لاہور: ٹی20 ورلڈکپ کے کمنٹری پینل میں شامل سنیل گواسکرنے پاکستان قومی کرکٹرزسے ملاقات کی۔

ملاقات میں انہوں نے بابراعظم کو کیپ کا تحفہ بھی دیا۔

گواسکر آسٹریلیا میں جاری ٹی20 ورلڈکپ کے کمنٹری پینل میں شامل ہیں، سابق کرکٹر اور بابراعظم سمیت قومی اسکواڈ کی ملاقات برسبین میں ایک ڈنر کے موقع پر ہوئی۔

ملاقات کے وقت قومی ٹیم مینجمنٹ کے دیگر ارکان بھی موجود تھے جبکہ قومی کھلاڑیوں نے سابق بھارتی لیجنڈ کے ساتھ تصاویر بھی بنوائیں۔

یاد رہے کہ سنیل گواسکر ہمیشہ سے ہی بابراعظم کی صلاحیتوں کے معترف رہے ہیں جبکہ وہ پیشگوئی بھی کرچکے ہپں کہ پاکستان ٹیم کے کپتان آل ٹائم گریٹ کرکٹرز کی فہرست میں جگہ بناسکتے ہیں۔

کراچی: سرسید یونیورسٹی آف انجیئنرنگ اینڈ ٹیکنالوجی نے یومِ سر سید احمد خان کے موقع پر سرسید احمد خان کی سیاسی فکر اور اس کے نتائج واثرات کے موضوع پر ایک سیمینار کا انعقاد کیا جس میں بین الاقوامی مفکرین و دانشوروں نے سرسید احمد خان کی شخصیت و خدمات پر روشنی ڈالی

اس موقع پر صدرِ مجلس پروفیسر ابو سفیان اصلاحی نے کہا کہ سرسید احمد خان پورے عالمِ اسلام کے رہنما تھے ۔ ان کا نبی ﷺ سے عشق والہانہ تھا ۔ سرسید نے اپنی تحریروں میں قرآن کی حقانیت پیش کی ۔ تحقیق کے لیے جنون نہ ہو تو تحقیق جاندار نہیں ہوتی ۔ قرآن کریم ان کی شخصیت پر غالب ترین نظرآتی تھی ۔ قرآن کو اپنی زندگی کا جزولانیفک بنانے والا مسلکوں کے چکر میں پڑ ہی نہیں سکتا ۔ وہ ایک متوازن شخصیت رکھتا ہے ۔

سیمینار سے خطاب کرتے ہوئے سرسید یونیورسٹی کے چانسلر جاوید انوار نے کہا کہ کائنات میں موجود تمام اسرار و رموز کو جاننے کا نام علم ہے ۔ ترقی صرف ان قوموں کا مقدر ہوتی ہے جو علم کو اہمیت دیتے ہیں اور حصول ِ علم پر توجہ مرکوزکرتے ہیں ۔ علم ایسی قوت ہے جو دنیا کی تمام قوتوں سے افضل ہے اور جس کے زوال کا تصور بھی نہیں کیا جاسکتا ۔ علم کی وجہ سے کائنات کی تمام وسعتیں آج کے انسان کے سامنے سمٹ گئی ہیں ۔

انہوں نےمزیدکہا کہ سرسید کا ویژن بھی یہی تھا ۔ ایمان کو علم کی اور علم کو ایمان کی سرپرستی کی ضرورت رہتی ہے ۔سرسید احمد خان اسلام کے سچے شیدائی تھے ۔ جب’’ لاءف آف محمد‘‘ میں انگریز گورنر سرولیم میور نے اسلام اور حضور محمد ﷺکے حالات کو توڑمروڑ کر پیش کیا تو اُس وقت سرسید کے علاوہ کوئی بھی شخص اس ہرزہ سرائی کے خلاف کھڑا نہیں ہوا لیکن سرسید کی حمیت نے گوارا نہ کیا کہ نبی ﷺ شان میں گستاخی کو برداشت کر لیا جائے ۔

