Reporter SS
کراچی : پاکستانی ہدایتکاروں نے معروف اداکار احد رضا میر اور اداکارہ سجل علی پر ڈراموں اور فلموں میں کام کرنے پر پابندی لگانے کا مطالبہ کردیا۔
حال ہی میں پاکستانی ہدایتکار حسیب حسن نے اداکارہ سجل علی اور اداکار احد رضا میر کے ساتھ بھارتی پروڈیوسر کے لیے ویب سیریز ’دھوپ کی دیوار‘ بنائی ہے جو کہ تکمیل کے حتمی مراحل میں ہے۔
اس حوالے سے چند پاکستانی ہدایت کاروں کا کہنا ہے اداکارہ سجل علی اور اداکار احد رضا میر بھارتی آرٹسٹ کے ساتھ کام کررہے ہیں لہٰذا ان پر پابندی عائد کی جائے۔
اس تمام تر صورتحال پر پاکستان فلم پروڈیوسر ایسوسی ایشن کے چوہدری اعجاز کا کہنا ہے کہ ان فنکاروں کے خلاف کارروائی ہونی چاہیے جو موجودہ صورتحال کے باوجود بھی بھارتی پروجیکٹس پر کام کررہے ہیں۔
دوسری جانب اداکارہ ثناء فخر نے پاکستانی فنکاروں کے بھارت میں کام کرنے پر کوئی اعتراض نہیں کیا۔
واضح رہے کہ بھارت کی سنیما انڈسٹری سے وابستہ فنکاروں اور دیگر عملے پر مشتمل آل انڈیا سِنے ورکرز ایسوسی ایشن نے پلوامہ حملے کے بعد پاکستانی فنکاروں پر مکمل طور پر پابندی عائد کردی تھی جب کہ دونوں ممالک کی جانب سے مواد نشر کرنے پر بھی پابندی لگائی گئی ہے۔
یاد رہے کہ اداکار و گلوکار احد رضا میر نے ساتھی اداکارہ سجل علی کے ساتھ گزشتہ ماہ قبل باضابطہ طور پر سماجی رابطوں کی ویب سائٹ انسٹاگرام پر منگنی کا اعلان کیا تھا۔
کراچی: کے الیکٹرک نے نیشنل گرڈ سے بجلی کی کمی کا جواز بنا کر لوڈشیڈنگ شروع کردی۔
ترجمان کے الیکٹرک کا کہنا ہے کہ حبکو پاورپلانٹ کی 500 کے وی این کے آئی لائن میں فالٹ آگیا ہے جس کے باعث کے الیکٹرک کو 250 میگا واٹ بجلی کی فراہمی میں کمی کا سامنا ہے، صورتحال سے نمٹنے اور جلد بحالی کیلئے این ٹی ڈی سی حکام سے رابطے میں ہیں اورصارفین سے تکلیف کیلئے معذرت خواہ ہیں۔
دوسری جانب کراچی میں کے الیکٹرک نے نیشنل گرڈ سے بجلی کی کمی کا جواز بناکر لوڈشیڈنگ شروع کردی۔ شہر میں لوڈشیڈنگ کا دورانیہ 10 گھنٹے تک پہنچ گیا جب کہ مستثنیٰ علاقوں میں بھی لوڈشیڈنگ شروع کردی گئی۔ شہر قائد میں مختلف علاقوں میں فنی خرابی یا کیبل فالٹ کے نام پر بھی بجلی کی بندش جاری ہے۔
اسلام آباد:اقوام متحدہ کی مستقل مندوب ملیحہ لودھی کو عہدے سے ہٹا کر ان کی جگہ منیر اکرم کو تعینات کردیا گیا ہے جبکہ بڑے پیمانے پر مختلف ممالک میں سفیر اور قونصل جنرل کے عہدوں میں بھی تبدیلیاں کی گئی ہیں۔
دفتر خارجہ کی جانب سے جاری کردہ بیان میں بتایا گیا ہے کہ وزیراعظم عمران خان نے وزارتِ خارجہ میں نئی تعیناتیوں کی منظوری دے دی ہے، جس کے تحت ملیحہ لودھی کو اقوام متحدہ کی مستقل مندوب کے عہدے سے ہٹا کر ان کی جگہ منیراکرم کو تعینات کردیا گیا ہے۔
ترجمان دفتر خارجہ ڈاکٹر محمد فیصل کے مطابق ڈائریکٹر جنرل برائے اقوام متحدہ خلیل احمد ہاشمی کو جنیوا میں مستقل مندوب تعینات کیا گیا ہے، جب کہ وزارت خارجہ کے ایڈیشنل سیکریٹری وزارت خارجہ محمد اعجاز کو ہنگری، احسن کے کے کو مسقط اور سید سجاد حیدر کو کویت میں پاکستان کا سفیر تعینات کیا گیا ہے۔
اسلام آباد:رویت ہلال کمیٹی کے چیئرمین مفتی منیب الرحمن نے وزارت سائنس کا قمری کیلنڈر غلط ثابت کردیا جس پر وفاقی وزیر مذہبی امور نور الحق قادری نے کہا ہے کہ چاند کا فیصلہ رویت ہلال کمیٹی ہی کرے گی۔
