Reporter SS

ملک کا اگلاوزیراعظم کون ہوگا؟؟ تحریک انصاف کی تلاش جاری

ایمزٹی وی(کراچی) پی ٹی آئی کے چیئرمین عمران خان نے وزیراعظم پاکستان کیلیے تحریک انصاف کے امیدواروں کے ناموں پر غور شروع کردیا ہے۔

ذرائع کا کہنا ہے کہ پاناما لیکس کیس کے متوقع فیصلے کے بعد اگر وزیراعظم نواز شریف کو نااہل قرار دیا جاتا ہے تو پی ٹی آئی وزیراعظم پاکستان کیلیے حکمران مسلم لیگ کے مدمقابل اپنا امیدوار بھی لائے گی تاہم تحریک انصاف کی مرکزی قیادت اس بات پر غورکر رہی ہے کہ اس عہدے کیلیے پارٹی چیئرمین عمران خان، مرکزی رہنما اسد عمر یا شاہ محمود قریشی کا نام دیے جانے کا امکان ہے۔

واضح رہے کہ تحریک انصاف کی مکمل توجہ آئندہ کے عام انتخابات پر مرکوز ہے تاہم پاناما لیکس کا فیصلہ آنے کے بعد پی ٹی آئی اپنی آئندہ کی حکمت عملی مرتب کرے گی۔

پاناما کیس کے فیصلہ کا ڈرافٹ تیار

ایمزٹی وی(اسلام آباد)پانامہ لیکس سے متعلق فیصلے کا ڈرافٹ تیار کرلیا گیا اور آئندہ ہفتے سنائے جانے کا قوی امکان ہے،ذرائع کے مطابق پانامہ لیکس سے متعلق فریقین کی جانب سے جمع کرائی گئی دستاویزات اور وکلاء کے دلائل کا جائزہ لینے کے بعد عدالت عظمیٰ نے پانامہ لیکس کا فیصلہ تحریر کر لیا ہے جو آئندہ جمعے سے قبل کسی بھی وقت سنایا جا سکتا ہے۔

واضح رہے کہ سپریم کورٹ کی جانب سے 27مارچ سے شروع ہونے والے عدالتی ہفتے کے لیے کاز لسٹ جاری کردی گئی ہے لیکن اس میں فیصلے سے متعلق تاریخ نہیں دی ہے لیکن قوی امکان ہے کہ فیصلے سے ایک روز قبل سپلیمنٹری کاز لسٹ جاری کی جائے۔

یا درہے کہ جسٹس آصف سعید کھوسہ کی سربراہی میں جسٹس اعجاز افضل،جسٹس گلزار احمد، جسٹس شیخ عظمت سعید اور جسٹس شیخ عظمت سعید اور جسٹس اعجاز الاحسن پر مشتمل پانچ رکنی لارجر بنچ نے پچیس سماعتوں کے بعد کیس کا فیصلہ محفوظ کر لیا تھا اور کہا تھا کہ کیس کا فیصلہ مناسب وقت پر سنایا جائے گا۔

ملک کو فسادیوں سے پاک کرنے کے لیے کوشاں ہیں

ایمزٹی وی(راولپنڈی)آرمی چیف جنرل قمر جاوید باجوہ نے پاک افغان سرحد کا دورہ کیا ہے جہاں انہیں پاکستانی پوسٹوں پر دہشتگردحملوں کی تفصیلات سے آگاہ کیا گیا۔ آرمی چیف کا کہنا تھا کہ سیکیورٹی فورسز ملک کو فسادیوں سے پاک کرنے کے لیے کوشاں ہیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے مہمند، اورکزئی ایجنسی میں پاک افغان سرحد کا دورہ کیا۔ آرمی چیف کو سرحدی سیکیورٹی انتظامات پر بریفنگ دی گئی جبکہ انہیں پاکستانی پوسٹوں پرحالیہ دہشت گردحملوں کی تفصیلات سے بھی آگاہ کیا گیا۔ آرمی چیف نے سوران اورکلایا میں فوجی دستوں سے بھی ملاقات کی اور حملوں کا بروقت اورموثر جواب دینے پر جوانوں کے حوصلے اور عزم کو سراہا۔

آرمی چیف نے طالبان کمانڈردران سمیت 5 دہشتگردوں کی ہلاکت پرجوانوں کی تعریف کی اور کہا کہ فسادیوں سے ملک کو پاک کرنے کے لیے سیکیورٹی فورسز کوشاں ہیں، قبائلیوں ،پرامن پاکستانی قوم کے تحفظ کیلئے ہرممکن اقدامات کیے جائیں گے۔

