ایمزٹی وی(اسلام اباد)پارلیمنٹ نے کم عمر اور غیر مسلم لڑکی کی زبردستی شادی کرانے والوں کیلئے شکنجہ تیا ر کرلیا۔ تفصیلات کے مطابق قومی اسمبلی نے فوجداری ترمیمی بل 2016ءمنظور کر لیا ہے۔ بل میں تجویز کیا گیا ہے کہ کم عمر لڑکی یا غیر مسلم عورت کی زبردستی شادی کرانے والوں کو دس سال تک کی سزا دی جائے۔ زبردستی شادی کرانے پر دس لاکھ تک جرمانہ بھی کرنے کی تجویز دی گئی ہے۔ اس جرم کے مرتکب افراد کو دونوں سزائیں بھی دی جا سکتی ہیں۔ بل میں مذہبی جذبات مجروح کرنے یا فرقہ وارانہ منافرت پھیلانے پر 3 سال قید کی سزا تجویز کی گئی ہے۔ کسی گروہ یا فرد کی جانب سے کسی بھی ملزم پر تشدد کی صورت میں تین سال تک قید کی سزا ہوگی۔ تشدد کے نتیجے میں ملزم کی ہلاکت پر دیگر سخت قوانین کا اطلاق بھی ہو گا۔ بل میں موبائل فونز پر رانگ کال‘ غلط ای میل یا ایس ایم ایس کرنے والوں کیلئے بھی سزائیں تجویز کی گئی ہیں جبکہ قانون شہادت میں ترمیم بھی بل کا حصہ ہے

ایمز ٹی وی(ٹیکنالوجی)یہ سال سام سنگ کے لیے گلیکسی ایس سیون اور ایس سیون ایج کے حوالے سے ضروراہم ہے لیکن 2017 میں سام سنگ اپنے اسمارٹ فونز میں مزید جدت لانے کے لیے تیار ہے۔ چونکہ تہہ ہو جانے والے یعنی فولڈ ایبل اسمارٹ فونز کے بارے میں کافی عرصے سے افواہیں گردش کر رہی تھیں لیکن اب یہ خواب حقیقت کے قریب ہے۔

سام سنگ 2017 میں فولڈ ایبل اسمارٹ فون متعارف کرائے گی۔ یہ ایسے اسمارٹ فونز ہوں گے جو چوڑائی میں ٹیبلٹ جیسے ہوں گے لیکن انہیں موڑ کر اسمارٹ فون جیسی شکل بھی دی جا سکے گی۔ اس منصوبے پر ایک عرصے سے پروجیکٹ ویلی کے نام سے کام جاری تھا۔ فی الحال اس فون کی کوئی حتمی تصویر سامنے نہیں آئی جس سے اس کے ڈیزائن کا یقینی طور پر اندازا ہو سکے لیکن اس کی متوقع تصاویر کی وجہ سے صارفین اس کے شدت سے منتظر بھی ہیں۔

ماہرین کے مطابق فولڈ ایبل اسمارٹ فون اس صنعت میں سام سنگ کو دیگر حریف کمپنیوں سے آگے بڑھنے میں بھرپور مدد دے گا۔ فولڈ ایبل اسمارٹ فون کے علاوہ اگلے سال سام سنگ گلیکسی ایس ایٹ، ایس ایٹ ایج، گلیکسی نوٹ سیون اور نوٹ سیون ایج بھی منظر عام پر آئیں گے۔

ایمز ٹی وی(ٹیکنالوجی) گوگل کلچرل انسٹی ٹیوٹ نے جدید اور تیز ترین روبوٹک آرٹ کیمرا متعارف کرا دیا جو مصوری کے فن پاروں کی ایک ارب پکسلز کی حامل انتہائی تفصیلات کے ساتھ تصاویر بنا سکتا ہے اور اس کا مقصد دنیا بھر میں موجود فن پاروں کی ڈیجیٹل کاپی محفوظ کرنا اور ان پر تحقیق کو آسان بنانا ہے۔مصوری کے فن پاروں کو سمجھنا بھی ایک فن ہے اس لیے مصوری سے دلچسپی رکھنے والے افراد دنیا بھر کے عجائب گھروں میں جاتے ہیں اور وہاں رکھے فن پاروں کا باریک بینی سے جائزہ لیتے ہیں۔ پرانے دور کے مصوروں نے اپنے فن پاروں میں کئی راز چھوڑے ہیں جنہیں تلاش کرنا آسان نہیں۔ یہی وجہ ہے کہ صدیوں ان کا معائنہ کرنے کے بعد بھی آج تک ان میں چھپی کوئی نہ کوئی نئی چیز دریافت ہو رہی ہے۔

