Reporter SS

رنگ گوراکرنےوالی کریموں کےخطرناک اثرات

لندن: کاسمیٹک مصنوعات کے ماہرین نے صارفین کو خبردار کیا ہے کہ رنگ گورا کرنے والی کریم کے استعمال سے جلد کا کینسر ہوسکتا ہے۔

برطانیہ میں مصنوعات کا معیار جانچنے والے ادارے ایل جی اے نے رنگ گورا کرنے والی کریموں کی جانچ پڑتال کے بعد ہوش رُبا انکشافات پر مبنی رپورٹ جاری کی ہے جس میں کہا گیا ہے کہ ان کریموں میں بلیچنگ ایجنٹ ہائیڈروکوینون اور مرکری یعنی پارہ بھی شامل ہوسکتا ہے جس کا رنگ گورا کرنے کا طریقہ دیوار سے پینٹ اتارنے والے کیمیکل کو جلد پر لگانے کے مترادف ہے۔

برٹش اسکن فاؤنڈیشن نے بھی رپورٹ پر اعتماد کا اظہار کرتے ہوئے بتایا کہ ایسی کئی کریمیں ضبط کی گئی ہیں جن میں خطرناک کیمیکلز استعمال ہوئے ہیں۔ صارفین کو چاہیے ان کریموں کا استعمال فوری طور پر بند کردیں اور اگر کریموں کے استعمال سے چہرے کی جلد میں سوزش، جلن یا کچھ غیرمعمولی کیفیت محسوس کریں تو فوری طور پر کسی ماہر امراض جلد سے رجوع کریں۔

دوسری جانب برطانوی محکمہ صحت کے ماہرین کا بھی کہنا ہے کہ رنگ گورا کرنے والی مصنوعات میں اکثر اجزاء کے درست تناسب کی تفصیل نہیں بتائی جاتی جن کا استعمال صارفین کےلیے خطرناک ثابت ہوسکتا ہے۔ مثلاً ایک کیمیکل ہائیڈروکوینون استعمال کیا جاتا ہے جو کیمیائی طور پر دیوار سے پینٹ اتارنے والے مرکب کا قدرتی نعم البدل ہے۔

کاسمیٹک انڈسٹری میں رنگ گورا کرنے والی کریموں کی مانگ بڑھتی جارہی ہے جس کا فائدہ اُٹھاتے ہوئے کچھ کمپنیاں غیر معیاری اور مقررہ حد سے زیادہ کیمیکلز کی آمیزش سے کریمیں بنا رہی ہیں جن کے استعمال سے چہرے کی جلد کے کینسر کے واقعات میں ہوشربا اضافہ ہوا ہے۔ متاثرہ ممالک میں غریب ایشیائی ممالک کے ساتھ امریکا اور برطانیہ جیسے ترقی یافتہ مالک بھی شامل ہیں۔

الیکشن ٹریبونل نے دوبارہ الیکشن کا حکم دیا تھا

اسلام آباد: قومی اسمبلی کے سابق ڈپٹی اسپیکر قاسم سوری نے الیکشن ٹریبونل کی جانب سے اپنے حلقہ انتخاب میں دوبارہ الیکشن کرانے کا فیصلہ سپریم کورٹ میں چیلنج کردیا۔

میڈیا کے مطابق قاسم سوری نے اپنے وکیل ایڈووکیٹ نعیم بخاری کی وساطت سے دائر اپیل میں موقف اختیار کیا ہے کہ ٹریبونل نے شواہد کا مکمل جائزہ نہیں لیا، انتخابی عمل میں بے ضابطگیاں ان سے منسوب نہیں ہو سکتیں، اس لئے الیکشن ٹریبونل کا فیصلہ کالعدم قرار دیا جائے اور ان کی درخواست کی جلد از جلد سماعت کی جائے۔

واضح رہے کہ الیکشن ٹریبونل نے قاسم سوری کی کامیابی کانوٹی فکیشن کالعدم قرار دے کر دوبارہ الیکشن کا حکم دیا تھا۔

