ایمزٹی وی(تجارت) نیپرا نے بجلی کی قیمت میں 3 روپے 60 پیسے فی یونٹ کمی کی منظوری دے دی جب کہ کے الیکٹرک کے لئے بجلی کی قیمت میں 60 پیسے فی یونٹ اضافے پرفیصلہ محفوظ کرلیا ہے۔
ذرائع کے مطابق نیشنل الیکٹرک پاورریگولیٹری اتھارٹی نے سینٹرل پاور پرچیز اتھارٹی اور کے الیکٹرک کی جانب سے بجلی کی قیمتوں میں رد و بدل کی درخواستوں کی سماعت کی۔

سی سی پی اے کی جانب سے کی گئی درخواست میں کہا گیا کہ نومبر میں 6 ارب83 کروڑ یونٹ بجلی صارفین کو فروخت کی گئی، جس پر مجموعی فیول لاگت 25 ارب 33 کروڑ روپے رہی، تیل کی قیمتوں میں کمی کی وجہ 8 ارب 90 کروڑروپے جب کہ دیگر ذرائع سے بجلی کی پیداوار میں اضافے کی وجہ سے 15 ارب روپے کی بچت ہوئی ہے اور اوسط پیداواری لاگت 3 روپے70 پیسے فی یونٹ رہی ہے۔ اس لئے بجلی کی قیمت میں 3 روپے 60 پیسے کمی کی جائے۔ نیپرا نے بجلی کی قیمت میں کمی کی درخواست منظور کرلی۔

چیئرمین نیپرا طارق سدوزئی کا کہنا ہے کہ بجلی کی قیمت میں کمی سے عوام کو مجموعی طور پر 24 ارب روپے سے زائد کا ریلیف ملے گا تاہم اس کا اطلاق لائف لائن اور کے الیکٹرک صارفین پر نہیں ہوگا۔دوسری جانب نیپرا نے کے الیکٹرک کی جانب سے بجلی کی قیمت میں 60 پیسے فی یونٹ اضافے کی درخواست پر فیصلہ محفوظ کرلیا۔

ایمز ٹی وی(بزنس) رواں مالی سال کی پہلی سہ ماہی میں وزیراعظم یوتھ لون پروگرام کے تحت 41 کروڑ 60 لاکھ روپے کے قرضے جاری کئےگئے، پروگرام کےتحت جاری کئے گئے قرضوں کی مجموعی مالیت 8 ارب 92 کروڑ روپے ہوگئی۔اسٹیٹ بینک کے مطابق جولائی سے ستمبر کے دوران 1317 نئی درخواستیں جمع کرائی گئیں۔ سہ ماہی کے 454 درخواستوں کے لئے ایک ارب انیس کروڑ کے قرضوں کی منظوری دی گئی۔ اس دوران 41 کروڑ 60 لاکھ روپے مالیت کے قرض جاری کئے گئے۔

پروگرام کے تحت موصول ہونے والی درخواستوں کی مجموعی تعداد 72961 ہوگئی۔جن میں سے 18 ہزار 144 درخواستوں کے لئے 18 ارب 31 کروڑ روپے مالیت کے قرضوں کی منظوری دی گئی۔ جبکہ 8 ارب 92 کروڑ 60 لاکھ روپے کے قرض جاری کئے گئے۔

پروگرام کے تحت 71 فیصد پنجاب، آٹھ فیصد سندھ، گیارہ فیصد کے پی کے، بلوچستان اورآزاد کشمیر کو دو دو، جبکہ گلگت بلتستان اور اسلام آباد کو تین، تین فیصد قرض جاری کئے گئے
جولائی سے ستمبر کے دوران 1 ارب 9 1کروڑ روپے مالیت کے قرض منظور کئے گئے، ستمبر 2016 کے اختتام تک منظور کئے گئے قرضوں کا حجم 18 ارب 31 کروڑ روپے ہوگیا، ستمبر 2016 تک جاری کئے گئے قرضوں 8 ارب 92 کروڑ روپے رہا، جولائی سے ستمبر 2016 کے دوران 45 کروڑ 40 لاکھ کے قرض جاری کئے گئے۔

