ایمز ٹی وی(تجارت) سی پیک کی تعمیر کے بعد معیشت کی بہتری کے دعوے کرنے والی حکومت نے بجٹ خسارہ اور زرمبادلہ کے ذخائر کم ہونے کے بعد غیر ملکی اداروں سے مزید قرضے لینے کا فیصلہ کر لیا ۔ زرائع کے مطابق وفاقی حکومت نے بجٹ خسارہ کم کرنے اور زرمبادلہ کے ذخائر کو سنبھالنے کیلئے ایشیائی ترقیاتی بینک ارو فرانس ڈیویلپمنٹ ایجنسی سے قرضے لینے کا حتمی فیصلہ کر لیا ہے ۔ زرائع کا کہنا ہے کہ حکومت اے ڈی بی سے 60کروڑ ڈالر کا قرض لے گی، یہ قرضہ حکومتی اداروں کے تنظیم نو اور توانائی منصوبوں کے نام پر لئے جائیں گے جبکہ فرانسیسی ایجنسی کے درمیان بھی 10 کروڑ ڈالر کے قرضے کیلئے مزاکرات جاری ہیں۔اے ڈی بی کی جانب سے سرکاری اداروں کی تنظیم نو کیلئے اگلے مالی سال میں فنڈز دئیے جانا تھا مگر حکومت کی درخواست پر یہ رقم رواں مالی سال جاری کی جائے گی۔ حکومت کومشرف دور میں فروخت کئے گئے یورو بانڈز کی ادائیگی کیلئے 75 کروڑ ڈالر درکار ہیں، ان دس سالہ بانڈز کی مدت مئی میں ختم ہورہی ہے، بانڈز پرشرح سود 6.8 فیصد ہے، یورو بانڈز کی ادئیگی کے لئے حکومت ایک بار پھر چینی کمرشل بینکوں کا دروازہ کھٹکھٹانے کا ارادہ رکھتی ہے۔چینی کمرشل بینک پہلے ہی 1 ارب30 کروڑ ڈالر کا قرض فراہم کر چکے ہیں۔ نوازحکومت نے تین برس میں پچیس ارب ڈالر کے نئے قرضے لئے ہیں، حکومت نے غیر ملکی کمرشل بینکوں سے 3 ارب 30کروڑ ڈالر کا قرض لیا جبکہ ساڑھے چار ارب ڈالر کے بانڈز بھی فروخت کئے جاچکے ہیں۔ یاد رہے کہ نواز لیگ کے موجودہ دورے حکومت میں ملک پر قرضوں کے بوجھ میں35 فیصد کا ہوش ربا اضافہ ریکارڈ کیا گیاجس کے بعد ملک کا مجموعی قرضہ 18 کھرب روپے سے تجاوز کرچکا ہے۔

ایمز ٹی وی (تجارت )عالمی مالیاتی فنڈ ( آئی ایم ایف) کا کہنا ہے کہ پاکستان کے معاشی اعشاریوں میں بہتری آئی ہے جسے دیکھتے ہوئے کہا جاسکتا ہے کہ پاکستان کا معاشی مستقبل بہتر ہو رہا ہے۔ عالمی مالیاتی فنڈ نے وزارت خزانہ اور اسٹیٹ بینک کے ساتھ مذاکرات کے بعد جاری اعلامیے میں کہا کہ پاک چین اقتصادی راہداری میں سرمایہ کاری کی وجہ سے پاکستان میں معاشی ترقی ہورہی ہے جب کہ معیشت میں اصلاحات نے پاکستان کو معاشی ترقی حاصل کرنے میں مدد فراہم کی، مالی سال 17-2016 کے دوران پاکستانی معاشی شرح نمو 5 فی صد کی شرح سے ترقی کرسکتی ہے اور بجلی کی فراہمی بہتر ہونے پر معاشی ترقی 6 فی صد تک بھی پہنچ سکتی ہے۔ علامیے کے مطابق پاکستان کی معیشت کو مالیاتی، بیرونی خسارے اور توانائی کی کمی جیسے بڑے مسائل کا سامنا ہے اس لئے حکومت پاکستان کو توانائی کے شعبے کی 100 فیصد وصولی کو یقینی بنانا ہوگا جب کہ رواں کھاتوں کا خسارہ جی ڈی پی کا 2.9 فی صد ہوگیا ہے اور موجودہ مالی سال کے دوران افراط زر کی شرح 4.3 فی صد رہنے کا امکان ہے۔ اعلامیے میںمزید کہا گیا ہے کہ پاکستان کی معاشی ترقی میں بڑی رکاوٹ بڑی صنعتوں کی کارکردگی توقع سے کم رہنے اور برآمدات میں کمی ہے، حکومت تجارتی خسارے کو کم کرنے کےلئے برآمدی شعبے کی صلاحیت کو بڑھائے اور بیرونی قرضوں اور مانیٹری پالیسی پر گہری نظر رکھے۔ دوسری جانب آئی ایم ایف حکام سے مذاکرات کے بعد مشترکہ پریس کانفرنس کرتے ہوئے وزیرخزانہ اسحاق ڈار کا کہنا تھا کہ آئی ایم ایف حکام سے ملاقات قابل اطمینان بخش رہی جب کہ حکام نے پاکستانی معیشت کی ترقی پر اطمینان کا اظہار کیا۔ انہوں نے کہا کہ پاکستان کی جی ڈی پی گروتھ گزشتہ 10 سال کے مقابلے میں بلندترین سطح پر ہے اور رواں سال امید ہے کہ اس میں مزید 5 فیصد اضافہ ہوگا۔

