ایمزٹی وی (فلپائن)فلپائن کے مشرقی علاقے میں سمندری طوفان ناک ٹین کے باعث اب تک 6 افراد ہلاک جبکہ متعدد لاپتہ ہوگئے ہیں۔
غیرملکی خبررساں ادارے کے مطابق فلپائن کے مشرقی علاقے میں گزشتہ روز ٹکرانے والے ناک ٹین سمندری طوفان کے باعث مرنے والوں کی تعداد 6 ہوگئی ہے جبکہ اب تک 18 سے زائد افراد لاپتہ ہیں۔

طوفان کے خدشے کے باعث فلپائنی حکومت نے درجنوں بندرگاہیں بند کرنے کے احکامات جاری کئے تھے، کیتندوانیس اور اطراف کے صوبوں سے ہزاروں افراد پہلے ہی اپنے گھر چھوڑ کر محفوظ مقامات پر چلے گئے تھے۔ جبکہ دارالحکومت منیلا میں حکام نے ہوا کے زور کے باعث گرنے کے خدشے کے پیش نظر بڑے بڑے اشتہاری بورڈز کو ہٹانے کا حکم دیا تھا لیکن اس کے باوجود فلپائن کے مختلف علاقوں میں بڑے پیمانے پر جانی و مالی نقصان ہوا ہے۔

ایمزٹی وی(گوا)بھارت کے معروف سیاحتی مرکز گوا کے ایئرپورٹ پر مسافر طیارہ اڑان بھرنے کے دوران رن وے سے پھسل گیا جس کے نتیجے میں 4 افراد زخمی ہوگئے۔

بھارتی میڈیا کے مطابق گوا کے ڈابولم انٹر نیشنل ایئرپورٹ پر جیٹ ایئر ویز نامی فضائی کمپنی کی پرواز نائن ڈبلیو 2347 ممبئی جارہی تھی، طیارے میں عملے کے ارکان سمیت 161 افراد سوار تھے۔ مسافر بردار طیارہ عین اس وقت رن وے سے پھسل گیا جب وہ ٹیک آف کررہا تھا۔ واقعے کے نتیجے میں 15 افراد زخمی ہوئے ہیں جنہیں قریبی اسپتال میں طبی امداد دی جارہی ہے۔

ایئر پورٹ حکام نے حادثے کی وجہ نہیں بتائیں تاہم ایئر پورٹ کو ہر قسم کی پروازوں کی آمد اور روانگی منسوخ کردی گئی ہے۔دوسری جانب فضائی کمپنی کی جانب سے جاری بیان میں کہا گیا کہ حادثے کا شکار طیارے کا عملہ اور مسافر محفوظ ہیں اور انہیں طیارے سے بحفاظت نکال لیا گیا ہے، چند مسافروں کو امددای سرگرمیوں کے دوران زخم آئے ہیں لیکن وہ شدید نوعیت کے نہیں تاہم ان کا علاج جاری ہے۔

ایمزٹی وی(کراچی) پیپلز پارٹی کی شہید چیئرپرسن محترمہ بینظیر بھٹو کی نویں برسی آج منائی جائے گی۔
ذرائع کے مطابق گڑھی خدا بخش میں مرکزی تقریب کے انتظامات مکمل کر لیے گئے ہیں، اسٹیج تیار، جلسہ گاہ میں پارٹی پرچم، ذوالفقار بھٹو، بینظیر بھٹو، مرکزی قیادت کی تصاویر اور بڑے بڑے پوسٹرز آویزاں کر دیئے گئے ہیں۔ آصف زرداری بھی نوڈیرو ہاوس پہنچ گئے۔

