کراچی: جامعہ اردو نے ایم اے پرائیوٹ کےسالانہ امتحانی فارم جمع کرانے کی تاریخ میں توسیع کردی۔

وفاقی اردو یونیورسٹی کے قائم مقام ناظم امتحانات غیاث الدین کے مطابق ایم اے(پرائیویٹ) کے سالانہ امتحانی فارم جمع کرانے کی تاریخ میں18جولائی سے20جولائی2022 تک توسیع کردی گئی ہے۔

طلباءو طالبات امتحانی فارم جامعہ اردو کی ویب سائٹ سے صبح9سے شام5بجے تک آن لائن پر کرنے کے بعد ڈاؤن لوڈ کرکے پرنٹ حاصل کریں۔

امتحانی فارم عسکری بینک گلشن اقبال برانچ اور عبدالحق کیمپس کی بوہرہ پیر برانچ میں جمع کرائیں۔امتحانی فیس5000/=روپے مقرر کی گئی ہے۔

کراچی: اعلیٰ ثانوی تعلیمی بورڈ کراچی نے انٹرمیڈیٹ حصہ اول،حصہ دوم اور حصہ اول و دوم باہم کے سالانہ امتحانات برائے 2022ء کے دوسرے مرحلہ کی تاریخوں کا اعلان کردیا ہے۔

انٹربورڈ کراچی کے جاری کردہ امتحانی شیڈول کے مطابق دوسرے مرحلہ میں آرٹس ریگولر، آرٹس پرائیویٹ گروپس، خصوصی امیدواروں اور ڈپلومہ ان فزیکل ایجوکیشن کے سالانہ امتحانات بروز جمعہ 29جولائی 2022ء سے شروع ہورہے ہیں جو بروز ہفتہ 20اگست2022ء تک جاری رہیں گے۔

تمام امتحانات دوپہر کی شفٹ میں 2 بجے سے 5بجے تک لیے جائیں گی

وہانگ : کووڈ-19 کے باعث پاکستان میں پھنسے چین کی جامعات میں زیرتعلیم پاکستانی طلبہ کا پہلا بیچ 20 جون 2022 کو چین واپس پہنچ چکا ہے اور انہوں نے قرنطینہ کی لازمی مدت پوری کرنے کے بعد اپنے متعلقہ اداروں میں پہنچ کر تدریسی سرگرمیاں شروع کر دی ہیں۔

تدریسی سرگرمیوں کی بحالی کے لئے چین واپس جانے کے خواہشمند باقی طلبہ کو ہدایت کی گئی ہے کہ وہ اپنی تازہ ترین معلومات کے ساتھ ویب سائٹ پر اپنی رجسٹریشن کرائیں۔

تمام خواہشمند طلبہ کو ہدایت کی گئی ہے کہ وہ درست اور معتبر معلومات کے ساتھ 21 جولائی 2022 تک اپنی رجسٹریشن مکمل کرا دیں۔ یہ معلومات مزید کارروائی اور ان کی تصدیق کے لئے چینی حکام کو فراہم کی جائیں گی

لاہور: پنجاب یونیورسٹی نےایسوسی ایٹ ڈگری امتحانات کی ڈیٹ شیٹ جاری کردی۔

امتحانات 4 اگست سے 2 ستمبر تک جاری رہیں گے۔

ترجمان پنجاب یونیورسٹی کے مطابق ڈیٹ شیٹ ایسوسی ایٹ ڈگری پارٹ ون اور ٹو کی جاری کی گئی ہے۔پارٹ ون کے امتحانات 4 اگست سے 19 اگست تک جاری رہیں گے جبکہ پارٹ ٹو کے امتحانات 20 اگست سے 2 ستمبر تک جاری رہیں گے۔ترجمان کے مطابق پہلے روز پولیٹیکل سائنس،بائیو کیمسٹری،اپلائیڈ سائیکالوجی کی امتحانات ہونگے۔

لاہور: پنجاب بھرکےتعلیمی بورڈزمیں کنٹریکٹ پررکھےگئےریٹائرڈملازمین کوفارغ کرنےکاحکم دےدیا گیا۔

محکمہ ہائر ایجوکیشن پنجاب نے نوکریوں سے فارغ ملازمین کو دوبارہ بھرتی کرنے کا بھی نوٹس لے لیا۔