ایمز ٹی وی(بزنس) نیشنل بینک میں ڈیڑھ ارب روپے کے فراڈ کا انکشاف ہوا ہے، مبینہ فراڈ میں بینک کے ابینڈڈ پراپرٹی آرگنائزیشن کی وائس پریذیڈنٹ اور دیگر اہلکار ملوث ہیں،ایف آئی اے نے تحقیقات کا آغاز کر دیا ہے
نیشنل بینک کی ابینڈڈ پراپرٹی آرگنائزیشن نے ترک شدہ اکائوئنٹس اور جائیدادوں کے سرمایہ سے مختلف اداروں میں سرمایہ کاری کررکھی ہے، یہ سرمایہ مبینہ طور پر اے پی او کی خاتون اسسٹنٹ وائس پریزیڈنٹ دیگر اہلکاروں کی ملی بھگت سے نکلوا کر ذاتی اکاونٹ میں منتقل کر تی رہیں جس سے بینک کو ڈیڑھ ارب روپے کا نقصان ہوا ہے۔

خاتون افسر کے خلاف اینٹی منی لانڈرنگ ، اینٹی کرپشن ایکٹ ،اور پاکستان پینل کوڈ کے تحت ایف آئی آر درج کرکے تحقیقات کا آغاز کردیا گیاہے ۔ایف آئی اے نے فراڈ کیس میں بینک کے 2ڈپٹی ایڈمنسٹریٹرز کو بھی گرفتار کیا ہے،نیشنل بینک میں ابینڈنٹ پراپرٹیزآرگنائزیشن کا قیام1971میں کیا گیا۔ جس کا مقصد ترک شدہ بینک اکاونٹس اور جائیدادوں کی دیکھ بھال ہے۔

ایمزٹی وی(راولپنڈی)آرمی چیف جنرل قمر جاوید باجوہ نے آپریشن ضرب عضب میں افسروں کی قربانیوں اور قائدانہ کردار کو قابل فخر قرار دیتے ہوئے کہا ہے کہ پاک فوج قومی سلامتی کیلئے اپنا کردار ادا کرتی رہے گی۔

پاک فوج کے تعلقات عامہ کے ادارے (آئی ایس پی آر) سے جاری بیان کے مطابق آرمی چیف جنرل قمر جاوید باجوہ نے جی ایچ کیو میں راولپنڈی گیریژن کے افسران سے خطاب کرتے ہوئے سیکیورٹی چیلنجز اور پیشہ ورانہ امور پر اظہار خیال کیا اور کہا کہ آپریشن ضرب عضب میں افسروں کی قربانیاں اور قائدانہ کردار قابل فخر ہے۔

انہوں نے ادارے کی مضبوطی کے حوالے سے بھی افسران کے کردار کو سراہا اور کہا کہ موجودہ حالات میں مسلح افواج بھرپور کردار ادا کر رہی ہے اور قومی سلامتی کیلئے پاک فوج اپنا کردار ادا کرتی رہے گی۔

ایمز ٹی وی(صحت) انسانی جسم میں موجود ہر شے یوں تو ایک نعمت ہے لیکن قدرت کا سب قیمتی تحفہ آنکھیں ہیں کہ جن سے محروم شخص کے لیے اس دنیا کے سارے رنگ بیکار ہوتے ہیں لہذا قدرت کے اس انمول تحفے کی حفاظت بے حد ضروری ہے۔

آنکھوں پر دانے:
اگر آنکھوں کے کونوں پر یاقریب میں دانہ نکل آئے تواس میں درد اور خارش ہوتی ہے‘ پلکوں کے قریب ایسے دانے ایک گلینڈ بلاک ہونے کے باعث نمودار ہوتے ہیں اور چند دن بعد غائب ہوجاتے ہیں۔