مراد علی شاہ نے بی بی کے مزار پر حاضری دی، پھول چڑھائے اور فاتحہ خوانی کی۔ میڈیا سے گفتگو میں وزیراعلیٰ نے سرپرائز کی پیشگوئی بھی کی۔ بینظیر اور بھٹو خاندان کے مزاروں پر فاتحہ خوانی کا سلسلہ جاری ہے۔ لاہور سے بھی قافلہ برسی میں شرکت کیلئے روانہ ہو گیا۔ ریلوے اسٹیشن پر جیالے نعرے بازی کرتے رہے۔ گڑھی خدا بخش میں ساڑھے 7 ہزار پولیس اور تین سو رینجرز اہلکار سیکورٹی ڈیوٹی انجام دیں گے۔

ایمز ٹی وی(مانیٹرنگ ڈیسک) عالمی ادارہ برائے تحفظ ماحول (ڈبلیو ڈبلیو ایف) کے پاکستانی حکام کا کہنا ہے کہ اورماڑہ اور کراچی کے قریبی سمندر میں جیلی فش کی بہت بڑی تعداد دیکھی گئی ہے جو اس سے پہلے کبھی نہیں دیکھی گئی۔

جیلی فش کی بڑھتی ہوئی تعداد سے مقامی ماہی گیر سخت پریشان ہیں کیونکہ جب وہ سمندر میں مچھلیاں پکڑنے جاتے ہیں تو قابلِ فروخت مچھلیوں کے بجائے یہ جیلی فش ان کے جال میں پھنس جاتی ہیں۔

پاکستان کے سمندری ماحول سے ڈبلیو ڈبلیو ایف پاکستان کی لاعلمی کا اندازہ اس بیان سے بھی لگایا جاسکتا ہے جس میں کہا گیا ہے کہ جیلی فش کی اتنی بڑی تعداد بہت کم ہی پاکستانی سمندر میں دیکھی جاتی ہے۔

حالانکہ پاکستانی سمندری حدود میں بحری حیات (میرین لائف) کے جائزوں میں یہ بات پہلے ہی معلوم ہوچکی ہے کہ مچھلیوں کے حد سے زیادہ شکار اور ماحولیاتی تبدیلیوں کے نتیجے میں یہاں عام مچھلیاں بہت کم رہ گئی ہیں جب کہ ان کے برعکس جیلی فش کی تعداد مسلسل بڑھتی جارہی ہے جو سمندری ماحول کے لیے شدید خطرہ ہے۔

بحری حیات کے ماہرین پچھلے 20 سال سے مسلسل خبردار کرتے آرہے ہیں کہ پاکستان کے سمندروں میں باریک جالوں اور بڑے بحری جہازوں سے مچھلیاں پکڑنے پر پابندی لگائی جائے ورنہ یہاں مچھلیاں بالکل ختم ہوجائیں گی اور مقامی ماہی گیروں کا کاروبار بھی ٹھپ ہوجائے گا۔

واضح رہے کہ مختلف غیرملکی کمپنیاں پاکستان کی سمندری حدود میں حکومت کی اجازت سے وسیع پیمانے پر، بڑے جہازوں کے ذریعے مچھلیاں پکڑتی ہیں اور اس مقصد کے لیے باریک جال استعمال کیا جاتا ہے جس میں مچھلیوں کے چھوٹے بچے بھی پھنس کر ہلاک ہوجاتے ہیں۔

ایمزٹی وی(تعلیم/ کراچی)جامعہ کراچی کے ناظم امتحانات پروفیسرڈاکٹر ارشد اعظمی کے اعلامیہ کے مطابق ایم اے اور ڈبل ایم اے پرائیوٹ اور امپرومنٹ آف ڈویژن کے لئے رجسٹریشن فارم جمع کرانے کی تاریخ کا اعلان کردیا گیا ہے۔

جس کے مطابق طلبہ اپنے رجسٹریشن فارم 20 فروری 2017 ء تک 3700/= روپے فیس کے ساتھ یو بی ایل بینک کائونٹرز واقع سلورجوبلی گیٹ جامعہ کراچی پر جمع کراسکتے ہیں۔مضمون کی تبدیلی کے لئے بھی انہی تاریخوں میں 1000/= روپے فیس کے ساتھ فارم جمع کرائے جاسکتے ہیں۔