آرمی چیف کاکہنا تھا کہ سرحدی نگرانی کیلئے فضائی نگرانی کے ساتھ جدیدآلات بھی نصب کیے جارہے ہیں۔دہشتگردی کے خلاف پاکستان اورافغانستان نے بہت قربانیاں دی ہیں، افغان حکام کے ساتھ مل کر سرحدی انتظامات بہتر بنانے کے لیے کوشاں ہیں کیونکہ موثر سرحدی نظام دونوں برادر اسلامی ملکوں کے مفاد میں ہے ۔

مردم شماری کی ٹیم پر حملے کا بڑا منصوبہ ناکام

ایمز ٹی وی(کراچی) شہر قائد میں سی ٹی ڈی نے کارروائی کرتے ہوئے مردم شماری کی ٹیم پر حملے کا منصوبہ ناکا م بناتے ہوئے ملزم کوگرفتار کر لیا۔

تفصیلات کے مطابق کاونٹرٹیررازم ڈیپارٹمنٹ(سی ٹی ڈی ) نے کراچی کے علاقے پرانی سبزی منڈی میں چھاپہ مارکارروائی کے دوران صوبہ خیبر پختونخوا سے فرار ہونیوالے کالعدم تنظیم کے گروہ کے کارندے کو دھر لیا۔

ابتدائی تحقیقات کے مطابق ملزم کراچی میں مردم شماری کی ٹیموں کو نشانہ بنانے کیلئے آیا ہوا تھا جبکہ پولیس حکام کو کے پی پولیس سے رابطہ کرنے پر پتہ چلا کہ ملزم اشتہاری ہے اور کے پی میں سرچ آپریشن کے بعد سے روپوش تھا اور ملزم کا جس گروہ سے تعلق ہے وہ گروہ صوبائی وزیر باقرحسین اور ایف سی کیمپ بونیر پر بھی حملے میں ملوث ہے ۔تاہم پولیس نے زیر حراست ملزم کیخلاف مقدمہ درج کرکے اسے نامعلوم مقام پر منتقل کردیا۔

ماحول دوست ایندھن کے حصول کا کامیاب منصوبہ

ایمز ٹی وی(مانیٹرنگ ڈیسک) جرمنی میں سائنسدانوں نے ایک تجرباتی روشنی کے منصوبے کو فعال کردیا ہے جسے ’مصنوعی سورج‘ کا نام دیا جارہا ہے۔ اس تیز مصنوعی روشنی کو ایسے ایندھن کی تیاری میں استعمال کیا جائے گا جو ماحول دوست ہو۔

سین لائٹ نامی اس منصوبے میں 149 فلم پراجیکٹر اسپاٹ لائٹس کو استعمال کیا گیا جس سے زمین پر آنے والی سورج کی روشنی سے 10 ہزار گنا تیز روشنی پیدا ہوئی۔

جب ان تمام آلات کو بیک وقت روشن کیا گیا تو اس سے پیدا ہونے والا درجہ حرارت 3500 سینٹی گریڈ تھا۔ سائنسدانوں کے مطابق یہ درجہ حرارت اتنا زیادہ ہے کہ اس وقت اگر کوئی جاندار وہاں موجود ہوگا تو وہ جل جائے گا۔

تجربے کا مقصد

ماہرین کا ماننا ہے کہ ہائیڈروجن گیس کو ایندھن پیدا کرنے کے لیے استعمال کیا جا سکتا ہے اور اس سے کسی قسم کا کاربن اخراج نہیں ہوتا گویا یہ زمین پر گلوبل وارمنگ کا سبب نہیں بنے گی۔

تاہم کائنات میں ہائیڈروجن ایک عام عنصر ہونے کے باوجود زمین پر اس کی مقدار بہت کم ہے۔

چناچہ ہائیڈروجن حاصل کرنے کے لیے پانی کے دونوں عناصر کو توڑا جائے گا یعنی آکسیجن، اور ہائیڈروجن۔

یہ تجربہ اسی مقصد کے لیے کیا جارہا ہے جس میں پانی کو خشک کر کے اسے بخارات میں تبدیل کیا جائے گا اور اس سے ہائیڈروجن حاصل کی جائے گی۔

ماہرین کا کہنا ہے کہ اگر یہ تجربہ کامیاب ہوجاتا ہے تو وہ مستقبل میں سورج کی روشنی سے اسی طریقے سے ماحول دوست ایندھن کے حصول میں کامیاب ہوجائیں گے۔

