ایمزٹی وی(تعلیم) ثانوی و اعلیٰ ثانوی تعلیمی بورڈ سکھر نے امتحانات کی تاریخ کا اعلان کردیا ۔ثانوی و اعلیٰ ثانوی تعلیمی بورڈ سکھر کے ناظم امتحانات کی جانب سے جاری کردہ ایک اعلامیے کے مطابق اوریئنٹل لینگویجز اینیوئل/کمپارٹمنٹل امتحانات2016پیر 21نومبر سے شروع ہو نگے
اعلامیے کے مطابق سکھر ، گھوٹکی اور خیرپور کے امیدواروں سے گورنمنٹ ہائی اسکول سکھر جبکہ نوشہرو فیروز کے امیدواروں سے گورنمنٹ مدرسہ ہائی اسکول نوشہرو فیروز میں امتحانات لیے جائیں گے۔

ایمزٹی وی(لاہور) چیف جسٹس لاہور ہائی کورٹ جسٹس منصور علی شاہ نے اسلام آباد بند کرنے کے اعلان کرنے کے خلاف درخواست کی سماعت کے لئے 3 رکنی فل بنچ تشکیل دے دیا ہے۔
ذرائع کے مطابق عمران خان کی جانب سے اسلام آباد بند کرنے کے اعلان کے خلاف لاہور ہوئی کورٹ میں درخواست دائر کی گئی تھی جس میں موقف اختیار کیا گیا تھا کہ اسلام آباد کو بند کرنے کا اعلان کرکے عمران نے عام شہریوں کو بغاوت پر اکسایا۔ ملک پہلے ہی امن و امان کے مسائل سے دوچار ہے جبکہ وفاقی دارالحکومت بند کرنے کی دھمکی سے اسٹاک ایکسچینج اور ملکی معیشت پر برے اثرات مرتب ہو رہے ہیں۔
چیف جسٹس لاہور ہائی کورٹ جسٹس منصور علی شاہ نے جسٹس شاہد حمید ڈار کی سربراہی میں 3 رکنی بنچ تشکیل دیا ہے جس میں جسٹس انوارالحق اور جسٹس قاسم خان بھی شامل ہیں، بنچ 26 اکتوبر کو درخواست کی سماعت کرے گا۔
واضح رہے کہ عمران خان نے 2 نومبر کو اسلام آباد بند کرنے کا اعلان کیا ہے۔ ان کا مطالبہ ہے کہ وزیر اعظم پاناما لیکس کی تحقیقات کے لیے اپوزیشن کے ٹی او آر کو من و عن تسلیم کرلے

ایمزٹی وی(کراچی)پاکستان تحریک انصاف وفاقی حکومت کے خلاف 2نومبر کو دھرنے کے مقام پرعارضی بستی یاٹینٹ ہاوس قائم کرے گی، اس بستی میں کھانے پینے کی اشیا اور ہنگامی طبی سہولتوں سمیت ضروریات زندگی کاسامان رکھاجائے گا۔
دھرنے میں آئے ہوئے شرکاکی رہائش کے لیے اس بستی میں موسم سرما سے بچاؤ کے لیے بھی خاص انتظامات کیے جائیں گے تاکہ لوگ موسم کی تبدیلی کے سبب بیمار ہونے سے بچ سکیں۔
پی ٹی آئی کے ذرائع کے مطابق پارٹی قیادت نے دھرنے کے شرکا سے بھی درخواست کی ہے کہ وہ اپنی ضروریات کا سامان بھی احتیاطاً اپنے ہمراہ لے کر آئیں۔

ایمزٹی وی(آزاد کشمیر) گزشتہ روز مسلم کانفرنس مظفرآباد ڈویژن کے عہدیدار وں اور مسلم کانفرنس کے دفتر گڑھی پن چوک میں استقبالیہ کیمپ کے افتتاح کے موقع پرکارکنوں سے خطاب کرتے ہوئے مسلم کانفرنس کے صدر سردار عتیق احمد خان نے کہا ہے کہ مقبوضہ کشمیر کے عوام کو نریندر مودی کے رحم وکرم پر نہیں چھوڑیں گے ۔آزاد کشمیر کے عوام 24نومبر کو کنٹرول لائن توڑ کر مقبوضہ علاقے میں داخل ہونگے۔

انہوں نے کہا کہ کارکن سیز فائر لائن توڑنے کے لیے گھر گھر مہم چلائیں۔عوام کو ذہنی اور عملی طور پر اس مہم میں شریک ہونے کے لیے تیار کیا جائے تاکہ دنیاپر واضح ہو سکے کہ کشمیر کے عوام ایک ہیں اور کشمیر کی وحدت کا تصور آج بھی بحال ہے ۔ بیرون ملک مثبت پیغام جائے گا۔