ایمزٹی وی(تعلیم/ کراچی)جامعہ کراچی کے ڈائریکٹر ایڈمیشنز پروفیسر ڈاکٹر خالد عراقی کے اعلامیہ کے مطابق جامعہ کراچی کی جانب سے جاری کردہ تمام داخلہ فہرستوں اور کلیم فہرستوں کی داخلہ فیس جمع کرانے کی تاریخ میں 29 دسمبر 2016 ء تک توسیع کردی گئی ہے۔

ایسے طلبہ جن کے نام جاری کردہ داخلہ فہرستوں / کلیم فہرستوں میں آچکے ہیں وہ اپنی داخلہ فیس جامعہ کراچی کے جمنازیم ہال نزد پوسٹ آفس میں صبح 9:30 تادوپہر01:00بجے تک جمع کراسکتے ہیں۔

علاوہ ازیں ڈونرنشستوں کے داخلہ فارم حاصل اور جمع کرانے کی تاریخ میں 28 دسمبر 2016 ء تک توسیع کردی گئی ہے۔داخلہ فارم یوبی ایل بینک کائونٹر واقع سلور جوبلی گیٹ سے صبح 9:30 تاشام4:00 بجے تک حاصل اور جمع کرائے جاسکتے ہیں۔

ایمزٹی وی(اسپورٹس)میلبورن ٹیسٹ میں پاکستان نے اپنی پہلی اننگز 4 وکٹوں کے نقصان پر 142 رنز بنائے تھے کہ کھیل بارش کے باعث روک دیا گیا۔

آسٹریلیا کے میلبورن کرکٹ گراؤنڈ میں کھیلے جا رہے ٹیسٹ میچ میں پاکستان کی پہلی اننگز میں بیٹنگ جاری ہے اور گرین کیپس نے چائے کے وقفے تک 4 وکٹوں کے نقصان پر 142 رنز بنائے تھے کہ میچ بارش کے باعث روک دیا گیا تاہم مسلسل بارش جاری رہنے کی وجہ سے کھیل دوبارہ شروع نہ ہو سکا اور امپائرز نے پہلے روز کا کھیل ختم کرنے کا اعلان کردیا۔ پاکستان کی جانب سے اننگز کا آغاز سمیع اسلم اور اظہر علی نے کیا تاہم 18 کے مجموعی اسکور پر سمیع اسلم 9 رنز بنا کر ناتھن لیون کی گیند پر اسٹیون اسمتھ کو کیچ تھما بیٹھے۔

بابر اعظم بھی 23 کے انفرادی اسکور پر ہیلز وڈ کی گیند پر اسٹیون اسمتھ کے ہاتھوں کیچ آؤٹ ہوئے۔ اظہر علی نے ذمہ دارانہ بیٹنگ جاری رکھتے ہوئے نہ صرف اپنی ففٹی مکمل کی بلکہ رواں برس ٹیسٹ میں اپنے ایک ہزار رنز بھی مکمل کئے۔ قومی ٹیم کا سکور 111 رنز پر پہنچا تو یونس خان جیکسن برڈ کی اندر آتی گیند پر کلین بولڈ ہو گئے، انہوں نے 21 رنز اسکور کئے، یونس اور اظہر کے درمیان 51 رنز کی شراکت ہوئی۔

