ایمز ٹی وی(نئی دہلی) دنیا کو امن کا درس دینے والے بھارت نے اپنے نئے بین البراعظمی بیلسٹک میزائل ’’اگنی فائیو‘‘ کا تجربہ کرلیا ہے جسے ایٹمی اسلحے سے لیس کیا جاسکتا ہے اور یہ 5000 کلومیٹر سے بھی زیادہ فاصلے پر اپنے ہدف کو نشانہ بناسکتا ہے۔

زرائع کے مطابق اگنی فائیو کو آج تجرباتی طور پر اڑیسہ کے قریب ویلر آئی لینڈ سے داغا گیا جس نے بحر ہند میں کسی نامعلوم مقام پر اپنے ہدف کو نشانہ بنایا۔

یہ اس میزائل کا چوتھا اور آخری تجربہ تھا لیکن اب تک بھارتی حکام نے اس کے کامیاب یا ناکام ہونے کے بارے میں کچھ نہیں بتایا ہے کیونکہ اس کا تیسرا تجربہ آج سے دو سال پہلے تکنیکی مسائل کی وجہ سے ناکام ہوچکا تھا۔

اگنی فائیو ایک نیوکلیئر بین البراعظمی بیلسٹک میزائل ہے جو تین مرحلوں پر مشتمل ہے جبکہ اس کا وزن 50 ٹن اور لمبائی 17 میٹر ہے؛ اور اس کا اصل مقصد چین کو نشانہ بنانا ہے۔

واضح رہے کہ اگنی فائیو کو بطورِ خاص ایٹم بموں سے لیس کرنے کےلئے ہی تیار کیا جارہا ہے جبکہ دوسری طرف بھارت اپنے نام نہاد پرامن ایٹمی پروگرام کی بنیاد پر نیوکلیئر سپلائرز گروپ اور میزائل ٹیکنالوجی کنٹرول رجیم میں شامل ہونے کی کوشش کررہا ہے۔

5000 کلومیٹر یا اس سے زیادہ رینج والے بیلسٹک میزائل اب تک صرف امریکہ، روس، چین، فرانس اور برطانیہ کے پاس ہیں جبکہ بھارت اس فہرست میں شامل ہونے کےلئے ایڑی چوٹی کا زور لگا رہا ہے اور اگنی فائیو بیلسٹک میزائل کا تجربہ ان ہی کوششوں کا حصہ ہے۔

ایمزٹی وی(اسلام آباد)صدر مملکت ممنون حسین کی اپیل پر ملک میں بارش کے لئے ایوان صدر میں نماز استسقا ادا کی گئی۔
سرکاری نشریاتی ادارے کے مطابق ملک بھر میں بارشیں نہ ہونے کے باعث خشک سالی سے نجات کے لئے ایوان صدر میں نماز ظہر کے بعد نماز استسقا ادا کی گئی جس میں صدر ممنون حسین کے علاوہ دیگر اہم شخصیات اور ایوان صدر کے اسٹاف نے بھی شرکت کی۔

نماز استسقا میں ملک میں اپنے گناہوں سے توبہ طلب کرتے ہوئے ملک بھر میں رحمت کی بارش کے لئے دعا کی گئی۔ اسلام آباد کے علاوہ ملک کے دیگر شہروں میں نماز استسقا ادا کی گئی۔

گزشتہ روز صدر ممنون حسین نے رواں سال ملک میں بارش نہ ہونے کے باعث خشک سالی پر تشویش کا اظہار کرتے ہوئے عوام سے اپیل کی تھی کہ نمازاستسقا ادا کریں اوراللہ کے حضور بارش کے لئے دعا کریں۔ صدر ممنون حسین نے علما کرام سے بھی اپیل کی تھی کہ وہ ملک کے طول و عرض میں نماز استسقا کے اجتماعات کی امامت کریں اور ملک سے خشک سالی کے خاتمے اور ابر رحمت کے لئے اللہ کی بارگاہ میں دعائیں مانگیں۔

ایمز ٹی وی (صحت) عمر بڑھنے کے ساتھ ہمارا دماغ تنزلی کا شکار ہونے لگتا ہے، ہم چیزیں بھولنے لگتے ہیں اور معمے حل کرنا ماضی جیسا آسان کام نہیں رہتا۔ اگرچہ بڑھاپے کے عمل کو واپسی کا راستہ دکھانا تو ممکن نہیں مگر اپنے ذہن کو ضرور ہم ہر عمر کے مطابق فٹ رکھ سکتے ہیں۔