یچ ای ڈی کے مطابق نوکریوں سے ایک بار نکالے گئے ملازمین کو اگر دوبارہ ملازمت دی گئی ہے تو ان کو بھی فارغ کیا جائے گا اور ان ملازمین کو نوکری سے فارغ کرکے رپورٹ محکمہ کو بھجوائی جائے گی۔

اس حوالے سے محکمہ ہائر ایجوکیشن نے تمام تعلیمی بورڈز کے سربراہان کو احکامات جاری کردیئے ہیں۔ترجمان ہائیر ایجوکیشن ڈیپارٹمنٹ پنجاب نے اے پی پی کو بتایا کہ صوبہ بھر کے تمام چیئرمین بورڈز کو حکم نامہ پر فوری عملدرآمد کرانے کی بھی ہدایت کی گئی ہے۔

ترجمان کے مطابق احکامات پر عملدرآمد نہ کرنے پر متعلقہ چیئرمین بورڈز کیخلاف تادیبی کارروائی کی جائے گی۔

گال: گال میں کھیلے جانے والے پہلےٹیسٹ میچ لنکن ٹائیگرز نے پاکستان کے خلاف 103 رنز پر 6 وکٹیں گنوادیں۔

گال کرکٹ اسٹیڈیم میں کھیلے جارہے پہلے ٹیسٹ میچ میں سری لنکا کی پاکستان کے خلاف بیٹنگ جاری ہے، لنکن ٹیم نے 6 وکٹوں کے نقصان پر 103 رنز بنالیے ہیں۔ پاکستان کی جانب سے شاہین شاہ آفریدی نے تین یاسر شاہ نے 2 جبکہ حسن علی نے ایک ایک وکٹ حاصل کی۔

سری لنکن کپتان ڈیمتھ کرونارتنے 1، کوشل مینڈس 21، اوشادا فرنینڈو 35، اینجلو میتھیوز صفر، دھننجایا ڈی سلوا 14 اور نروشن ڈکویلا 4 رنز بناکر آؤٹ ہوئے۔

قبل ازیں میچ کے آغاز سے قبل سری لنکن کپتان ڈیمتھ کرونارتنے نے ٹاس جیت کر پہلے بیٹنگ کا فیصلہ کیا، انہوں نے کہا کہ پچ بیٹنگ کیلئے سازگار ہے کوشش ہوگی پہلی اننگز میں بڑا ٹوٹل لگائیں اور پاکستانی ٹیم کو پریشر میں لائیں۔

اس موقع پر قومی ٹیم کے کپتان بابراعظم نے کہا کہ پاکستان کیلئے آل راؤنڈر سلمان علی آغا ڈیبیو کررہے ہیں جبکہ محمد نواز اور یاسر شاہ قومی ٹیم میں واپسی ہوئی ہے۔

پاکستان کا اسکواڈ
کپتان بابراعظم،امام الحق، محمد رضوان، آعبداللہ شفیق، اظہر علی،آغا سلمان، حسن علی، محمد نواز، یاسر شاہ، شاہین شاہ آفریدی اور نسیم شاہ شامل ہیں۔
سری لنکا کا اسکواڈ
کپتان ڈیموتھ کرونارتنے، اوشادا فرنینڈو، کوشل مینڈس، اینجلو میتھیوز، دنیش چندیمل، دھننجایا ڈی سلوا، نروشن ڈکویلا، رمیش مینڈس، مہیش تھیکشنا، پربت جے سوریا اور کسن راجیتھا شامل ہیں۔
دوسری جانب سلمان علی آغا نے سابق ٹیسٹ کرکٹر محمد یوسف سے ٹیسٹ کیپ حاصل کی، کرکٹر کو مڈل آرڈر بیٹر فواد عالم کی جگہ ٹیم میں شامل کیا گیا ہے۔

لاہور: پاکستان کرکٹ بورڈ (پی سی بی) کے اعلیٰ حکام نےایشیاکپ کےانعقادکیلئےسری لنکاکی حمایت کرنےکافیصلہ کرلیا۔

ذرائع کے مطابق چیف ایگزیکٹو پی سی بی کا کہنا ہے کہ پاکستان چاہتا ہے کہ ایشیا کپ سری لنکا میں ہی ہو، آسٹریلیا کی کامیاب سیریز کے بعد اب ہماری ٹیم بھی سری لنکا میں موجود ہے، تاہم ٹورنامنٹ کے وینیو کا حتمی فیصلہ ایشین کرکٹ کونسل کو کرنا ہے۔