بھنوؤں کا گرنا:
بھنوؤں کے بال گرنے کی کئی وجوہات ہوسکتی ہیں۔ عمر بڑھنا‘ ذہنی تناؤاور کسی غذائی جز کی کمی‘ مگر ایک ممکنہ وجہ تھائی رائیڈ ہارمونز کی جسم میں بہت زیادہ کمی ہے جو کہ سر کے بالوں سے محرومی کا باعث بھی بن سکتا ہے۔ اگر بھنوؤں کے ساتھ سر کے بال بھی گر رہے ہیں تو ڈاکٹر سے رجوع کیا جانا چاہئے۔

دھندلاہٹ:
آج کل بیشتر افراد گھنٹوں گھر یا دفتر میں کمپیوٹرز یا کسی بھی طرح کی اسکرین کے سامنے بیٹھے رہتے ہیں جس کے نتیجے میں آنکھیں جلنا یا دھندلانے لگتی ہیں، اب اسے ڈیجیٹل آئی اسٹرین کا نام بھی دیا گیا ہےجس کا حل نہ نکالنے پر بینائی تیزی سے کمزور ہونے لگتی ہے۔

زیادہ اور کم نظر آنا:
بینائی میں کسی بھی قسم کی تبدیلی خطرے کی گھنٹی ہوتی ہے جس کے لیے فوری ردعمل ظاہر کرنے کی ضرورت ہوتی ہے، خاص طور پر اگر بینائی اچانک غائب ہوجائے، ایک چیز دو یا زیادہ نظر آنے لگے، چیزیں کچھ لمحوں کے آنکھوں کے سامنے سے ہٹ جائے تو فوری طور پر طبی امداد حاصل کرنی چاہئے کیونکہ اکثر یہ فالج کی پہلی علامت ہوتی ہے۔

حلقے:
آنکھوں کے نیچے گہرے حلقے اکثر افراد کے پڑ جاتے ہیں جس کی وجہ عام طور پر نیند کی کمی ہوتی ہے۔ یعنی رات گئے تک جاگنا اور جلد اٹھ جانا آنکھوں کے گرد حلقوں کا باعث بن جاتا ہے، تاہم اگر یہ حلقے مناسب نیند لینے کے باوجود ختم نہ ہو تو طبی ماہرین کا کہنا ہے کہ یہ دیگر طبی مسائل کا اشارہ ہوسکتے ہیں۔ ماہرین کے مطابق یہ تھائی رائیڈ (بے نالی غدود) یا خون کی کمی جیسے امراض کی علامت بھی ہوسکتے ہیں۔

پیلاہٹ:
اگر آپ کی آنکھوں کا سفید حصہ زرد یا پیلاہٹ زدہ نظر آنے لگے تو یہ جان لیوا جگر کے امراض کی ممکنہ علام ہوسکتی ہے جسے کسی صورت نظرانداز نہیں کرنا چاہئے۔ طبی ماہرین کے مطابق آنکھوں کی یہ رنگ ہیپاٹائٹس‘ جگر کے صحیح سے کام نہ کرنے یا دیگر امراض کے باعث بھی ہوسکتی ہیں۔

سوج جانا:
گہرے حلقوں کی طرح آنکھوں کا سوج جانا بھی چہرے کی کشش کو ماند کردیتا ہے، اس کے لیے اکثر برف کی ٹکور، کھیرے کا ٹکڑا یا دیگر ٹوٹکوں کا استعمال کیا جاتا ہے مگر جب یہ کسی صورت ختم نہ ہو تو زیادہ سنگین طبی مسائل کی علامت بھی ہوسکتا ہے۔

سرخ لکیریں:
اگر آپ کی آنکھیں بہت سرخ یا ان میں سرخ لکیریں سے بن گئی ہو تو پہلی فرصت میں ڈاکٹر کے پاس پہنچ جائیں کیونکہ یہ سنگین امراض جیسے آشوب چشم‘ پپوٹوں کی سوزش‘ آنکھ کے پردے کے ورم اور کسی قسم کے موتیا کی جانب اشارہ بھی ہوسکتی ہے۔

