ایمزٹی وی(اسلام آباد) وزیراعظم کے سابق معاون خصوصی طارق فاطمی نے اپنے اوپر لگائے گئے تمام الزامات کو بے بنیاد قرار دے دیا۔
میڈیا ذرائع کے مطابق سابق معاون خصوصی طارق فاطمی نے وزیراعظم کے نام خط لکھا ہے جس میں انہوں نے اپنے اوپر لگائے تمام الزامات کو بے بنیاد قراردے دیا ہے، وزیراعظم کو لکھے گئے خط میں طارق فاطمی کا کہنا ہے کہ 50 سال ملک کی خدمت کرنے والے کے لئے الزامات تکلیف دہ ہیں تاہم ہر قسم کے تعاون کے لیے تیار ہوں جب کہ پاکستان اور سفارت کاری کے ساتھ رشتہ ہمیشہ قائم رہے گا۔
واضح رہے کہ چند روز قبل وزیر اعظم نواز شریف نے ڈان لیکس کی تحقیقاتی رپورٹ کی سفارشات کی منظوری دی تھی جس کے تحت طارق فاطمی کو ان کے عہدے سے ہٹادیا گیا تھا، اس کے علاوہ وزیراعظم نے وزارت اطلاعات کے اعلیٰ افسر راؤ تحسین کے خلاف بھی ای ڈی رولز 1973 کے تحت کارروائی کی منظوری دی تھی۔
ایمز ٹی وی(تجارت) ایل پی جی کی مئی2017 کے لیے سعودی آرامکو کنٹریکٹ پرائس فی ٹن84 ڈالر کی کمی سے388 ڈالر کی سطح پر پہنچنے کے باعث پاکستان بھر میں فی کلوگرام ایل پی جی کی قیمت میں9 روپے، فی 11.8 کلوگرام سلنڈرکی قیمت105 روپے اورفی 45.4 کلوگرام سلنڈر کی قیمت405 روپے گھٹ گئی ہے۔
ایل پی جی ڈسٹری بیوٹرزایسوسی ایشن اورایف پی سی سی آئی کی اسٹینڈنگ کمیٹی برائے ایل پی جی کے سینئروائس چیئرمین علی حیدرنے بتایا کہ مقامی ایل پی جی پروڈیوسرز سعودی آرامکوکنٹریکٹ پرائس میں اضافے کی صورت میں تو ایل پی جی کی قیمتوں میں فی الفوراضافہ کردیتے ہیں لیکن محسوس ہوتا ہے کہ مئی2017 کے لیے ایل پی جی کی عالمی قیمت میں ہونے والی کمی کے تناسب سے مقامی پروڈیوسرز اپنی ایل پی جی کی پیداوارکی قیمت گھٹانے سے گریز کررہے ہیں۔
علی حیدر نے وفاقی وزارت پٹرولیم وقدرتی وسائل پر زور دیا کہ وہ مقامی پروڈیوسرز کو سعودی آرامکوکنٹریکٹ پرائس میں ہونے والی کمی کے تناسب سے ایل پی جی کی قیمت میں کمی کے احکامات جاری کریں کیونکہ اب ملک بھر میں موسم سرد نہیں رہا اورگرمی کی شدت بڑھ رہی ہے لہٰذا ایل پی جی کی مقامی طلب بھی گھٹ گئی ہے، انہوں نے کہا کہ مہنگائی کے اس پرآشوب دور میں ایل پی جی کے پروڈیوسرز کو صارفین کے جائز حقوق کا خیال رکھتے ہوئے فی الفورایل پی جی کی قیمتوں میں کمی کا اعلان کیا جانا چاہیے۔
ایمزٹی وی (کراچی) سندھ ہائی کورٹ نے آئی جی سندھ کو عہدے سے ہٹانے کے خلاف حکم امتناع میں توسیع کرتے ہوئے اے ڈی خواجہ کو کام جاری رکھنے کی ہدایات کی ہے۔
ذرائع کے مطابق سندھ ہائی کورٹ میں آئی جی سندھ اے ڈی خواجہ کو عہدے سے ہٹانے سے متعلق کیس کی سماعت ہوئی، اس موقع پر درخواست گزار کے وکیل فیصل صدیقی کے ساتھی وکیل نے عدالت کو آگاہ کیا کہ فیصل صدیقی بیمار ہیں لہذا وہ پیش نہیں ہوں گے جس پر ایڈوکیٹ جنرل سندھ کا کہنا تھا کہ یہ اہم مسئلہ ہے لہذا کیس چلایا جائےجب کہ آئی جی سندھ اور وزیراعلیٰ کے درمیان پیشہ ورانہ تعلقات ٹھیک نہیں جس سے دیگر معاملات متاثر ہورہے ہیں۔