ممتاز اسکالر محمداسلام نشتر نے کہا کہ پاکستان سرسید احمد خان سیاسی ، سماجی، تعلیمی، دینی اور اخلاقی خیالات اور نظریات سے ہم سب واقف ہیں ۔ ان خیالات اور نظریات سے کسی نہ کسی طور اختلاف تو کیا جاسکتا ہے البتہ اس بات پر پورا بر،صغیر آج بھی متفق ہے کہ وہ مسلمانانِ ہند کے سب سے بڑے مصلح اور رہنما بن کر سامنے آئے ۔

اظہار تشکر پیش کرتے ہوئے سرسیدیونیورسٹی کے وائس چانسلر پروفیسر ڈاکٹر ولی الدین نے کہا کہ سرسیداحمد خان بلاشبہ ایک تاریخ ساز شخصیت تھے اور وہ اپنے عہد کا بہتر شعور رکھنے والے انسان تھے ۔ انہوں نے تضادات اور نظریات سے بالاتر ہوکر انسانیت کی خدمت کی ۔ کیونکہ وہ جانتے تھے کہ انسانوں کی زندگی میں مثبت تبدیلی انقلاب سے نہیں ، بلکہ اصلاح اور ارتقاء سے آتی ہے ۔

لٹریری آرٹ اینڈ کلچر فورم کی کنوینئر پروفیسر نوشابہ صدیقی نے نظامت کے فراءض بہت عمدہ طریقے سے انجام دیتے ہوئے سرسید احمد خان کی شخصیت کے کئی پہلوءوں کو بھی اجاگر کیا ۔ انہوں نے سیمینار کے کامیاب اور نتیجہ خیز انعقاد پر مجلس منتظمیٰ کے اراکین بالخصوص ڈاکٹرعماد الحق، ڈاکٹر ارشد رضوی کا بھی شکریہ ادا کیا ۔

گیلونگ: ٹی20 ورلڈکپ کے پانچویں کوالیفائر میچ میں نیدرلینڈز نے نمیبیا کو 5 وکٹوں سے شکست دیکر گروپ میں پہلی پوزیشن حاصل کرلی۔

گیلونگ میں کھیلے جارہے میچ میں نمیبیا نے ٹاس جیت کر پہلے بیٹنگ کرنے کا فیصلہ کیا، جو درست ثابت نہ ہوا اور پوری مقررہ 20 اوورز میں 6 وکٹوں کے نقصان پر محض 121 رنز بناسکی۔

نمیبیا بیٹنگ
نمیبیا کی جانب سے جان فرائے لنک سب سے زیادہ 43 رنز بناکر نمایاں رہے، ان کے علاوہ دیگر بلےبازوں میں کپتان گیرہارڈ ایراسمس 16، اسٹیفن بارڈ 19 جبکہ ڈیوڈ ویزا 16 رنز بناکر ناٹ آؤٹ رہے۔
نیدرلینڈز کی جانب سے بس ڈی لیڈز نے 2 جبکہ ٹم پرنگل، کالن ایکرمین اور رولف وین ڈر مروی نے ایک ایک وکٹ حاصل کی۔

نیدرلینڈز بیٹنگ
ہدف کے تعاقب میں نیدرلینڈز کی اوپننگ جوڑی نے 59 رنز کا آغاز فراہم کیا، وکرم جیت سنگھ 39 رنز بناکر آؤٹ ہوئے جبکہ میکس او ڈاؤڈ نے 35 رنز اسکور کیے۔ ٹام کوپر اور کولن ایکرمین جلد وکٹیں گنوا بیٹھے تاہم بس ڈی لیڈز 20 رنز اسکور کرکے ٹیم کو فتح سے ہمکنار کروادیا۔

نمیبیا کی جانب سے جے اسمٹ نے 2 جبکہ جان فرائے لنک اور برنارڈ شولٹز نے ایک ایک وکٹ حاصل کی۔

قبل ازیں نمیبیا نے ایشین چیمپئین سری لنکا کو 55 رنز سے شکست دی تھی جبکہ نیدرلینڈز نے متحدہ عرب امارات (یو اے ای) کو 3 وکٹوں سے مات دی تھی۔

سڈنی : آسٹریلیا اور بھارت کے درمیان کھیلے جانے والے وارم اپ میچ میں بھارتی بیٹر سوریا کمار یادیو کی دلچسپ گفتگو ریکارڈ ہوگئی۔