مگر کچھ عادتیں ایسی ہوتی ہیں جو دماغ کے لیے تباہ کن ثابت ہوتی ہیں اور ذہنی تنزلی کی جانب سفر تیز ہوجاتا ہے۔

کم نیند:
دماغ کے لیے تباہ کن عادات میں سے ایک نیند کی کمی یا رات گئے سونا ہے جو کہ ڈیمینشیا اور الزائمر امراض کا خطرہ بڑھاتی ہے، اگر رات کو 7 سے آٹھ گھنٹے کی نیند پوری نہ کی جائے تو یہ خطرہ بڑھ جاتا ہے اور بدقسمتی سے آج کل بیشتر افراد اس بری عادت کے شکار ہیں۔

تنہا وقت گزارنا:
انسان میل ملاقات کو پسند کرتے ہیں، فیس بک پر چاہے کتنے بھی زیادہ دوست ہو مگر حقیقی زندگی میں کوئی دوست نہ ہونا دماغ کے لیے مضر ثابت ہوتا ہے، ایک تحقیق کے مطابق چند قریبی دوست زندگی کو خوش باش اور کیرئیر میں زیادہ بامقصد کام کرنے میں مدد دیتے ہیں، اسی طرح دماغی تنزلی اور الزائمر جیسے امراض کا خطرہ بھی کم ہوجاتا ہے۔

جنک فوڈ کا زیادہ استعمال:
دماغ کے وہ حصے سیکھنے، یاداشت اور دماغی صحت وغیرہ کے لیے ہوتے ہیں، ان کا حجم ایسے افراد میں بہت چھوٹا ہوتا ہے جو جنک فوڈ جیسے برگرز، فرنچ فرائز اور سافٹ ڈرنکس کے شوقین ہوتے ہیں، دوسری جانب بیریاں، اجناس، گریاں اور سبز پتوں والی سبزیاں دماغی افعال کو محفوظ رکھنے میں مددگار ثابت ہونے والی غذائیں ہیں۔

ہیڈ فون لگے رہنا:
جب کانوں کے پردے میں ہیڈفونز کا شور سنائی دے تو سننے کی سماعت متاثر ہونے کا خطرہ ہوتا ہے، مگر معاملہ صرف کانوں تک ہی محدود نہیں بلکہ یہ دماغی مسائل جیسے الزائمر اور دماغی ٹشوز ختم ہونے وغیرہ کا سبب بھی بن سکتا ہے۔

سست طرز زندگی:
جتنا آپ جسمانی سرگرمیوں سے دور ہوتے ہیں، اتنا ہی دماغی تنزلی کے مرض ڈیمینشیا کا خطرہ بڑھ جاتا ہے، اس کے علاوہ ذیابیطس، امراض قلب اور ہائی بلڈ پریشر جیسے امراض کا خطرہ بھی ہوتا ہے اور یہ سب الزائمر سے بھی جڑے ہوتےہیں۔

: حد سے زیادہ کھانا

اگر آپ بہت زیادہ کھانا کھاتے ہیں چاہے وہ صحت کے لیے ضروری غذائیں ہی کیوں نہ ہو، آپ کا دماغ سوچنے اور یاد رکھنے کے لیے مضبوط نیٹ ورک کو تشکیل دینے کے قابل نہیں رہتا، حد سے زیادہ کھانا خطرناک حد تک جسمانی وزن بڑھا سکتا ہے جس کے نتیجے میں امراض قلب، ذیابیطس اور ہائی بلڈ پریشر جیسے امراض کا خطرہ بڑھتا ہے جو آگے بڑھ کر دماغی مسائل کا باعث بنتے ہیں۔

سورج سے دوری:
اگر آپ کے جسم کو مناسب مقدار میں قدرتی روشنی نہیں ملتی تو ڈپریشن کا خطرہ تو بڑھتا ہی ہے اس کے ساتھ ساتھ دماغ کی رفتار بھی سست روی کا شکار ہوسکتی ہے، تحقیق کے مطابق سورج کی روشنی دماغ کو ٹھیک طرح کام کرنے میں مدد دیتی ہے۔