عدالت نے ریمارکس دیے کہ درخواست گزار کے بغیر کارروائی آگے نہیں بڑھا سکتے، عدالت نے آئی جی سندھ اے ڈی خواجہ کو دیا گیا حکمِ امتناع برقرار رکھتے ہوئے آئندہ سماعت تک کام جاری رکھنے کی ہدایت کی اور درخواست کی سماعت کل تک ملتوی کردی۔
واضح رہے کہ حکومت سندھ نے آئی جی پولیس اے ڈی خواجہ کی خدمات وفاق کے حوالے کردی تھیں تاہم معاملہ سندھ ہائیکورٹ میں جانے کے بعد عدالت نے صوبائی حکومت کا نوٹی فکیشن معطل کردیا تھا۔
ایمز ٹی وی(مانیٹرنگ ڈیسک) کینیڈا کے ماہرین نے ایک ایسا روبوٹ سرجن ایجاد کیا ہے جو اپنے باریک برموں کی مدد سے دماغ کا آپریشن صرف 2 منٹ میں مکمل کرسکتا ہے اور اس طرح یہ دنیا بھر میں دماغ کے لاکھوں مریضوں کو ہر سال فائدہ پہنچا سکتا ہے۔
دماغ کی درست ترین عکس نگاری کے لیے یہ روبوٹ سی ٹی اسکین سے استفادہ کرتا ہے اور اپنے برموں کو نپے تلے انداز میں حرکت دیتے ہوئے دماغ کا حساس ترین آپریشن بھی صرف 2 منٹ میں کرسکتا ہے۔ اب تک یہ ایسے تجرباتی پتلوں پر آزمایا جاچکا ہے جو اندرونی اور بیرونی طور پر بالکل حقیقی انسانی کھوپڑی جیسے ہیں۔ البتہ کینیڈا کی وزارتِ صحت سے منظوری مل جانے کے بعد اس سے مریضوں کے آپریشن بھی تجرباتی طور پر کیے جائیں گے تاکہ اس کی کارکردگی درست طور پر سامنے آسکے۔
سرجری کے شعبے میں بہت زیادہ ترقی ہوجانے کے بعد بھی اب تک دماغ کا آپریشن مشکل ترین تصور کیا جاتا ہے کیونکہ دماغ انسانی جسم کا نازک ترین حصہ ہے اور آپریشن میں معمولی سی غلطی بھی مریض کی جان لے سکتی ہے یا پھر اسے ساری زندگی کےلیے معذور بھی بناسکتی ہے۔ یہی وجہ ہے کہ دماغ کے چھوٹے سے چھوٹے آپریشن میں بھی کم سے کم 2 گھنٹے لگ جاتے ہیں جب کہ کامیابی کا اوسط امکان صرف 10 فیصد کے لگ بھگ رہتا ہے۔
لیکن یونیورسٹی آف یوٹاہ کینیڈا میں ایجاد کیے گئے اس روبوٹ کی بدولت یہ سارا منظرنامہ آنے والے برسوں میں تبدیل ہوسکتا ہے۔ آپریشن کے دوران انسانی سرجن کے ہاتھ کانپ سکتے ہیں جب کہ انسانی آنکھ ایک خاص حد سے زیادہ باریک بینی کا مظاہرہ نہیں کرسکتی۔ اس کے مقابلے میں روبوٹ سرجن کی نظر بہت تیز ہے جب کہ اس سے آپریشن کو تیر بہدف بنانے کے لیے سی ٹی اسکین کی مدد سے مسلسل اور تیز رفتار عکس نگاری بھی کی جاتی رہتی ہے۔ اس طرح یہ دماغ کے ان چھوٹے اور اندرونی حصوں کو بھی پوری تفصیل سے دیکھ سکتا ہے جنہیں دیکھنا انسان کے بس سے باہر ہے۔