ریکارڈ گفتگو سوریا کمار یادیو کے آسٹریلیا کے خلاف آخری اوور میں نصف سنچری پوری ہونے سے قبل کی ہے جس میں انھیں بیٹنگ پارٹنر اکسر پٹیل سے کہتے سنا جا سکتا ہے کہ ’یار آج مارنے کا موڈ نہیں ہو رہا‘۔

گفتگو اس وقت مزید دلچسپ ہوگئی جب سوریا کمار یادیو اگلی ہی بال پر غلط شاٹ کھیلتے ہوئے آسٹریلین بولر کو کیچ دے بیٹھے اور آؤٹ ہوگئے۔

یہ تو نہیں کہا جا سکتا کہ سوریا کمار نے ایسا کیوں کہا لیکن اس کے باوجود بھارتی بیٹر نے آج کے میچ میں بہترین بیٹنگ کا مظاہرہ کیا اور 33 گیندوں پر اپنی نصف سنچری مکمل کی۔

وارم اپ میچ میں بھارت نے دلچسپ مقابلے کے بعد آسٹریلیا کو 6 رنز سے شکست دی۔

سڈنی: انگلینڈ کے خلاف قومی ٹیم کے فاسٹ بولرشاہین شاہ آفریدی وارم اپ میچ میں میدان میں اترچکے ہیں ۔

اس سے قبل پاکستان کرکٹ بورڈ کی جانب سے بھی شاہین شاہ کی کچھ ویڈیوز اور تصاویر شیئر کی گئی ہیں۔

ویڈیو میں جہاں کھلاڑیوں کو میچ سے قبل پریکٹس کرتے دیکھا گیا وہیں شاہین کو بھی بھارتی بولر شامی سے بولنگ ٹپس لیتے دیکھا جاسکتا ہے۔

دوسری جانب پی سی بی نے شاہین کی ویڈیو شیئر کرتے ہوئے ’بیک ‘ لکھا ہے۔

برسبین: ٹی20 ورلڈ کپ کے وارم اپ میچ میں انگلینڈ نے ٹاس جیت کر پہلے فیلڈنگ کا فیصلہ کر لیا۔

کپتان بابر اعظم وارم اپ میچ میں حصہ نہیں لے رہے، شاداب خان ٹیم کی قیادت کریں گے۔ وارم اپ میچ میں 13 کھلاڑی حصہ لیں گے جبکہ فخر زمان ری ہیب کے ساتھ ٹریننگ کا سلسلہ جاری رکھیں گے۔

شاداب خان کے علاوہ کھلاڑیوں میں افتخار احمد، آصف علی، محمد وسیم، نسیم شاہ، محمد حسنین، حارث روف، شاہین آفریدی، محمد رضوان، حیدر علی، شان مسعود، محمد نواز اور خوشدل شاہ شامل ہیں۔

نئی دہلی : ٹی ٹوئنٹی ورلڈکپ کے لیےبھارت نے انجرڈ فاسٹ بولر جسپریت بمراہ کی جگہ متبادل بولر کے نام کا اعلان کر دیا۔

بھارتی ٹیم کے اہم بولر جسپریت بمراہ انجری کے باعث ورلڈکپ سے باہر ہو گئے تھے اور ان کی جگہ ٹریول ریزرو کھلاڑیوں میں شامل محمد شامی اور دیپک چاہر مضبوط امیدوار کے طور پر سامنے آئے تھے۔

چند روز قبل بھارتی ٹیم کے ہیڈ کوچ راہول ڈریوڈ اور کپتان روہت شرما نے بھی بمراہ کے متبادل کھلاڑی کے طور پر واضح اشارہ دیا تھا۔

تاہم اب بھارتی کرکٹ بورڈ نے بمراہ کے متبادل کھلاڑی کے طور پر فاسٹ بولر محمد شامی کو شامل کر لیا ہے۔

اس حوالے سے بھارتی ٹیم کے کپتان روہت شرما کا کہنا تھا شامی ایک تجربہ کار بولر ہے اور اسے آسٹریلیا میں بھی کرکٹ کھیلنے کا اچھا تجربہ ہے۔