ایمزٹی وی(اسلام آباد) قومی احتساب بیورو(نیب)كے چیرمین قمرزمان چوہدری نے كہا ہے كہ نیب ملك سے بدعنوانی كے خاتمے کے لیے پر عزم ہے اور پلی بارگین كا مقصد عوام كی لوٹی ہوئی رقم كی واپسی كے ساتھ ساتھ لٹیروں كی معافی نہیں۔

اسلام آباد میں میڈیا سے بات کرتے ہوئے چیرمین نیب قمر زمان چوہدری نے کہا کہ پلی بارگین ایك سزا ہے جس میں ملزم صرف جیل نہیں جاتا، سزا كے تمام لوازمات اس پر لاگو ہوتے ہیں، اگر كرپشن میں ملوث كوئی سركاری ملازم پلی بارگین كرتا ہے تو اسے سركاری ملازمت سے ڈسمس كردیا جاتا ہے اور وہ ساری عمر سركاری ملازمت نہیں كرسكتا اور اگر كوئی منتخب عوامی نمائندہ كرپشن كے الزام میں نیب سے پلی بارگین كرتا ہے تو وہ 10 سال کے لیے نااہل ہوجاتا ہے اور آئندہ كوئی الیكشن نہیں لڑ سكتا، كوئی كاروباری شخص پلی بارگین كرتا ہے تو وہ بینك سے كوئی لین دین نہیں كرسكتا۔

چیرمین نیب نے كہا كہ جہاں تك بلوچستان كے سابق سیكرٹری خزانہ مشتاق رئیسانی اور مشیر خزانہ خالد لانگو كے كیسز كا تعلق ہے تو رقم كی رضاكارانہ واپسی كی درخواست كو مسترد كردیا تھا تاہم اگلے مرحلے میں ان كی پلی بارگین كی درخواست منظور كی گئی، چیئرمین نیب كو قانون كے تحت پلی بارگین كی درخواست منظور كرنے كا اختیار ہے تاہم اس كا حتمی فیصلہ متعلقہ عدالت كرتی ہے، اس كیس میں مشیر خزانہ اور دوسرے ملزموں كے خلاف تحقیقات كے حتمی مرحلے میں ہیں ان كے خلاف احتساب عدالت میں مقدمہ چلے گا، ان كے اكاؤنٹس منجمند ہیں۔ انہوں نے كہا كہ مشتاق رئیسانی كے مكان سے65 كروڑ 32 لاكھ روپے نقد اور3 كلو سونا ملا تھا جب كہ كوئٹہ میں 6 كروڑ روپے مالیت كا مكان اور ڈی ایچ اے كراچی میں 7 كروڑ روپے مالیت كی جائیداد نیب نے قبضے میں لی ہے، خالد لانگو كے فرنٹ مین سہیل مجید شاہ سے نیب نے ایك ارب روپے كی ریكوری كی ہے۔

قمر زمان چوہدری کا کہنا تھا کہ میرے دور میں رضاكارانہ واپسی اور پلی بارگین كے ذریعے مجموعی طور پر بدعنوان عناصر سے لوٹے گئے 45 ارب37 كروڑ روپے وصول كیے گئے ہیں، نیب كی طرف سے سیكرٹری خزانہ اور مشیر خزانہ كے فرنٹ مین سے پلی بارگین كی 2 ارب روپے كی رقم اسٹیٹ بنك كے ذریعے واپس صوبائی خزانے كو لوٹا دی گئی ہے اور اب ملزموں كے خلاف مقدمے عدالتوں میں چلیں گے۔

ایمزٹی وی(روس)افغانستان کی سکیورٹی صورتحال پر سہ ملکی ورکنگ گروپ کا اجلاس آج ماسکو میں ہوگا،روس سمیت پاکستان اور چین کے نمائندے شرکت کر رہے ہیں، افغانستان کا کہنا ہے کہ ماسکو میں افغانستان کی سکیورٹی صورتحال پر ہونے والا سہ ملکی ورکنگ گروپ کا اجلاس حقیقی طور پر مددگار ثابت نہیں ہوگا۔

