راولپنڈی:افواجِ پاکستان کی جانب سے جاری بیان کے مطابق بھارت کے ایک اورآپریشن کی ڈرامے بازیاں سامنے آگئیں جب کہ پاکستانی فوج بھارت کی جارحیت کا منہ توڑ جواب دینے کیلئے تیار ہے۔

بھارتی آرمی چیف کی گیڈربھبھکیوں پر افواج پاکستان نے کرارا جواب دیتے ہوئے کہا کہ مقبوضہ وادی میں ناکامیوں کوچھپانے کے لئے بھارت الٹے بیانات اور غلط بیانی سے کام لے رہا ہے، جموں و کشمیر سے متعلق بھارتی فوجی کمانڈروں کے غیرذمہ دارانہ بیانات فرسٹریشن کا اظہار ہے جب کہ بھارتی جرنیل عالمی دنیا کی توجہ مقبوضہ کشمیر میں جاری دہشت گردی اور بربریت سے ہٹانا چاہتے ہیں۔

ڈی جی آئی ایس پی آرمیجر آصف غفور کے مطابق بھارت کے ایک اورآپریشن کی ڈرامے بازیاں سامنے آگئیں ، بھارتی فوجی کمانڈر مقبوضہ کشمیر میں صورتحال پر قابو پانے سمیت میں ناکام ہو چکے اوربھارت دنیا کی توجہ مقبوضہ کشمیر کے حالات سے ہٹانے میں ناکام ہو چکا ہے، اگربھارت نے کسی قسم کی بھی چھیرچھاڑ کی تو اس کے خطے کے امن پر سنگین اثرات مرتب ہوں گے۔

اسلام آباد: ملک کی 10بڑی بجلی کی تقسیم کار کمپنیوں نے ایک سال کے دوران 157 ارب روپے کے لائن لاسز کا بوجھ صارفین پر ڈال دیا۔

آڈیٹر جنرل آف پاکستان کی آڈٹ رپورٹ برائے 18-2017 کے مطابق ایک سال کے دوران ملک کی 10 بڑی بجلی کی تقسیم کار کمپنیوں کی 28 ارب یونٹس بجلی لائن لاسز کی نذر ہوگئی، جس کی مجموعی مالیت 157 ارب روپے سے زائد تھی اور لائن لاسز کی مد میں خسارے کا بوجھ صارفین کو برداشت کرنا پڑا۔

رپورٹ کے مطابق لائن لاسز میں حیسکو (حیدرآباد الیکٹرک سپلائی کمپنی) سر فہرست رہی جس کا اس مد میں خسارہ 49ارب 51 کروڑ روپے رہا، سیپکو 37 ارب 73 کروڑ سے زائد کے لائن لاسز کے ساتھ دوسرے نمبر پر رہی، پیسکو کی جانب سے 29ارب روپے سے زائد کے لائن لاسز رہے، کیسکو کے 19ارب 22 کروڑ، لیسکو کی جانب سے 7 ارب 62 کروڑ روپے ، میپکو کی جانب سے 7 ارب19کروڑ روپے جب کہ آئیسکو دس لاکھ 70ہزار روپے پر کم لائن لاسز والی کمپنی نکلی۔

اسلام آباد: سپریم کورٹ کے فاضل جج جسٹس قاضی فائز عیسیٰ نے جنگلات کی کٹائی کے حوالے سے دائر درخواست کی سماعت کے دوران ریمارکس دیئے ہیں کہ ایک آمر آکر دو منٹ میں پارلیمنٹ کو اڑا دیتا ہے۔

جسٹس مشیرعالم کی سربراہی میں سپریم کورٹ کے 3 رکنی بینچ نے خیبر پختونخوا میں جنگلات کی کٹائی سے متعلق کیس کی سماعت کی۔ جنگلات کی ملکیت کے دعوی داروں کی درخواستیں خارج کرتے ہوئے قرار دیا کہ درخواست گزاروں نے کیس کی سماعت کے دوران کسی سطح پراپنا حق نہیں مانگا۔

دوران سماعت قاضی فائز عیسی نے ریمارکس دیئے کہ حکومت کو اس کیس میں نظرثانی کے لئے آناچاہیے تھا کہ درخواست گزاروں کا حق دعوی نہیں بنتا،حکمران دیگر مسائل میں الجھے ہوئے ہیں اصل مسئلہ ماحول کا تحفظ ہے، جنگلات کا تحفظ آنے والی نسلوں کے مستقبل کے لئے ضروری ہے، جنگلات کاٹنے والے لوگ نسلوں کو قتل کر رہے ہیں۔

کراچی: کراچی میں آوارہ کتوں کی تعداد میں بے پناہ اضافہ ہوگیا ،کتوں کی بہتات سے سگ گزیدگی کے واقعات بڑھ گئے ہیں 9 ماہ میں آوارہ کتوں نے12ہزار سے زائد شہریوں کو کاٹا ہے۔

حکومت سندھ اور بلدیاتی ادارے آوارہ کتوں کے خاتمے کے لیے ٹھوس اقدامات نہیں کررہے،میئرکراچی بتاچکے ہیں کہ ہمارے پاس کتوں کو مارنے والا زہر موجود نہیں،حکومت کی جانب سے کوئی اعلان نہیں کیاگیا اور ضلعی بلدیاتی اداروں کے پاس کتے مارنے والا زہر اور ویکسین موجود نہیں ہے،رات کے وقت سڑکوں پر کتوں کے غول شہریوں پر حملہ آور ہورہے ہیں۔

