ایمز ٹی وی(انٹرٹینمنٹ) خیبر پختونخوا کے دارالحکومت پر بنائی جانے والی پہلی انٹرنیشنل فلم 'پروجیکٹ پشاور' جلد ریلیز کردی جائے گی۔

طویل عرصے سے دہشت گردی کی لپیٹ میں رہنے والے پشاور کی صورتحال سیکیورٹی کے اعلیٰ انتظامات کے باعث بہتر ہورہی ہے جبکہ فلم ساز اس فلم کو پشاور کے لیے ایک نئی امید مانتے ہیں۔

یہ فلم امریکا، برطانیہ، کینیڈا اور ہالینڈ میں ریلیز کی جائے گی۔

فلم کے ہدایت کار یرشو بنگش کا اس حوالے سے کہنا تھا کہ 'اس فلم کی کہانی برطانیہ سے تعلق رکھنے والے ایک نوجوان پر مبنی ہے جو پشاور کی ایک لڑکی سے انٹرنیٹ پر محبت کرنے لگتا ہے، تاہم پشاور پہنچ کر اسے اندازہ ہوتا ہے کہ یہ اسے اغوا کرنے کا جھانسا تھا'۔

فلم کی شوٹنگ پشاور، برطانیہ اور کینیڈا میں کی گئی، جسے انگریزی، اردو، پشتو اور ڈچ زبان میں ریلیز کیا جائے گا۔

پشاور جسے ایک وقت میں پختون سینما کی بنیاد مانا جاتا تھا طویل عرصے سے عسکریت پسندوں کے خلاف جاری جنگ کا نقصان اٹھا رہا ہے۔

2014 میں پشاور کے آرمی اسکول پر طالبان کی جانب سے کیا گیا حملہ مہلک ترین حملہ تھا جس کے نتیجے میں 150 سے زائد لوگ شہید ہوئے تھے جن میں اسکول کے بچے بھی شامل ہیں۔

جس کے بعد اس شہر میں آرمی کی جانب سے سخت آپریشن کا آغاز ہوا۔

تاہم پشاور میں سیکیورٹی کے بہتر صورتحال کے باعث اب ایک مرتبہ پھر اس کا سینما آباد ہورہاہے۔

ہدایت کار کے مطابق اس فلم کا ریڈ کارپٹ پشاور میں فلم کی ریلیز سے قبل منعقد کیا جائے گا، جس میں تقریباً دو ماہ درکار ہیں۔

ایمز ٹی وی(مانیٹرنگ ڈیسک) سام سنگ کی جانب سے نئے فلیگ شپ فونز گلیکسی ایس ایٹ اور ایس ایٹ پلس کو متعارف کرائے ایک ہفتہ ہی ہوا مگر جنوبی کورین نے اس کے زیادہ بہتر ورژن بھی پیش کردیئے ہیں۔

جی ہاں سام سنگ نے گلیکسی ایس ایٹ پلس کا سکس جی بی ریم اور 128 جی بی اسٹوریج والا فون پیش کیا ہے۔

مگر یہ صرف جنوبی کوریا اور چین (فی الحال ابھی) میں دستیاب ہوگا اور اس کی قیمت ایک ہزار ڈالرز (ایک لاکھ پاکستانی روپے سے زائد) سے زائد ہوگی۔

اگرچہ سام سنگ نے کوئی باضابطہ اعلان تو نہیں کیا مگر کمپنی کی کورین ویب سائٹ پر اپ گریڈ ماڈل کا ذکر کیا گیا ہے۔

رپورٹ کے مطابق اس فون کی قیمت 1020 ڈالرز ہوگی جس کے ساتھ ڈیکس ڈوک مفت دیا جائے گا جس سے صارفین اس ڈیوائس کو ڈیسک ٹاپ کمپیوٹر کے طور پر بھی استعمال کرسکیں گے۔

واضح رہے کہ گلیکسی ایس ایٹ 750 ڈالرز (78 ہزار پاکستانی روپے سے زائد) جبکہ گلیکسی ایس ایٹ پلس کا اسٹینڈرڈ ماڈل 850 ڈالرز (89 ہزار روپے سے زائد) میں فروخت کے لیے پیش کیے جائیں گے تاہم پاکستان میں قیمت کا تعین یہاں آنے کے بعد ہی ہوگا۔

یہ پہلی دفعہ نہیں کہ کسی کمپنی نے اسمارٹ فون کو ڈیسک ٹاپ کمپیوٹر میں تبدیل کرنے کا تجربہ کیا ہے۔

اس سے قبل موٹرولا، ایچ پی اور مائیکرو سافٹ ایسا کرچکے ہیں تاہم ان کے فونز صارفین کی توجہ حاصل کرنے میں ناکام رہے مگر سام سنگ کی مقبولیت کو دیکھتے اس بار کامیابی کا پورا امکان ہے۔

تو کیا آپ ایک لاکھ روپے سے زائد قیمت کا یہ فون لینا پسند کریں گے؟ اگر ہاں تو اس کے لیے ابھی پاکستان میں انتظار کرنا پڑے گا (وہ بھی پتا نہیں آئے گا یا نہیں) تاہم چین اور جنوبی کوریا جاکر اسے خریدا جاسکے گا۔