برطانوی خبر رساں ادارے کے مطابق افغانستان کی سکیورٹی صورتحال پر سہ ملکی ورکنگ گروپ کا اجلاس آج ماسکو میں ہوگا،روس سمیت پاکستان اور چین کے نمائندے شرکت کر رہے ہیں،افغانستان کی وزارت خارجہ کے ترجمان کا کہنا ہے کہ روس، پاکستان اور چین کے درمیان ہونے والی اس ملاقات کا حقیقی طور پر کوئی فائدہ نہیں ہوگا کیونکہ اس ملاقات میں شرکت کے لیے افغانستان کے نمائندے کو مدعو ہی نہیں کیا گیا ہے۔

افغان ترجمان کا کہنا تھا کہ افغانستان کو اس ملاقات میں شامل نہ کرنے وجہ تو واضح نہیں ہے لیکن اسے شامل نہ کرنا باعث تشویش ضرور ہے،اس سے قبل اسی سلسلے کی دو ملاقاتیں اسلام آباد اور بیجنگ میں بھی ہو چکی ہیں۔

واضح رہے کہ رواں ماہ ہی انڈیا کے شہر امرتسر میں ہونے والی ہارٹ آف ایشیا کانفرنس سے خطاب کرتے ہوئے افغانستان کے صدر اشرف غنی نے پاکستان پر ایک بار پھر شدت پسند تنظیموں کی پشت پناہی کرنے کا الزام لگاتے ہوئے کہا تھا کہ پاکستان نے افغانستان کے لیے پانچ سو ملین ڈالر دینے کا اعلان کیا ہے، بہتر ہوگا کہ وہ اس رقم کا استعمال پاکستان کے اندر انتہا پسندی پر قابو پانے پر صرف کرے،دوسری جانب سرتاج عزیز نے افغان صدر کے بیان کے جواب میں کہا تھا کہ پاکستان افغانستان میں دیر پا امن کے لیے ہر ممکن کوشش کرنے کے لیے تیار ہے تاہم افغان حکومت کو پاکستان کے خلاف بے بنیاد الزامات لگانے سے گریز کرنا چاہیے۔

ایمزٹی وی(سندھ) ڈیڑھ سال کی خود ساختہ جلا وطنی کے بعد وطن واپسی پر آصف علی زرداری نے کارکنوں سے خطاب میں جس خوشخبری کا اعلان کیا تھا اس کی تفصیلات سامنے آ گئی ہیں اور کہا جا رہا ہے کہ سابق صدر آج بلاول بھٹو کی پارلیمانی سیاست شروع کرنے کا اعلان کریں گے

ذرائع کے مطابق گزشتہ روز پاکستان پیپلز پارٹی کی سینٹرل ایگزیکٹو کمیٹی (سی اوسی) کا نوڈیرو ہاﺅس میں اجلاس ہوا جس میں اہم رہنماءشریک ہوئے۔

شہید بینظیر بھٹو کی 9ویں برسی

ذرائع کے مطابق اجلاس میں بلاول بھٹو زرداری کی پارلیمانی سیاست شروع کرنے پر اتفاق ہوا اور فیصلہ کیا گیا کہ وہ جلد ہی ضمنی انتخابات میں حصہ لے کر رکن قومی اسمبلی بنیں گے۔

ذرائع کا کہنا ہے کہ اس اعلان کے بعد جلد ہی ایک رکن قومی اسمبلی استعفیٰ دے گا اور بلاول بھٹو زرداری اس استعفے کے باعث خالی ہونے والی سیٹ پر ضمنی الیکشن کے ذریعے قومی اسمبلی پہنچیں گے۔