اپنے تجرباتی مرحلے میں یہ پوری طرح سے خودکار نہیں بلکہ انسانی آپریٹر کی نگرانی میں اپنا کام انجام دیتا ہے۔ البتہ انسانی تجربات کے دوران جانچ پڑتال مکمل ہوجانے کے بعد امید ہے کہ یہ مستقبل میں تقریباً مکمل خودمختار حیثیت سے دماغ کے آپریشن انجام دے رہا ہوگا۔ توقع ہے کہ ’’روبوٹک ڈرل‘‘ کہلانے والے اس دماغی سرجن روبوٹ کے انسانی تجربات کی اجازت اس سال کے اختتام تک مل جائے گی۔
ایمزٹی وی(راولپنڈی)پاک فوج کے شعبہ تعلقات عامہ (آئی ایس پی آر) کے مطابق پاک بھارت ڈی جی ملٹری آپریشنزکا ہاٹ لائن پررابطہ ہوا، پاک فوج نے بھارتی فوجیوں کے اعضاء کاٹنے اورنعشیں مسخ کرنے کا الزام مسترد کرتے ہوئے کہا کہ پاک فوج نے نا توراولا کوٹ پونچھ سیکٹرپرسیز فائرکی خلاف ورزی کی اورنا ہی لائن آف کنٹرول پارکی۔
ڈی جی ملٹری آپریشنزنے کہا کہ پاکستان آرمی پیشہ ورفوج ہے جو طرزعمل کے اعلیٰ ترین معیاربرقراررکھتی ہے، ہم کنٹرول لائن پرامن و سکون قائم رکھنے کیلئے پرعزم ہیں، بھارت کا فوجیوں کی نعشیں مسخ کرنے کا الزام وادی کی صورتحال سے توجہ ہٹانے کی کوشش ہے۔
ڈی جی ایم اوکی جانب سے مطالبہ کیا گیا کہ بھارت الزامات کے قابل قبول شواہد پیش کرے اورواقعہ کی تحقیقات کرائے جب کہ کنٹرول لائن پر کسی بھی جارحیت کا اپنی مرضی کے مقام اوروقت پرجواب دیا جائے گا۔ ہاٹ لائن پررابطے میں ڈی جی ایم اونے ایل او سی پر بھارت کی جانب سے معصوم شہریوں کو ہدف بنانے کا مسئلہ بھی اٹھایا اورشہریوں پر جارحیت جاری رہی تو مناسب جواب دیا جائے گا۔
اس سے قبل گزشتہ رات لائن آف کنٹرول پرراولا کوٹ پونچھ سیکٹرمیں پاک فوج کے کمانڈر نے بھارتی ہم منصب سے ہاٹ لائن رابطہ کیا تھا۔ آئی ایس پی آرکے مطابق بھارتی حکام کوبتایا گیا کہ بھارتی میڈیا پاکستان پرغیرضروری الزام لگا رہا ہے اوربھارت کی جانب سے اس معاملے پردانشمندی کے اظہارکی امید ہے، پاکستان کنٹرول لائن پرپُرامن ماحول کے لیے پُرعزم ہے اورتوقع ہے کہ بھارت بھی ایل اوسی پر امن کو متاثرکرنے والا کوئی اقدام نہیں کرے گا۔
واضح رہے کہ بھارتی فوج کی جانب سے گزشتہ روز الزام عائد کیا گیا تھا کہ پاک فوج نے ایل او سی پر قائم بھارتی فوج کی 2 چوکیوں پر مارٹرگولوں اورراکٹ سے حملہ کیا اوربعد میں چوکیوں کے درمیان گشت کرنے والے 2 فوجیوں کو ہلاک اور ان کی لاشیں مسخ کردی ہیں۔ پاک فوج نے بھارت کے اس مکروہ الزام کی سختی سے تردید کرتے ہوئے اپنے بیان میں کہا تھا کہ پاک فوج ایک اعلیٰ ترین اور پیشہ وارانہ فورس ہے، وہ کسی فوجی یہاں تک کہ بھارتی فوجی کی بھی تضحیک نہیں کرے گی لہٰذا بھارتی سپاہیوں کی لاشوں کے عضو کاٹنے کا بھارتی الزام بے بنیاد اور جھوٹ پر مبنی ہے۔