انہوں نے کہا کہ ایشین کرکٹ کونسل (اے سی سی) حکام سے بات ہوئی ہے، وہ صورتحال کا جائزہ لے رہے، ان کا ہر فیصلہ قبول کریں گے۔

چیف ایگزیکٹو پی سی بی فیصل حسنین کا کہنا تھا کہ چیئرمین رمیز راجا کے ہمراہ آئندہ ہفتے آئی سی سی کی سالانہ جنرل کونسل کے اجلاس میں شرکت کروں گا، یہ اجلاس آئندہ 8 سالہ فیوچر ٹور پروگرام (ایف ٹی پی) کی تیاری کے لیے بہت اہم ہے۔

انہوں نے کہا کہ دنیا بھر میں فرنچائز ٹی20 لیگز بڑھنے سے انٹرنیشنل کرکٹ کیلنڈر شدید متاثر ہورہا ہے، اس معاملے پر پاکستان انٹرنیشنل کرکٹ کونسل کو ایک مجوزہ پلان بھیج چکا ہے۔

اجلاس کی سائیڈ لائنز پر کرکٹ آسٹریلیا، انگلینڈ اینڈ ویلز کرکٹ بورڈ اور سری لنکا کرکٹ حکام سے ملاقاتیں کریں گے جس میں فور نیشن اور ٹرائی نیشن ٹورنامنٹس کے ایجنڈے زیر غور ہوں گے۔

اسلام آباد: ملک میں کورونا کی شدت میں مسلسل اضافہ ہورہا ہے۔چارمارچ کےبعد پہلی بارکوروناکے 10 مریض انتقال کرگئے۔

قومی ادارہ صحت (این آئی ایچ ) کے مطابق گزشتہ 24 گھنٹوں کے دوران کورونا سے متاثر مزید 10 افراد انتقال کرگئے۔

کورونا کے189 مریضوں کی حالت تشویشناک ہے۔

گزشتہ 24 گھنٹوں کے دوران ملک بھر میں کورونا کے 22 ہزار451 ٹیسٹ کئےگئے جس میں 737کا کورونا ٹیسٹ مثبت آیا۔

کورونا کے 189 مریضوں کی حالت تشویشناک ہے۔ ملک میں کورونا کے مثبت کیسز کی شرح تین اعشاریہ دو آٹھ فیصد ریکارڈ کی گئی۔

لاہور میں کورونا کیسز کی شرح سب سے زیادہ 6.61 فیصد ریکارڈ کی گئی۔ حیدرآباد میں 5.26، پشاور میں 5.22 اورکراچی میں 4.82 ریکارڈ کی گئی۔

گزشتہ 24 گھنٹوں کے دوران لاہور میں 131، حیدرآباد میں 12، پشاور میں 28 اورکراچی میں 415 افراد میں کورونا کی تصدیق ہوئی۔ سندھ میں کورونا سے 9 جبکہ پنجاب میں ایک شخص کا انتقال ہوا۔

لاہور: سری لنکا اور پاکستان کے مابین کھیلے جانے والے دوسرے ٹیسٹ میچ کا مقام بدل دیا گیا۔

پاکستان کرکٹ بورڈ (پی سی بی) ترجمان کے مطابق سری لنکا میں معاشی بحران اور سیاسی صورتحال کے پیش نظر کولمبو میں شیڈول دوسرے ٹیسٹ میچ کے مقام کو تبدیل کردیا گیا ہے، جس کے بعد دوسرا ٹیسٹ بھی گال کرکٹ اسٹیڈیم میں ہی کھیلا جائے گا۔

ترجمان کا کہنا ہے کہ لنکن بورڈ نے پی سی بی سے درخواسٹ کی تھی کہ دوسرے ٹیسٹ کے مقام کو تبدیل کیا جائے، جس کو بورڈ نے قبول کرلیا۔قبل ازیں گزشتہ روز قومی کرکٹ ٹیم کے کپتان بابراعظم نے سری لنکا میں فراہم کردہ سکیورٹی انتظامات پر اطمینان کا اظہار کیا تھا جبکہ دونوں ٹیمیں سیریز کے پہلے ٹیسٹ میں آج گال کرکٹ اسٹیڈیم میں ایک دوسرے کے مدمقابل ہیں۔