ایمزٹی وی(کوئٹہ)وزیراعظم نواز شریف کی زیر صدارت اعلیٰ سطح کا اجلاس ہوا جس میں آرمی چیف جنرل راحیل شریف ،ڈی جی آئی ایس آئی لیفٹیننٹ جنرل رضوان اختر ،کمانڈر سدرن کمانڈ لیفٹیننٹ جنرل عامر ریاض ،ڈی جی ایم آئی میجر جنرل ذکی ،ڈی جی ایم او ،آئی جی ایف سی ،وزیر داخلہ چوہدری نثار ،مشیر قومی سلامتی نا صر جنجوعہ اور وزیر اعلیٰ بلوچستان نواب ثنا اللہ زہری نے شرکت کی ۔اجلاس میں سانحہ کوئٹہ ، نیشنل ایکشن پلان پر عملد ر آمد کا جائزہ اور بلوچستان کی سیکیورٹی صورتحال کے حوالے سے غورکیا گیا ۔

کوئٹہ میں پولیس ٹریننگ سنٹر ہاسٹل پر حملے کا منصوبہ کہاں بنا یا گیا اور اس منصوبے پر عملدرآمد کیسے کیا گیا ،اس حوالے سے اعلیٰ سطح کے اجلاس میں آئی ایس آئی کے کمانڈر نے بریفنگ دیتے ہوئے ساری کہانی بے نقاب کر دی ۔

۔اس موقع پرآئی ایس آئی کمانڈر بریگیڈئر خالد فرید نے اجلاس کو بتا یا کہ پولیس ٹریننگ کالج ہاسٹل پر حملے کا منصوبہ نئی دہلی میں تیار کیا گیا اور افغانستان میں ”را “کے نیٹ ورک کے سپرد کیا گیا ۔یہ منصوبہ افغانستان میں لشکر جھنگوی کے حوالے کیا گیا جس نے کوئٹہ میں اس پر عمل کیا ۔انہوں نے کہا کہ حالیہ دہشت گرد حملوں کی کڑی افغان این ڈی ایس سے ملتی ہے ۔این ڈی ایس سپین بولدک میں تربیتی کیمپ چلا رہی ہے۔

اس موقع پر آئی جی ایف سی اور آئی ایس آئی کے مقامی کمانڈر نے شرکا کودہشت گردوں کے حملے اور فورسز کی کارروائی سے متعلق آگا ہ کیا ۔انہوں نے ایف سی اور فوج کے لائٹ کمانڈو یونٹ کے مشترکہ آپریشن کلین اپ کے بارے میں بھی آگاہ کیا

ایمزٹی وی(اسلام آباد)وسط ایشیائی علاقائی اقتصادی تنظیم کاریک کے اجلاس سے خطاب کرتے ہوئے وزیر اعظم نوازشریف نے کہا کہ کاریک پروگرام کا تصور 1996میں پیش کیا گیا جس کا مقصد رکن ملکوں میں پائیدار ترقی کے اہداف حاصل کرنا ہے۔
ان کا کہنا تھا کہ علاقائی روابط میں مضبوطی کے لیے مواصلاتی نظام کی ترقی ضروری ہے ،کاریک وسط ایشیائی ممالک کی منڈیوں تک پہنچنے کا ذریعہ ہے
وزیراعظم نے کہا کہ کاریک وسط ایشیائی منڈیوں تک پہنچنے کا اہم منصوبہ اور رکن ممالک میں تعاون بڑھانے کے لیے اہم فورم ہے۔ وزیراعظم نواز شریف نے کہا ہے کہ وسط ایشیائی علاقائی اقتصادی تنظیم کے رکن ممالک میں تعاون غربت کے خاتمے میں مدد گار ثابت ہو گا ،کاریک ملکوں کی شراکت ترقی کے خواب کو حقیقت میں بدلے گی ۔
انہوں نے کہا کہ پاکستان سول ایوی ایشن اتھارٹی کاریک ملکوں میں اہم ادارہ ہے ۔نواز شریف نے مزید کہا کہ کاریک ممالک آپس میں توانائی ٹرانسپورٹ اور تجارت میں تعاون کر سکتے ہیں۔
واضح رہے کہ کاریک تنظیم میں دس ممالک شامل ہیں جن میں پاکستان ،چین ،افغانستان ،آذربائیجان ،قازقستان ،کر غزستان ،منگولیا ،تاجکستان ،ترکمانستان اور ازبکستان بھی شامل ہیں ۔

ایمزٹی وی(آزاد کشمیر)صدر آزاد جموں و کشمیر سردار محمد مسعود خان نے آزاد ریاست جموں و کشمیر کے 69 ویں یوم تاسیس کے موقع پر روچڈیل ٹائون ہال کے باہر ریاستی پرچم لہرایا ۔ پرچم کشائی کی اس تقریب میں آزاد کشمیر قانون ساز اسمبلی میں قائد حزب اختلاف چوہدری محمد یاسین ، مانچسٹر میں پاکستان کے قونصل جنرل ڈاکٹر ظہور احمد سمیت دیگر رہنمائوں نے شرکت کی۔