قومی ٹیم کے کپتان مصباح الحق جارحانہ موڈ میں نظر آئے اور انہوں نے ناتھن لیون کو چھکا لگا کر اپنا کھاتا کھولا لیکن 11 کے انفرادی اسکور پر وہ بھی جیکسن برڈ کی گیند پر شارٹ لیگ پر کیچ آؤٹ ہو گئے، میڈنسن نے ڈائیو لگا کر ان کا شاندار کیچ تھاما۔ پاکستان نے 50.5 اوورز میں 142 رنز اسکور کئے تھے کہ بارش کے باعث کھیل روک کر چائے کا وقفہ لے لیا گیا تاہم کھیل دوبارہ شروع نہ ہو سکا۔ پہلے روز کا کھیل ختم ہوا تو اظہر علی 66 اور اسد شفیق 4 رنز پر بیٹنگ کر رہے تھے۔ آسٹریلیا کی جانب سے جیکسن برڈ نے 2 جب کہ ہیزل وڈ اور ناتھن لیون نے ایک ایک کھلاڑی کو آؤٹ کیا۔

قبل ازیں پاکستان کے کپتان مصباح الحق نے ٹاس جیت کر پہلے بیٹنگ کا فیصلہ کیا۔ ان کا کہنا تھا کہ راحت علی کو آرام دیا گیا ہے اور ان کی جگہ سہیل خان کو ٹیم میں شامل کیا گیا ہے۔ دوسری جانب پاکستان کے خلاف پہلا ٹیسٹ جیتنے والی آسٹریلین ٹیم میں کوئی تبدیلی نہیں کی گئی ہے۔

ایمز ٹی وی (انقرہ) ترک انتظامیہ نے گزشتہ 6 ماہ کے دوران سوشل میڈیا پر دہشت گرد تنظیموں کی مبینہ حمایت اور ترک افسران پر تنقید کے الزام میں ایک ہزار 656 افراد کو حراست میں لیا ہے۔

ترک دفتر داخلہ کی جانب سے جاری ہونے والے بیان کے مطابق ان گرفتاریوں کے علاوہ 10 ہزار کے قریب سوشل میڈیا صارفین کے بارے میں تحقیقات کا سلسلہ بھی جاری ہے۔

پولیس کی نشاندہی پر 3 ہزار 710 افراد کے خلاف قانونی کارروائی بھی کی جاچکی ہے جب کہ حراست میں موجود ان افراد میں سے 12 سو افراد کو آزمائشی طور رہا اور 767 افراد کو الزامات ثابت نہ ہونے پر بری کردیا گیا تاہم 84 افراد اب بھی پولیس کی حراست میں موجودہیں۔

ان افراد پر عائد کیے جانے والے الزامات میں دہشت گرد تنظیموں کی حمایت، لوگوں میں نفرت انگیز جذبات کو فروغ دینا، دہشت گردوں کے پروپیگنڈے کی تشہیر، دہشت گرد گروہوں سے تعلق کا اعلان، ریاست اور ریاستی افراد کی تضحیک اور شہریوں کے تحفظ کو نشانہ بنانے جیسے سنگین الزامات شامل ہیں۔

علاوہ ازیں عوامی پراسیکیوٹرز کو رپورٹ کیے جانے والے 10 ہزار افراد کے خلاف تحقیق اور قانونی کارروائی کا سلسلہ بھی جاری ہے۔

یاد رہے کہ ترکی کی جانب سے رواں سال جولائی میں بغاوت کی ناکام کوشش کے بعد ایمرجنسی نافذ کردی گئی تھی جس کے بعد سے قانون شکن گروہوں سے مبینہ روابط قائم کرنے پر ہزاروں شہریوں کو گرفتار کیا جا چکا ہے۔

مغربی حکومتوں،انسانی حقوق کی تنظیموں اور قانونی ماہرین کی جانب سے ترک حکومت کی جانب سے کیے جانے والے اس کریک ڈاؤن پر مسلسل تشویش کا اظہار کیا جاتا رہا ہے، کچھ افراد کا خیال ہے کہ یہ کریک ڈاؤن سیاسی مخالفین اور ناقدین کو نشانہ بنانے کے لیے کیا جارہا ہے۔

دوسری جانب انقرہ کی طرف سے ان تمام کارروائیوں کو ترکی میں بڑھنے والی دہشت گردی کے خلاف ضروری احتیاطی تدابیر قرار دیا جارہا ہے۔