ڈپٹی ڈائریکٹر عبدالرزاق قاضی کے خلاف انکوائری شروع کردی گئی

کراچی:اینٹی کرپشن نے جعلی تقرری اور غیر قانونی پروموشن پرسندہ ایجوکیشن اینڈ لٹریسی ڈپارٹمنٹ کے گریڈ 18 کے ڈپٹی ڈائریکٹر عبدالرزاق قاضی کے خلاف انکوائری شروع کردی، اینٹی کرپشن نے سیکرٹری تعلیم کو لیٹر جاری کرکے تمام ریکارڈ طلب کرلیا۔

جعلی تقررنامے پر بھرتی ٹیچرگریڈ 18 تک پہنچ گیا ,عبدالرزاق قاضی ڈائریکٹوریٹ آف پرائیویٹ انسٹی ٹیوشنزمیں ڈپٹی ڈائریکٹرتعینات ہیں.

محکمہ تعلیم کے پاس عبدالرزاق قاضی کی پرسنل فائل ہے نا ہی دیگر ریکارڈ موجود ہے، 1986 سے اب تک عبدالرزاق قاضی کہاں کہاں تعینات رہے کسی کو معلوم نہیں عبدالرزاق قاضی کے خلاف پہلی انکوائری 2014 میں ہوئی تھی.

انکوائری رپورٹ کیمطابق عبدالرزاق قاضی 1986 میں سکھر میں جونیئراسکول ٹیچربھرتی ہوئے، عبدالرزاق قاضی 1994 میں حیرت انگیز طور پر ہائی اسکول ٹیچر بن گئے اور 2002 میں کراچی تبادلہ کرایا ، 2006میں گریڈ 17 کے سبجیکٹ اسپیشلسٹ کے عہدے پر ترقی مل گئی ،سابق سیکرٹری تعلیم اور ڈائریکٹراسکول ایجوکیشن نے عبدالرزاق کیخلاف کارروائی کی سفارش کی تھی.

ایران کے سرحدی شہرمیرجاواہ میں پاک ایران سرحدی حکام کا اجلاس

چاغی: پاکستان اورایران نے سرحد پر زائرین کے لیے خصوصی کاؤنٹرز کے قیام پراتفاق کیا ہے جہاں زائرین کو 24 گھنٹے سہولیات فراہم کی جائیں گی۔

ایران کے سرحدی شہرمیرجاواہ میں پاک ایران سرحدی حکام کا اجلاس ہوا۔ پاکستانی حکام کی سربراہی ڈپٹی کمشنرچاغی جب کہ ایران کے کرنل شہرام خصرو نے کی۔ دونوں ملکوں نے زائرین کے لئے ٹرانسپورٹ، رہائشی اوردیگرسہولیات کو مزید بہتر بنانے پر اتفاق کیا۔

اجلاس میں پاکستان سے ایران جانے والے زائرین کے لیے 22 کاوٴنٹرقائم کرنے پر اتفاق کیا گیا، ان کاوٴنٹرز پر 24 گھنٹے کام ہوگا۔ اس کے علاوہ زائرین کے مسائل کے حل کے لیے دونوں ممالک کی جانب سے بروقت رابطہ کے لیے دونوں جانب سے فوکل پرسن بنانے پر بھی اتفاق کیا گیا۔

لوئر دیر: تیز بارش کے دوران سیلابی ریلے میں مکان بہہ گیا

دیر لوئر: تیز بارش کے دوران سیلابی ریلے میں مکان بہہ گیا جس میں 3بچے بھی بہہ کر جاں بحق ہوگئے۔

لوئردیر میں تیز بارش کے دوران سیلابی ریلہ مکان کو بہا کر لے گیا جس میں 3بچے بھی بہہ کر جاں بحق ہوگئے۔

مقامی انتظامیہ کے مطابق واقعہ تحصیل میدان لر میرگام میں پیش آیا، ریلہ میں بہنے والے بچوں کی لاشیں نکال لی گئیں،تینوں کا تعلق ایک ہی خاندان سے تھا۔

پابندی کا اطلاق یکم اکتوبر سے ہوگا

لاہور: پنجاب میں آئندہ 3 ماہ کے لیے فصلوں کی باقیات، ٹائر، پلاسٹک اور کوڑا کرکٹ جلانے پر پابندی عائد کردی گئی ہے۔