ایمزٹی وی(کراچی) ڈاؤ یونیورسٹی آف ہیلتھ سائنسز میں19ماہ بعدبالآخر مستقل وائس چانسلر تعینات کر دیاگیا ۔ وائس چانسلر کی تعیناتی عدالتی احکامات کے بعد عمل میں لائی گئی اور پروفیسر سعید قریشی کو یکم مئی 2017سے 4سال کے لئے وائس چانسلر مقرر کردیا گیا ۔ اس سے قبل پروفیسر مسعود حمید خان کی وائس چانسلر شپ کی تیسری مدت 13ستمبر 2015کو پوری ہوئی تھی۔ جس سے قبل ہی تلاش کمیٹی نے مئی 2015سے مستقل وائس چانسلر کے لئے امیداروں کے انٹرویو لینا شروع کر دیئے تھے ۔
ذرائع کے مطابق تلاش کمیٹی نے 34امیدواروں کے انٹرویوکے بعد 3امیدواروں کے نام سابق وزیر اعلیٰ سندھ سید قائم علی شاہ کو ارسال کیے اورپروفیسر سعید قریشی کو موزوں ترین امیدوار قرار دیا ۔وزیر اعلیٰ سندھ ہاؤس نے پروفیسر سعید قریشی کو وائس چانسلر بنانے کی سمری یکم اکتوبر 2015کو گورنر ہاؤس کو موصول کرائی لیکن سابق گورنر سندھ ڈاکٹر عشرت العباد خان نے اس کے برخلاف پروفیسر نوشاد شیخ کو وائس چانسلر تعینات کیا جسے عدالت نے کالعدم قرار دیا۔
چند دنوں کے بعدسابق وزیر اعلیٰ سندھ کی جانب سے دوبارہ پروفیسر سعید قریشی کو وائس چانسلر بنانے سمری سابق گورنر سندھ کو ارسال کی گئی تاہم سابق گورنر سندھ نے دوبارہ پروفیسر نوشاد شیخ کو وائس چانسلر تعینات کیا جسے عدالت نےدوبارہ کالعدم قرار دیا۔
جس کے بعدڈاؤ یونیورسٹی آف ہیلتھ سائنسز کے وائس چانسلر کی تعیناتی کا مسئلہ سنگین نوعیت اختیار کر گیااور وزیراعلیٰ ہاؤس اور گورنر ہاؤس کے درمیان سرد جنگ جاری رہی ۔ اسی دوران سندھ ہائی کورٹ نے26اپریل 2016کو احکامات جاری کیےکہ 20دن کے اندر ڈاؤ یونیورسٹی آف ہیلتھ سائنسز میں مستقل وائس چانسلرتعینات کیا جائے ۔جس پر ایک بار پھر تلا ش کمیٹی بنی جس نے 12 امیدواروں کے انٹرویو کے بعد موزوں امیدواروں میں بالترتیب پروفیسر سعید قریشی ،پروفیسر عمر فاروق اورپروفیسر امجد سراج میمن کو قرار دیااور تینوں نام سابق وزیر اعلیٰ سندھ کو ارسال کیے تاہم سابق وزیر اعلیٰ نے ان تینوں ناموں کے برخلاف آٹھویں نمبر پر آنے والے امید وار پروفیسر نوشاد شیخ کو وائس چانسلر تعینات کرنے کی سمری گورنر ہاؤس کو ارسال کی جسے سابق گورنر سندھ نے خاطر نہیں لایا۔
اس طرح تقریبا ً19ماہ تک صوبے کی سب سے بڑی میڈیکل یونیورسٹی مستقل وائس چانسلر کی تعیناتی سے محروم رہی تاہم پیر کو گورنر سندھ کی جانب سے پروفیسر سعید قریشی کو 4سال کی مدت کے لئے وائس چانسلر مقرر کر دیا گیا جسے شعبہ طب سے تعلق رکھنے والے افرادنے سراہا ۔
ایمز ٹی وی(مانیٹرنگ ڈیسک) دنیا کی سب سے بڑی سوشل ویب سائٹ فیس بک نے ٹریفک بڑھ جانے اور ممکنہ طور پر سسٹم کی رفتار سست ہونے کی وجہ سے نیا ڈیٹا سینٹر تیار کرلیا۔
خیال رہے کہ فیس بک کی جانب سے قائم کیے گئے اس نئے ڈیٹا سینٹر سے قبل بھی کمپنی کے 6 ڈیٹا سینٹر کام کر رہے ہیں، جو امریکا اور یورپ کے مختلف مقامات پر واقع ہیں۔
فیس بک نے اپنا ساتواں ایڈوانس ٹیکنالوجی کا حامل ڈیٹا سینٹر جنوب مغربی امریکی ریاست نیو میکسیکو کے چھوٹے سے قصبے لوس لناس میں کھولا ہے۔
