لاہور: آئی سی سی ٹیسٹ چیمپئن شپ میں پاکستان کوچوتھی پوزیشن واپس مل گئی۔

تفصیلات کے بعد آسٹریلیا کی گال ٹیسٹ میں سری لنکا کو 10 وکٹوں سے شکست کے بعد آئی سی سی چیمپئن شپ پوائنٹس ٹیبل پر تبدیلیوں میں پاکستان کو چوتھی پوزیشن پر واپس آنے کا موقع ملا، قومی ٹیم اب بھی اپنے بقیہ 7 میں سے 5 میچزجیت کر فائنل تک رسائی کا موقع پا سکتے ہیں۔

پاکستان ٹیم کی اگلی سیریز رواں ماہ سری لنکامیں ہےجہاں دونوں میچزمیں کمزور میزبان ٹیم پر ہاتھ صاف کرنےکا سنہری موقع میسر آئے گا۔ پاکستان کو ہوم گراؤنڈز پر انگلینڈ کے خلاف 3 ٹیسٹ میچز کھیلنا ہیں جبکہ ہوم سیریز میں 2 مقابلے نیوزی لینڈ سے بھی ہوں گے۔

موجودہ پوزیشن کے مطابق آسٹریلیا کی ٹیم پہلے، جنوبی افریقہ دوسرے، بھارت تیسرے اور پاکستان چوتھے نمبر پر موجود ہے جبکہ سری لنکا پانچویں پوزیشن پر چلا گیا ہے۔

یونیورسٹی آف مینجمنٹ اینڈٹیکنالوجی کےتحت 22واں کانووکیشن ایکسپوسینٹرلاہورمیں منعقد کیا گیا۔

جلسہ تقسیم اسناد سے خطاب کرتے ہوئے گورنر پنجاب محمد بلیغ الرحمٰن نے خطاب کرتے ہوئے کہا کہ یونیورسٹی کا شمار ملک کی باوقار جامعات میں ہوتا ہے، یو ایم ٹی وقت گزرنے کے ساتھ معیاری تعلیم کی فراہمی کے ذریعے ایک بامعنی اور نتیجہ خیز انداز میں ترقی کی راہ پر گامزن ہے۔

ریکٹر یوایم ٹی ڈاکٹر آصف رضا نے کہا کہ یو ایم ٹی کا نہ صرف پاکستان بلکہ بیرون ملک کے بہترین اداروں میں شمار ہوتا ہے جسے 900 اعلیٰ تعلیم یافتہ فیکلٹی ممبران اور دنیا بھر کی ممتاز یونیورسٹیز سے270سے زائد پی ایچ ڈی اسکالرز اپنی خدمات سرانجام دے رہے ہیں۔

چیئرمین یو ایم ٹی /علم ٹرسٹ احمد عمر مراد نےگریجویٹس ، ان کے والدین اور اساتذہ کو عظیم سنگ میل کوحاصل کرنے پر مبارکباد پیش کی، یو ایم ٹی کے صدر ابراہیم حسن مراد نے گورنر کو سووینئرپیش کیا۔

تقریب میں مختلف شعبہ جات کے1225 گریجویٹس میں میڈلز، ڈگریاں ، سرٹیفکیٹ اور ایوارڈز تقسیم کئے گئے،

ملک بھر میں جاری بجلی کی طویل و غیر اعلانیہ لوڈشیڈنگ اور پیٹرولیم مصنوعات کی بڑھتی ہوئی قیمتوں کے پیشِ نظر ٹیلی کام اور انٹرنیٹ سروس فراہم کرنے والی کمپنیوں نے سروس معطلی کا عندیہ دے دیا۔

ٹیلی کام کمپنیوں کی جانب سے پاکستان ٹیلی کمیونیکیشن اتھارٹی (پی ٹی اے) کو لکھے گئے مشترکہ خط میں کہا گیا ہے کہ بجلی کے بحران کے باعث ٹیلی کام کمپنیوں کو خدمات جاری رکھنے میں مشکلات کا سامنا ہے۔

