K2 - Results from #18690

فیس بک میسنجرمیں بڑی تبدیلی، لوکیشن کا تبادلہ ایک گھنٹے میں ممکن

ایمز ٹی وی(مانیٹرنگ ڈیسک) فیس بک میسنجر پر اب آپ اپنے دوستوں کو نہ صرف براہ راست اپنے مقام سے متعلق آگاہ کرسکیں گے بلکہ آپ اپنی لوکیشن کا تبادلہ ایک گھنٹے تک کرسکیں گے۔

فیس بک کے اس نئے فیچر سے آپ کسی گنجان جگہ پر گم ہونے کی صورت میں اپنے دوستوں کو براہ راست اپنی لوکیشن کے بارے میں بتا سکتے ہیں اور اس فیچر کو آن کرتے ہی آپ ایک گھنٹے تک براہ راست لوکیشن سے آگاہ کرسکتے ہیں، یعنی آپ کے دوست آپ کے مقام کی جگہ ایک گھنٹے تک دیکھ سکیں گے۔

فیس بک کا لائیو لوکیشن آپشن استعمال کرنے کے لئے آپ میپ پر اپنی موجودہ لوکیشن دیکھیں گے جس پر نیلے رنگ کا ٹیپ آپشن موجود ہوگا جسے دبانے کے بعد آپ جہاں جہاں جائیں گے آپ کے دوستوں کو اس مقام پر پتا چلتا رہے گا اور اس کا دورانیہ ایک گھنٹے تک ہوگا اور جس دوست کو بھی آپ اپنی لوکیشن شیئر کریں گے اسے ٹھیک ٹھیک اس مقام کے بارے میں معلوم ہوتا رہے گا یہی نہیں بذریعہ کار اس مقام تک پہنچنے کے لئے جتنا وقت درکار ہوگا اس کا بھی پتہ چلے گا۔

نقشے کے بالکل نیچے ایک گھڑی ہوگی جس میں آپ کی لائیو لوکیشن کا دورانیہ آرہا ہوگا اور کسی بھی وقت آپ ٹیپ بٹن کو دوبارہ دبا کر آپشن کو بند بھی کرسکتے ہیں۔ واضح رہے کہ لائیو لوکیشن کی سہولت گوگل میپ اور ایپل پہلے ہی صارفین کو فراہم کرچکے ہیں لیکن فیس بک میسنجر میں اس آپشن کے شامل ہونے کے بعد صارفین کی بڑی تعداد اسے استعمال کرسکے گی۔

پاکستان فلم انڈسٹری کے نئے سفر کا آغاز

ایمز ٹی وی (انٹرٹینمنٹ)سنیئر اداکار وہدایتکار جاوید شیخ نے کہا ہے کہ یہ فلمسازی کے لیے بہترین وقت ہے‘ بہت کوششوں کے بعد پاکستان فلم انڈسٹری نے نئے سفر کا آغاز کیا ہے۔

جاوید شیخ کا کہنا ہے کہ اگر ہم ماضی کی غلطیوں کو دہرانے لگے تو کامیابیوں کا یہ سفر رک جائے گا۔

ایک سوال کے جواب میں انھوں نے کہا کہ ٹی وی ڈراموں کی کامیابی کی بڑی وجہ اچھا اسکرپٹ اور عمدہ پروڈکشن ہے، اسی طرح فلم انڈسٹری میں بھی اسی رحجان کو تقویت دینے کی ضرورت ہے۔ انہوں نے بتایا کہ ان دنوں ذاتی پروڈکشن کی فلم کا پیپرورک مکمل کیا جارہا ہے۔

فلم میں بھی بنے حقیقی بہن بھائی

ایمز ٹی وی (انٹرٹینمنٹ)شردھا کپور اوران کے بھائی سدھانت کپور حقیقی بہن بھائی ہوتے ہوئے کسی بھی بھارتی فلم میں ایک ساتھ اسی رشتے کا کردار نبھانے والے پہلے بھارتی اداکار بن گئے۔ بالی ووڈ اداکارہ شردھا کپور انڈر ورلڈ ڈان داؤد ابراہیم کی بہن حسینہ کی زندگی پر بننے والی فلم میں مرکزی کردار ادا کررہی ہیں اور اپنے کردار میں ڈھلنے کے لیے انتھک محنت کررہی ہیں لیکن اب شردھا اور ان کے بھائی نے ایک ساتھ حقیقی رشتے کے کردار میں اپنا نام پہلے بھارتی اداکاروں کی فہرست میں درج کرالیا ہے۔