ایمزٹی وی(بزنس)پاکستان اور بلوچی بھائیوں کو ایک اور بڑی خوشخبر ی مل گئی ،بلوچستان سے تیل اور گیس کا بڑا ذخیرہ دریافت ہو گیا۔ بلوچستان میں تیل اور گیس کا بڑا ذخیرہ جندران کے علاقے مری ایجنسی میں دریافت ہوا ہے ۔بتا یا جا رہا ہے کہ گیس کا یہ ذخیرہ 1950میں ڈیرہ بگٹی کے علاقے سوئی میں دریافت ہونے والے ذخیرے سے کئی گنا بڑا ہے ۔

جندران میں دریافت ہونے والا ذخیرہ سوئی میں دریافت ہونے والے ذخیروں سوئی ون ،پیرکوہ اور لوٹی فیلڈ سے بھی بڑا ہے ۔پاکستان کے سب سے بڑے شہر کراچی اور وسطی پنجاب سمیت ملک بھر میں سوئی گیس انڈسٹریل ریولیوشن کا ذریعہ بنی ۔گیس کا چوتھا ذخیرہ قبائلی علاقے بگٹی میں اوچ کے مقام پر پہاڑی علاقوں میں ہے جس کی گیس بجلی بنانے کے لیے استعمال کی جا رہی ہے ۔اوچ پاور پلانٹ میں بننے والی بجلی واپڈا کو فروخت کی جاتی ہے اور کچھ بجلی صوبہ سندھ میں نیشنل گر ڈ کو بھی فروخت کی جاتی ہے ۔

ایمزٹی وی(سری نگر)مقبوضہ کشمیرمیں بھارتی ایجنٹوں نے مزیدایک کشمیری کوفائرنگ کرکے شہید کر دیا جبکہ ایک نوجوان کوزندہ جلانے کی کوشش کی گئی۔

گزشتہ روزضلع بارہ مولہ کے علاقے بہرام پورہ رفیع آباد میں اچانک بھارتی مسلح ایجنٹ نمودارہوئے اورایک نوجوان پراس کے گھر کے باہر اندھا دھند گولیاں چلا دیں، فائرنگ سے32سالہ نذیر احمد میر شہید ہوگیا جس کیخلاف علاقے میں مظاہرے ہوئے۔ مظاہرین نے بھارت کیخلاف اورآزادی کے حق میں نعرے لگائے۔

سمبل کے علاقے میں اس وقت سنسنی پھیل گئی جب بھارتی نقاب پوش ایجنٹوں نے رات گئے ایک مکان پر دھاوابول دیا، ایک نوجوان کو گھسیٹتے ہوئے گھر سے باہر نکالا اور اسے ایک دکان کے باہرکھمبے سے باندھ کر مار مار کر لہولہان کر دیا جس سے وہ بے ہوش ہوگیا، نوجوان کوزندہ جلانے کیلیے دکان میں آگ لگادی گئی اوربھارتی ایجنٹ وہاں سے فرار ہو گئے۔ اسپتال میں ڈاکٹروں نے اس کی حالت نازک قراردی ہے۔ جس دکان کوآگ لگائی گئی اس میں لاکھوں روپے کامال خاکسترہوگیا۔

کشمیریونیورسٹی میں طلبانے ٹھٹھرتی سردی اورجھیل ڈل کی سرد ہواؤں کی لپیٹ میںشام، فلسطین، حلب اوردیگریورپی اورافریقی ممالک میں مسلمانوں کے قتل عام کے خلاف خاموش احتجاجی دھرنا دیا۔ طلبا وطالبات نے اقوام متحدہ سمیت انسانی حقوق کیلیے کام کرنیوالے اداروں سے اپیل کی ہے کہ وہ افریقا، امریکا، اسرائیل، شام اور دیگر ممالک میں مسلمانوں کے قتل عام کو روکیں۔ بھارتی فورسز نے حریت کانفرنس کے6ماہ بعد ہونیوالے ایک اجلاس پر پابندی لگادی اورقائدین کو اجلاس میںشرکت کی اجازت دینے سے انکارکردیا۔ حریت کا اجلاس حیدرپورہ میں سیدعلی گیلانی کی صدارت میں منعقد ہونے والا تھا۔