کراچی: ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی )،جامعہ کراچی کے زیرِ اہتمام ”موسم کے موافق صحت کی نگہداشت کے بنیادی ڈھانچے کی تعمیر: پاکستان میں آفات کے بعد کا منظر “ کے موضوع پر ایک روزہ ہائبرڈ سمینار بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی میں ہو گا۔

نیشنل ڈیزاسٹر رسک مینجمنٹ فنڈ اسلام آبادکے سی ای او ڈاکٹر بلال انوراس سیمینار میں نہ صرف شرکت بلکہ خصوصی خطاب بھی کریں گے۔

آئی سی سی بی ایس، جامعہ کراچی کے ترجمان کے مطابق یہ ایک روزہ ہائبرڈ سیمینار پاکستان اکیڈمی آف سائینسز،ایوائڈایبل ڈیتھ نیک ورک برطانیہ، ڈاکٹر پنجوانی سینٹربر ائے مالیکیو لر میڈیسن اینڈ ڈرگ ریسرچ اور سندھ انوویشن ریسرچ اینڈ ایجوکیشن نیٹ ورک (سائرن) کے باہمی تعاون سے منعقد ہوگا۔

ترجما ن کے مطابق دیگر ممتاز مقررین میں آکلینڈ یونیورسٹی آف ٹیکنالوجی نیوزی لینڈ کے پروفیسر ڈاکٹرمائیکل پیٹرسین، پاکستان اکیڈمی آف سائینسز کراچی چیپٹر کے سیکٹریٹری ڈاکٹر محمد واسع، برطانیہ کی یونیورسٹی آف لیسسٹرکے رسک مینجمنٹ کی پروفسیر ڈاکٹر نیبا دیتاایس رے بنینٹ اور گائیناکولوجسٹ، سماجی کارکن اور ٹیکنوکریٹ پروفیسر ڈاکٹر غزنا خالد اورایوائڈایبل ڈیتھ نیک ورک کی ڈاکٹر نمرا اقبال کے نام شامل ہیں۔

اس سیمینار کے انعقاد کے مقاصد میں یہ مقصد بھی شامل ہے کہ صحت کی نگہداشت کے تناظر میں مستقبل میں آنے والی قدرتی آفات کے لئے تیاری کی جائے۔

سڈنی: آئی سی سی مینز ٹی ٹوئنٹی ورلڈ کپ کے پہلےمرحلےکےافتتاحی میچ میں نمیبیا نے سری لنکا کو 55 رنز سے شکست دے دی۔

سری لنکا کی ٹیم 164 رنز کے ہدف کے تعاقب میں صرف 108رنز بنا سکی جب کہ ٹیم کے تمام کھلاڑی آؤٹ ہوگئے۔
نمیبیا نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 163 رنز بنائے۔

کوالیفائنگ راؤنڈ کے افتتاحی میچ میں سری لنکا نے نمیبیا کے خلاف ٹاس جیت کر فیلڈنگ کا فیصلہ کیا، ٹیم کے مڈل آرڈر بیٹرز جان فرائلنک اور جے جے سمٹ نے شاندار بیٹنگ کا مظاہرہ کیا۔

نمیبیا کی اننگز:
جان فرائلنک 44 رنز بناکر آؤٹ ہوئے جب کہ جے جے سمٹ نے ناقابل شکست31 رنز کی اننگز کھیلی۔
سری لنکا کی جانب سے پرامود مدوشن نے 2 جب کہ مہیش ٹھیکشنا، دشمنتھا چمیرا،چمیکا کرونارتنے اور ونندو ہسارنگا نے ایک ایک وکٹ حاصل کی۔

سری لنکا کی اننگز:
آسٹریلیا میں نمیبیا کے بولرز نے سری لنکن بیٹنگ لائن اکھاڑ کر رکھ دی، سری لنکا کی جانب سے کپتان داسن شنکا نے 29 اور بھانوکا راجا پکشا نے 20 رنز بنائے۔
نمیبیا کے ڈیوڈ ویزا، برنرڈ شالٹز، بین شکونگو اور جان فرائلنک نے 2،2 وکٹیں حاصل کیں جب کہ جے جے سمٹ نے 1 کھلاڑی کو آؤٹ کیا۔
آسٹریلیا کے شہر جی لانگ کے کارڈینیا پارک اسٹیڈیم میں کھیلے جانے والے دوسرے مقابلے میں متحدہ عرب امارات اور نیدرلینڈز کی ٹیمیں آمنے سامنے ہوں گی۔