ایمز ٹی وی (انٹرٹینمنٹ)اداکارہ میر انے حکومت سے دو لاکھ روپے ماہانہ امداد اور ایک کروڑ روپے فلم بنانے کیلئے مانگ لئے۔انہوں نے وزیر اعلیٰ پنجاب کے نام لکھی درخواست میں یہ دونوں مطالبات کئے ہیں ۔یہ درخواست انہوں نے پنجاب ا نسٹی ٹیوٹ آف لینگو ئج آف آرٹ اینڈ کلچر میں دو روز قبل جمع کرائی اور انتظامیہ نے فارورڈ کر دی ہے ۔

پلاک کی ڈی جی صغریٰ صدف نے کہا ہے کہ روزانہ متعدد درخواستیں امداد کیلئے وصول ہوتی ہیں جنہیں ہم فارورڈ کر دیتے ہیں ۔

ایمز ٹی وی(نئی دہلی) بھارتی حکومت انڈس واٹر کمیشن کے اجلاس میں طے پانے والے اتفاق رائے سے منحرف ہو گئی جبکہ بھارتی حکومت کی جانب سے کہا گیا ہے کہ ان مذاکرات میں پاکستانی اعتراضات تسلیم کر نے کی بات درست نہیں اور نہ ہی دریائے چناب پر میار ہائیڈرو الیکٹرک منصوبے پر کام روکنے کے لئے رضا مندی ظاہر کی گئی ہے۔بھارتی میڈیا نے حکومتی ذرائع کا حوالے دیتے ہوئے کہا ہے کہ پاکستانی میڈیا کی جانب سے یہ دعوے کیے گئے تھے۔ انڈس واٹر کمیشن کے اسلام آباد میں ہونیوالے اجلاس کے آخری روز نئی دہلی نے میار ڈیم پر پاکستانی اعتراضات کو تسلیم کرلیا ہے جو کہ مکمل طورپر غلط اور بے بنیاد ہیں ذرائع کا کہنا ہے کہ بھارت نے قطعی طور پر اس منصوبے کو روکنے پر اتفاق نہیں کیا ہے جبکہ ذرائع کا یہ بھی کہنا ہے کہ پاکستانی میڈیا نے یہ بھی دعویٰ کیا تھا کہ لوئرکلنائی ہائیڈرو الیکٹرونک پراجیکٹ کے ڈیزائن پر بھی نظرثانی کے لئے رضا مندی ظاہر کی گئی ہے یہ دعویٰ بھی درست نہیں ہے ، تاہم ذرائع کا یہ کہنا تھا کہ اس حوالے سے تبادلہ خیال ضرور کیا گیا ہے تاہم بھارت ایسے کسی بھی معاہدے کا حصہ نہیں بن سکتا جس سے ان منصوبوں پر قدغن لگے

ایمز ٹی وی(واشنگٹن) امریکی حکومت نے پروازوں پر الیکٹرانک اشیاءلانے پر پابندی لگانے کا فیصلہ کر لیا ۔ پابندی کا اطلاق 12ممالک کے مسافروں پر ہو گا اے آر وائے نیوز کے مطابق امریکا نے دہشتگردی کے پیش نظر دنیا کے 12ممالک کے باشندوں پر امریکا آنے والی پروازوں میں الیکٹرانک اشیاءلانے پر پابندی عائد کرنے کا فیصلہ کیا ہے امریکی حکام کا کہناہے کہ سیکورٹی خدشات کی بنا پرامریکہ آنے والے مسافروں کوزیادہ برقی آلات لےجانے کی اجازت نہیں دی جائےگی۔ امریکی حکام کے مطابق مشرقِ وسطیٰ اور افریقی ممالک سے امریکہ جانے والے مسافروں کے لیب ٹاپ اور ٹیبلٹس کوچیک کیاجائےگاتاہم ابھی یہ واضح نہیں کیا گیا کہ کون سی ایئرلائنز ان پابندیوں کی زد میں آئیں گی اور کب تک یہ پابندی لگی رہے گی