ایمزٹی وی(اسلام آباد)تحریک انصاف کے چیئر مین عمران خان نے 27دسمبر کو پیپلز پارٹی کے جلسے سے امیدیں لگا لیں ،ان کاکہناہے کہ کل 27دسمبر ہے ،دیکھتے ہیں پیپلز پارٹی کیا اعلان کرتی ہے۔ان کا کہنا ہے کہ پوری اپوزیشن متفق ہے کہ پاناما پر نواز شریف کو جواب دینا پڑے گا ۔عمران خان نے چوہدری نثار کے نیب چیئر مین سے متعلق بیان کا خیر مقدم بھی کیا ۔

میڈ یا سے گفتگو کرتے ہوئے انہوں نے کہاکہ جب بھی حکومت قانون توڑتی ہے تو اپوزیشن کو جواب لینا ہو تاہے ،پاناما میں جو اربو ں روپے باہر گئے وہ عوام کا پیسہ ہے ۔

ان کاکہنا تھا کہ نیب پاکستان میں کرپشن بڑھا رہی ہے ،اگر نیب کامیاب ہوتی تو کرپشن نہ بڑھتی،نواز شریف کے خلاف نیب میں 12کیسز ہیں ،پاکستان کی تاریخ میں پاناما اہم کیس ہے ۔

عمران خان نے کہا کہ چوہدری نثار نے کہا نیب چیئر مین سپریم کورٹ مقرر کرے ،ان کے اس بیان کا خیر مقدم کرتے ہیں ،نیب کو سپریم کورٹ کے ماتحت ہونا چاہیے ۔انہوں نے کہا کہ پاکستان کا المیہ ہے لوگ کہتے ہیں نواز شریف کو سزا نہیں ہو گی ،پاکستان کا نظام صرف کمزوروں کو پکڑتا ہے ۔چیئر مین تحریک انصاف نے مزید کہا کہ یہودی لابی پہلے ہی پاکستان کے ایٹمی پروگرام کے خلاف لگی ہوئی ہے ،ایسے میں خواجہ آصف کے نیو کلیئر حملے سے متعلق بیان سے پاکستان کی بدنامی ہوئی ۔

ایمزٹی وی (انٹرٹینمنٹ) بالی ووڈ کے مسٹر پرفیکٹ عامر خان کی امیدوں پر پانی پھرگیا اور ان کی فلم ’دنگل‘امریکہ میں باکس آفس پر ’پی کے ‘ اور ’باہوبلی‘ کا ریکارڈ توڑنے میں ناکام رہی ، پہلے دن دولاکھ بیاسی ہزار دوسواسی ڈالر کا بزنس کیا ۔

زرائع کے مطابق عامر خان کی ہندی فلم دنگل نے امریکی باکس آفس پر شاندارطریقے سے اپناآغاز کیا لیکن پی کے اور باہوبلی کی ریلیز کے ابتدائی ریکارڈ توڑنے میں ناکام رہی حالانکہ عامر خان امریکہ میں معروف بالی ووڈاداکاروں میں سے ایک ہیں، کرسمس کی وجہ سے دنگل کے ڈسٹری بیوٹرز نے بھی فلم کی ریلیز کے موقع پر ملک بھر میں وسیع انتظامات کیے تھے اور سکریننگ کیلئے کئی تھیٹرز بک کرالیے تھے۔

فلم ’پی کے‘ 280سینماگھروں میں ریلیز کیساتھ عامر خان کی سب سے بڑی ریلیز ہونیوالی فلم تھی اور اب دنگل نے سکریننگ کا ریکارڈ توڑ دیا اور 330سینماءگھروں میں سکرین ہوئی اور یہ امریکہ میں سب سے بڑی ریلیز ہی قرارپائی ۔ اس سے پہلے رنویرسنگھ کی فلم باجی راﺅمستانی 300سکرینوں پرریلیز ہوئی تھی ۔