پنجاب حکومت نے صوبے میں فضائی آلودگی پر قابو اور اسموگ کو کم کرنے کے لئے دفعہ 144 نافذ کر دی ہے جس کا اطلاق آج بدھ یکم اکتوبر سے ہوگا۔ یہ پابندی صوبے میں یکم اکتوبر سے 31 دسمبر 2019 تک 3 ماہ کے لئے لگائی گئی ہے۔

ایڈیشنل چیف سیکرٹری داخلہ سید علی مرتضی کی جانب سے باضابطہ نوٹی فکیشن جاری کردیا گیا ہے۔ جس کے مطابق صوبے بھر میں ٹائر، پلاسٹک مٹیریل وغیرہ جلانے پر پابندی عائد ہو گی۔ کھیتوں میں آگ لگانے پر پابندی ہو گی۔ یہ فیصلہ فضائی آلودگی اور فوک کے پیش نظر کیا گیا ہے ۔ دفعہ 144 کی خلاف ورزی کرنے والوں کے خلاف قانونی کارروائی کی جائے گی ۔

صارفین سے تکلیف کیلئے معذرت خواہ ہیں، ترجمان کے الیکٹرک

کراچی: کے الیکٹرک نے نیشنل گرڈ سے بجلی کی کمی کا جواز بنا کر لوڈشیڈنگ شروع کردی۔

ترجمان کے الیکٹرک کا کہنا ہے کہ حبکو پاورپلانٹ کی 500 کے وی این کے آئی لائن میں فالٹ آگیا ہے جس کے باعث کے الیکٹرک کو 250 میگا واٹ بجلی کی فراہمی میں کمی کا سامنا ہے، صورتحال سے نمٹنے اور جلد بحالی کیلئے این ٹی ڈی سی حکام سے رابطے میں ہیں اورصارفین سے تکلیف کیلئے معذرت خواہ ہیں۔

دوسری جانب کراچی میں کے الیکٹرک نے نیشنل گرڈ سے بجلی کی کمی کا جواز بناکر لوڈشیڈنگ شروع کردی۔ شہر میں لوڈشیڈنگ کا دورانیہ 10 گھنٹے تک پہنچ گیا جب کہ مستثنیٰ علاقوں میں بھی لوڈشیڈنگ شروع کردی گئی۔ شہر قائد میں مختلف علاقوں میں فنی خرابی یا کیبل فالٹ کے نام پر بھی بجلی کی بندش جاری ہے۔

10سال بعد مانی کااعتراف

کراچی : مزاح کی دنیا میں شہرت رکھنے والے کامیڈین و اداکار سلمان شیخ عرف مانی نے اعتراف کیا ہےکہ انہوں نے اپنی اہلیہ حِرا سے 10 سال تک پہلی شادی کو چھپایا۔

ایک انٹرویو کے دوران میزبان نے مانی سے سوال کیا کہ کیا حرا کو آپ کی شادی کے بارے میں معلوم تھا؟ جس کے جواب میں مانی نے کہا کہ حرا کو میری پہلی شادی کے بارے میں معلوم نہیں تھا، اگر ہوتا تو وہ مجھ سے کبھی شادی نہیں کرتی۔

مانی نے انٹرویو میں مزید بتایا کہ میں نے اپنی پہلی شادی کو اہلیہ حرا سے 10 سال تک چھپایا لیکن ایک دن اچانک اُن کی پہلی بیوی آمنہ بیٹے نیّر کے ساتھ اُن کے گھر پر آگئیں اور پیسوں کا مطالبہ کرنے لگیں، اُسی دن حرا کو میری پہلی شادی کے بارے میں معلوم ہوا تھا۔

ان کا مزید کہنا تھا کہ حرا دل کی بہت اچھی ہیں انہیں اس بارے میں معلوم ہوا تو انہیں کوئی فرق نہیں پڑا اور اب میری پہلی شادی ختم ہو چکی ہے، شکر ہے اس وقت ٹی وی اور انٹرنیٹ کا دور نہیں تھا ورنہ یہ بات ٹی وی پر آجاتی۔