طویل لوڈ شیڈنگ اور بیک اپ آلات کی درآمد میں رکاوٹ کی وجہ سے ٹاور اور تنصیبات کے لیے بیک اپ بجلی کی مسلسل فراہمی ممکن نہیں رہی، جس کے باعث ملک میں ٹیلی کام سروسز اور براڈ بینڈ انٹرنیٹ کی سروس معطل ہونے کا خدشہ ہے۔

ٹیلی کام کمپنیوں کا کہنا ہے کہ طویل و غیر اعلانیہ لوڈ شیڈنگ کے باعث ان کے لیے سروس کے معیار اور نیٹ ورک کی توسیع سے متعلق لائسنس کی شرائط پوری کرنا مشکل ہو گیا ہے۔

دوسری جانب ان کمپنیوں کو ٹیلی کام آلات اور بیک اپ بیٹریاں درآمد کرنے میں بھی مشکلات درپیش ہیں جس کے باعث لوڈشیڈنگ کے دوران سیلولر ٹاورز کو مہنگے ایندھن پر کئی کئی گھنٹے بیک اپ فراہم کرنا مشکل ہے۔

ٹیلی کام کمپنیوں نے پی ٹی اے سے اپیل کی ہے کہ طویل لوڈ شیڈنگ اور آلات کی درآمد پر کیش مارجن کا معاملہ متعلقہ اتھارٹیز کے سامنے اٹھایا جائے اور اس مسئلے کو فوری حل کیا جائے۔

سرسید یونیورسٹی آف انجینئرنگ اینڈ ٹیکنالوجی، ASPIRE پاکستان، IdeaGist اور MoITT نے مشترکہ طور پر آن لائن“Call for Ideas for the National Idea Bank Competition 2022" کی افتتاحی تقریب کا انعقادکیا جس میں تعلیمی،صنعتی اورکاروباری شخصیات سمیت مختلف جامعات کے وائس چانسلرز و دیگر اسٹیک ہولڈرز نے شرکت کی ۔

اس موقع پر خطاب کرتے ہوئے اخوت فاءونڈیشن کے بانی ڈاکٹر امجد ثاقب نے نوجوان تخلیق کاروں کو غیرمعمولی سوچ کو اپنانے کی حوصلہ افزائی کرتے ہوئے کہا کہ وہ روزمرہ کے مسائل کو حل کرنے کے مواقع کی طرف توجہ دیں ۔ تمام innovators اور entrepreneurs کے لیے یہ ایک بہترین موقع ہے کہ وہ اپنے نئے اور جدید آئیڈیاز نیشنل آئیڈیا بینک میں جمع کروائیں تاکہ سرمایہ کاروں تک رسائی حاصل کی جاسکے

سرسیدیونیورسٹی کے وائس چانسلر پروفیسر ڈاکٹر ولی الدین نے کہا کہ نیشنل آئیڈیاز بینک کا منصوبہ سرسید یونیورسٹی کے ا س عزم کا اظہار کرتا ہے کہ نئے علم اور ٹیکنالوجی کے فروغ کے لیے نیٹ ورکنگ کے دائرہ کار کو بڑھایا جائے تاکہ ہمارا ملک ترقی کر سکے اور ترقی یافتہ قوموں کی صف میں ایک باوقار مقام حاصل کرسکیں ۔ این آئی بی 2021کی شاندار کامیابی سرسید یونیورسٹی، اسپائر پاکستان، آئیڈیا جسٹ، ایگناءٹ اور پاکستان سافٹ وئیر ایکسپورٹ بورڈ کی مشترکہ کاوشوں کا نتیجہ تھی ۔ این آئی بی پروگرام کے لانچ کے بعد سے ہماری ٹیم کے ممبران کی تعداد میں کافی اضافہ ہوا ہے ۔ اور این آئی بی پروگرام میں قومی اور بین الاقوامی ممبران مسلسل شامل ہورہے ہیں ۔

وائس چانسلر پروفیسر ڈاکٹر ولی الدین نے بتایا کہ سرسیدیونیورسٹی نے کیمپس میں سرسید ٹیکنالوجی انکوبیشن سینٹر قائم کیا ہے تاکہ صنعتی سیکٹرکے تعاون سے ٹیکنالوجی کو فروغ دینے کے لیے نئی مصنوعات کو قابلِ فروخت شے میں تبدیل کیا جاسکے ۔ جامعہ سرسید نے قومی و دیگر یورپی جامعات کے تعاون سے متعدد Eramus+ (EU) انٹرنیشنل کریڈٹ موبلٹی فنڈنگ پروگرام حاصل کئے ۔