یہاں یہ امر بھی قابل ذکر ہے کہ دنگل پہلے دن کے کاروبار میں دولاکھ بیاسی ہزار دوسواسی ڈالرتک محدود رہی جبکہ عامر خان کی ہی فلم ’پی کے‘ نے ایک دن میں دس لاکھ ڈالر (ایک ملین ڈالر) کا کاروبار کیاتھاجبکہ باہوبلی نے پی کے سے بھی 10ہزار ڈالر زیادہ کا بزنس کیاتھا، خیال کیا جارہاتھاکہ ’دنگل‘ تمام ریکارڈ توڑدے گی لیکن بظاہرواضح فرق کیساتھ فلم ’دنگل‘ کاروبارمیں پیچھے رہ گئی۔

ایمزٹی وی(تجارت)کاروباری ہفتے کے پہلے روز پاکستان ا سٹاک ایکسچینج میں مثبت رجحان رہا ہے اور کے ایس ای 100انڈیکس 46ہزار 689پوائنٹس کی سطح پر بند ہو ا ۔

تفصیلات کے مطابق پیر کے روز پاکستان اسٹاک ایکسچینج میں مثبت رجحان رہا اور کے ایس ای 100انڈیکس 55پوائنٹس کے معمولی اضافے کے بعد 46ہزار 689پوائنٹس کی سطح پر بند ہو گیا ۔

پی ایس ایکس میں آج8کروڑ 34لاکھ 95ہزار 50شیئرز کا لین دین ہوا جن کی مارکیٹنگ ویلیو 64ارب 60کروڑ70لاکھ 8ہزار 63روپے تھی ۔کے ایس ای 100انڈیکس میں آج مجموعی طور پر 386کمپنیوں نے کاروبار کیا جن میں سے 185کمپنیوں کے شیئرز کی ویلیو میں اضافہ ،181کمپنیوں کے شیئرز کی ویلیو میںکمی جبکہ 20کمپنیوں کے شیئرز کی ویلیو اپنی سطح پر مستحکم رہی ۔

ایمزٹی وی(تجارت)عوامی فلاح و بہبود اور ترقی کے دعوے کرنیوالی منتخب جمہوری حکومتوں کے دور میں عوام پر غیرملکی قرضوں کے بوجھ میں آمرانہ دور حکومت کے مقابلے میں غیرمعمولی اضافہ ہوا ہے۔

پاکستان کی دو حالیہ منتخب جمہوری حکومتیں عوام پر غیرملکی قرضوں کا بوجھ مسلط کرنے میں آمرانہ دور حکومت سے بھی بھاری ثابت ہوئی ہیں۔ جنرل ریٹائرڈ پرویز مشرف کے 9سالہ دور اقتدار میں غیرملکی قرضوں کے بوجھ میں 8ارب ڈالر جبکہ یکے بعد دیگرے 2 منتخب جمہوری حکومتوں کے حالیہ ادوار میں مجموعی طور پر 28ارب 84کروڑ ڈالر کا اضافہ ہوا ہے۔ زرمبادلہ کے ذخائر میں اضافے کے لحاظ سے بھی دونوں منتخب جمہوری حکومتیں مل کر بھی آمرانہ دور حکومت کا مقابلہ نہیں کرسکیں۔

مشرف دور حکومت میں زرمبادلہ کے ذخائر میں 10ارب ڈالر جبکہ حالیہ 2 جمہوری حکومتوں کے دونوں ادوار میں کل ملاکر ساڑھے آٹھ ارب ڈالر کا اضافہ ہوا ہے جس میں زیادہ تر آئی ایم ایف اور ورلڈ بینک کے قرضوں پر مشتمل ہے۔ جنرل ریٹائرڈ پرویز مشرف کے دور حکومت کے مقابلے میں پیپلز پارٹی اور ن لیگ کی حکومتوں کے حالیہ ادوار کے دوران عوام پر غیرملکی قرضوں کے بوجھ میں 28ارب 84کروڑ 60لاکھ ڈالر کا اضافہ ہوا ہے۔