اِن تمام باتوں کے بعد مانی نے زور دار قہقہہ لگاتے ہوئے کہا کہ یہ صرف ایک مذاق تھا، اس میں کوئی صداقت نہیں، اگر میری شادی ایسےہوئی ہوتی تو اِس کا علم انسان تو کیا جانوروں کو بھی ہوتا۔

یاد رہے کہ اداکارہ حرا اور مانی کا شمار پاکستان کی سب سے پسندیدہ اداکار جوڑی میں ہوتا ہے اور دونوں 2008 میں شادی کی تھی۔

قوم پاک فوج کے شانہ بشانہ کھڑی ہے، شاہ محممود قریشی

اسلام آباد: وزیرخارجہ شاہ محمود قریشی کا کہنا ہے کہ قوم سیسہ پلائی دیوارکی طرح پاک فوج کے شانہ بشانہ کھڑی ہے۔

پاک فضائیہ کے سربراہ ایئرچیف مارشل مجاہد انورکی وزیرخارجہ شاہ محمود قریشی سے ملاقات ہوئی۔ ملاقات میں پاک فضائیہ کی آپریشنل تیاریوں اور خطے کی صورتحال پرتبادلہ خیال کیا گیا۔

ملاقات میں پاک فضائیہ کے سربراہ نے خطرے سے نمٹنے اورفضائی حدود کے دفاع کیلئے پاک فضائیہ کے عزم کا اعادہ کیا۔

وزیرخارجہ نے پاک فضائیہ کی پیشہ ورانہ مہارت اورعزم وحوصلے کی تعریف کی اور کہا کہ دشمن کسی بھول میں مت رہے، قوم سیسہ پلائی دیوار کی طرح پاک فوج کے شانہ بشانہ کھڑی ہے۔

پلاسٹک بیگ کی تیاری، فروخت اوراستعمال قابل سزا جرم

کراچی:کراچی سمیت سندھ بھر میں آج سے پلاسٹک بیگ کے استعمال ، فروخت اور تیاری پر پابندی عائد کردی گئی ہے۔

محکمہ ماحولیات سندھ نے پابندی کا نوٹیفکیشن بھی جاری کردیا ہے۔

وزیر اعلیٰ سندھ کے مشیر برائے ماحولیات بیرسٹر مرتضیٰ وہاب کا کہنا ہے کہ ماحولیاتی قوانین کے تحت پلاسٹک بیگ کی تیاری ، فروخت اور استعمال قابل سزا جرم ہوگا۔

مرتضیٰ وہاب کا کہنا ہے کہ قانون کی خلاف ورزی کرنے والوں کے خلاف قواعد کے تحت مقدمہ درج کیا جائے گا اور قانون کے مطابق گرفتاری وسزا بھی عمل میں لائی جائے گی۔

مشیر ماحولیات کے مطابق پابندی کا اطلاق سندھ بھر میں ہوگا اور محکمہ ماحولیات پلاسٹک بیگ کے استعمال کی پابندی پر عمل کرانے کا پابند ہوگا۔

ماحولیاتی ٹیمیں مختلف مارکیٹوں کا معائنہ کریں گی اور خلاف ورزی کے مرتکب افراد کے خلاف کارروائی ہوگی۔

بیرسٹر مرتضیٰ وہاب نے عوام سے اپیل بھی کی ہے کہ وہ پلاسٹک بیگز کے بجائے کپڑے، کاغذ یا تھیلے کا استعمال کریں۔

واضح رہے کہ سندھ حکومت نے رواں سال اگست کے مہینے میں پلاسٹک بیگ کے استعمال پر پابندی لگانے کا اعلان کیا تھا جس کیلئے یکم اکتوبر کی ڈیڈ لائن دی گئی تھی۔

مشیر ماحولیات کا کہنا تھا کہ قانون پر عمل درآمد اس وقت تک نہیں ہوسکتا جب تک عوام میں آگاہی نہ ہو۔

پلاسٹک بیگ پر پابندی کا فیصلہ بڑھتی ہوئی ماحولیاتی آلودگی پر قابو پانے کے لیے کیا گیا ہے۔

پاکستان کا شمار ان ممالک میں ہوتا ہے جنہیں موسمیاتی تبدیلیوں سے سخت خطرات لاحق ہیں ۔

Page 691 of 2388