واضح رہے کہ رواں سال ترکی کے کئی اہم شہروں میں دھماکوں اور حملوں کا سلسلہ دیکھنے میں آیا جن کی ذمہ داریاں کرد جنگجوؤں یا داعش نے قبول کی۔

ترک حکومت کی جانب سے بیشتر اوقات اشتعال انگیز مواد کی تشہیر روکنے کے لیے سوشل میڈیا ویب سائٹس پر پابندی عائد کی جاتی ہے تاکہ امن و امان اور عوامی تحفظ متاثر نہ ہو۔

یہ پابندیاں عموماً کسی دہشت گرد حملے اور بڑے کریک ڈاؤن کے بعد سامنے آتی ہیں، گذشتہ ہفتے بھی داعش کی جانب سے ترک فوجیوں کو جلانے کی ویڈیو منظرعام پر آنےکے بعد ترکی میں سوشل میڈیا ویب سائٹس کو کئی گھنٹوں کے لیے بند رکھا گیا۔

ایمز ٹی وی(اسپورٹس)مکی آرتھر نے ٹریک بدل لیا اور کوچ برائیاں کرنے کے بعد اب اچانک سہیل خان کے گن گانے لگے جب کہ ان کا کہنا ہے کہ وہ اچھے سوئنگ بولر ہیں اور فٹنس مسائل پر قابو پانے کیلیے وزن بھی 7 کلو کم کرلیا۔

برسبین ٹیسٹ کے بعد ایک انٹرویو میں ہیڈ کوچ مکی آرتھر نے کہا تھا کہ سہیل خان پہلا اسپیل بہت اچھا، دوسرا مناسب اور تیسرا مشکل سے کرتے ہیں، اس کے بعد ان کی کوئی کارکردگی نہیں ہوتی، یہ صورتحال دیگر بولرز پر دباؤ بڑھا دیتی ہے،اس لیے انھیں زیر غور نہیں لایا گیا، رائٹ آرم پیسر کو اب میلبورن ٹیسٹ کیلیے پلیئنگ الیون کا حصہ بنالیا گیا ہے، اس تضاد کے حوالے سے سوال پر مکی آرتھر نے کہا کہ سہیل خان نے غیر معمولی ٹریننگ کی،انہوں نے فٹنس کی بہتری کیلیے اپنا وزن بھی 7 کلو کم کرلیا ہے۔

مکی آرتھر کا کہنا تھا کہ گذشتہ ایک ماہ میں سہیل نے سخت محنت سے ایک پروفیشنل کھلاڑی ہونے کا ثبوت دیا،وہ واقف ہیں کہ ان کے حوالے سے ہماری کیا تشویش ہے،رائٹ آرم پیسر کی شمولیت سے بولنگ متوازن ہوئی ہے،ان کی موجودگی میں ناتھن لیون کو فائدہ اٹھانے کیلیے پچ پر زیادہ ناہموار اسپاٹ نہیں ملیں گے، وہ سوئنگ کی مدد سے ٹیم کیلیے وکٹیں بھی لے سکتے ہیں۔ ایک الگ انٹرویو میں مکی آرتھر نے کہا کہ میں نے سہیل خان کی فٹنس کے حوالے سے تحفظات کا اظہار کیا تھا، انہوں نے مسائل پر قابو پانے کیلیے کوشش بھی کی، پوری امید ہے کہ اپنی اہلیت ثابت کرسکیں گے۔

یاد رہے کہ سہیل خان ابتدا میں بہتر اور بعد ازاں بدتر بولر کی شہرت رکھتے ہیں،پیسر کی 24میں سے 21وکٹیں پہلی اننگز میں حاصل ہوئیں،دوسری باری میں ان کی اوسط 123رنز فی وکٹ ہے۔

ایمز ٹی وی (روس) روس میں بحیرہ اسود میں گر کر تباہ ہونے والے فوجی طیارے کی یاد میں یوم سوگ منایا گیا جبکہ بحیرہ اسود میں لاشوں اور بلیک باکس کی تلاش کے لیے سرچ آپریشن دوسرے روز بھی جاری رہا۔

