ایمز ٹی وی (بین الا قومی)حکومت نے ابوظہبی آنے والے تمام ممالک کے شہریوں کو سیاحتی ویزا دینے کا اعلان کردیا جس کے لیے ایئرپورٹ پر کاؤنٹر قائم کردیا گیا ہے۔ عرب میڈیا کے مطابق ابوظہبی آنے والے افراد کو چار دن کے لیے سیاحتی ویزا دیا جائے گا اور یہ ویزا ابوظہبی انٹرنیشنل ایئرپورٹ پر ہی محض 15 تا 30 منٹ میں جاری کردیا جائے گا، اس ضمن میں امیگریشن حکام نے ابوظہبی ایئرپورٹ کے ٹرمینل تھری (ٹرانزٹ ایریا) پر نیا کاؤنٹر قائم کردیا ہے تاکہ ٹرانزٹ ویزا اور نئے آنے والوں کو فوری ویزا دیا جاسکے۔ یہ کاؤنٹر مختلف اقسام کے ویزے جاری کررہا ہے جس میں نئے آنے والے افراد کو سیاحتی ویزوں کا اجرا بھی شامل ہے ، ابوظہبی ایئرپورٹ پہنچنے والا کسی بھی ملک کا شہری اس کاؤنٹر پر جاکر سیاحتی ویزا حاصل کرسکتا ہے جو کہ اسے آدھے گھنٹے میں مل جائے گا، سیاحتی ویزا براہ راست ابوظہبی پہنچنے والے افراد کے ساتھ ساتھ ایسے افراد بھی حاصل کرسکتے ہیں جو ٹرانزٹ ویزا پر ابوظہبی پہنچے ہیں اور چاہتے ہیں کہ ان کا ٹرانزٹ ویزا سیاحتی ویزا میں تبدیل کردیا جائے۔ قبل ازیں ایئرپورٹ پر ٹرانزٹ ویزا محض چند ممالک کے شہریوں کے لیے دستیاب تھا جب کہ دیگر ممالک کے شہریوں کو ٹرانزٹ ویزا کے لیے رائج طریقہ کار کے تحت وہاں آنے سے پہلے درخواست دینی پڑتی تھی۔
ایمز ٹی وی (تجارت )کرشنگ سیزن وقت پر شروع نہ ہونے کے باعث کاشتکاروں کو اربوں روپے مالیت کے نقصانات اورگنے کی فصل کے حوالے سے رواں سال ایک بڑا بحران پیدا ہونے کے خدشات لاحق ہوگئے ہیں۔ شوگرملوں کی ایما پر گنے کے کاشتکار حکومت سے مطالبہ کررہے ہیں کہ انہیں فی من گنے کی فروخت پر براہ راست 20 سے 25 روپے کی زرتلافی دینے کا اعلان کرے تاکہ کھیتوں میں موجود ان کی فصل کی شوگرملوں کی ترسیل شروع ہوسکے اور شوگر ملیں بلاتاخیرگنے کی کرشنگ کاآغاز کرسکیں۔ واضح رہے کہ عمومی طور پر سندھ میں شوگر ملیں اکتوبر کے آخری ہفتے میں جبکہ پنجاب میں نومبر کے تیسرے ہفتے میں نئے کرشنگ سیزن کا آغاز کرتی ہیں لیکن رواں سال چینی کی قیمت میں توقعات کے برعکس کمی کے باعث شوگرملوں نے باہمی یکجہتی کے ساتھ نئے کرشنگ سیزن شروع کرنے میں تاخیر کررہی ہیں لیکن اس تاخیر کی وجہ سے گنے کے کاشتکاروں میں تشویش کی لہر پائی جارہی ہے۔ گنے کی کرشنگ میں تاخیر سے گندم کی کاشت میں بھی تاخیر یا گندم کی کاشت ہدف کی نسبت انتہائی کم کاشت ہونے کے خدشات بھی پیدا ہوگئے ہیں۔ ذرائع کے مطابق اکتوبر، نومبر 2016 میں چینی کی قیمتیں 58 روپے فی کلوگرام تک پہنچ گئی تھیں جبکہ گنے کی مقررہ قیمت فروخت 180 روپے فی من تھی جبکہ رواں سال اوپن مارکیٹ میں چینی کی قیمتیں 47 روپے فی کلوگرام کی سطح نیچے آئی ہیں اوراس خدشے کا بھی اظہار کیا جا رہا ہے کہ شوگر ملوں کے فعال ہونے کی صورت میں چینی کی قیمتوں میں مزید نمایاں کمی واقع ہوگی لیکن ان حقائق کے باوجود گنے کی قیمت فروخت رواں سال بھی 180 روپے فی من مقرر کی گئی ہے جس کے باعث شوگر ملز آپریشنل نہیں ہو رہی ہیں۔ شوگر مالکان نے ’’ایکسپریس‘‘ کو بتایا کہ شوگر ملز نے مئی جون میں حکومت پاکستان سے 15 لاکھ ٹن چینی بغیر سبسڈی کے برآمد کرنے کی اجازت طلب کی تھی کیونکہ اس وقت چینی کی بین الاقوامی منڈیوں میں قیمتیں انتہائی پرکشش تھیں لیکن حکومت پاکستان کی جانب سے اس دورانیے میں چینی برآمد کرنے کی اجازت نہیں دی گئی اور یہی وہ عوامل ہیں کہ کرشنگ سیزن میں تاخیر کاسبب بن گئے ہیں جس سے مستقبل میں چینی کانیا بحران پیدا ہوسکتا ہے۔ شوگرملز سیکٹر کا کہنا ہے کہ اس وقت بھی ملک بھر میں 12 لاکھ ٹن سے زائد چینی کے ذخائر موجود ہیں جس کے باعث چینی کی قیمتوں میں مندی کا رجحان دیکھا جا رہا ہے۔ انہوں نے بتایا کہ کسانوں اور شوگر ملز کو درپیش اس مسئلے کے حل کیلیے حکومت پاکستان کو چاہیے کہ وہ کاشتکاروں کیلیے گنے کی فروخت پر 20 سے 25 روپے فی من سبسڈی کا اعلان کرے جس سے کسانوں کی فی ایکڑ آمدنی بہتر ہونے کے ساتھ ساتھ شوگر ملز کو بھی نیا کرشنگ سیزن شروع کرنے میں کوئی رکاوٹ باقی نہیں رہے گی جبکہ اس سے گندم کی کاشت بھی زیادہ سے زیادہ ہو سکے گی۔
ایمز ٹی وی(تجارت) پنجاب میں اوبر اور کریم سمیت شیئررائیڈنگ گاڑیوں کے لئے نئی پالیسی تیارکرلی گئی ہے جس کے تحت نجی گاڑیوں کے کمرشل ہونے سے کرایوں میں اضافہ ہوگا۔ پنجاب میں اوبر اور کریم سمیت تمام آن لائن شیئررائیڈنگ سروسزسے منسلک گاڑیوں کے لئے نئی پالیسی تیارکرلی گئی ہے، اس سلسلے میں پنجاب انفارمیشن ٹیکنالوجی بورڈ، محکمہ ٹرانسپورٹ اورمحکمہ ایکسائز نے پالیسی تجاویزصوبائی حکومت کو ارسال کردیں جس کی منظوری بھی دے دی گئی ہے۔ نئی پالیسی کے تحت شیئررائیڈنگ گاڑیوں کے مالکان کو اپنی گاڑیوں کی کمرشل رجسٹریشن کروانا ہوگی اور ان گاڑیوں کا کمرشل ٹیکس بھی ادا کرنا ہوگا، یہ شیئر رائیڈنگ گاڑیاں عارضی طور پر کمرشل رجسٹرڈ ہوسکیں گی اور گاڑی کا مالک جب چاہے اس کی کمرشل رجسٹریشن ختم کرواسکے گا۔ شیئررائیڈنگ گاڑیوں کے کمرشل ہونے سے کرایوں میں اضافہ ہوگا اوراس اقدام سے شہریوں کو محفوظ ، آرام دہ اورسستے سفرکی سہولت مہنگی پڑجائے گی۔ واضح رہے کہ چند ماہ پہلے شیئرائیڈنگ گاڑیوں کے کمرشل استعمال کی بنیاد پرلاہور،کراچی اوراسلام آباد میں یہ سروسزمعطل کردی گئی تھیں۔