اس کے علاوہ دنیا کے ہر فرد کا ان فن پاروں تک پہنچنا بھی ممکن نہیں۔ ان کی جو تصاویر دستیاب ہیں وہ جتنی بھی اچھی ہو جائیں ان کا انتہائی باریک بینی سے جائزہ لینا ممکن نہیں۔ ان فن پاروں کی تصویر کشی کے لیے الٹرا ہائی ریزولوشن کیمرا درکار ہوتا ہے۔ لیکن یہ فن پارے بہت ہی پرانے دور کے ہونے کی وجہ سے انتہائی نازک ہیں۔ انہیں زیادہ ہوا، روشنی اور نمی سے نقصان پہنچتا ہے۔ یہی وقت ہے کہ وقت کے ساتھ ساتھ کئی ایسے انمول فن پارے ضائع ہو گئے۔

دنیا میں موجود ان پاروں کو محفوظ کرنے کے لیے گوگل کلچرل انسٹی ٹیوٹ نے ایک نیا آرٹ کیمرا متعارف کرایا ہے۔ یہ کیمرہ ایک ارب پکسلز کی حامل الٹرا ہائی ریزولوشن تصویر بنا سکتا ہے۔ یہ کیمرا تصویر کو نقصان پہنچائے بغیر اس کے ایک ایک نقطے کی انتہائی بہترین تصویر بنانے کی صلاحیت رکھتا ہے۔ تصویر کے ہر حصے کو مکمل فوکس میں لانے کے لیے یہ اس کی سیکڑوں تصاویر بنا لیتا ہے۔

اس کیمرے کے ذریعے گوگل کا مقصد دنیا بھر میں موجود نایاب فن پاروں کی ڈیجیٹل کاپیاں تیار کرنا ہے اس کام کے لیے یہ کیمرا دنیا بھر کے عجائب گھروں کا سفر کرے گا تاکہ ان میں رکھے فن پاروں کو ہمیشہ کے لیے محفوظ کیا جا سکے۔ اور یہ کام گوگل بغیر کسی معاوضے کے یعنی مفت انجام دے گا۔ کیمرے کے اجرا کے موقع پر اس کی پہلی بنائی 200 تصاویر کو بھی آن لائن پیش کیا گیا ہے جس سے اس کیمرے کی صلاحیتوں کا اندازہ لگایا جا سکتا ہے۔

ایمز ٹی وی(ٹیکنالوجی )سال 2013 میں فون بنانے والی دنیا کی معروف ترین کمپنی نوکیا نے اپنا موبائل فون بنانے کا شعبہ مائیکروسافٹ کے ہاتھ بیچ دیا تھا لیکن اب نوکیا اس میدان میں واپسی کے لیے تیار ہے۔ اینڈروئیڈ کی آمد اور بھرپور مقبولیت نے نوکیا موبائل فونز کی فروخت کو شدید نقصان پہنچایا۔ اینڈروئیڈ کو استعمال نہ کرنے کی وجہ سے نوکیا کی مصنوعات صارفین کی پسندیدگی حاصل کرنے میں ناکام ثابت ہوئیں۔

لگتا ہے نوکیا کو بھی اپنی اس غلطی کا اب شدت سے احساس ہے یہی وجہ ہے کہ نوکیا اب کی بار اینڈروئیڈ کے حامل اسمارٹ فون اور ٹیبلٹ تیار کرے گی جس کے لئے فن لینڈ سے تعلق رکھنے والی ایک کمپنی ایچ ایم ڈی کے ساتھ معاملات طے پا چکے ہیں۔ یہ کمپنی اسمارٹ فون بنانے کے حوالے سے اچھا تجربہ رکھتی ہے۔ معاہدے کے مطابق یہ کمپنی “نوکیا” کا نام استعمال کرتے ہوئے نئے اسمارٹ فون اور ٹیبلٹ تیار کرے گی جن میں اینڈروئیڈ کو بطور آپریٹنگ سسٹم استعمال کیا جائے گا۔ اس طرح نوکیا کے شائقین اب حقیقی معنوں میں اینڈروئیڈ پر مبنی شانداراسمارٹ فون دیکھ سکیں گے