یاد رہے کہ گذشتہ روز شام جانے والا روس کا ایک فوجی طیارہ بحیرہ اسود میں گر کر تباہ ہوگیا تھا جس سے طیارے میں سوار تمام 92 افراد ہلاک ہوگئے تھے۔

روسی وزارت دفاع کے طیارے ٹی یو 154 میں ملٹری بینڈ کے درجنوں موسیقار اور رقاص شامل تھے جو سال نو کے موقع پر منائے جانے والے جشن میں فن کا مظاہرہ کرنے شام جارہے تھے۔

اس کے علاوہ 9 روسی صحافی بھی اس طیارے میں سوار تھے جبکہ ملٹری سروس کے نمائندوں اور روسی صدر ولادی میر پیوٹن کے انسانی حقوق کونسل کے اہم رکن الیزاویٹا گلنکا بھی حادثے کا شکار ہونے والے طیارے میں موجود تھے۔

روس میں یوم سوگ کے موقع پر سوگواران نے جہاز کے اڑان بھرنے کے مقام، جنوبی روس کے ایئرپورٹ سوچی پر پھول رکھے اور شمعیں روشن کیں۔

روسی وزیر مواصلات میکسم سوکولود کے مطابق طیارے کو پیش آنے والے حادثے کی وجہ پائلٹ کی غلطی یا کوئی تکنیکی خرابی ہوسکتی ہے تاہم طیارے کی تباہی میں کسی دہشتگرد کارروائی کا کوئی امکان نہیں۔

حادثے کے بعد بحیرہ اسود میں جاری امدادی کارروائیوں کے حوالے سے روسی وزارت دفاع کے ترجمان آئیگور کوناشینکوف کا بتانا تھا کہ اب تک 11 افراد کی لاشوں کو تلاش کیا جاچکا ہے، اور کھلے سمندر میں لاشوں اور طیارے کے بلیک باکس کی تلاش کے لیے جاری آپریشن جس میں ساڑھے تین ہزار افراد مصروف ہیں،اسے مزید بڑھایا جائے گا۔

ان کا کہنا تھا کہ 39 بحری جہاز، 5 ہیلی کاپٹرز، ایک ڈرون اور 100 سے زائد غوطہ خور سرچ آپریشن کا حصہ ہیں جبکہ بحیرہ اسود کے ساحل پر روسی فوجیوں کی بھی بڑی تعداد موجود ہے۔

واضح رہے کہ روسی صدر ولادیمیر پیوٹن کی جانب سے طیارے کو پیش آنے والے حادثے کی تحقیقات کا حکم دیا جاچکا ہے جبکہ اس سلسلے میں ایک تحقیقاتی کمیشن بھی تشکیل دیا گیا ہے جس کی سربراہی وزیراعظم دمتری میدویدوف کررہے ہیں۔
۔

6 روز قبل ہی 19 دسمبر کو سائیبریا کے شمال مشرقی علاقے میں روس کے فوجیوں کو لے جانے والے ایک طیارے نے کریش لینڈنگ کی تھی، تاہم حادثے میں کسی جانی نقصان کی اطلاع موصول نہیں ہوئی تھی، البتہ جہاز میں سوار 32 فوجی اہلکار زخمی ہوئے تھے۔

اس سے قبل مارچ 2016 میں بھی دبئی سے روس جانے والا مسافر طیارہ لینڈنگ کے دوران گر کر تباہ ہوا تھا، جس کے نتیجے میں عملے کے 6 ارکان سمیت 61 افراد ہلاک ہوگئے تھے۔

رپورٹس کے مطابق بوئنگ 737 طیارہ روس کے جنوبی شہر روستو آن ڈان کے ایئرپورٹ پر لینڈنگ کے دوران گر کر تباہ ہوا۔