ایمزٹی وی (اسپورٹس)ویسٹ انڈیز اور پاکستان کے درمیان دوسرا ٹیسٹ آج سے برج ٹاؤن، بارباڈوس میں شروع ہورہا ہے تاہم گرین کیپس نے کیریبیئن قلعہ سر کرنے کی ٹھان لی۔ سبائنا پارک میں کامیابی کے جھنڈے گاڑنے کے بعد اب پاکستان ٹیم دوسرے ٹیسٹ کیلیے برج ٹاؤن کے کینسنگٹن اوول میں اترنے کو تیار ہے جہاں پر ایک تاریخی موقع اس کا منتظر ہوگا۔ پاکستان نے اب تک 8 کوششوں میں ایک بار بھی ویسٹ انڈیز میں ٹیسٹ سیریز کامیابی حاصل نہیں کی مگر سیریز میں 1-0 کی برتری کے بعد کیریئر کے آخری ٹیسٹ میچز کھیلنے والے مصباح الحق اور یونس خان کے پاس سنہری موقع ہے کہ وہ کھیل کوہمیشہ کے لیے الوداع کہنے سے قبل کیریبیئن جزائر پر ٹیم کو سیریز کامیابی سے ہمکنار کرسکتے ہیں۔ دوسری جانب پہلے ٹیسٹ سے قبل گروئن انجری کا شکار ہونے والے حسن علی فٹ ہوچکے اور انھوں نے ہفتے کے روز ساتھی کھلاڑیوں کے ہمراہ پریکٹس میں حصہ لیا۔ بیٹسمینوں نے نیٹ میں کافی وقت صرف کیا اوراپنی صلاحیتوں کو مزید نکھارتے ہوئے دکھائی دیے۔ اگر پاکستانی ٹیم ایک ٹیسٹ قبل ہی سیریز اپنے نام کرلیتی ہے تو اس سے مصباح اور یونس کو اپنے الوداعی ٹیسٹ میں زیادہ آزادی سے کھیلنے اور لطف اندوز ہونے کا موقع میسر آ جائے گا۔ دوسری جانب ویسٹ انڈیز کی توجہ کم بیک پر مرکوز ہے، اسے اپنے بیٹسمین روسٹن چیس اور شین ڈورئچ سے زیادہ امیدیں وابستہ ہیں جو پہلے ٹیسٹ میں اچھا پرفارم کرچکے۔ یاد رہے کہ پاکستانی ٹیم نے ویسٹ انڈیز کا پہلا ٹور 1957-58 میں کیا جس کے پہلے ہی مقابلے میں حنیف محمد نے 337 رنز کی تاریخی اننگز کھیلی تھی۔ 1987-88 میں عمران خان کی زیر قیادت ٹیم نے ویسٹ انڈین ٹور پر پہلا ٹیسٹ جیتا اور دوسرا ڈرا کیا تھا، تیسرے میں اس کو یہ سنہری موقع حاصل ہوا جب 266 رنز کا ہدف دینے کے بعد میزبان سائیڈ کو 8 وکٹ 207 رنز پرمحدود کردیا گیا، مگر جیفری ڈوجون اور ونسٹن بینجمن نے نویں وکٹ کیلیے ناقابل شکست 61 رنز بناکر تاریخی موقع سے محروم کردیا تھا۔

ایمزٹی وی(اسپورٹس) بی سی سی آئی کی جانب سے چیمپئنز ٹرافی کے بائیکاٹ کی دھمکیوں نے شائقین، براڈ کاسٹرز اور اسپانسراداروں کو پریشانی سے دوچار کردیا ہے، کرکٹ انڈسٹری کی حقیقی معنوں میں نیند اڑنے لگی ہے، سب سے زیادہ پریشانی آئی سی سی کے نشریاتی پارٹنر کو ہے جسے بھارتی کرکٹ کے حقوق بھی حاصل ہیں، اسی کمپنی کے منیجنگ ڈائریکٹر سنجے گپتا نے کہاکہ ہمیں امید ہے کہ بی سی سی آئی اور آئی سی سی اس مسئلے کا حل نکال لیں گے، بھارتی شائقین میں اس ٹورنامنٹ کے حوالے سے بہت جوش و خروش پایا جاتااور وہ اس بے چینی سے اس کے منتظر ہیں۔ دوسری جانب ایک میڈیا کمپنی کے سربراہ سری نواس نے کہاکہ اس ٹورنامنٹ سے منسلک ہر ایک کے مفادات جڑے ہوئے ہیں، زیادہ تر اشتہاری ریونیو بھارت سے حاصل ہوتا ہے،اگر بھارتی ٹیم ہی اس میں شریک نہیں ہوئی تو پھر اشتہاردینے والوں کی دلچسپی پہلے جیسی نہیں رہے گی۔ واضح رہے کہ اس وقت ایک چینی موبائل کمپنی بھارتی ٹیم کی اسپانسر ہونے کے ساتھ آئی سی سی کی کمرشل پارٹنر بھی ہے۔ دوسری جانب بھارتی کرکٹ بورڈ کی جانب سے معاملے پر غور کیلیے 7 مئی کو خصوصی جنرل میٹنگ بلائی گئی جس میں تمام اسٹیٹ ایسوسی ایٹس اپنی رائے پیش کریں گے، اسی کی روشنی میں مستقبل کا لائحہ عمل طے کیا جائے گا، 2014 میں طے پانے والے ممبر شرکت معاہدے کی پاسداری نہ کرنے پر بھارتی بورڈ کی جانب سے آئی سی سی کو لیگل نوٹس بھیجے جانے کا بھی امکان ہے۔ علاوہ ازیں سپریم کورٹ کی مقرر کردہ کمیٹی آف ایڈمنسٹریٹرز کے سربراہ ونود رائے نے بھی واضح کیاکہ وہ آئی سی سی کے معاملے پر بورڈ کے فیصلے کا ساتھ دیں گے۔