واضح رہے کہ پاکستان اور سری لنکا کے درمیان دوسرا ٹیسٹ 24 جولائی سے 28 جولائی تک شیڈول ہے

کراچی: سندھ حکومت نے تعلیمی اداروں کے احاطے میں منشیات کے استعمال پر پابندی کے لیے ’دی پرائیویٹ ایجوکیشنل انسٹی ٹیوشنز (ریگولیشنز اینڈ کنٹرول) رولز 2005‘ میں ضروری ترامیم کرنے کا فیصلہ کیا ہے۔

۔ ڈائریکٹوریٹ آف انسپیکشن اینڈ رجسٹریشن آف پرائیویٹ انسٹی ٹیوشنز سندھ کی جانب سے وزیر تعلیم و خواندگی محکمہ سید سردار شاہ کے سامنے پیش کردہ ایک باضابطہ دستاویزات کے مطابق صوبائی حکومت نے اصولی طور پر فیصلہ کیا کہ تعلیمی اداروں میں منشیات کے استعمال پر سختی سے پابندی لگائی جائے۔ اور اگر کوئی ادارہ مقررہ قانون کی خلاف ورزی کا مرتکب پایا گیا تو 20 لاکھ روپے جرمانہ عائد کیا جائے گا۔

بیان میں کہا گیا کہ دیکھنے میں آیا ہے کہ نئی نسل میں منشیات کا استعمال عام ہے اور بدقسمتی سے تعلیمی ادارے بھی اس سے مستثنیٰ نہیں ہیں۔ اسی مراسلے میں وزیر تعلیم سردار شاہ کو بتایا گیا کہ عالمی وبا ہر سال تقریباً 80 ملین افراد کو موت کے گھاٹ اتار رہی ہے جن میں سے 12 لاکھ سے زائد غیر تمباکو نوشی کرتے ہیں اور غیر فعال تمباکو نوشی سے مر رہے ہیں۔ پاکستان میں تمباکو کے استعمال سے ہر سال تقریباً 160,000 افراد ہلاک ہو رہے ہیں جن میں 6 سے 15 سال کی عمر کے 1200 بچے بھی شامل ہیں۔ سرکاری خط و کتابت میں بتایا گیا کہ وزیر تعلیم نے اس معاملے کا سنجیدگی سے نوٹس لیا اور آنے والی نسلوں کے لیے صحت مند ماحول پیدا کرنے کے لیے تمام اداروں سے سماجی برائی کا صفایا کرنے کا فیصلہ کیا۔

اس سے قبل سماجی برائی کو جڑ سے اکھاڑ پھینکنے کے لیے صوبے بھر میں ایک پہل کرنے اور آگاہی مہم چلانے کے لیے ایک اجلاس منعقد کیا گیا تھا۔ سیمینارز، ورکشاپس اور سمپوزیم میں مشہور شخصیات اور نامور شخصیات جیسے اداکاروں، گلوکاروں، شاعروں، کھلاڑیوں، نجی تعلیمی اداروں کے سربراہوں، قابل ذکر افراد اور اے این ایف کے عہدیداروں کی وسیع پیمانے پر شرکت کی تجویز دی گئی۔ مزید برآں پرائیویٹ ایجوکیشنل انسٹی ٹیوشنز (ریگولیشنز اینڈ کنٹرول) رولز 2005' میں ضروری ترمیم کے لیے یہ بھی فیصلہ کیا گیا کہ تعلیمی اداروں میں منشیات کا استعمال سختی سے ممنوع ہے، اگر کوئی خلاف ورزی پائی گئی تو 20 لاکھ روپے جرمانہ ہوگا۔ ایسے انسٹی ٹیوٹ کے خلاف عائد کیا گیا ہے جبکہ صوبائی حکومت نے مہم کے لیے 20 ملین روپے مختص کرنے کی درخواست کی ہے۔

میڈیا سے گفتگو کرتے ہوئے سید سردار شاہ نے کہا کہ یہ مسئلہ تشویشناک ہے اور ہمارے مستقبل سے وابستہ ہے اس لیے ضروری قانون سازی کی جائے اور منشیات کی فروخت میں ملوث افراد کو بھی بخشا نہیں جائے گا۔ انہوں نے مزید کہا کہ اس سلسلے میں تمام اسٹیک ہولڈرز ایک پیج پر ہیں اور اس لعنت کے خاتمے کے لیے پرعزم ہیں۔