سرسید یونیورسٹی نے اقوام متحدہ کی انڈسٹریل ڈیولپمنٹ آرگنائزیشن کے مقابلے میں حصہ لیا جس میں سرسید یونیورسٹی کے دو پروجیکٹس کو نہ صرف مالی طور پر نوازا گیا، بلکہ فائنل راءونڈ کے لیے امریکہ کی سلیکون ویلی لے جایا گیا ۔

یشنل آئیڈیا زبینک کے سفر کے بارے میں ایک معلوماتی پریزنٹیشن بھی دی گئی ۔ ڈاکٹر اعظم ارستو نے این آئی بی 2022 پلان پیش کیا ۔ آخر میں Call for Ideas for NIB 2022 کے آغاز کا اعلان کی گیا ۔

قبل ازیں نیشنل آئیڈیاز بینک کے بانی حسن سید نے مہمانوں کا خیر مقدم کیا اور بالخصوص سرسید یونیورسٹی کو اپنا لیڈر شپ رول بخوبی نبھانے پر خراجِ تحسین ادا کیا ۔نیشنل آئیڈیاز بینک 2021 کامیابی کے ساتھ اختتام پزیر ہوا ۔

اس پروگرام کی رجسٹریشن کی تعداد 1400 تھی ۔ پہلی کال پر تقریباََ2000آئیڈیاز جمع کئے گئے اور مختلف مکتبہ فکر سے تعلق رکھنے والے 300 ججوں نے ان آئیڈیاز کا تجزیہ کیا ۔ قومی مقابلوں میں جیتنے والوں کی تعداد 18تھی جنھیں venture capitalists کے ساتھ تعلقات بنانے کی تربیت دی جارہی ہے ۔

میٹا کی زیرملکیت فوٹو شیئرنگ ایپ انسٹاگرام نےتمام وڈیوزپوسٹس کوریلزمیں بدلنےکافیصلہ کیاہے۔

تفصیلات کے مطابق میٹا کی زیرملکیت فوٹو شیئرنگ ایپ کی جانب سے تمام ویڈیو پوسٹس کو ریلز میں بدلنے کی آزمائش کی جارہی ہے۔میٹا کے ایک ترجمان نے بتایا کہ ہم اس فیچر کی آزمائش کررہے ہیں تاکہ انسٹاگرام پر ویڈیو تجربے کو بہتر بنایا جاسکے۔

انسٹاگرام کی جانب سے ٹک ٹاک کا مقابلہ کرنے کے لیے 2020 میں مختصر ویڈیوزکافیچر ریلز کو متعارف کرایا گیا تھا۔

کمپنی کی جانب سے بھی تصدیق کی گئی ہے کہ دنیا بھر میں محدود تعداد میں صارفین کے گروپ پر اس تبدیلی کی آزمائش کی جارہی ہے اور اس کا مقصد ایپ میں ویڈیو کو سادہ بنانا ہے۔

ابھی یہ واضح نہیں کہ انسٹاگرام کی جانب سے اس تبدیلی کو بڑے پیمانے پر کب تک متعارف کرایا جائے گااور جب اسے متعارف کرایا جائے گا تو پھر ان ویڈیوز کا کیا ہوگا جو ابھی صارفین پوسٹ کرچکے ہیں۔

اسی طرح ابھی یہ بھی معلوم نہیں کہ کیا اس تبدیلی کے بعد بھی صارفین 10 منٹ کی ویڈیوز پوسٹ کرسکیں گے یا نہیں(ویریفائیڈ اکاؤنٹس 60 منٹ کی ویڈیو بھی پوسٹ کرسکتے ہیں)۔

یہ تبدیلی اس وقت کی جارہی ہے جب کمپنی نے حال ہی میں بتایا تھا کہ انسٹاگرام پر لوگ اپنا 20 فیصد سے زیادہ وقت ریلز پر گزارتے ہیں۔

