Reporter SS
ایمزٹی وی(پشاور/تعلیم) وفاقی و پنجاب حکومت کی دیکھا دیکھی پشاور کے ضلع ناظم نے بھی لیپ ٹاپ اسکیم شروع کرنے کا اعلان کر دیا ۔
ذرائع کے مطابق لیپ ٹاپ اسکیم کے حوالے سے وفاقی و پنجاب حکومت پر سخت تنقید کرنے والے عمران خان کی پارٹی کے زیر حکمرانی صوبہ خیبر پختونخوا کے صدر مقام پشاور میں ضلع ناظم محمد عاصم نے بھی امتحانات میں اچھا رزلٹ لینے والے طلبا کیلئے لیپ ٹاپ سکیم شروع کرنے کا اعلان کر دیا ہے جسے سن کر سب خوشکوار حیرت میں مبتلا ہیں ۔
ذرائع کا کہنا ہے کہ پشاور میں لیپ ٹاپ اسکیم کے تحت طلبا کو ایک لاکھ روپے فی کس بھی دیے جائیں گے جبکہ حکومت کی جانب سے لیپ ٹاپ بھی پیش کیے جائیں گے ۔
یاد رہے اس سے قبل پاکستان تحریک انصاف کے چیئرمین عمران خان اور دیگر رہنما لیپ ٹاپ اسکیم کے حوالے سے وفاقی اور پنجاب حکومت کو شدید تنقید کا نشانہ بناتے رہے ہیں جن کا خیال ہے کہ حکومت کو چاہئے کہ طلبا کو لیپ ٹاپ دینے کی بجائے تعلیمی اصلاحات کرے۔
ایمزٹی وی(صحت)گردہ ٹرانسپلانٹ اسکینڈل میں تہلکہ خیز انکشافات سامنے آنے لگے، پہلا غیر قانی گردہ ٹرانسپلانٹ آپریشن شریف میڈیکل کمپلیکس میں کیا گیا۔ نوازشریف کے پرسنل سیکرٹری کے بھائی کو گردہ لگایا گیا۔
نجی ٹی وی کے مطابق گردہ ٹرانسپلانٹ اسکینڈل میں گرفتار ہونے والی نرس صفیہ نے انکشاف کیا ہے کہ پہلا آپریشن شریف میڈیکل کمپلیکس میں کیا گیا ۔
نواز شریف کے سیکرٹری کے بھائی جاوید کو گردہ لگایا گیا۔ آپریشن ڈاکٹر ذکی نے کیا۔ صفیہ بی بی نے بتایا کہ بشیر نامی شخص شکار تلاش کر کے لاتا جن میں زیادہ تر بھٹہ مزدور ہوتے تھے، گردہ کے عوض 2 لاکھ روپے ادا کئے جاتے جبکہ ڈاکٹر خود ایک آپریشن کے 13 لاکھ روپے وصول کرتا تھا.
ایمزٹی وی(پشاور)خیبر پختونخوا کے ٹیچنگ ہسپتال کے نرسنگ ہاسٹل میں خاتون فزیوتھراپسٹ ٹیکنیشن نے مبینہ طور پر خودکشی کرلی۔
تفصیلات کے مطابق کے پی کے ٹیچنگ ہسپتال کے نرسنگ ہاسٹل میں خاتون ٹیکنیشن کی لاش ملی ہے اور پولیس کے مطابق لاش پنکھے سے لٹکی ملی جو کہ خودکشی کا معاملہ لگتا ہے۔خاتون کا تعلق ایبٹ آباد سے ہے اور لاش کو تحویل میں لیکر پوسٹمارٹم کیلئے بھجوادیا گیا ہے جبکہ پوسٹمارٹم کی رپورٹ آنے کے بعد مزید تحقیقات کا آغاز کردیا جائے گا۔
ایمزٹی وی(اسپورٹس)اسٹار فٹبالر میسی سے مشابہت رکھنے والے ایرانی شہری کو پولیس نے گرفتار کر کے گاڑی بھی ضبط کر لی۔
میڈیا ذرائع کے مطابق ایرانی پولیس نے سٹار فٹبالر میسی کے ہم شکل رضا پرستش نامی نوجوان کو اس پاداش میں گرفتار کر کے تھانے بند کر دیا کیونکہ اس کے ساتھ تصویریں بنوانے والوں کا رش لگ گیا ۔
پولیس حکام کا کہنا ہے کہ لوگوں کو منتشر کرنے کیلئے ہمیں رضا پرستش کو تھانے لیجانا پڑا جبکہ اس کی گاڑی بھی ضبط کی گئی ہے۔
رضا پرستش کا معاملہ چند ماہ قبل اس وقت شروع ہوا جب انکے والد نے اس کی تصویر بارسلونا کی 10 نمبر والی قمیص میں کھینچی۔اس کے بعد سے 25 سالہ رضا نے میسی کی طرح داڑھی رکھ لی اور بال بھی انہی کی مانند کٹوانے شروع کر دیے۔بس پھر کیا تھا، اس کے بعد رضا جہاں جاتے، ان کے ساتھ سیلفی کھنچوانے کے خواہش مندوں کا تانتا بندھ جاتا۔