فیس بک کے مطابق اس ڈیٹا سینٹر کو 2018 میں آن لائن کردیا جائے گا، اس ڈیٹا سینٹر کے قیام کے بعد صارفین کو فیس بک کے استعمال میں سست رفتاری کی شکایت نہیں ہوگی۔
فیس بک کے مطابق لوس لناس میں بنائے گئے اس ڈیٹا سینٹر کو ایکسپریس بیک بون (ای بی بی) کا نام دیا گیا ہے۔
فیس بک کے مطابق ڈیٹا سینٹر کو ایک سال سے بھی کم عرصے میں تیار کیا گیا، اس سینٹر کو 100 فیصد پاور اور انرجی بیک اپ فراہم کیا گیا ہے۔
فیس بک نے اپنی آن لائن پوسٹ میں بتایا کہ ویب سائٹ پر ویڈیوز اور تصاویر کی زیادہ سے زیادہ شیئرنگ سمیت دیگر مواد کی پوسٹنگ کے باعث ٹریفک کے تکنیکی مسائل پیدا ہو رہے تھے، جس کی وجہ سے نئے ایڈوانس ڈیٹا سینٹر کی ضرورت تھی۔
فیس بک انتظامیہ نے دعویٰ کیا کہ اس سینٹر کے کام کرنے کے بعد فیس بک کی اسپیڈ مزید بہتر ہوگی اور صارفین آسانی سے، ویڈیوز، تصاویر اور دیگر ڈیٹا شیئر کر سکیں گے۔
ایمز ٹی وی(صحت) گرمیوں کا آغاز ہوگیا ہے اور تربوز آج کل عام دستیاب پھل ہے جو پیاس کی شدت کو ختم کردیتا ہے۔
متعدد افراد اسے شوق سے کھاتے ہیں مگر کیا آپ کو اس کے صحت پر مرتب ہونے والے اثرات کا علم ہے؟
اگر نہیں تو درج ذیل فوائد اس پھل کے لیے آپ کی محبت مزید بڑھا دیں گے۔
شریانوں اور ہڈیوں کی صحت
تربوز میں موجود لائیکو پین خون کی شریانوں کی صحت کے لیے بہت اہم ہے جبکہ یہ ہڈیوں کی صحت کو بھی بہتر بناا ہے۔ تربوز کا زیادہ استعمال خون کی شریانوں کے افعال کو بہتر بناتا ہے کیونکہ اس سے دوران خون بہتر ہوتا ہے جبکہ بلڈ پریشر کی سطح معمول پر آتی ہے۔ لائیکو پین سے آکسی ڈیٹیو اسٹریس بھی کم ہوتا ہے جبکہ ہڈیوں کی کمزوری کا باعث بنتا ہے، اسی طرح تربوز میں پوٹاشیم بھی ہوتا ہے جو کہ جسم میں کیلشیئم کی سطح برقرار رکھنے میں مدد دیتا ہے جو کہ مضبوط ہڈیوں کے لیے ضروری جز ہے۔
جسمانی چربی میں کمی
تربوز میں موجود سٹرولائن خلیات میں چربی کے اجتماع کی شرح کم کرتا ہے، سٹرولائن ایسا امینو ایسڈ ہے جو کہ جسم میں جاکر آرجنین میں تبدیل ہوجاتا ہے جو کہ گردوں کے لیے فائدہ مند ہوتا ہے۔ سٹرولائن فیٹ سیلز میں ایسی سرگرمیوں کو روکتا ہے جو کہ جسم پر چربی چڑحنے کا باعث بنتے ہیں جس سے توند سے نجات بھی ممکن ہوتی ہے۔
ورم کش
تربوز میں مختلف اجزاءجیسے فلیونوئڈز، کیروٹین اور دیگر شامل ہوتے ہیں، کیروٹین جسم میں ورم کی سطح میں کمی لانے اور مضر صحت اجزاءسے نجات میں مدد دیتا ہے۔ اس میں شامل tripterpenoid بھی ورم کش ہوتا ہے اور ایسے انزائمے روکتا ہے جو کہ جسمانی ورم کا باعث بنتا ہے۔
جگر اور گردوں کے لیے مفید