شردھا کپور فلم ’’حسینہ‘‘ میں حسینہ پارکر اور ان کے بھائی سدھانت کپور داؤد ابراہیم کا کردار نبھا رہے ہیں جب کہ دونوں حقیقی بہن بھائی بھارتی انڈسٹری میں تاریخ رقم کرتے ہوئے فلم میں بھی بہن بھائی کا کردار نبھانے والی پہلی جوڑی بن گئی ہے۔ دوسری جانب اداکارہ شردھا کپور نے سماجی رابطے کی ویب سائٹ ٹوئٹر پر تشہیری پوسٹر جاری کیا ہے جس میں وہ حسینہ پارکر کے بالکل منفرد انداز میں ہیں اور سدھانت کپور کو داؤد ابراہیم کے روپ میں دیکھا جاسکتا ہے جب کہ مداحوں کی جانب سے دونوں بہن بھائیوں کی جھلک کو کافی پسند کیا جارہا ہے۔ واضح رہے کہ ہدایتکار اپوروا لاکھیا کی فلم’’حسینہ‘‘رواں سال 14 جولائی کو نمائش کے لیے پیش کی جائے گی۔

گلیکسی ایس 8 اور ایس 8 پلس سے سام سنگ کے نئے عہد کا آغاز

ایمز ٹی وی(مانیٹرنگ ڈیسک) سام سنگ نے اپنا نئے فلیگ شپ اسمارٹ فونز گلیکسی ایس 8 اور ایس 8 پلس متعارف کرا دیا ہے۔

نیویارک میں ایک ایونٹ کے دوران سام سنگ نے ان فونز کو متعارف کرایا اور انہیں اب تک کا سب سے بہترین قرار دیا جو کہ کمپنی کے بقول ' ایک نئے عہد کا آغاز' کریں گے۔

جیسا پہلے ہی لیکس میں سامنے آچکا تھا، یہ دونوں فونز بیزل لیس ہیں جن میں کمپنی نے ہوم بٹن کو نادیدہ کردیا ہے جبکہ انفنٹنی ڈسپلے یعنی سپر امولیڈ سے بھی لیس ہے۔

گلیکسی ایس ایٹ 5.8 انچ جبکہ گلیکسی ایٹ پلس 6.2 انچ اسکرین کے ساتھ ہے مگر انفنٹنی ڈسپلے اور بیزل لیس ہونے کے باعث یہ دیکھنے میں گلیکسی ایس سیون جتنے ہی لگتے ہیں جبکہ کواڈ ایچ ڈی ریزولویشن یا 2960x1440 ہے۔

انفینٹن اسکرین ورچوئل پر اس فون کے فرنٹ پینل کو کور کرے گی یا یوں کہہ لیں کہ ایج لیس اسکرین ہے اور یہ پہلا فون ہے جسے ایچ ڈی آر پریمیئم سرٹیفکیٹ دیا گیا ہے یعنی یہ رنگوں کو بالکل حقیقی انداز سے پیش کرتی ہے۔

ان فونز کے کیمروں کو گزشتہ سال کے مقابلے میں بہتر بنایا گیا ہے اور اس بار بھی 12 میگا پکسل ڈوئل پکسل رئیر کیمرہ دیا گیا ہے جس میں ایف 1.7 آپرچر موجود ہے جو کہ گلیکسی ایس سیون میں بھی تھا مگر اس بار سام سنگ نے تصاویر کے پراسیس کے طریقے کو بدلا ہے جس کے نتیجے میں فوٹوز کے رنگ پہلے سے کچھ بہتر اور واضح ہوتے ہیں، جبکہ ملٹی فریم پراسیسر شامل کیا گیا ہے تاکہ ایک وقت میں کئی تصاویر کو اکھٹا کرکے پرفیکٹ تصویر لی جاسکے۔

اسی طرح آٹھ میگا پکسل فرنٹ کیمروں کو بہتر بنایا گیا اور اسمارٹ آٹو فوکس اور وائیڈ اینگل سیلیفز لینے کے فیچر شامل کیا گیا ہہے اور ہاں تصاویر کو سجانے کے لیے متعدد شوٹنگ موڈز اور آپٹیمائز فلٹرز بھی دیئے گئے ہیں۔