انہوں نے خبررساں ادارے اے ایف پی کو بتایاکہ اب لوگ مجھے ایرانی میسی سمجھتے ہیں اور چاہتے ہیں کہ میں ان کی نقل کرتا رہوں۔ جب میں کہیں جاتا ہوں تو لوگ مجھے دیکھ کر دنگ رہ جاتے ہیں۔ مجھے خوشی ہے کہ میری وجہ سے لوگوں کو خوشی ملتی ہے اور یہ خوشی مجھے بہت زیادہ توانائی بخشتی ہے۔
رضا پرستش نے مزید کہا کہ اب فٹبال کے کچھ کرتب بھی سیکھ رہاہوں تاکہ میسی کا کردار زیادہ بہتر طریقے سے نبھا سکوں۔
ایمزٹی وی(چمن)سیکورٹی حکام کا کہنا ہے کہ بیمار افغان شہریوں کو انسانی بنیادوں پر افغانستان جانے کی اجازت دےدی گئی ہے، وہ افغان شہری جو سخت بیمار ہیں دستاویزات دکھا کر اپنے ملک جاسکتے ہیں۔
ایف آئی اے امیگریشن کے مطابق مقامی اسپتال میں انتقال کرجانے والے افغان شہری کی میت افغانستان بھیج دی گئی ہے، فوت ہونے والا افغان شہری علاج کی غرض سے پاسپورٹ پر کوئٹہ گیا تھا۔
ایف آئی اے کا کہنا ہے کہ 14 بیمار افغان شہریوں کو بھی پاسپورٹ دکھانے پر افغانستان جانے دیاگیا ہے، جن افغانوں کوبھیجاگیا وہ علاج کی غرض سے ویزا پاسپورٹ پر پاکستان آئے تھے۔
ایمزٹی وی(لاہور)باتوں کا شیر بھارتی فوجی پاکستان رینجر کے سامنے ڈھیر ہوگیا، واہگہ بارڈر پر پریڈ کے دوران بھارتی فوجی گر پڑا۔
گزشتہ روز واہگہ بارڈر پر پرچم اُتارنے کی تقریب کے دوران بھارتی فوجی گر پڑا۔ یہ واقعہ اس وقت پیش آیا جب پاک بھارت سرحد پر قائم واہگہ گیٹ پر روزانہ کی بنیاد پر پرچم اُتارنے کی تقریب جاری تھی۔ پریڈ کی تقریب کے دوران بھارتی سورما پاکستان رینجرز کے جوانوں کی گرج اور دھمک کو برداشت نہ کر سکا اور گر گیا۔
بھارتی فوجی اہلکار کے گرنے کے باعث تقریب میں موجود بھارتی عوام اور بھارتی فوجی اہلکاروں کو شدید شرمندگی کا سامنا کرنا پڑا جبکہ دوسری جانب پاکستانی سرحد پر فضا "پاکستان زندہ باد" کے نعروں سے گونج اٹھی۔ جبکہ پریڈ دیکھنے کیلئے آئے شہریوں نے بھارتی فوجی کے گرنے کے مناظر کیمرے میں محفوظ کرلئے۔ ویڈیو دیکھئے
ایمزٹی و(تعلیم/چمن)پاک افغان اعلیٰ حکام کے رابطوں کے بعد چمن کے سرحدی علاقے میں کشیدگی میں کمی آگئی ہے، تعلیمی ادارے کھل گئے ہیں تاہم باب دوستی پانچویں روزبھی بندہے۔
افغان جارحیت کے بعد چمن کے سرحدی علاقے میں پاک فوج اور ایف سی کے تازہ دم دستے ہر قسم کی صورتحال کنٹرول کرنے کیلئے موجود ہیں۔
پانچویں دن بھی باب دوستی پرتمام سرگرمیاں معطل اور ویزا سیکشن بند ہے جبکہ تجارتی سرگرمیاں اورپیدل آمدروفت بھی معطل ہے۔
ادھرمحکمہ تعلیم کے مطابق کشیدگی کےباعث بند کئے گئے تمام تعلیمی ادارے آج سے دوبارہ کھل گئے، تاہم طلبہ و طالبات کی حاضری کم رہی۔
دس سرحدی دیہات ایسے ہیں جہاں تعلیمی ادارے بدستور بند ہیں، متاثرہ دیہات کے مکین خیمہ بستی اور محفوظ مقامات پر منتقل ہو چکے ہیں۔
دوسری طرف شہری علاقوں میں مردم شماری تین دن بعد دوبارہ شروع ہوگئی ہے، نقل مکانی کرنے والےافراد کے دیہات میں مردم شماری بدستورمعطل ہے۔
ایمزٹی وی(اسلام آباد)وفاقی وزیر مملکت برائے اطلاعات و نشریات مریم اورنگزیب کا کہنا ہے کہ عمران خان منتخب وزیراعظم پر الزام لگانے روز عدالت آتے تھے لیکن آج غائب ہیں، عمران خان صاحب آپ کو اپنے اوپر اٹھنےوالے تمام سوالات کے جواب دینے ہونگے۔
