر چکی ہے جبکہ وائرس سے متاثرہ 42 ہزار مریض جان کی بازی ہار گئے ہیں۔

لاک ڈاؤن کے بعد پیدا ہونے والی صورت حال افسوس ناک ہے

کراچی: شہر قائد میں راشن تقسیم کے نام پر سرجانی کے غریب شہریوں سے لوٹ مار شروع ہو گئی۔

کرونا وائرس کی وجہ سے شہر میں لاک ڈاؤن کے بعد پیدا ہونے والی صورت حال میں افسوس ناک واقعات بھی سامنے آنے لگے ہیں، راشن تقسیم کے نام پر سرجانی کے غریب شہریوں سے بے دردی لوٹ مار کی گئی۔

شہر میں سرگرم جعل سازوں نے سرجانی ٹاؤن میں بھوکے غریب عوام کو 50 روپے سے 200 روپے تک کے راشن ٹوکن بیچ دیے، جعل سازوں نے سرجانی تیسر ٹاؤن کے سیکڑوں مکینوں کو راشن کے نام پر چونا لگا دیا، علاقہ مکین جعل سازوں کی لوٹ مار کے خلاف سڑکوں پر نکل کر احتجاج کرنے لگے۔

متاثرین نے دہائی دی کہ علاقے میں کسی شخص کو اب تک راشن نہیں دیا گیا، ہم کرونا سے نہیں لیکن بھوک سے ضرور مر جائیں گے، مظاہرین کا کہنا تھا کہ مافیا کے لوگوں نے متعدد افراد کی شناختی کارڈ کی کاپیاں بھی لیں لیکن کوئی راشن نہیں ملا۔ علاقہ مکینوں کا کہنا تھا کہ ان کے پاس پانی ہے نہ راشن، جائیں تو جائیں کہاں۔

خاتون کا کہنا تھا کہ ان کو بارہ مہینے راشن کے وعدے پر پچاس پچاس روپے لے کر ٹوکن دیے گئے، اور تین چار لاکھ روپے کما کر بھاگ گیا

خیال رہے کہ سندھ میں لاک ڈاؤن کا آج 9 واں روز ہے، بے روزگار اور یومیہ کمانے والے مزدور دو وقت کی روٹی کے لیے پریشان ہیں، عوام پوچھتے ہیں کہاں ہیں منتخب نمائندے؟ گھر گھر راشن پہنچانے کے وعدے کرنے والے کہاں ہیں؟

کرائے کے مکانوں میں رہایش پذیر، دواؤں کے خرچ سے پریشان، پیٹ کی آگ بجھانے کے لیے لاک ڈاؤن میں دیہاڑی دار طبقہ دہری اذیت کا شکار ہو چکا ہے۔ تنگ آ کر لیاری، مچھر کالونی، گوہرام گوٹھ کے متاثرین گھروں سے باہر آ گئے ہیں۔ جن کا مطالبہ ہے کہ عوامی نمائندے صورت حال سے نمٹنے کے لیے سامنے آئیں اور مستحقین کی داد رسی کریں۔

وائرس کے خلاف ہیلتھ ورکز فرنٹ لائن پر جہاد کررہے ہیں ،عمران خان

راولپنڈی: وزیراعظم عمران خان نے کہا ہے کہ وائرس کے خلاف ہیلتھ ورکز فرنٹ لائن پر جہاد کررہے ہیں ، پوری قوم اورحکومت ڈاکٹرزاور ہیلتھ ورکرز کیساتھ ہے۔

تفصیلات کے مطابق وزیراعظم عمران خان نےکنٹونمٹ جنرل اسپتال راولپنڈی کاافتتاح کردیا ، جس کے بعد انھوں نے اسپتال کے مختلف شعبوں کا دورہ کیا اور سہولتوں کا جائزہ لیا۔

وزیراعظم کو اسپتال میں سہولتوں سےمتعلق بریفنگ دی گئی ، کنٹونمنٹ جنرل اسپتال کی اپ گریڈیشن،تزئین وآرائش حکومت کابڑااقدام ہے ، حکومتی اقدام سےراولپنڈی، ملحقہ علاقےکوصحت کی معیاری سہولت میسر آئے گی۔

اس موقع پر وزیراعظم عمران خان نے کہا کہ حکومت کی طرف سے ڈاکٹرز،نرسز،عملےکویقین دلاتاہوں، چین میں کوروناپھیلا تو15جنوری کو اندازہ ہوگیا تھا کہ یہ وائرس پاکستان بھی آئے گا، جس کے بعد سے ہی ہم تیاری کر رہے ہیں۔

وزیراعظم کا کہنا تھا کہ وائرس کےخلاف ہیلتھ ورکز فرنٹ لائن پر جہاد کررہےہیں، میں اور میری بہنیں بھی سرکاری اسپتالوں میں جاتے تھے ، بدقسمتی سے پوری دنیا میں حفاظتی کٹس،وینٹی لیٹرزکی ڈیمانڈ بڑھ گئی۔

عمران خان نے کہا کہ ہماری خوش قسمتی ہے کہ چین نے ہمیں پوری ترجیح دی ، چین نے پوری دنیا میں سب سے پہلے ترجیح پاکستان کو دی ، پاکستان میں تمام میڈیکل سامان چین سے آرہاہے، چین سے آنیوالا سامان تقریباً ہر جگہ 4 سے 5دن میں مکمل طورپر پہنچ جائے گا۔