سردار مسعود خان نے خطاب کرتے ہوئے کہا کہ بھارتی فوج کشمیری نوجوا نوں کے خون سے ہولی کھیل رہی ہے ۔مظاہرین کے خلاف اندھا دھند طاقت کا استعمال کرکے انسانی حقوق کی سنگین خلاف ورزیاں کی جارہی ہیں۔
یاسین ملک کو غلط انجکشن لگا کر ان کا ایک بازو مفلوج کر دیا گیا ہے ۔صدر آزاد کشمیر نے مطالبہ کیا کہ یاسین ملک کو علاج معالجے کے لیے بیرون ملک بھیجا جائے ۔ ان کی زندگی کو کچھ ہوا تو ذمہ دار بھارتی حکمران ہوں گے ۔

ایمزٹی وی (کوئٹہ)سانحہ کوئٹہ کے غم میں پورے ملک کی فضاءسوگوار ہے مگر دوسری جانب اسپیکر سندھ اسمبلی آغاسراج درانی رات کو محفل موسیقی سے لطف اندوز ہوتے رہے ۔
ذرائع کا کہنا ہے کہ کراچی میں امریکی قونصل خانے میں امریکی صحافی ڈینئل پرل کی یاد میں ورلڈ میوزک ڈے کی تقریب منعقد کی گئی۔ سانحہ کوئٹہ کو گذرے ابھی چوبیس گھنٹے بھی نہ گذرے تھے کہ سندھ پولیس کے اعلٰی افسران اس ناچ گانے کی تقریب میں شریک ہوئے اور رقص و سرور کی محفل سے محظوظ ہوتے رہے۔ ڈی آئی جی ویسٹ ذوالفقارلاڑک، ڈی آئی جی ساوتھ آزاد خان، ڈی آئی جی سی آئی اے ڈاکٹرجمل، ڈی آئی جی سرورجمالی، ایس ایس پی ویسٹ پیر محمد شاہ ا،یس پی اسد ملحی ، ایس پی روبن اور ایس پی حسیب بیگ بھی موجود تھے۔
ذرائع نے بتایا کہ تقریب میں اسپیکرسندھ اسمبلی آغاسراج درانی سمیت دیگر افراد بھی میوزیکل نائٹ میں موجود رہے۔ آئی جی سندھ کے ریڈ الرٹ کے احکامات اور افسران میوزیکل نائٹ میں موجود تھے۔ ڈینئل پرل نے ورلڈ میوزک ڈے کی تقریب میں خوب ہلہ گلہ کیا گیا۔ امریکن قونصلیٹ کی انتظامیہ کی جانب سے میوزیکل تقریب موخر کرنے کی تجویز مسترد کردی تھی۔

ایمزٹی وی(کوئٹہ)کوئٹہ کے پولیس ٹریننگ کالج پر حملے کے باعث سرکاری سطح پر سوگ کا اعلا ن کیا گیا ہے جبکہ انجمن تاجران کی کال پر ہڑتال کی جارہی ہے ۔

کوئٹہ میں سانحہ پولیس ٹریننگ کالج پر صوبائی حکومت کی جانب سے سرکاری عمارتوں پریوم سوگ کی مناسبت سے سرکاری پرچم سر نگوں ہے۔

سانحہ پولیس ٹریننگ کالج کےخلاف شہر میں شٹرڈاؤن ہڑتال کی کال دی گئی ہے، شٹرڈاؤن کےموقع پرشہر میں کاروباری مراکز اور دکانیں بند ہیں جبکہ مختلف سیاسی جماعتوں نے بھی شٹر ڈاؤن ہڑتال کی حمایت کا اعلان کیا ہے۔

ایمزٹی وی(اسلام آباد)وزیراعظم نوازشریف کی زیر صدارت سانحہ کوئٹہ کے تناظرمیں اہم اجلاس شروع ہو گیا جس میں آرمی چیف جنرل راحیل شریف بھی شریک ہیں

اجلاس میں سانحہ کوئٹہ کے حوالے سے صورتحال کا جائزہ لیا جا رہا ہے۔میڈ یا رپورٹس کے مطابق گورنر ہاوس بلوچستان میں وزیراعظم نواز شریف کی زیر صدارت اعلیٰ سطح کا اجلاس ہو رہا ہے جس میں آرمی چیف جنر ل راحیل شریف ،ڈی جی آئی ایس آئی لیفٹیننٹ جنرل رضوان اختر ،کمانڈر سدرن کمانڈ لیفٹیننٹ جنرل عامر ریاض ،ڈی جی ایم آئی میجر جنرل ذکی منج ،وزیر داخلہ چوہدری نثار ،مشیر قومی سلامتی ناصر جنجوعہ اور ڈی جی ایم او میجر جنرل شیر شمشاد نے شرکت کی ۔

اس موقع پر بلوچستان کی سیکیورٹی صورتحال کا جائزہ لیا جارہاہے ۔ذرائع کے مطابق اجلاس میں بلوچستان کی سیکیورٹی صورتحال کے حوالے سے اہم فیصلے بھی متوقع ہیں ۔