مریم اورنگزیب نے سپریم کورٹ کے باہر میڈیا سے گفتگو میں تحریک انصاف پر کڑی تنقید کرتے ہوئے کہا کہ بدتمیزی اور اوئے کی سیاست کرنےوالے کو آج خود اس کا سامنا ہے ۔
ان کا مزید کہنا تھا کہ آج سپریم کورٹ میں بڑے کیس کی سماعت ہوئی، عمران خان کو اب سپریم کورٹ میں جواب دینا ہو گا ۔
مریم اورنگزیب نے عمران خان کو مخاطب کرتے ہوئے کہا کہ آپ نے وقت کو جھوٹ بولنے میں ضائع کیا ،آپ کے اوپر جتنے سوالات اٹھ رہے ہیں ان سب کے جوابات دینے ہونگے ۔اپنے جھوٹ کو لوگوں تک پہنچانے کےلیے روز چھوٹی چھوٹی جلسیاں کرتے ہیں ، آپ روز تیسری بار منتخب وزیراعظم پر الزام لگانے سپریم کورٹ پہنچ جاتے تھے لیکن اب کہاں غائب ہیں ۔
انہوں نے کہا کہ جس طرح عمران خان دوسروں پر الزام لگانے روز سپریم کورٹ آتے تھے ،آج بھی سپریم کورٹ آئیں ،قوم ان کی منتظر ہے۔
ایمزٹی وی(انٹرٹینمنٹ)مارول سپر ہیروز میں سب سے زیادہ مشہور خاتون کردار ونڈر وومن کے گِرد گھومتی ایکشن ایڈونچر سے بھرپور نئی ہالی ووڈ فینٹسی ایڈونچر فلم’’ 'ونڈر وومن ‘‘کانیا ٹریلر جاری کر دیا گیا ہے۔
پیٹی جینکنز کی ہدایتکاری میں بننے والی اس فلم میں مرکزی کردار اداکارہ گیل گیڈٹ نبھا رہی ہیں جن کے علاوہ فلم کی دیگر کاسٹ میں کرس پائن، الینا انایا، رابن رائٹ،کونی نیلسن، لوسی ڈیوس، ایوان بریمنر،ڈینی ہوسٹن، سمانتھاجو، ٹیلی پاؤل ، لیزا لووین اور فلورینس سونبا شامل ہیں۔
چارلس روون ، زیک سینڈر اورڈیبورا سینڈر کی مشترکہ پروڈیوس کردہ اس فلم کی کہانی ڈیانا نامی ایک ایسی جنگجو خاتون کے گرد گھومتی ہے جو دور دراز ایک جزیرے پر پرورش پاتی ہے تاہم ایک دن اچانک ایک پائلٹ جہاز کریش ہوجانے پر جزیرے پر پہنچ جاتا ہے ۔
یہ پائلٹ دوسری جنگِ عظیم کے دوران اپنے فرائض سر انجام دیتے ہوئے حادثے کا شکار ہوکر جزیرے پر پہنچتا ہے تو ڈیانا کر دیکھ کر حیران رہ جاتا ہے جسے لے کرپائلٹ اپنی دنیا میں پہنچتا ہے تو غیر معمولی صلاحیتوں کی حامل یہ خاتون ونڈر وومن بن کرجنگ کو روکنے کی کوشش کرتی ہے ۔
150ملین ڈالر لاگت سے بننے والی فلم وارنر بروس پکچرز کے تحت رواں سال 2 جون کو سنیما گھروں میں تہلکہ مچانے آرہی ہے۔
ایمزٹی وی(کراچی)پی ایس پی کے سربراہ مصطفی کمال نے کہاہے کہ کراچی شہر میں مہاجرکے نام پر سیاست کرنامہاجروں کیساتھ دشمنی ہے جبکہ ہماری کسی سے لڑائی نہیں ہے اور نہ ہم کسی سے لڑنا چاہتے ہیں۔
تفصیلات کے مطابق مصطفی کمال کا کہنا تھا کہ میئر کراچی 6فیصد کمیشن لے رہے ہیں اور اچھا ہوگا کہ وہ ملین مارچ میں نہ آئیں جبکہ ہم ایم کیو ایم کو بھی دعوت دیں گے لیکن ان کےساتھ اتحاد نہیں کریں گے ،ہم کسی پاکستانی سے لڑنانہیں چاہتے ، میرے نظریات پراختلافات ہوسکتے ہیں لیکن دشمنی نہیں ہوسکتی، جو بھی ہمیں بلائے گا ہم اس کے پاس ضرور جائیں گے۔
انہوں نے کہا کہ کراچی شہر میں مہاجر نام پر سیاست کرنا مہاجروں کے ساتھ دشمنی ہے جبکہ ہم نے اپنی دو نسلیں اس شہر کیلئے تباہ کر دیں ہیں۔اللہ تعالیٰ نے پھر سے ہمیں اس شہر کی خد مت کرنے کا موقع دیا ہے لیکن ہم لوگوں کو اپنے ساتھ کام کرنے پر مجبور نہیں کریں گے ۔