گزشتہ سال انسٹاگرام کے سربراہ ایڈم موسیری نے کہا تھا کہ اب یہ ایپ مزید فوٹو شیئرنگ ایپ نہیں رہے گی کیونکہ کمپنی کی جانب سے ویڈیو پر منتقلی کو ترجیح دی جارہی ہے۔

مانیٹرنگ ڈیسک : گوگل نے اینڈرائیڈ آپریٹنگ سسٹم اورکروم براؤزرکےلیےپاس ورڈمنیجرکواپ ڈیٹ کردیا ہے تاکہ وہ ایپس اور ڈیوائسز میں یکساں انداز سے کام کرسکے۔

صارفین کو بہت جلد کروم یا اینڈرائیڈ ڈیوائسز پر پاس ورڈ منیجر کے حوالے سے نیا یونیفائیڈ تجربہ فراہم کیا جائے گا تاکہ سائٹس یا ایپس کے پاس ورڈز خودکار طور پر اکٹھے ہوجائیں جبکہ اینڈرائیڈ ہوم اسکرین پر ان پاس ورڈز تک رسائی کا نیا شارٹ کٹ بھی فراہم کیا جائے گا۔

گوگل نے ایک بلاگ میں بتایا کہ اس اپ ڈیٹ کے بعد سنگل پاس ورڈ سیٹنگز پیج فراہم کیا جائے گا تاکہ لوگ کروم براؤزر اور اینڈرائیڈ ڈیوائسز میں پاس ورڈ کو بیک وقت محفوظ کرسکیں۔

پاس ورڈ منیجر لوگوں کو ویب سائٹ اور ایپس کے لیے زیادہ محفوظ پاس ورڈز بنانے میں بھی مدد فراہم کرے گا۔اس مقصد کے لیے پاس ورڈ چیک اپ کے ذریعے لوگ جان سکیں گے کہ ان کے پاس ورڈ کس حد تک کمزور ہیں۔

گوگل کی جانب سے پاس ورڈ ہیک ہونے پرکروم براؤزر پر آگاہ کیا جائے گا۔گوگل نے بتایا کہ پاس ورڈ منیجمنٹ سسٹم فی الحال کروم براؤزر پر ہی دستیاب ہوگا جبکہ پاس ورڈ کو مینوئلی ایڈ کرنے کی سہولت بھی متعارف کرائی جارہی ہے۔

کراچی : جناح سندھ میڈیکل یونیورسٹی کے وائس چانسلر پروفیسر امجد سراج میمن نے متوسط طبقے کو رعایتی قیمت پر ٹیسٹ کی سہولت فراہم کرنے کیلئے کراچی میں ساتھویں اور اعظم بستی میں پہلی جے ایس ایم یو ڈائیگناسٹک لیبارٹری کا افتتاح کردیا۔

اس موقع پر رجسٹرار ڈاکٹر اعظم خان، این آئی سی وی ڈی کے ایگزیکٹو ڈائریکٹر ڈاکٹر ندیم قمر، پاکستان میڈیکل ایسوسی ایشن کے سیکریٹری جنرل ڈاکٹر قیصر سجاد، امریکا کے معروف ماہر امراض قلب، پاکستانی کمیونٹی کی سماجی شخصیت اور جناح سندھ میڈیکل یونیورسٹی کے المنس ڈاکٹر جاوید سلیمان، ڈاکٹر زاہد جمال، ڈاکٹر مکرم، لیب منیجر حسنین عباس و دیگر بھی موجود تھے،

وائس چانسلر پروفیسر امجد سراج میمن کا کہنا تھا کہ جے ایس ایم یو لیب کے نتائج درستی اور معیار کے اعتبار سے اپنی ایک پہنچان رکھتے ہیں اور یہی وجہ ہےکہ تیزی کیساتھ شہر کے مختلف علاقوں میں جے ایس ایم یو لیب کے کلیکشن مراکز کھولے جارہے ہیں اور اس اقدام کا مقصد ہر شہری کے لئے ارزاں قیمت پر ٹیسٹ کی بہترین سہولیات فراہم کرناہے۔

