ریاض:کرپشن کے الزام میں گرفتار سعودی عرب کے سابق فرماںروا شاہ عبداللہ کے صاحبزادے شہزادے متعب بن عبد اللہ کو ایک ڈیل کے بعد رہا کردیا گیا۔متعب بن عبد اللہ کو انسداد بدعنوانی مہم کے تحت 5 نومبر کو دیگر 10 شہزادوں کے ہمراہ گرفتار کیا گیا تھا۔ شہزادہ متعب بن عبداللہ کو ایک ارب ڈالر واپس کرنے کے سمجھوتے پر رہا کیا گیا ۔ شہزادہ متعب ان 200 اہم سیاسی و کاروباری شخصیات میں سے ایک ہیں جنہیں 4 نومبر کو نظربند کیا گیا اور حکام کی جانب سے گرفتار افراد میں سے وہ سب سے زیادہ بااثر سمجھے جانے والے شہزادے ہیں۔ اس حوالے سے سعودی ذرائع کا کہنا ہے کہ کچھ شہزادوں نے اپنے جرائم کا اعتراف کرتے ہوئے ناجائز دولت واپس حکومت کو سپرد کرنے پر رضامندی ظاہر کر دی تھی۔ ممکنہ طور پر ان شہزادوں میں متعب بن عبد اللہ بھی شامل ہیں۔64 سالہ شہزادہ متعب سعودی عرب کی نیشنل گارڈ کے سربراہ بھی تھے جنہیں گرفتاری سے کچھ دیر قبل ہی عہدے سے ہٹا یا گیا تھا۔مغربی میڈیا نے دعویٰ کیا ہے کہ کرپشن کے الزام میں گرفتار مزید تین شخصیات نے ڈیل کرلی تاہم ان افراد کے نام ظاہر نہیں کیے گئے۔دوسری جانب سعودی حکومت نے اس حوالے سے خاموشی اختیار کر رکھی ہے۔

ایمز ٹی وی (انٹرٹینمنٹ)حال ہی میں مس ورلڈ منتخب ہونے والی بھارتی حسینہ مانوشی چھیلر نے عامر خان کی فلم میں کام کرنے کی خواہش کا اظہار کیا ہے۔ بھارتی میڈیا کو دیئے گئے انٹرویو میں مانوشی چھیلر نے کہا کہ بالی ووڈ میں انٹری اس وقت ان کے ذہن میں نہیں ہے وہ سوچ رہی ہیں تو بس اتنا کہ اگلا سال ان کے لیے کس قدر ہنگامہ خیز اور دلچسپ ہوگا، وہ دنیا بھر کا سفر کریں گی اور مس ورلڈ رہنے والی خواتین کے ساتھ دنیا بھر میں خواتین کو درپیش طبی مسائل سے متعلق شعور کو اجاگر کرنے کے لیے کام کریں گے۔ مانوشی چھیلر کا کہنا تھا کہ اداکاراؤں میں ان کی پسندیدہ فنکارہ پریانکا چوپڑا ہیں لیکن وہ مستقبل قریب میں عامر خان کی فلموں میں ضرور کام کرنا چاہتی ہیں کیونکہ ان کی فلم میں معاشرتی مسائل کے حوالے سے پیغام ہوتا ہے، ان کی فلموں میں کردار نبھانا بہت چیلنجنگ ہوتا ہے اس لیے ان کے لیے یہ سب بہت دلچسپ ہوگا۔ عالمی مقابلہ حسن کے حوالے سے مانوشی نے کہا کہ مقابلے کے دوران شریک امیدواروں میں ایک دوسرے سے متعلق جاننے کے لیے بہت تجسس ہوتا ہے کیونکہ وہاں ایک دوسرے سے متعلق بہت کم معلومات ہوتی ہیں اور نا ہی انتظامیہ کی جانب سے کچھ بتایا جاتا ہے۔ مقابلے کے دوران دیگر لڑکیاں یہ سمجھتی تھیں کہ میں بالی ووڈ کی اداکارہ ہوں۔