ٹی ٹوئنٹی ورلڈ کپ کے پہلے مرحلے میں کوالیفائنگ میچز کھیلے جائیں گے، ٹورنامنٹ کے لیے کُل 8 ٹیموں کو دو گروپس میں تقسیم کیا گیا ہے۔

پہلے مرحلے کے اختتام پر چار ٹیمیں مین راؤنڈ سپر 12 کے لیے کوالیفائی کریں گی، سپر 12 راؤنڈ کا آغاز 22 اکتوبر سے ہو گا۔

’دنیا کی بہترین جامعات‘ کی درجہ بندی برائے 2023 میں پاکستان کی قائد اعظم یونیورسٹی دنیا کی 500 بہترین جامعات میں شامل ہوگئی ۔

اسلام آباد کی قائد اعظم یونیورسٹی کا 401 واں نمبر ہے جبکہ 1000 بہترین جامعات میں پاکستان کی گورنمنٹ کالج یونیورسٹی فیصل آباد، یو ایم ٹی، عبدالولی خان یونیورسٹی، بحریہ یونیورسٹی، کامسیٹس اسلام آباد، ڈاؤ یونیورسٹی آف ہیلتھ سائنسز، یو ای ٹی ٹیکسلا، ہزارہ یونیورسٹی مانسہرہ اور انٹرنیشنل اسلامک یونیورسٹی اسلام آباد شامل ہیں۔

عالمی درجہ بندی میں بھارت کی پانچ اعلیٰ تعلیمی اداروں کو 500 جامعات میں شامل کیا گیا ہے جن میں انڈین انسٹیٹیوٹ آف سائنس 251 نمبر پر ہے۔

ٹائمز ہائر ایجوکیشن عالمی درجہ بندی میں 104 ممالک اور خطوں کی 1,799 جامعات شامل کی گئی ہیں، جو انہیں آج تک کی سب سے بڑی اور متنوع جامعات کی درجہ بندی میں شامل کرتی ہیں۔

دنیا کی 10 بہترین جامعات میں پہلا نمبر برطانیہ کی یونیورسٹی آف آکسفورڈ کا ہے جبکہ دوسرا نمبر امریکا کی ہارورڈ یونیورسٹی، تیسرا نمبر برطانیہ کی یونیورسٹی آف کیمبرج، چوتھا نمبر امریکا کی اسٹیفورڈ یونیورسٹی کا ہے۔

اس کے علاوہ باقی 10 میں امریکا کی ایم آئی ٹی، کیلیفورنیا انسٹیٹیوٹ آف ٹیکنالوجی، پرنسٹن یونیورسٹی، یونیورسٹی آف کیلیفورنیا، ییل یونیورسٹی، اور برطانیہ کی امپیریئل کالج شامل ہیں۔

ٹائمز ہائر ایجوکیشن کا کہنا ہے کہ اس جائزے کی بنیاد 13 پرفارمنس انڈیکیٹر ہیں جن میں تدریس، تحقیق، علم کی منتقلی اور عالمی نقطۂ نظر شامل ہیں۔

ٹائمز ہائر ایجوکیشن نے اپنے جائزے میں کہا ہے کہ ’تحقیق میں امریکی جامعات کی بالادستی اب ختم ہو رہی ہے۔ اس کی وجہ ایلیٹ اور باقی جامعات کے درمیان پیداوار کا بڑھتا فرق ہے۔‘

چینی جامعات کے بارے میں اس کا کہنا ہے کہ وہاں تحقیق کا معیار بڑھ رہا ہے، جہاں امریکہ کا اسکور 70 سے گِر کر 69.4 ہوگیا ہے وہیں چین کا سکور 55.6 سے بڑھ کر 58 ہوگیا ہے۔

ٹائمز ہائر ایجوکیشن کے مطابق چینی جامعات ایک چیز میں کمزور ہیں اور وہ ہے انٹرنیشنلائزیشن۔