سرکاری اعدادوشمار کے مطابق مارچ 2008تک پاکستان کے مجموعی غیرملکی قرضوں کی مالیت 45ارب 79کروڑ 20لاکھ ڈالر تھی اس مالیت میں مشرف دور حکومت کے 9سالہ دور اقتدار میں غیرملکی قرضوں کی مالیت میں 8ارب ڈالر کا اضافہ ہوا جبکہ حالیہ جمہوری حکومتوں کے 8سالہ دور میں غیر ملکی قرضوں کے بوجھ میں 28ار 84کروڑ 60لاکھ ڈالر کا اضافہ ہوا ہے۔
پیپلز پارٹی کی حکومت کے دوران غیرملکی قرضوں میں 15ارب ڈالر کا اضافہ ہوا اور اس عرصے میں قرضوں کا بوجھ 45ارب 79کروڑ ڈالر سے بڑھ کر 60ارب 90کروڑ ڈالر تک پہنچ گیا۔ ن لیگ کی حکومت نے اس تسلسل کو جاری رکھا اور حکومت کے پہلے

3 سال کے دوران ستمبر 2016کے اختتام تک غیرملکی قرضوں کا بوجھ 13ارب 74کروڑ ڈالر اضافے سے 74ارب 63کروڑ ڈالر تک پہنچ چکا ہے۔

جنرل ریٹائرڈ پرویز مشرف نے جس وقت اقتدار سنبھالا قومی خزانے میں ایک ارب 37کروڑ ڈالر کا زرمبادلہ موجود تھا جو مشرف دور کے اختتام تک 10ارب ڈالر اضافے سے 11ارب 15کروڑ ڈالر تک پہنچ گیا۔ اس کے مقابلے میں حالیہ دو جمہوری حکومتوں کے دوران زرمبادلہ کے ذخائر میں اب تک صرف 8.5ارب ڈالر کا اضافہ ہوا ہے جس میں سے زیادہ تر آئی ایم ایف اور ورلڈ بینک کے قرضوں پر مشتمل ہے

ایمز ٹی وی(انٹرٹینمنٹ) زرائع کے مطابق ہالی ووڈ کے پاپ گلوکاری سے شہرت پانے والے سروں کے جادوگر جارج مائیکل 53برس کی عمر میں انتقال کر گئے ۔

انکے قریبی ساتھی نے گلوکار کی موت کی تصدیق کرتے ہوئے کہا ہے کہ وہ لندن کے علاقے آکسفورڈ شائر میں اپنے مکان میں موجود تھے اور مردہ حالت میں ملے ہیں تاہم انکی موت حادثاتی نہیں ہے بلکہ وہ مکمل صحت مند اور توانا تھے۔

جارج مائیکل کی گلوکاری کا عروج ویم بینڈ سے ہوا جو انہوں نے اپنے اسکول کے دوست اینڈریو ریگلی کے ہمراہ بنایا۔ اس کے بعد وہ سولو گلوکاری جانب چلے گئے۔برطانوی چارٹس میں ان کے سات گانے سر فہرست رہے جن میں کییر لس وسپرز اور فیتھ شامل ہیں۔ انہوں نے3 برٹ ایوارڈ اور2 گریمی جیتے۔

جارج مائیکل نے اپنے کریئر کا آعاز 80 کی دہائی میں ویم سے کیا تھا اور بعد میں اکیلے اپنی گلوکاری جاری رکھی۔ وہ لندن میں پیدا ہوئے اور چار دہائی کے کریئر میں ان کی 10کروڑ کے قریب البمز فروخت ہوئیں۔

اکتوبر 2006 ءمیں گلوکار نے منشیات استعمال کر کے گاڑی چلانے کا اعتراف بھی کیا تو ڈرائیونگ پر پابندی کا سامنا کرنا پڑا اور پھردکان سے گاڑی ٹکرانے پر انہیں 2سال قید بھی کاٹنا پڑی۔

ایمز ٹی وی( مانیٹرنگ ڈیسک) اگر آپ دنیا کے امیر ترین شخص بننا چاہتے ہیں تو اس وقت دنیا کے امیر ترین شخص بل گیٹس نے اپنی کامیابی کے کچھ راز بتائے ہیں اور انہوں نے نوجوانوں کے لیے مستقبل میں کامیابی کے لیے تین اسکلز کو بہترین قرار دیا ہے۔

لنکڈن کے ایگزیکٹو ایڈیٹر ڈینئیل روتھ سے بات کرتے ہوئے بل گیٹس نے زندگی میں کامیابی کا نسخہ بتایا۔