ایمزٹی وی (اسپورٹس)پاکستانی انکار نے بنگلہ دیش کو غصے سے آگ بگولہ کر دیا،اونچی ہواؤں میں اڑنے والے کرکٹ بورڈ کے صدر نظم الحسن نے دعویٰ کیاکہ ناکامی کا خوف اس فیصلے کی وجہ بنا ہے،انھوں نے آئی سی سی کی آمدنی میں سے بھی پاکستان اور ویسٹ انڈیز سے بھی زیادہ حصہ مانگ لیا۔ بنگلہ دیشی کرکٹ بورڈ ٹور سے پاکستانی انکار پر بیحد ناراض ہے، صدر نظم الحسن نے آئی سی سی میٹنگ سے وطن واپسی پر بڑے بڑے دعوے کیے ہیں، پاکستان کی جانب سے مسلسل تیسری مرتبہ ٹیم بھیجنے سے انکار کے بارے میں انھوں نے کہاکہ ہمیں آفیشلی طور پر کچھ نہیں بتایا گیا، آئی سی سی میٹنگز کے دوران پی سی بی کے چیئرمین شہریار خان نے صرف اتنا کہا تھا کہ ان کے لیے ٹیم بھیجنا مشکل ہوگا. کرکٹ بورڈ کے صدر نے کہا کہ ورلڈکپ میں براہ راست انٹری کیلیے ستمبر کی کٹ آف ڈیٹ سے قبل انھیں ہم سے شکست کی صورت میں مزید ریٹنگ پوائنٹس کھونے کا خوف ہوسکتا ہے، میں نے سنا ہے کہ وہ کہہ رہے ہیں کہ ہم مسلسل تیسری مرتبہ ٹور نہیں کرسکتے جبکہ درحقیقت پاکستانی ٹیم پہلے بھی دیگرممالک کے تین سے بھی زیادہ مرتبہ ٹورز کرچکی ہے، اب وہ کیوں کرکٹ نہیں کھیلنا چاہتے، ہم انھیں آفیشل شیڈول بھیج کردیکھیں گے کہ وہ کیا جواب دیتے ہیں، اس کے بعد ہی آگے بات ہوگی، ہم تو کرکٹ کھیلنا چاہتے ہیں۔ نظم الحسن نے آئی سی سی کی جانب سے نئے ریونیو ماڈل میں 132 ملین ڈالر ملنے کا تمام تر کریڈٹ خود لیتے ہوئے کہا کہ میں نے آئی سی سی کو قائل کیا کہ بنگلہ دیش اب بڑی مارکیٹ بن چکا اور یہاں سے اسپانسر سامنے آرہے ہیں، عالمی سطح پر ہماری کارکردگی بھی بہت بہتر ہے، اسی وجہ سے ہمیں زیادہ حصہ ملا ہے، میں نے کونسل سے یہ بھی کہا تھا کہ ہمیں ویسٹ انڈیز اور پاکستان سے بھی زیادہ حصہ ملنا چاہیے کیونکہ ہماری کارکردگی ان سے بھی زیادہ بہتر ہے۔ علاوہ ازیں بھارت کے حوالے سے سوال پر نظم الحسن نے کہا کہ انھیں ہم سے کوئی مسئلہ نہیں ہوگا، ہم مختلف ایشوز پر بی سی سی آئی کے ساتھ ہیں مگر اپنے حصے میں کٹوتی نہیں چاہتے تھے، اس لیے ریونیو تقسیم پر اپنے مفاد میں فیصلہ کیا، ویسے بھارت کے پاس وقت ہے، وہ پیش کردہ اضافی رقم آئی سی سی سالانہ اجلاس سے قبل قبول کرسکتا ہے۔

ایمزٹی وی (کراچی)سابق وزیراعلیٰ سندھ قائم علی شاہ نے کہاہے کہ لیاری گینگ وار میں تمام تر کارروائیوں کی ذمہ دارٹی ٹی پی ہے،ہم نے کراچی نے آپریشن میں پولیس ہدایت دی کہ کسی بھی مجرم کو نہ چھوڑا جائے۔ ذرائع کے مطابق میڈیا سے گفتگو کرتے ہوئے قائم علی شاہ کاکہنا تھا کہ میرے بے اختیار وزیراعلی ہونے کی خبروں میں کوئی صداقت نہیں ہے ،کراچی سے کشمور تک صرف میں انچارج تھا اور جتنا میرے دور میں کام ہواہے اتنا کسی کے دور میں نہیں ہواہے۔ا انہوں نے کہاکہ رینجرز اور پولیس نے اچھا کام کیا اور ہمیشہ سینے پر گولیاں کھائی ہیں۔ پنجاب میں نہیں پکڑے گئے جتنے ہم نے پکڑے لیاری گینگ وار میں پکڑے ہیں ،یہی نہیں ہم نے پولیس کو آپریشن میں لیاری میں کسی کرمنل کو نہ چھوڑنے کی ہدایت دیں، ہم نے وہاں پر باقاعدہ کیمپ قائم کئے اور موثر کارروائی کی۔قائم علی شاہ نے مزید کہا کہ بلاول کا انداز بھٹووالا ہے ابھی ان کو وقت چاہیے لیکن انہیں کسی تربیت کی ضرورت نہیں ہے جبکہ ذوالفقار مرز ا پارٹی کی پالیسی کے مطابق نہیں چل رہے تھے، آصف علی زرداری نے بھی ذوالفقار مرزاکو روکا مگر وہ نہیں مانے۔