دالوں کی درآمدات میں50فیصداضافہ

ایمز ٹی وی (تجارت)رواں مالی سال2016-17ء کے پہلے8 ماہ کے دوران دالوں کی درآمدات میں50فیصد کا اضافہ ہوا ہے اور اس دوران گذشتہ مالی سال کے اسی عرصہ کے مقابلہ میں199.305 ملین ڈالر کی زائد درآمدات کی گئی ہیں۔ ادارہ برائے شماریات پاکستان(پی بی ایس) کے اعدادوشمارکے مطابق جاری مالی سال میں جولائی تا فروری کے دوران دالوں کی ملکی درآمدات کا حجم 599.285 ملین ڈالر تک بڑھ گیا جبکہ گذشتہ مالی سال کے اسی عرصہ کے دوران399.980 ملین ڈالر کی درآمدات کی گئی تھیں۔

پی بی ایس کی رپورٹ کے مطابق بالحاظ وزن دالوں کی درآمد میں23 فیصد کے اضافہ سے درآمدات میں ایک لاکھ43 ہزار769 میٹرک ٹن کا اضافہ ریکارڈ کیا گیا ہے۔گذشتہ مالی سال میں جولائی تا فروری2015-16ء کے دوران6 لاکھ37 ہزار357 میٹرک ٹن دالیں درآمد کی گئی تھیں جبکہ جاری مالی سال کے ابتدائی 8 ماہ کے دوران دالوں کی قومی درآمدات7 لاکھ81 ہزار126 میٹرک ٹن تک بڑھ گئیں۔

زرعی و اقتصادی ماہرین نے کہا ہے کہ تیزی سے بڑھتی ہوئی ملکی آبادی کی غذائی ضروریات کی تکمیل کیلئے دالوں کی طلب میں اضافہ جبکہ نامساعد موسمی حالات کے باعث بارانی علاقوں میں دالوں کی پیداوارمیں کمی کے باعث درآمدات میں اضافہ ہوا ہے۔

انہوں نے کہا کہ درآمدات میں کمی اور قیمتی زرمبادلہ کی بچت کیلئے دالوں کے زیرکاشت رقبہ میں اضافہ اور پیداوار کے فروغ کیلئے جدید زرعی ٹیکنالوجی اور زائد پیداوار کے حامل بیجوں اور متناسب کھادوں کے استعمال کے رجحان میں اضافہ کیلئے کاشتکار طبقہ کی رہنمائی کیلئے جامع حکمت عملی کے تحت اقدامات کی ضرورت ہے۔

خوبانی کی گری موت کی بڑی وجہ ثابت

ایمز ٹی وی(صحت) خوبانی ایک صحت بخش اور مفید پھل ہے جو تقریبا سبھی لوگوں کو پسند ہوتا ہے۔ خوبانی کی اہم بات اس کی گری ہے جو بادام جیسا مزا دیتی ہے ۔اسی لیے کم و بیش سبھی خوبانی کھانے والے اس کی گری بھی شوق سے کھاتے ہیں مگرایسا کرنے سے موت بھی واقع ہو سکتی ہے۔

خوبانی کی گری سے متعلق اب تک یہ سمجھا جاتا رہا ہے کہ اسے کھانا مفید ہے اور یہ کینسر سمیت کئی اقسام کی بیماریوں سے بچاؤ میں مددگارثابت ہوتی ہے۔ مگر حقیقت اس کے برعکس ہے، خوبانی کی گری صحت کیلئے سنگین خطرے کا باعث بن سکتی ہے حتیٰ کہ اسے کھانے سے فوری موت بھی واقع ہو سکتی ہے کیونکہ گری میں جان لیوا زہر’’سائنائیڈ‘‘ پایا جاتا ہے۔

ایک رپورٹ کے مطابق خوبانی کی گری میں ایک مادہ ’’امیگدالین‘‘پایا جاتا ہے، جو ’’گیلوکوسیڈسایانوجن ‘‘ کیمیکل کی ایک قسم ہے۔ خوبانی کی گری چبانے سے ہائیڈروجن سائنائیڈ گیس پیدا ہوتی ہے ۔ البتہ اگر گری کو پکا لیا جائے تو ایک مخصوص درجہ حرارت پر اس کے زہریلے اثرات ختم ہو جاتے ہیں۔

برطانوی فوڈ اسٹینڈرڈز ایجنسیی (ایف ایس اے ) کی جانب سے جاری کردہ وارننگ کے مطابق خوبانی کی گری کھانے سے پرہیز کیا جائے کیونکہ اس میں سائنائیڈ سمیت انتہائی زہریلے مادے پائے جاتے ہیں۔ وارننگ کے مطابق خوبانی کی 30 گریاں ایک ہی وقت میں کھا لینے سے انسان کی موت بھی واقع ہوسکتی ہے، جبکہ 10 سے 15گریاں کھانے والے افراد بھی ہاتھ پاﺅں سن ہوجانے اور دیگر شکایات کے بعد اسپتال پہنچ چکے ہیں۔