قبل ازیں جے ایس ایم یو ڈائیگناسٹک لیبارٹری سے متصل نارتھ امریکن فزیشنز آف کراچی اوریجن(ناپکو)ہارٹ کلینک کے افتتاح کی تقریب منعقد کی گئی، اس تقریب کا سلوگن ’’احتیاط علاج سے بہتر ہے‘‘تھا، کلینک کا افتتاح این آئی سی وی ڈی کے ایگزیکٹو ڈائریکٹر ڈاکٹر ندیم قمر نے کیا، یہ کلینک نارتھ امریکن فزیشنز آف کراچی اوریجن اور جستجو ویلفیئر آرگنائزیشن کا مشترکہ منصوبہ ہے جہاں امراض کلب کے اعلیٰ معیارکےڈاکٹرز بغیر کسی معاوضے کے انسانی خدمت کے جذبے کے تحت اپنی خدمات انجام دینگے۔

تقریب سے خطاب کرتےہوئےڈاکٹر جاوید سلیمان کاکہناتھاکہ یہ ایک پروینٹوہارٹ کلینک ہے،موجودہ دور میں پاکستان سمیت جنوبی ایشیائی ممالک میں30 سے 40 سال کی عمر کے افراد میں دل کے امراض زیادہ دیکھنے میں آرہے ہیں جس کی مختلف وجوہات ہیں اور اس کلینک کا مقصد بھی ان وجوہات کا سراغ لگانا ہے تاکہ یہاں سے ملنے والا ڈیٹا استعمال کرتے ہوئے ایک بڑی آبادی کو دل کے امراض میں مبتلا ہونے سے بچایا جاسکے، انہوں نے بتایا کہ اس کلینک میں مریضوں سے صرف رجسٹریشن فیس لی جائیگی جو کہ انتہائی کم رکھی گئی ہے۔

وائس چانسلر پروفیسر امجد سراج میمن نے متوسط طبقے کے عوام کے لیے اعلیٰ معیار کے کلینک کے آغاز پر زاہد جمال اور جاید سلیمان کی مکمل ٹیم اور جستجو فائونڈیشن کی بنیاد ڈالنے والے طلبا کو خراج تحسین پیش کیااور کہاکہ یہ تمام شخصیات اپنی ذات میں انسٹیٹیوشنز ہیں، ہم پروینٹو کارڈیولاجی کو ایک سبجیکٹ کے طور پر متعارف کروانے کیلئے آپ سب سےتجاویز لیں گے۔این آئی سی وی ڈی کے ایگزیکو ڈائریکٹر ڈاکٹر ندیم قمر نے بھی اس کلینک کے قیام پر ڈاکٹر جاوید سلیمان اور زاہد جمال کو خراج تحسین پیش کیا۔

جناح سندھ میڈیکل یونیورسٹی کے رجسٹرار ڈاکٹر اعظم خان نےکہاکہ نہ صرف پاکستان بلکہ پوری دنیا یہاں سے اکٹھا کیے جانیوالے ڈیٹا سے مستفید ہوگی۔پی ایم اے کے سیکریٹری جنرل ڈاکٹر قیصر سجاد کاکہنا تھاکہ اگر علاج سے زیادہ احتیاط پر توجہ دی جائے تو 70 فیصد بیماریوں کا خاتمہ ہوجائیگا۔اس موقع پر پاکستان میں اس کلینک کے روح رواں ڈاکٹر زاہد جمال کاکہناتھاکہ مجھے یہ بتاتے ہوئے خوشی ہورہی ہےکہ اس کلینک میں اعلیٰ معیار کے ماہر امراض کلب اپنی خدمات انجام دینے کیلئے پر عزم ہیں۔تقریب میں جناح سندھ میڈیکل یونیورسٹی کی ڈاکٹر راحت ناز، قاضی شبیر و دیگر بھی موجود تھے۔

لاہور: پنجاب یونیورسٹی نے امتحانی فیسوں میں اضافہ کردیا۔

تفصیلات کے مطابق فیسوں میں اضافہ پرائیوٹ امیداروں اور الحاق شدہ کالجز کے طلبی کی امتحانی فیس میں کیا گیا ہے، بی ایس ای، بی اے ایسوسی ایٹ ڈگری کی فیس میں اضافہ کردیا گیا،پرائیوٹ طلبا کے لئے بی ایس ای، بی اے م ایسوسی ایٹ ڈگری کی امتحانی فیس میں 9سو روپے اضافہ کردیا گیا۔