ایمز ٹی وی (بین الا قومی)حکومت نے ابوظہبی آنے والے تمام ممالک کے شہریوں کو سیاحتی ویزا دینے کا اعلان کردیا جس کے لیے ایئرپورٹ پر کاؤنٹر قائم کردیا گیا ہے۔ عرب میڈیا کے مطابق ابوظہبی آنے والے افراد کو چار دن کے لیے سیاحتی ویزا دیا جائے گا اور یہ ویزا ابوظہبی انٹرنیشنل ایئرپورٹ پر ہی محض 15 تا 30 منٹ میں جاری کردیا جائے گا، اس ضمن میں امیگریشن حکام نے ابوظہبی ایئرپورٹ کے ٹرمینل تھری (ٹرانزٹ ایریا) پر نیا کاؤنٹر قائم کردیا ہے تاکہ ٹرانزٹ ویزا اور نئے آنے والوں کو فوری ویزا دیا جاسکے۔ یہ کاؤنٹر مختلف اقسام کے ویزے جاری کررہا ہے جس میں نئے آنے والے افراد کو سیاحتی ویزوں کا اجرا بھی شامل ہے ، ابوظہبی ایئرپورٹ پہنچنے والا کسی بھی ملک کا شہری اس کاؤنٹر پر جاکر سیاحتی ویزا حاصل کرسکتا ہے جو کہ اسے آدھے گھنٹے میں مل جائے گا، سیاحتی ویزا براہ راست ابوظہبی پہنچنے والے افراد کے ساتھ ساتھ ایسے افراد بھی حاصل کرسکتے ہیں جو ٹرانزٹ ویزا پر ابوظہبی پہنچے ہیں اور چاہتے ہیں کہ ان کا ٹرانزٹ ویزا سیاحتی ویزا میں تبدیل کردیا جائے۔ قبل ازیں ایئرپورٹ پر ٹرانزٹ ویزا محض چند ممالک کے شہریوں کے لیے دستیاب تھا جب کہ دیگر ممالک کے شہریوں کو ٹرانزٹ ویزا کے لیے رائج طریقہ کار کے تحت وہاں آنے سے پہلے درخواست دینی پڑتی تھی۔

ایمز ٹی وی (ٹیکنالوجی) امریکی ادارے ایسے پودوں پر کام کررہے ہیں جو دشمنوں کی جاسوسی اور ماحولیاتی خطرات مثلاً کیمیائی ہتھیاروں کا اندازہ لگانے کا کام کرسکیں گے۔ امریکا میں ’’ڈیفنس ایڈوانسڈ ریسرچ پروجیکٹس ایجنسی‘‘ (ڈارپا) کے ماہرین اس سے قبل حیرت انگیز دفاعی ٹیکنالوجی پرکام کرتے رہے ہیں اور اب جاسوس پودے ان کا نیا ہدف ہیں جو ماحول اور فضا میں جراثیم، تابکاری، کیمیائی و جراثیمی ہتھیاروں کے علاوہ دشمن کی سن گن بھی لے سکیں گے۔ ان پودوں کو فوجی مقاصد کےلیے بھی استعمال کیا جاسکتا ہے۔ مثلاً یہ کسی بارودی سرنگ کی نشاندہی کرسکتے ہیں جو پھٹنے سے رہ گئی ہو۔ ڈارپا نے اسے ’’ایڈوانسڈ پلانٹ ٹیکنالوجی‘‘ (اے پی ٹی) کا نام دیا ہے جس کے تحت پودوں میں قدرتی طور پر ایسی صلاحیت پیدا کی جائے گی تاکہ وہ آلودگی سے لے کر روشنی کی شدت کو بھی نوٹ کرسکیں گے اور یہ کام جینیاتی انجینئرنگ کے ذریعے انجام دیا جائے گا۔ اس سے روایتی سینسر کی جگہ قدرتی انداز میں کام کرنے والے سینسر بنائے جاسکیں گے اور فوجیوں کی جانیں اور دیگر وسائل بچانے میں مدد مل سکے گی۔ جینیاتی طور پر تبدیل شدہ پودے کئی مواقع پر اپنا ردِ عمل دے سکیں گے اور ان سے خود پودوں پر کوئی منفی اثر نہیں پڑے گا۔ اس ضمن میں 12 دسمبر 2017 سے ڈارپا تجاویز اور پروجیکٹس کی تفصیلات وصول کرے گی۔ پہلے گرین ہاؤس اور تجربہ گاہوں میں کام ہوگا اور اس کے بعد تجرباتی بنیادوں پر حقیقی کھیتوں اور قدرتی ماحول میں ان کی آزمائش کی جائے گی جس کی نگرانی امریکی محکمہ زراعت کرے گا۔ اس کے بعد ان جاسوس پودوں کی نگرانی سیٹلائٹ کے ذریعے کی جائے گی جو آج اتنے جدید ہوچکے ہیں کہ وہ پودوں کے درجہ حرارت تک پر بھی نظر رکھ سکتے ہیں۔ کامیابی کی صورت کے بعد یہ خاموش جاسوس اپنا کام کرسکیں گے۔ عام زندگی میں سورج مکھی کا پودا سورج کی جانب رخ کرتا ہے اور چھوئی موئی کا پودا ہلکے احساس کے ساتھ ہی بند ہوجاتا ہے۔ عین اسی کیفیت کو دیگر اشیا کی تصدیق کےلیے بھی استعمال کیا جاسکے گا اور یہی ڈارپا کا مقصد ہے۔ یہ پودے عوام کو اطراف میں موجود خطرناک بارودی سرنگوں سے بھی آگاہ کرسکیں گے۔