تربوز پیشاب کی روانی کو بڑھانے میں مدد دیتا ہے مگر گردوں پر بوجھ نہیں ڈالتا۔ اسی طرح یہ پھل جگر کے افعال جیسے امونیا کے اخراج میں بھی مددگار ثابت ہوتا ہے جس میں خرابی کی صورت میں اضافی سیال مواد بڑھتا ہے اور گردوں پر دباﺅ بڑھ جاتا ہے۔
مسلز کے لیے مفید
پوٹاشیم سے بھرپور ہونے کی وجہ سے تربوز اعصاب اور مسلز کے ایکشن کو کنٹرول کرنے میں مدد دیتا ہے، پوٹاشیم مسلز کے زاویوں اور حجم کا تعین کرتا ہے جبکہ اعصاب کو کنٹرول کرتا ہے۔
آنکھوں کی صحت بہتر بنائے
تربوز بیٹا کیروٹین کے حصول کا بھی اچھا ذریعہ ہے جو کہ جسم میں جاکر وٹامن اے میں تبدیل ہوجاتا ہے۔ یہ جز آنکھ کے قرینے میں نسیج کے قدرتی رنگ کے حوالے سے مدد دیتا ہے جبکہ عمر بڑھنے سے بینائی میں آنے والی تنزلی سے بچاتا ہے۔ وٹامن اے صحت مند جلد، دانت اور نرم ٹشوز کے لیے بھی مددگار ثابت ہوتا ہے۔
جلد کو بچائے
جیسا بتایا جاچکا ہے کہ اس میں لائیکو پین ہوتا ہے، یہ اینٹی آکسائیڈنٹ جز جلد کو سورج کی شعاعوں سے ہونے والے نقصان سے بچاتا ہے۔ ایک تحقیق کے مطابق تربوز میں ٹماٹر کے مقابلے میں 40 فیصد زیادہ نباتاتی کیمیکل ہوتا ہے جو سن اسکرین کی طرح آپ کی جلد کی چمک دمک برقرار رکھنے میں مددگار ثابت ہوتا ہے۔
ایمزٹی وی (کراچی/ تعلیم)کراچی میں بارہویں جماعت کا آج ہونے والاکیمسٹری کا پرچہ امتحان شروع ہونے سے پہلےہی آؤٹ ہوگیا۔
کیمسٹری کا پرچہ صبح 9 بجے شروع ہوناتھا لیکن پرچہ وقت سے 15 منٹ پہلے ہی آوٹ ہوگیا ۔یہ پرچہ سوشل میڈیا پر شیئر کیا گیا۔
قواعد کے مطابق امتحان شروع ہونے کے ایک گھنٹے بعد تک پرچہ امتحانی مرکز سے باہر نہیں آسکتا۔
ایمز ٹی وی(صحت) متعدد افراد نیند کے دوران ڈراﺅنے خواب دیکھتے ہیں جو بظاہر کوئی نقصان دہ چیز نہیں اور اس پر توجہ مرکوز نہیں کی جانی چاہیئے۔
تاہم اگر کسی شخص کو بار بار ایسے تجربے کا سامنا ہو تو یہ سنگین ذہنی امراض کی نشانی بھی ہوسکتی ہے۔
یہ بات فن لینڈ میں ہونے والی ایک طبی تحقیق میں سامنے آئی۔
ٹیورکو یونیورسٹی کی تحقیق میں بتایا گیا کہ نیند کے دوران نظر آنے والے یہ خوفناک خواب ذہنی امراض کی ابتدائی علامت ہوتے ہیں۔
تحقیق کے مطابق اس طرح کے خوابوں کو سنجیدگی سے لیا جانا چاہیئے اور اس حوالے سے ڈاکٹر سے رجوع کرنا چاہیئے۔
اس تحقیق کے دوران 1972 سے 2012 کے دوران 71 ہزار سے زائد افراد میں کیے جانے والے ایک سروے کے ڈیٹا کا جائزہ لیا گیا۔
نتائج سے معلوم ہوا کہ ایسے خواب زیادہ دیکھنے والے افراد میں مختلف ذہنی امراض کی نشاندہی ہوتی ہے۔
محققین نے ایسے خوابوں کو منفی جذباتی حالت کی نشانی قرار دیا، جس کے نتیجے میں مزاج برہم رہنے سمیت دیگر ذہنی عوارض کا خطرہ بڑھتا ہے۔
ان کا کہنا تھا کہ مستقبل میں اس حوالے سے مریضوں کی حالت میں بہتری لانے کے لیے زیادہ توجہ دینے کی ضرورت ہوگی کیونکہ یہ سنگین مسائل کی ابتدائی نشانی ہے۔