سام سنگ نے اسے اپنا طاقتور ترین فون قرار دیا ہے جس میں اسنیپ ڈراگون 835 پراسیسر دیا گیا ہے جبکہ 4 جی بی ریم اور 64 جی بی انٹرنل اسٹوریج ہے جس میں ایس ڈی کارڈ سے 256 جی بی تک اضافہ کیا جاسکتا ہے۔

گلیکسی نوٹ سیون کے بیٹری پھٹنے کے تجربے کے بعد اس بار بیٹریوں کو کئی سیکیورٹی ٹیسٹ کے بعد استعمال کے لیے محفوظ قرار دیا گیا ہے، گلیکسی ایس ایٹ میں 3000 ایم اے ایچ جبکہ گلیکسی ایٹ پلس میں 3500 ایم اے ایچ بیٹری دی گئی ہے۔

فون کو ان لاک کرنے کے لیے آئی آر آئی ایس اسکینر دیا گیا ہے یعنی آپ آنکھوں سے ڈیوائس کو ان لاک کرسکیں گے، اسی طرح چہرے کی شناخت سے بھی فون کی ہوم اسکرین تک رسائی کا فیچر بھی دیا گیا ہے، جبکہ فنگر پرنٹ اسکینر کے ساتھ روایتی پاس ورڈ اور پیٹرن لاک بھی دیئے گئے ہیں۔

گلیکسی ایس سیون کی طرح یہ بھی ڈسٹ اور واٹر ریزیزٹنٹ ہیں جبکہ فنگر پرنٹ سنسر فرنٹ سے بیک پر کیمرے کے برابر میں چلا گیا ہے۔

اور پہلی بار سام سنگ کے ڈیجیٹل اسسٹنٹ بیکسبی کو بھی متعارف کرایا گیا اور کمپنی کے مطابق اس کی مدد سے آپ صرف آواز سے ہی اپنے فون سے وہ کام لے سکتے ہیں جو اسکرین کو ٹچ کرنے پر کیا جاتا ہے اور ایسا فیچر فی الحال دیگر ڈیجیٹل اسسٹنس میں دستیاب نہیں۔

گلیکسی ایس ایٹ کے لیے سام سنگ نے ڈیکس نامی خصوصی ڈوک تیار کیا ہے جس پر رکھنے کے لیے بعد آپ اس فون کو بطور ڈیسک ٹاپ اینڈرائیڈ کمپیوٹر کے طور پر استعمال کرسکیں گے اور بس مانیٹر، ماﺅس اور کی بورڈ کی ضرورت ہوگی۔

اسی طرح یہ فونز پانچ رنگوں مڈ نائٹ بلیک، آرچڈ گرے، آرکٹک سلور، میپل گولڈ اور کورل بلیو میں دستیاب ہوں گے جبکہ وائرلیس چارجنگ، سام سنگ ہیلتھ، سام سنگ پے ، ہیڈ فون جیک، 3000 ایم اے ایچ، 3500 ایم اے ایچ، وائرلیس چارجنگ، سام سنگ ہیلتھ وغیرہ اس کے دیگر نمایاں فیچرز ہیں۔

یہ فون اکیس اپریل کو دنیا کے مختلف ممالک میں فروخت کے لیے پیش کیے جائیں گے جبکہ ان کے پری آرڈر تیس مارچ سے شروع ہوں گے۔

گلیکسی ایس ایٹ 750 ڈالرز (78 ہزار پاکستانی روپے سے زائد) جبکہ گلیکسی ایس ایٹ پلس 850 ڈالرز (89 ہزار روپے سے زائد) میں فروخت کے لیے پیش کیے جائیں گے تاہم پاکستان میں قیمت کا تعین یہاں آنے کے بعد ہی ہوگا۔

اس فون کے ساتھ 99 ڈالرز (10 ہزار پاکستانی روپے سے زائد) کا ائیر فون مفت دیا جائے گا جو کہ اس وقت مارکیٹ میں دستیاب بہترین ائیربیڈ قرار دیا گیا ہے۔