موٹرسائیکل سوار کتے پیچھے پڑنے پر حادثات کا شکار ہوجاتے ہیں ، شہر کے تمام متوسط اور پوش علاقوں میں آوارہ کتے ہر طرف منڈلاتے نظر آتے ہیں ، یکم جنو ری سے ستمبر تک رواں سال کے 9 ماہ کے دوران صرف جنا ح اسپتال میں 7008 شہری کتوں کے کا ٹنے کی وجہ سے اسپتال پہنچے جنھیں جناح اسپتال میں طبی امداد فراہم کی گئی۔

کراچی: بی اے سال اول ریگولر سالانہ امتحانات برائے 2018 ءکے نتائج کا علان کردیا۔

جامعہ کراچی کے ناظم امتحانات پروفیسر ڈاکٹر ارشد اعظمی کے مطابق بی اے سال اول ریگولر سالانہ امتحانات برائے 2018 ءکے نتائج کا علان کردیا گیا ہے۔نتائج کے مطابق امتحانات میں 5927 طلبہ شریک ہوئے،2120 طلبہ کو کامیاب قراردیا گیا جبکہ 3807 طلبہ ناکام قرارپائے۔کامیاب طلبہ کا تناسب 35.77 فیصدرہا۔

کراچی:  کراچی نے سری لنکنزکے استقبال کیلیے بانہیں پھیلا دیں۔

پاکستان میں انٹرنیشنل کرکٹ کی جمعے کو واپسی ہوگی،سری لنکا سے تینوں ون ڈے میچز کراچی میں کھیلے جائیں گے، شہر قائد نے آئی لینڈرز کا استقبال کرنے کیلیے بانہیں پھیلا دی ہیں، قذافی اسٹیڈیم میں تربیتی کیمپ اتوار کو ہی ختم ہوگیا تھا، گذشتہ روز کھلاڑیوں نے آرام کیا اور میزبان اسکواڈ گذشتہ رات ہی لاہور سے روانگی کے بعد کراچی پہنچ گیا۔

دوسری جانب پیر کو سری لنکن بورڈ نے بھی اپنی ٹیم کی روانگی کا شیڈول جاری کردیا،کھلاڑیوں کو منگل کے روز کولمبو میں بورڈ ہیڈ کوارٹرز سے رخصت کیا جائے گا، سب سے پہلے آفیشل فوٹو گراف اور پھر کپتان کی میڈیا سے گفتگو ہوگی، مذہبی رسومات کے بعد کرکٹرز پاکستانی وقت کے مطابق صبح ساڑھے 6بجے اڑان بھریں گے،کراچی آمد شام 6بجے متوقع ہے۔

ٹرافی کی تقریب رونمائی کے بعد مہمان کپتان لاہیرو تھریمانے میڈیا سے بات کریں گے، سری لنکا ٹیم کی ٹریننگ شام 6بجے ہوگی، جمعے کو پہلا ون ڈے سہ پہر 3 بجے شروع ہونا ہے۔

دوسری جانب ون ڈے سیریز کیلیے نیشنل اسٹیڈیم میں تیاریاں عروج پر پہنچ گئیں، سیکیورٹی کے حوالے سے حکمت عملی تیار کرلی گئی، وینیو کا کونا کونا اب کیمروں کی نظرمیں ہوگا،اسٹیڈیم میں کمانڈ اینڈ کنٹرول روم نے کام شروع کردیا۔

مختلف ایریاز میں 80 سے زائد ہائی ریزولوشن کیمرے نصب کردیے گئے، انکلوژرز،گراؤنڈ، پویلین اوراسٹیڈیم کے اندرونی ایریاز کیمروں کی مکمل نگرانی میں ہوں گے،گراؤنڈ کے چاروں اطراف،ملحقہ سڑکیں اورعمارتیں بھی کیمرے کی آنکھ سے نہیں بچ سکیں گی،جدید کیمروں کے ذریعے اسٹیڈیم میں بیٹھے ہرشخص کی نقل وحرکت مانیٹرہوگی،اسٹیڈیم کے باہرسے گزرتی ایک ایک گاڑی کوبھی مانیٹرکیا جائیگا۔

کیمرے رات کی تاریکی میں بھی ریکارڈنگ کی صلاحیت رکھتے ہیں،کمانڈ اینڈ کنٹرول روم کی نگرانی سیکیورٹی ادارے کریں گے، رش سے بچنے کیلیے شائقین کو میچ شروع ہونے سے تین گھنٹے قبل اسٹیڈیم پہنچنے کی ہدایت کردی جائے گی، تماشائی کم از کم5 مقامات پر چیکنگ کے مراحل سے گزرنے کے بعد ہی اپنے اسٹینڈز تک پہنچ پائیں گے۔

یاد رہے کہ کراچی میں پہلا ایک روزہ میچ 27 ستمبر،دوسرا 29 ستمبر اور تیسرا 2 اکتوبر کو شیڈول ہے، لاہور میں ٹی ٹوئنٹی میچز ساڑھے 6 بجے شروع ہوں گے، یہاں میچز 5، 7 اور 9 نومبر کو کھیلے جائیں گے۔