ان کا کہنا تھا کہ دنیا بھر میں ہیلتھ ورکرز پر دباؤ زیادہ ہے ، امریکا نے ہیلتھ ورکرز کیلئے ویزہ کھول دیئے ہیں ، ہم ڈاکٹرز، نرسز اور اسٹاف کے پیچھے کھڑے ہیں، کوروناوائرس کی شدت مزید بڑھے گی مگر تعین نہیں کیا جا سکتا۔

وزیراعظم نے کہا کہ مغربی ممالک میں کوروناوائرس کی شدت زیادہ ہے ، پاکستان میں دیگر ممالک کی نسبت اس کی شدت کم ہے ، ڈاکٹرزاور ہیلتھ ورکرز کی حفاظت ہم سب کی پہلی ترجیح ہے، پوری قوم اورحکومت ڈاکٹرزاور ہیلتھ ورکرز کیساتھ ہے۔

دنیابھرکےممالک کوحج کی تیاریاں مؤخرکرنےپرزور

ریاض:سعودی عرب نے کوروناوائرس کے باعث دنیا بھرکےممالک کو حج کی تیاریاں مؤخر کرنے پرزور دیا ہے.

سعودی وزیر حج محمد بنتن نے کہا ہے کہ سعودیہ کو مسلمانوں کئ صحت زیادہ عزیز ہے اس لئے صورتحال بہتر ہونےتک کوئی معاہدہ نہ کیا جائے.

سعودی وزیر حج نے مزید کہا ہے کہ سعودیہ عرب حج اور عمرہ زائرین کی خدمت کےلئے تیار ہے. حکومت نے رواں سال حج ہونے یا نہ ہونے کا حتمی فیصلہ نہیں کیا ہے.

رونالڈو کا 4 ماہ کی تنخواہ نہ لینے کافیصلہ

پرتگال : پرتگال کےشہرآفاق فٹبالر کرسٹیانو رونالڈو اور ان کےفٹبال کلب جووینٹس کےکوچ ماریزیوسری نےاپنے دیگر ساتھیوں سمیت 4 ماہ کی تنخواہیں نہ لینے کا ا فیصلہ کیاہے.

ذرائع کاکہنا ہےرونالڈو اور انکے ساتھی مارچ سے جون تک تنخواہ نہیں لیں گے.

جووینٹس کلب نے ایک مراسلے میں کہا ہے کہ جووینٹس کلب اس مشکل وقت میں کوچ اور کھلاڑیوں کا شکریہ ادا کرنا چاہتا ہے.

اس ضمن میں کریسٹیانو رونالڈو اور دیگرلوگ مجموعی طور پر 90 ملین یوروز یعنی 100کروڑ ڈالرز معاوضہ نہیں لیں گے.

واضح رہے کہ جووینٹس کلب کے 3 کھلاڑیوں ڈینئل روگانی, بلیزماتیوڈی اورپالاڈیبالا کےکورونا وائرس کئ رپورٹ مثبت آئی ہے.

کورونا سے نمٹنے کے لیے واٹس ایپ ہیلپ لائن تیار

وفاقی حکومت کی جانب سے عالمی وبا کورونا سے نمٹنے کے لیے ملک کے طول و عرض میں کورونا کے بارے میں تمام ضروری معلومات مقامی زبانوں میں پہنچانے کے لیے واٹس ایپ ہیلپ لائن تیار کر لی گئی ہے۔

حکومت کی جانب سے انگریزی، اردو، پنجابی، پشتو، سندھی، بلوچی اور کشمیری زبان پر مبنی ہیلپ لائن کا آغاز کیا گیا ہے جس کی کی بدولت شہری کورونا کے بارے میں اپ ڈیٹ، خطرے کی صورتحال اور کورونا ٹیسٹ کے حوالے سے نزدیکی لیبارٹری کے بارے میں جان سکیں گے۔

وزیراعظم عمران خان نے کہا کہ کورونا سے ڈرنا نہیں لڑنا ہے، واٹس ایپ ہیلپ لائن عوام کو مستند معلومات کی فراہمی میں اہم قدم ہے ، واٹس ایپ ہیلپ لائن پر پیغام بھیجتے ہی مطلوبہ معلومات فراہم کردی جائیں گی۔

کورونا ریلیف ٹائیگرفورس کا ٹیسٹ رن مکمل کرلیا گیا

وزیراعظم آفس میں کورونا ریلیف ٹائیگرفورس کا ٹیسٹ رن مکمل کرلیا گیا ہے۔ وزیراعظم عمران خان آج شام سے نوجوانوان کی رجسٹریشن کا آغازکریں گے۔ اس حوالے سے معاون خصوصی برائے یوتھ افیئرزعثمان نے کہا کہ ڈیٹا بیس سسٹم پرکام شروع کردیا گیا ہے۔ رجسٹریشن پورٹل وزیراعظم کی منظوری سے آج شام آن لائن دستیاب ہوگا۔ نوجوان سیٹیزن پورٹل پرخود کورجسٹرکرسکیں گے۔

عثمان ڈارکا کہنا تھا کہ ٹائیگرفورس قومی سطح پرسیاسی وابستگی سے بالا ترہوکرتشکیل دی جائیگی، رضاکاروں کی رجسٹریشن 10 اپریل تک جاری رہے گی، ٹائیگرفورس مکمل لاک ڈاؤن یا ہنگامی صورت میں کام کرے گی۔

مزید کہا کہ نوجوانوں کوگھروں تک راشن سپلائی کی تربیت دی جائیگی، وزیراعظم نے نوجوانوں کو ہنگامی حالات میں مدد کے لئے تیاررکھنے کی بھی ہدایت کی ہے۔

Page 454 of 2385