نئی فیس میں 6920 روپے مقرر کردی گئی ، بی ایس سائیکوتھراپسٹ کی فیس میں 12 سو روپے اضافہ کردیاگیا، بی ایس میڈیکل لیبارٹری ٹیک کی امتحانی فیس بھی 12 سو روپے بڑھادی گئی ۔

ایم ایڈ کی فیس میں میں بھی 9سو روپے اضافہ کردیا گیا،ایم اے کی فیس میں بھی ایک ہزار روپے کا اضافہ کردیا گیا۔

نئی فیسوں کا اطلاق یکم جولاءی سے ہوگا،پنجاب یونیورسٹی نئی فیسوں کا نوٹیفکیشن بھی جاری کردیا۔

کراچی: کراچی میں مون سون بارشوں کے پیش نظر نیشنل لاجسٹکس سیل نے جامع منصوبہ بندی کرلی۔

ترجمان این ایل سی کے مطابق حساس مقامات پر پانی کے بہاؤ کی 24 گھنٹے نگرانی کی جائے گی جب کہ لانگ بوم ایکسکویٹر، ڈی واٹرنگ پمپس کو حساس علاقوں میں پہنچایا جا رہا ہے۔

ترجمان نے بتایا کہ گلیوں میں پانی کا داخلہ روکنے کےلیے تمام چوکنگ پوائنٹس پر مسلسل ڈریجنگ کی جائے گی، اس کے علاوہ ریت کے20 ہزار تھیلے نشیبی علاقوں کے ساتھ نالے کے اطراف میں رکھے گئے ہیں۔

ترجمان کے مطابق اورنگی نالے پر حفاظتی بندوں کی تعمیر بھی کی جارہی ہے جب کہ شاداب گراؤنڈ، مین کیمپ اور سائٹ ایریا میں ایمرجنسی رسپانس سیل قائم کیا گیا ہے جو بارشوں کے دوران 24 گھنٹے کام کرے گا۔

کراچی میں پانی سے بھرے بادل برسنے کو تیار ہیں لیکن شہر کے نالوں کی صفائی کا کام اب تک مکمل نہیں کیا جاسکا ہے جب کہ اہم شاہراہوں اورعمارتوں پر لگے خطرناک بل بورڈزا ور ہورڈنگز بھی اب تک نہیں ہٹائے جاسکے ہیں۔

لاہور: پنجاب یونیورسٹی سمیت صوبے کی پانچ جامعات میں وائس چانسلرکی تعیناتی کامعاملہ التوا کا شکار ہے۔

ساہیوال یونیورسٹی سمیت ملتان اور سرگودھا کی دو جامعات مستقل وائس چانسلر کی تعیناتی کا معاملہ حل نہ ہوسکا۔ تفصیلات کے مطابق ایک طرف ساہیوال یونیورسٹی میں کوئی وائس چانسلرنہیں تو دوسری جانب پنجاب یونیورسٹی کے وائس چاسلر کی مدت چار جولائی کو ختم ہورہی ہے اور ابھی تک نئے عارضی چارج نہیں۔

ذرائع کاکہنا ہے کہ اگر 4جولائی تک عارضی یامستقل چارج کا فیصلہ نہ ہوا تو تین جامعات بغیر وائس چانسلر کے ہونگی اور ان اداروں میں امتظامی بحران ہوگا۔
دوسری جانب سرگودھا، ملتان اور ساہیوال جامعات میں مستقل وائس چانسلر کی تعیناتی کےلئے سمری وزیراعلیٰ کو بھجوائی تھی جس پر ایک ماہ بعد فیصلہ نہیں ہوا ہے

محکمہ ہائر ایجوکیشن کے ذرائع کا کہنا ہے کہ پنجاب یونیورسٹہ کا عارضی چارج دینے کےلئے جامعہ کے سابق وائس چانسلر کانام زیر غور ہے۔
دوسری طرف ہائرایجوکیشن ڈیپارٹمنٹ کے حکام کاکہنا ہے کہ جلد عارضی چارج کا فیصلہ کرلیا جائے گا