فلم ’کولوسل‘ کا ریڈ کارپٹ پریمیئر کا انعقاد

ایمز ٹی وی (انٹرٹینمنٹ)نیو یارک میں ایکشن اور تھرل سے بھرپور ہالی ووڈ سائنس فکشن فلم ’کولوسل‘ کے رنگا رنگ ریڈ کارپٹ پریمیئر کا انعقاد کیا گیا۔ تقریب میں فلم میں مرکزی کردار نبھانے والی اداکارہ اینی ہتھاوے سمیت دیگر ستاروں نے شرکت کرکے چار چاند لگا دیئے۔

ناچو وگالوندو کی ہدایت کاری میں بننے والی اس فلم کی کہانی ایک ایسی لڑکی کے گرد گھوم رہی ہے جو اپنی نوکری چھوٹنے اور دوست سے علیحدگی کے بعد ایک پراسرار مخلوق کی کھوج لگانے کیلئے اپنے آبائی شہر کا رخ کرتی ہے۔ فلم کی کاسٹ میں اینی ہتھاوے، ڈین اسٹیونز، جیسن سوڈیکس، آسٹن اسٹوویل اور ٹم بلیک کے علاوہ دیگر اداکار شامل ہیں۔ نکولس چارٹیئر کی پروڈیوس کردہ یہ سنسنی خیز مناظر سے بھرپور فلم 7اپریل کو سینما گھروں کی زینت بنے گی۔

پاکستان اسٹاک ایکسچینج میں خود کو لسٹ کرانے میں نئی کمپنیوں کی دلچسپی

ایمز ٹی وی (تجارت) پاکستان اسٹاک ایکسچینج میں 15 نئی کمنپیوں نے لسٹنگ کے لئے درخواستیں جمع کرادی ہیں ، انتظامیہ نے 2کمپنیوں اتفاق آئرن اور سندھ بینک کی درخواستیں منظوری کرلیں جبکہ بقیہ 13 پر غور جاری ہے۔ سال 2016 میں دنیا کی پانچویں بہترین اور ایشیا کی نمبر ون قرار پانے والی پاکستان اسٹاک ایکسچینج میں کئی کمپنیاں خود کو لسٹ کرانے میں دلچسپی لے رہی ہیں ۔ پاکستان اسٹاک ایکسچینج کے مطابق اس وقت 15 مختلف کمپنیوں نے لسٹنگ کیلئے درخواست دائر کی ہے ، ان کمپنیوں میں یونیک کال لمیٹڈ، فرسٹ حبیب اسلامک انکم فنڈ، الفلاح جی ایچ پی اسلامک پروس پیریٹی پلاننگ فنڈ، میزان گولڈ فنڈ، میزان انرجی فنڈ، میزان ایسٹ ایلوکیشن فنڈ، میزان اسٹرٹیجک ایلوکیشن فنڈ، ٹی پی ایل لائف انشورنس، لیبرٹی پاور، میکٹر انٹرنیشنل لمیٹڈ، ٹاپ لائن سیکیورٹی، این ایل ٹی گورنمٹ ٹریجری فنڈ اور ہیسکول پیٹرولیم اپنے اسلامی بانڈز بھی جاری کرے گا۔ پاکستان اسٹاک ایکسچینج نے دو کمپنیاں جس میں اتفاق آئرن اور سندھ بینک شامل ہیں، کی باقاعدہ لسٹنگ کی منظوری دے دی ہے ، بقیہ 13 کمپنیوں کے حوالے پاکستان اسٹاک ایکسچینج انتظامیہ غور کررہی ہے۔ سال 2016 میں پاکستان اسٹاک ایکسچینج میں 3 کمپنیوں کی لسٹنگ ہوئی، عوام کو فروخت کیے جانے والے حصص سے 4 ارب 20 کروڑروپے حاصل ہوئے ، جبکہ سال 2015 میں 6 نئی کمپنیاں پاکستان اسٹاک ایکسچینج میں لسٹ ہوئیں اور مجموعی طور پر 116 ارب روپے حاصل ہوئے ، جس میں حبیب بینک کے 102 ارب روپے کے آئی پی اوز شامل تھے۔

پاکستانی سفیروں کو تبدیل کرنے کا فیصلہ

ایمزٹی وی(اسلام آباد)بھارت میں تعینات پاکستانی ہائی کمشنر عبدالباسط سمیت مختلف ممالک میں تعینات پاکستانی سفیروں کو تبدیل کرنے کا فیصلہ کیا گیا ہے۔