ٹماٹر 160 روپے اور مرغی کی قیمت 4سے5 سو روپے تک پہنچ گئی

ایمز ٹی وی (تجارت)پیداوار میں کمی کی خبروں پر مارکیٹ میں مرغی اور ٹماٹر کی قیمتیں بڑھ رہی ہیں، لیاقت آباد سپر مارکیٹ میں ٹماٹر 100 اور مرغی 380 روپے کلو فروخت ہوئی۔

مارکیٹ کے ایک سبزی فروش عمران کے مطابق مارکیٹ میں گرم موسم میں مرغیوں کے مرنے اور ٹماٹر کی پیداوار کم ہونے کی خبریں قیمت کو بڑھاوا دے رہی ہے۔ حکومت نے ننانوے روپے ریٹ دیا ہے، یہ بھی اضافی قیمت کا عندیہ ہے کیونکہ حکومتی ریٹ مارکیٹ ریٹ سے ہمیشہ کم ہوتا ہے۔

شہر کے بڑے علاقوں میں ٹماٹر 160 روپے تک فروخت ہوا ، جبکہ مرغی کی قیمت چار اور پانچ سو روپے کے درمیان بے قرار نظر آئی۔

واٹس ایپ کےایک اورنئے فیچر نےصارفین کو مشکل میں ڈال دیا

ایمز ٹی وی(مانیٹرنگ ڈیسک) واٹس ایپ میں اکثر نئی تبدیلیاں آتی رہتی ہیں اور اب اس میں ایک اور فیچر جلد سامنے آنے والا ہے۔

جی ہاں واٹس ایپ میں اب نیا فیچر متعارف کرائے جانے والا ہے جس میں اگر کوئی صارف اپنا فون نمبر تبدیل کرے گا تو اس کے کانٹیکٹس کو اس کی اطلاع دی جائے گی۔

یہ فیچر ان افراد کے لیے کارآمد ہے جو کسی وجہ سے فون نمبر بدلتے ہیں مگر اپنے واٹس ایپ فرینڈز کو برقرار رکھنا چاہتے ہیں مگر انہیں یہ یقین دلانا مشکل ہوسکتا ہے کہ یہ نیا نمبر آپ کا ہی ہے۔

اپنے کانٹیکٹس کو اپنے پاس رکھنا اور فون نمبر بدلنے سے انہیں آگاہ کرنا کافی آسانی کا باعث ہوگا۔

تاہم یہ فیچر کب تک متعارف کرایا جاتا ہے ابھی اس بارے میں کہنا مشکل ہے مگر رپورٹس کے مطابق اس فیچر کی مدد سے آپ اپنی مرضی سے ایسے کانٹیکٹس کا انتخاب کرسکیں گے جنھیں فون نمبر بدلنے پر نوٹیفکیشن ارسال کیا جائے گا۔

واضح رہے کہ حالیہ مہینوں میں واٹس ایپ میں کئی تبدیلیاں متعارف کرائی گئی تاکہ دنیا بھر میں اس ایپ کی مقبولیت کو برقرار رکھا جاسکے۔

اپنے نئے اسٹیٹس کے ساتھ انہوں نے ٹیکسٹ اسٹیٹس کو بھی دوبارہ متعارف کرایا۔

اسی طرح واٹس ایپ میں لینڈ اسکیپ موڈ کی آزمائش کی بھی اطلاعات ہیں جو کہ پہلی بار ہے کیونکہ اب تک اس میں پورٹریٹ موڈ کو استعمال کیا گیا ہے۔

شرح سود پانچ اعشاریہ سات پانچ فیصد پر برقرار

ایمز ٹی وی (تجارت)اسٹیٹ بینک نے نئی مانیٹری پالیسی کا اعلان کردیا، اگلے دو ماہ کے لیے شرح سود پانچ اعشاریہ سات پانچ فیصد پر برقرار رکھی گئی ہے۔

اسٹیٹ بینک کا کہنا ہے کہ مالی سال دوہزار سترہ میں معاشی شرح نمو مزید بہتر ہونے کی توقع ہے۔سی پیک، توانائی کی بہتر ترسیل، خام مال کی کم قیمت سے بڑی صنعتوں اور زراعت کی پیداوار بڑھ رہی ہے۔ شہریوں کی آمدنی میں اضافے کی وجہ سے اشیا کی طلب میں بھی اضافہ ہورہا ہے ۔

Page 1790 of 2389