ایمز ٹی وی (تجارت) پاکستان انٹرنیشنل ائیر لائنز (پی آئی اے) اور ترکش ائیر لائنز کے درمیان یکم فروری 2017ءسے منسلک پروازوں میں ایک دوسرے کے مسافروں کو ان کی منزل پر پہنچانے میں تعاون بڑھانے کیلئے معاہدہ ہو گیا ہے۔ دونوں ائیر لائنز کے چیف ایگزیکٹو آفیسرز (سی ای اوز) کے درمیان معاہدے پر دستخط کے بعد ترکش ائیر لائنز کی جانب سے جاری ایک بیان میں کہا گیا ہے کہ ” اس معاہدے سے مسافروں کو پاکستان سے ترکی یا دیگر ممالک میں سفر کے دوران مزید بہتر روابطہ اور بغیر رکاوٹ کے سفر کا موقع ملے گا۔“ بیان میں مزید کہا گیا ہے کہ منسلک پروازوں میں تعاون بڑھانے کے اس معاہدے کے تحت ترکش ائیر لائن اب اپنے کوڈ اور فلائٹ نمبرز کے ذریعے پی آئی کی کراچی اور اسلام آباد سے دبئی، ابو ظہبی، اور مسقط جبکہ لاہور سے دبئی اور ابوظہبی جانے والی پروازوں کی مارکیٹنگ کر سکتی ہے۔ اسی طرح اس معاہدے کے تحت اب پاکستان انٹرنیشنل ائیر لائنز (پی آئی اے) اپنے کوڈ اور فلائٹ نمبروں کا استعمال کرتے ہوئے استنبول سے آگے اٹلانٹا، جوہانسبرگ، ایتھنز، ایمسٹرڈیم، تاشقند، ماسکو، میامی، بوسٹن، ہوسٹن، واشنگٹن، لاس اینجلس، سان فرانسسکو اور شکاگو جانے والی پروازوں کی ٹکٹیں فروخت کر سکتی ہے۔ 

ایمز ٹی وی (صحت)کیا آپ اپنے بہت سے دیگر کاموں کی طرح ورزش کو بھی ویک اینڈ کے لیے مخصوص رکھتے ہیں، کیونکہ آپ پورا ہفتہ ورزش کے لیے وقت نہیں نکال پاتے؟ اگر آپ ایسا کرتے ہیں تو جان لیں کہ آپ ان افراد کی نسبت زیادہ فوائد حاصل کر رہے ہیں جو روزانہ ورزش کرتے ہیں۔ جنرل آف امریکن میڈیکل ایسوسی ایشن انٹرنل میڈیسن میں شائع ہونے والی ایک تحقیق کے مطابق یوں تو باقاعدگی سے ورزش کرنا بھی صحت کے لیے نہایت مفید ہے اور یہ بے شمار بیماریوں سے حفاظت فراہم کرتا ہے، لیکن اگر آپ صرف ویک اینڈ پر یا ہفتہ میں صرف ایک سے دو دن ورزش کرنے کے عادی ہیں تو آپ ورزش سے حاصل ہونے والے تمام فوائد دگنے حاصل کر رہے ہیں۔ ماہرین کا کہنا ہے کہ دراصل ایک مخصوص وقت کے لیے جسم کو فعال رکھنا اسے بے شمار بیماریوں سے بچاتا ہے۔ انہوں نے تجویز دی کہ ہفتے میں کم از کم 75 منٹوں کی ورزش جسم کو چاق و چوبند رکھتی ہے۔ ماہرین نے واضح کیا کہ یہ ایک اوسط اندازہ ہے۔ تاحال اس بات کا تعین نہیں کیا جاسکا کہ کسی شخص کے لیے کتنے گھنٹوں یا منٹوں کی ورزش اسے صحت مند رکھنے کے لیے کافی ہے۔ تحقیق میں یہ بھی کہا گیا کہ ویک اینڈ پر ورزش کرنے والے افراد میں باقاعدگی سے ورزش کرنے والے افراد کی نسبت مختلف بیماریوں سے موت کا امکان بھی کم ہوتا ہے۔ تحقیق میں شامل ماہرین کا کہنا ہے کہ یہ ایک خوشگوار انکشاف ہے کہ ہم ہفتے میں صرف ایک سے دو دن ورزش کر کے بھی اپنے جسم کو بے شمار بیماریوں سے بچا سکتے ہیں۔ واضح رہے کہ ورزش نہ کرنا اور غیر متحرک زندگی گزارنا مختلف بیماریوں جیسے امراض قلب، فالج، جسم میں درد اور موٹاپے کو جنم دیتا ہے اور یہ بیماریاں انسان میں قبل از وقت موت کا خطرہ بڑھا دیتی ہیں۔