میڈیا ذرائع کے مطابق حکومت پاکستان نے مختلف ممالک میں تعینات پاکستانی سفیروں کو تبدیل کرنے کا فیصلہ کیا گیا ہے۔ ذرائع کے مطابق بھارت میں تعینات پاکستانی ہائی کمشنر عبدالباسط کو تبدیل کر کے ترکی میں موجود سفیر سہیل محمود کو بھارت میں ہائی کمشنر تعینات کرنے کا فیصلہ کیا گیا ہے۔ وزارت خارجہ کے ایڈیشنل سیکریٹری ایڈمن افتخار عزیز کو ترکی میں سفیر تعینات کیا جائے گا۔

ذرائع کے مطابق برازیل میں موجود سفیر برہان الاسلام رواں برس ریٹائر ہو رہے ہیں اور ان کی جگہ جنوبی افریقا میں موجود نجم الثاقب کو برازیل میں سفیر لگایا جا رہا ہے جب کہ تھائی لینڈ میں سفیر ڈاکٹر سہیل خان کو ساوتھ افریقا بھیجنے کا فیصلہ کیا گیا ہے۔ ڈنمارک میں موجود سفیر مسرور احمد جونیجو جون میں ریٹائر ہو رہے ہیں جن کے متبادل کے طور پر ایڈیشنل سیکرٹری ایشیا پیسفک ذوالفقار گردیزی کو سفیر تعینات کیا جا رہا ہے۔

ایشین اسٹاک مارکیٹس میں حصص کے نرخوں میں اتار چڑھاؤ

ایمز ٹی وی (تجارت) ایشین اسٹاک مارکیٹس میں حصص کے نرخوں میں اتار چڑھاؤ رہا ۔ٹوکیو اسٹاک مارکیٹ میں وقفے پر نکی 225 انڈیکس 5.52 پوائنٹس کم ہوکر 19197.35پوائنٹس رہا۔ٹاپکس انڈیکس 2.87پوائنٹس گرنے کے بعد 1541.96 پوائنٹس رہا۔ہانگ کانگ کا ہینگ سینگ انڈیکس 50.39 پوائنٹس بڑھ کر 24396.26 پوائنٹس رہا۔ چین کا شنگھائی کمپوزٹ انڈیکس 4.71 پوائنٹس بڑھ کر 3257.66 پوائنٹس رہا۔شینزن کمپوزٹ انڈیکس 1.71 پوائنٹس کم ہوکر 2032.51 پوائنٹس رہا۔

پاکستان بحرین کاروباری مواقع کے بارے میں کانفرنس کا آغاز

ایمز ٹی وی (تجارت) پاکستان بحرین کاروباری مواقع کےبارے میں کانفرنس آج اسلام آباد میں شروع ہو گی ۔ بحرین کے وزیر تجارت زید الزاؤن کی قیادت میں خلیجی ملکوں کی کاروباری شخصیات اورسرمایہ کاروں کا وفد کانفرنس میں شرکت کے لئے پاکستان پہنچ گیا ۔ وزارت تجارت اوربحرین میں پاکستانی سفارتخانے نے مشترکہ طورپر کانفرنس کا اہتمام کیا ہے۔بحرین میں پاکستان کے سفیر جاوید ملک نے کہا ہے کہ یہ پہلا موقع پر کسی بھی خلیجی ملک سے اتنا بڑا وفد پاکستان آیا ہے۔

چیمبرآف کامرس،31 مارچ 2017 بروز جمعہ کو کھلا رکھنے کا اعلان

ایمز ٹی وی (تجارت) حیدرآباد چیمبر آف کامرس اینڈ انڈسٹری کے اعلامیہ کے مطابق میمورنڈم آف آرٹیکلز آف ایسوسی ایشن کی شق نمبر 9 اور 10 کے تحت تجدید رکنیت 2017-2018ءوصول کی جا رہی ہے اور آئین کے مطابق 31 مارچ 2017ءتک وصول کی جائے گی۔ ایسو سی ایٹ ممبران انکم ٹیکس گو شوا رہ 2016ءاور کارپوریٹ ممبران انکم ٹیکس گوشوا رہ 2016ءاور رواں ماہ کا سیلز ٹیکس گوشوا رہ کے ہمراہ سالانہ فیس ادا کر کے رسید حاصل کرلیں‘ سالانہ فیس جمع کرنے کے سلسلے میں چیمبر سیکریٹریٹ بروز جمعہ 31 مارچ 2017ءکو کھلا رہے گا۔