کراچی کنگز کے مالک سلمان اقبال نے کہا ہے کہ پی ایس ایل کا فائنل جیت گئے تو شوکت خانم اسپتال کے لیے ایک لاکھ ڈالر عطیہ کریں گے۔کراچی کنگز کی ٹیم اور آفیشلز نے شوکت خانم کینسر اسپتال کا دورہ کیا اور کینسر جیسے موذی مرض میں مبتلا بچوں سے ملاقات کرکے ان کے چہروں پر مسکراہٹ بکھیر دی۔کراچی کنگز کے مالک سلمان اقبال کا کہنا تھا کہ اندازہ نہیں تھا اتنے بڑے فنکشن میں آؤں گا، میرا وعدہ ہے ان بچوں کے لیے ٹیم اور اچھا کھیلے گی۔انہوں نے کہا کہ پی ایس ایل کا فائنل جیت گئے تو ایک لاکھ ڈالر شوکت خانم اسپتال کے لیے دوں گا، انشا اللہ فائنل میچ ہم لاہور میں کھیلیں گے۔جبکہ کراچی کنگز کے صدر وسیم اکرم کا کہنا تھا کہ شوکت خانم اسپتال میں میرٹ پر علاج ہوتا ہے، شوکت خانم میں کوئی سفارش نہیں چلتی، دنیا میں کوئی اسپتال ایسا نہیں جہاں کینسر کا مفت علاج ہوتا ہو۔

 معاون خصوصی برائے صحت ڈاکٹر ظفر مرزا کا کہنا ہے کہ پی ایس ایل کی وجہ سے کورونا وائرس کے کیسز چھپانے کی بات 200 فیصد غلط ہے۔ میڈیا سے گفتگوکرتے ہوئے معاون خصوصی برائے صحت ڈاکٹر ظفر مرزا کا کہنا تھا کہ پاکستان میں کورونا کے 5 مریض ہیں تاہم پاکستان سپر لیگ کی وجہ سے کورونا وائرس کے کیسز چھپانے کی بات 200 فیصد غلط ہے۔ جب کہ ہر نزلے اور زکام کو کورونا وائرس نہ سمجھا جائے، صوبائی اور وفاقی سطح پر مل کر کام کررہے ہیں، صوبائی حکومتیں خودمختار ہیں اور اپنے لوگوں کے لیے بہتر فیصلے کررہی ہیں۔ مزید کہا کہ چین میں کل 2 ہزار طلبہ موجود ہیں۔ جس میں سے ووہان میں 620 طلبہ ہیں اور ان تمام سے رابطہ ہے جب کہ چین نے پاکستانیوں کے لیے بھی وہی پابندی لگائی ہیں جو اپنے لوگوں کے لیے لگائی ہے۔

اسلام آباد میں ہونے والی ملاقات میں وزیر اعظم عمران خان نے پاکستان کی اعزازی شہریت پر ڈیرن سیمی کومبارکباد دی۔اس دوران وزیراعظم عمران خان نے کہا کہ پاکستان میں انٹرنیشنل کرکٹ کی بحالی میں سیمی کا کردار لائق تحسین ہے۔وزیراعظم نے جنوبی افریقا کے لیجنڈ بیٹسمین اور زلمی کے مینٹور ہاشم آملہ کو بھی خوش آمدید کہا۔
اس موقع پر عمران خان نے کہا کہ خوشی ہے پورا پی ایس ایل پاکستان میں ہورہا ہے اورشائقین کی بڑی تعداد میں موجودگی اورجوش و جذبہ حوصلہ افزا ہے، یہ پوری دنیا کو پاکستان کا مثبت پیغام ہے۔
خیال رہے کہ پاکستان میں کرکٹ کی بحالی کیلئے خدمات پر ڈیرن سیمی کو یوم پاکستان پر 23 مارچ کو صدر مملکت عارف علوی اعزازی شہریت اور سول ایوارڈ سے نوازیں گے۔
کراچی پریس کلب نے بھی ڈیرن سیمی اور کوئٹہ گلیڈی ایٹرز کے مینٹور سر ویوین رچرڈز کو تاحیات اعزازی رکنیت دینے کا فیصلہ کیا ہے۔

سندھ حکومت کے 13 مارچ تک تعلیمی ادارے بند رکھنے کے فیصلے کے باوجود کراچی کے مختلف علاقوں کے نجی اسکولوں میں تعلیمی سلسلہ جاری رکھے جانے پر دو روز میں 70 اسکولوں کی رجسٹریشن معطل کردی گئی۔حکومت سندھ کے 13 مارچ تک تعلیمی ادارے بند رکھنے کے فیصلے کے باوجود کراچی کے مختلف علاقوں کے نجی اسکولوں میں تعلیمی سلسلہ جاری رہا۔ ڈائریکٹوریٹ پرائیوٹ اسکولز کی ٹیموں نے شہر کے درجنوں اسکولوں کی ریجسٹریشن معطل کردی۔ تمام تر کارروائی ڈائریکٹر جنرل پرائیویٹ انسٹیٹوشنز کی ہدایت پر کی گئی۔

قومی کرکٹ ٹیم کے سابق کھلاڑی سعید اجمل بھی فیڈرل بورڈ آف ریونیو (ایف بی آر)کے نادہندہ نکلے، 26 لاکھ روپے سے زائدٹیکس کا نوٹس سابق کرکٹر کو بھجوادیا گیا۔

ایف بی آر ذرائع کے مطابق جائیدادوں کی خریدوفروخت کے ریکارڈ کی جانچ پڑتال کے دوران یہ انکشاف ہوا کہ قومی ٹیم کے سابق آف اسپنر سعید اجمل نے فیصل آباد کے مہنگے ترین علاقے گلبرگ میں جائیداد خریدی تھی۔
ایف بی آر نے آمدنی چھپانے پر 6 کرکٹرز کو نوٹس جاری کردیئے۔اپنی جائیداد کو کمرشل کروانے کے لیے انہوں نے فیس بھی ادا کی لیکن اس مد میں انہوں نے ایف بی آر کو ٹیکس کی ادائیگی نہیں کی۔

ایف بی آر نے سعید اجمل کو جائیداد کے ٹیکس کی مد میں واجب الادا 26لاکھ 57ہزار 500 روپے ادا کرنے کا نوٹس جاری کر کے فوری طور پر رقم قومی خزانے میں جمع کروانے کی ہدایت کردی ہے۔