ایمز ٹی وی (اسپورٹس )اوگرا نے حکومت کو پیٹرولیم مصنوعات کی قیمتوں میں اضافے کی سفارش کردی ہے۔ عوام پر پیٹرول بم گرانے کی تیاری کرلی ہے اور وزارت پیٹرولیم کو پیٹرولیم مصنوعات کی قیمتوں میں اضافے کی سمری ارسال کردی ہے۔ سمری کے مطابق پیٹرول کی قیمت میں 2 روپے 49 پیسے، ہائی اسپیڈ ڈیزل کی قیمت میں 5 روپے 19 پیسے، لائٹ ڈیزل کی قیمت میں 12 روپے 63 پیسے جب کہ مٹی کا تیل 15 روپے 99 پیسے فی لیٹر اضافے کی تجویز دی گئی ہے۔ واضح رہے کہ حکومت عالمی منڈی کے تناظر میں ماہانہ بنیادوں پر پیٹرولیم مصنوعات کی قیمتوں کا تعین کرتی ہے۔
ایمزٹی وی (جدہ)سعودی عرب نے کہا ہے کہ اقوام متحدہ کے رکن ممالک اور عالمی برادری روہنگیا کے مسلمانوں پر ڈھائے جانے والے مظالم بند کرائیں اور میانمار کی حکومت کو بین الاقوامی عہد و پیمان اور اصولوں کی پاسداری پر آمادہ کریں۔ سعودی عرب نے اقوام عالم سے مطالبہ کیا ہے کہ روہنگیا کی مسلم اقلیت کا مسئلہ حل کرائے یہ مطالبہ اقوام متحدہ میں متعین سعودی عہدیدار فیصل الحقبانی نے روہنگیا کے مسلمانوں کے خلاف کئے گئے جرائم کی بین الاقوامی رپورٹ پر تبصرے کیلئے منعقد اقوام متحدہ کے پروگرام میں بیان دیتے ہوئے کیا ۔ الحقبانی نے کہا کہ انکا ملک روہنگیا مسلمانوں پر ڈھائے جانے والے وحشیانہ مظالم کو انتہائی تشویش کی نظر سے دیکھ رہا ہے۔ 1992ءسے کم از کم 10لاکھ مسلمان میانمار میں مذہبی تفریق کا شکار ہیں۔
ایمز ٹی وی(تجارت)قومی احتساب بیورو نے ملک بھر سے بدعنوانی کا خاتمہ کرتے ہوئے گزشتہ تین سال کے دوران پچاس ارب روپے وصول کرکے قومی خزانے میں جمع کرائے ہیں۔ قومی احتساب بیورو(نیب) کے ترجمان کے مطابق گذشتہ3سالوں کے دوران گزشتہ برسوں کے مقابلے میں شکایات، انکوائریوں اور تحقیقات کی شرح تقریباً دوگنا رہی جس کی وجہ سے مختلف افراد سے وصول کئے گئے 50ارب روپے قومی خزانے میں جمع کرائے گئے ہیں۔ انہوں نے کہا کہ نیب معاشرے سے بد عنوانی کے مکمل خاتمے کے لئے آگاہی ،روک تھام اور عملدرآمد سے متعلق بدعنوانی کے خاتمے کی جامع حکمت عملی پر عمل پیرا ہے اوراس کے لئے تمام سرکاری اورنجی اداروں کو قوم کی خدمت کا پابند بنایا گیا ہے۔
ایمز ٹی وی(اسپورٹس) نجم سیٹھی کو چیئرمین پی سی بی کی مسند پر بٹھانے کیلیے تیاریاں مکمل ہو گئیں جبکہ نئے گورننگ بورڈ ارکان کو بدھ کو شیڈول سے پہلے اجلاس میں شرکت کیلیے دعوت نامے جاری کیے جا چکے ہیں۔ شہریار خان نے 18 اگست 2014کو بطور چیئرمین پی سی بی چارج سنبھالا تھا لیکن ان کی انگلینڈ موجودگی کے دوران الیکشن کا جو شیڈول بنایا گیا اس کے تحت وہ قبل از وقت ہی اپنا دفتر چھوڑ چکے، الیکشن کمشنر افضال حیدر 2ہفتے قبل ہی بورڈ کے ہیڈ کوارٹرز قذافی اسٹیڈیم لاہور آنا شروع ہوگئے تھے۔ نجم سیٹھی کو نیا چیئرمین پی سی بی منتخب کرنے کیلیے رسمی کارروائی بدھ کو مکمل کرلی جائیگی جبکہ نئے گورننگ بورڈ میں ڈپارٹمنٹس یونائیٹڈ بینک، حبیب بینک، واپڈا اور سوئی سدرن گیس کمپنی، ریجنز میں فاٹا، لاہور، سیالکوٹ اور کوئٹہ کے نمائندے شامل ہیں، فاٹا میں ایڈہاک پر کام چلایا جا رہا ہے، الیکشن کا عمل مکمل ہونے پر ہی اس کا نمائندہ گورننگ بورڈ کا رکن بنے گا۔ پی سی بی الیکشن میں حکومتی نمائندے عارف اعجاز سمیت 9ارکان ووٹ دینگے،نئے گورننگ بورڈ کے ارکان کو پہلے اجلاس میں شرکت کیلیے دعوت نامے جاری کیے جا چکے ہیں، گزشتہ روز بھی الیکشن کمشنر نے معاملات کا جائزہ لیا۔ اےک ریجن کے نمائندے کا کہناتھاکہ نیا چیئرمین آئین کے تحت وضع کیے جانے والے طریقہ کار کے تحت منتخب ہوگا، نواز شریف پی سی بی کے چیف پیٹرن نہیں رہے تو ن لیگ سے تعلق رکھنے والے دوسرے وزیر اعظم ان کی جگہ لے چکے،بظاہر کوئی مسائل پیدا ہونے کی وجہ نظر نہیں آتی۔
ایمزٹی وی(تعلیم) صوبہ سندھ میں گرمیوں کی تعطیلات ختم ہونے میں دو ہفتے باقی رہ گئے ہیں اورگزشتہ دنوں کراچی اور سندھ کے دیگر شہروں میں بارش کا سلسلہ جاری تھا، جس کی وجہ سے سرکاری اسکولوں کی پہلے سے تباہ شدہ اور مرمت طلب عمارتوں کو شدید نقصان پہنچا ہے لیکن محکمہ تعلیم کی عدم دلچسپی اور محکمہ منصوبہ بندی کی کاہلی کی وجہ سے گرمیوں کی چھٹیوں کے دوران سرکاری اسکولوں کی مرمت کا انتظام نہیں کیا جاسکا ہے، گزشتہ سال سرکاری اسکولوں اور کالجوں کی مرمت اور تزئین کے لئے جو رقم مختص کی گئی تھی اس میں سے صرف تیس فیصد کا اجراء ہوا اور اس میں سے بھی صرف بیس فیصد استعمال کی جاسکی، تاہم اس سال اسکولوں اور کالجوں کی عمارتوں کی مرمت اور فرنیچر کی فراہمی پر جو رقم مختص کی گئی ہے اسے ابھی تک جاری نہیں کیا جاسکا ہے، اس طرح گرمیوں کی تعطیلات کے بعد کھلنے والے ان تعلیمی اداروں میں بظاہر طلباء کی سہولت کا کوئی سامان نہیں ہوسکے گا، والدین کی جانب سے اس صورتحال پر مسلسل تشویش کا اظہار کیا جارہا ہے اور وہ اپنے بچوں کو ان اداروں میں داخل کرنے سے گریز کررہے ہیں، حالانکہ حکومت نے سرکاری تعلیمی اداروں میں پہلی کلاس سے دسویں کلاس تک فیس معاف بھی کی ہے اور یہاں پڑھنے والے طلباء کو نصابی کتابیں بھی مفت فراہم کی جارہی ہیں تاہم والدین اس رعایت کو اسکولوں میں موجود غیرتعلیمی ماحول اور اساتذہ کی جانب سے عدم دلچسپی کو اچھی نظر سے نہ دیکھتے ہوئے اپنے پیٹ پر پتھر باندھ کر اپنے بچوں کو نجی تعلیمی اداروں میں داخل کرانے پر مجبور نظر آتے ہیں۔