بل گیٹس نے اپنے پاس جمع کردہ ڈیٹا کے حوالے سے بتایا کہ تین پس منظر رکھنے والے افراد آنے والے برسوں میں زیادہ کامیاب ثابت ہوں گے، سائنس، انجنیئرنگ اور اکنامکس۔

انہوں نے کہا ' میرے خیال میں سائنس، ریاضی اور معاشیات کی بنیادی معلومات رکھنے والوں کی مستقبل میں ملازمتوں کے حوالے سے بہت زیادہ مانگ ہوگی'۔

انہوں نے کہا ' ضروری نہیں کہ آپ کوڈ لکھنے میں مہارت رکھتے ہوں مگر آپ کو یہ سمجھ ہونی چاہئے کہ انجنیئرز کیا کرسکتے ہیں اور کیا نہیں کرسکتے'۔

ان کا کہنا تھا کہ ان موضوعات میں مہارت رکھنے والے افراد مستقبل میں اداروں کو بدل کر رکھ دیں گے۔

اس سے پہلے رواں سال ایک بلاگ میں انہوں نے لوگوں کو امیر بننے کا بھی نسخہ بتایا تھا۔

بل گیٹس کے مطابق اگر ان کی آمدنی بھی انتہائی غربت میں رہنے والے افراد جتنی ہوتی تو وہ مرغیوں کی پرورش کرکے سماجی حیثیت میں اضافے کی کوشش کرتے۔

جی ہاں بل گیٹس مرغیاں پال کر خود کو امیر بناتے۔

یہ بات انہوں نے اپنے آفیشل بلاگ پوسٹ میں کہتے ہوئے تخمینہ لگایا کہ مرغیوں کی لاگت بیشتر ترقی پذیر ممالک میں 5 ڈالرز کے لگ بھگ ہوتی ہے تو روزانہ کے دو ڈالرز کو خرچ کرکے وہ ایک ماہ میں 12 مرغیوں کو خرید لیتے۔

چند ماہ بعد ان کے پاس درجنوں مرغیاں ہوتیں جو کہ پیسہ کمانے کی مشین ثابت ہوتیں اور انہیں بہت زیادہ آمدنی کے ساتھ غربت کی لکیر سے باہر نکال کر درمیانے طبقے کا باسی بنادیتیں۔

بل گیٹس چاہتے ہیں کہ کم آمدنی والے گھرانوں کو ایسا ہی کرنا چاہئے۔

ایمزٹی وی(تجارت) وفاقی وزارت خزانہ نے 5 ہزار روپے کے کرنسی نوٹ کو ختم کئے جانے سے متعلق خبروں کو بے بنیاد قرار دیتے ہوئے اس کی تردید کردی ہے۔

سینیٹ نے گزشتہ ہفتے 5 ہزار روپے کے کرنسی نوٹ بتدریج بند کرنے سے متعلق قرارداد کثرت رائے سے منظور کی تھی، قرارداد میں کہا گیا تھا کہ 5 ہزار کا کرنسی نوٹ غیر قانونی لین دین میں سب سے زیادہ استعمال ہوتا ہے۔

ایوان بالا میں قرارداد کی منظوری کے بعد کاروباری و تجارتی حلقوں اور سرمایہ کاروں میں تشویش کی لہر دوڑ گئی تھی، ملک میں رائج سب سے بڑے کرنسی نوٹ کی بندش کی خبروں پر لوگوں کی جانب سے غیر ملکی کرنسی بالخصوص ڈالر اور سونا خریدنے کے رجحان میں اضافہ دیکھا جارہا تھا تاہم وفاقی وزارت خزانہ نے ان خبروں کی تردید کردی ہے۔

وفاقی وزارت خانہ کی جانب سے جاری بیان کے مطابق 5 ہزار روپے کے کرنسی نوٹ بند کرنے سے متعلق گردش ہونے والی خبریں بے بنیاد ہے۔ ملک میں سب سے زیادہ مالیت کے کرنسی نوٹ کو بند نہیں کیا جارہا۔ 5 ہزار روپے کا نوٹ ختم کرنے سے کاروباری طبقے کے لیے بھی مسائل پیدا ہوں گے کیونکہ گزشتہ مالی سال کے دوران ملک میں زیر گردش کرنسی کا 17 فیصد حصہ 5 ہزار روپے کے نوٹوں پر مشتمل تھا۔