یہ بات انہوں نے رویت ہلال سے متعلق جدید ٹیکنالوجی کے استعمال پر منعقدہ ایک اہم اجلاس کی صدارت کرتے ہوئے کہی۔ اجلاس میں اسلامی نظریاتی کونسل کے چیئرمین قبلہ ایاز، چیئرمین مرکزی رویت ہلال کمیٹی مفتی منیب الرحمن، مفتی شہاب الدین پوپلزئی، قاری حنیف جالندھری سمیت تمام وفاق المدارس، صوبائی اوقاف و مذہبی امور، اسپارکو اور محکمہ موسمیات کے نمائندوں نے شرکت کی۔
اجلاس میں رویت ہلال کمیٹی کی تشکیل نو، وزارتِ سائنس و ٹیکنالوجی کے قمری کیلنڈر کے استعمال اور عیدین کا تنازعہ زیر بحث آیا اور تمام جید علماء کرام سمیت متعلقہ سائنسی محکموں کے نمائندوں کی رائے معلوم کی گئی۔
اجلاس کے اختتام پر وفاقی وزیر نے کہا کہ وزارتِ مذہبی امور رویت ہلال کے مسئلہ پر علماء کرام کی رائے کے ساتھ کھڑی ہے، رویت ہلال کے عمل میں شرعی تقاضوں کے ساتھ ساتھ معاشرتی اور مذہبی تہوار بھی جڑے ہوئے ہیں، اس خطہ کی روایات میں رویت ہلال شامل ہے ایک اسلامی معاشرے میں ہمیشہ قرآن و سنت کی طرف رجوع کیا جاتا ہے۔
نور الحق قادری نے کہا کہ محکمہ فلکیات و موسمیات چاند کی پیدائش اور امکان رویت پر مدد دیتے آئے ہیں تاہم حتمی فیصلہ کا انحصار شریعت کی رو سے مرکزی رویت ہلال کمیٹی کا ہوتا ہے۔ انہوں نے واضح کیا کہ قمری کیلنڈر مرتب کرنے پر وزارت سائنس و ٹیکنالوجی کی کوشش قابل تعریف ہے تاہم رویت کا حتمی فیصلہ مرکزی رویت ہلال کمیٹی ہی کرے گی۔
اجلاس کے دوران عیدین کے موقع پر تنازع کے حل کے لیے جامع سفارشات مرتب کرنے کے لیے وزیر مذہبی امور پیر نور الحق قادری کی زیر صدارت کمیٹی کے قیام کا فیصلہ بھی کیا گیا۔ اس کمیٹی میں قبلہ ایاز، قاری حنیف جالندھری، مفتی شہاب الدین پوپلزئی، سیکریٹری مذہبی امور اور وفاقی وزارت مذہبی امور کے دو افسران شامل ہوں گے۔
اسلام آباد: حکومت نے اکتوبر کے لیے پیٹرولیم مصنوعات کی موجودہ قیمتیں برقرار رکھنے کا اعلان کردیا۔
ایکسپریس نیوز کے مطابق حکومت نے اوگرا کی پیٹرولیم مصنوعات کی قیمتوں میں کمی کی سمری مسترد کردی ہے اور اکتوبر کے لیے پیٹرولیم مصنوعات کی موجودہ قیمتیں ہی برقرار رکھنے کا فیصلہ کیا ہے۔
اوگرا نے پیٹرولیم مصنوعات کی قیمتوں میں کمی کی تجویز دی تھی، تاہم وزارت خزانہ کا کہنا ہے کہ ستمبر کے وسط میں عالمی منڈی میں پیٹرولیم مصنوعات کی قیمتوں میں اضافہ کے رجحان کی وجہ سے قیمتیں برقرار رکھی گئی ہیں۔
قبل ازیں اوگرا کی جانب سے وزارت پیٹرولیم کو بھجوائی گئی سمری میں آئندہ ماہ کے لیے پیٹرولیم مصنوعات کی قیمتوں میں کمی کی سفارش کی گئی تھی۔
اوگرا کی جانب سے بھیجی گئی سمری میں پیٹرول 2 روپے 55 پیسے فی لیٹر، ہائی اسپیڈ ڈیزل 3 روپے 23 پیسے، لائٹ ڈیزل آئل 2 روپے 41 پیسے سستا کرنے جب کہ مٹی کے تیل کی قیمت میں ایک روپے 19 پیسے فی لیٹر اضافے کی تجویز دی گئی تھی۔
صدرمملکت ڈاکٹر عارف علوی میچ دیکھنے نیشنل سٹیڈیم کراچی پہنچ گئے ،چیئرمین پی سی بی احسان مانی نے ان کا استقبال کیا ۔
تفصیلات کے مطابق پاکستان میں کرکٹ کے میدان 10 سال آباد ہو گئے ،نیشنل اسٹیڈیم کراچی میں پاکستان اور سری لنکا کے درمیان دوسرا ون ڈے میچ کھیلا جارہا ہے ،
اس موقع پر سکیورٹی کے سخت ترین انتظامات کئے گئے ہیں ، صدر مملکت ڈاکٹر عارف علوی کراچی میں ہونے پر میچ دیکھنے کیلئے نیشنل اسٹیڈیم کراچی پہنچ گئے،چیئرمین پی سی بی احسان مانی نے ان کا استقبال کیا۔