ایمز ٹی وی(مانیٹرنگ ڈیسک) ماہرینِ فلکیات کی بین الاقوامی ٹیم نے 10 ماہ کے مسلسل مشاہدے کے بعد ایک ایسا دیوقامت بلیک ہول دریافت کیا ہے جو اپنے قریب موجود سورج جتنے ستارے کو ہڑپ کرنے میں مصروف ہے جس کے نتیجے میں اس سے زبردست شعاعیں خارج ہورہی ہیں۔

یہ فلکیاتی واقعہ پچھلے سال (2015 میں) مشاہدہ کیا گیا تھا جسے ابتدائی طور پر سپر نووا کا دھماکا سمجھ لیا گیا تھا لیکن فلکیات دانوں کا ایک گروپ اس سے مطمئن نہیں تھا اور ان کا خیال تھا کہ زبردست روشنی کے اس اخراج کی وجہ ایک نادیدہ اور بہت بڑا بلیک ہول ہے جو ہمارے سورج جتنی جسامت والے ستارے کو ہڑپ کرنے میں مصروف ہے۔
اس خیال کی تصدیق کرنے کے لیے ’’یورپین سدرن آبزرویٹری‘‘ کے تحت آسٹریلیا، چلی، ڈنمارک، فن لینڈ، جرمنی، اسرائیل، اٹلی، اسپین، سویڈن، برطانیہ اور امریکا کے ماہرین فلکیات پر مشتمل ایک بین الاقوامی ٹیم تشکیل دی گئی جس نے زمین پر نصب طاقتور دوربینوں کے علاوہ ہبل خلائی دوربین اور ’’سوئفٹ گیمارے برسٹ مشن‘‘ نامی خلائی دوربین سے 10 ماہ تک اس مظہر کا مسلسل مشاہدہ کیا اور مختلف ضروری اعداد و شمار جمع کیے۔

اس تمام ڈیٹا کا محتاط تجزیہ کرنے کے بعد سائنسدانوں کا کہنا ہے کہ اس واقعے میں شدید گیما شعاعوں اور ایکسریز کا اخراج جس جگہ سے ہورہا ہے وہ ایک کہکشاں کے مرکزے سے بہت قریب ہے اور کہکشانی مرکزے میں بہت ہی ضخیم (super-massive) بلیک ہول موجود ہے۔ یہ بلیک ہول ہمارے سورج جیسے ایک ستارے کو ہڑپ کرنے میں مصروف ہے اور اسی بناء پر وہاں سے اتنی شدید نوعیت کی شعاعیں بھی خارج ہورہی ہیں۔

سائنسدانوں کا یہ بھی کہنا ہے کہ مذکورہ واقعے کی پچھلی وضاحت میں، جو ایک سپرنووا کے طور پر کی گئی تھی، بہت سی تکنیکی خامیاں موجود ہیں جب کہ یہ واقعہ کسی نئے ستارے کی تشکیل بھی قرار نہیں دیا جاسکتا۔ ان ہی باتوں کی بنیاد پر وہ اسے کائنات کا ایک منفرد واقعہ بھی قرار دے رہے ہیں۔

واضح رہے کہ بہت ہی ضخیم (super-massive) بلیک ہولز جنہیں اردو میں ’’فوق ضخیم بلیک ہولز‘‘ بھی کہا جاتا ہے، اپنی کمیت کے اعتبار سے عام بلیک ہولز کے مقابلے میں لاکھوں کروڑوں گنا زیادہ بڑے ہوتے ہیں۔ یعنی ایک فوق ضخیم بلیک ہول میں مادّے کی مقدار، ہمارے سورج کے مقابلے میں 10 لاکھ سے سے ہزاروں ارب گنا زیادہ ہوسکتی ہے۔
فوق ضخیم بلیک ہولز کہکشانی مرکزوں میں پائے جاتے ہیں اور اسی مناسبت سے انہیں ’’سرگرم کہکشانی مرکزے‘‘ (Active Galactic Nuclei) یا مختصراً ’’اے جی این‘‘ بھی کہا جاتا ہے۔ ہماری ملکی وے کہکشاں کے مرکز میں بھی ایسا ہی ایک بہت بڑا بلیک ہول موجود ہے جس کی کمیت کے بارے میں ماہرین نے اندازہ لگایا ہے کہ یہ ہمارے سورج کے مقابلے میں 40 لاکھ گنا زیادہ ہے۔ یعنی اس ایک بلیک ہول میں ہمارے سورج جیسے 40 لاکھ ستاروں سے بھی زیادہ کا مادّہ موجود ہے۔

چونکہ ہم بلیک ہولز کو نہیں دیکھ سکتے اس لیے ان کے مشاہدے کے لیے شدید ایکسریز اور گیما شعاعوں کے طاقتور جھماکوں کا سہارا لیا جاتا ہے جو ان میں گرتے ہوئے مادّے سے خارج ہوتے ہیں اور جنہیں ’’مادے کی آخری چیخ‘‘ بھی کہا جاتا ہے۔

ایمزٹی وی(اسلام آباد) پی آئی اے کے چیرمین اعظم سہگل نے اپنے عہدے سے استعفیٰ دے دیا۔
ذرائع کے مطابق پی آئی اے کے چیرمین اعظم سہگل نے اپنے عہدے سے استعفیٰ دے دیا جو انہوں نے پی آئی اے بورڈ کو بھیج دیا ہے جب کہ ترجمان پی آئی اے نے بھی اعظم سہگل کے استعفے کی تصدیق کردی ہے۔

ذرائع کا کہنا ہے کہ اعظم سہگل نے طیارہ حادثہ کے بعد پی آئی اے معاملات پر استعفیٰ دیا ہے۔ دوسری جانب چیرمین پی آئی اے اعظم سہگل کی جانب سے دیئے گئے استعفے میں مستعفی ہونے کی ذاتی وجوہات بتائی گئی ہیں۔
واضح رہے کہ 7 دسمبر کو پی آئی اے کی چترال سے اسلام آباد جانے والی پرواز حویلیاں کے قریب حادثے کا شکار ہوئی تھی جس کے نتیجے میں جہاز کے عملے سمیت تمام 47 افراد جاں بحق ہوگئے تھے۔

ایمزٹی وی(انٹرٹینمنٹ)فلم سایہ خدائے ذو الجلال 16 دسمبر کوعام نمائش کیلئے پیش کی جائیگی جسکی تشہیری مہم تیزی سے جاری ہے ۔ کاسٹ میں جاوید شیخ، معمررانا، حمزہ علی عباسی،سہیل سمیر،نور اور جیاعلی نمایاں ہیں ۔

معمررانا کا کہنا تھا فلم جذبہ حب الوطنی پرمبنی ہے جسے آئی ایس پی آر کے تعاون سے تیار کیا گیا ہے ۔امیدہے شائقین اسے پسند کرینگے ۔

ایمزٹی وی(کراچی)پیپلز پارٹی کے چیئرمین بلاول بھٹو زرداری نے پاکستان تحریک انصاف کے سربراہ عمران خان کو تنقید کا نشانہ بناتے ہوئے کہا ہے کہ یوٹرن والوں کے ساتھ نہیں چل سکتا۔ تفصیلات کے مطابق بلاول بھٹو زرداری نے سماجی رابطوں کی ویب سائٹ ’ٹوئٹر‘ پر جاری ایک پیغام میں کہا کہ سچ تو یہ ہے کہ یوٹرن والوں کے ساتھ نہیں چل سکتا، سر چکرا جاتا ہے۔

I honestly can't keep up with the U-turns. Makes ones head spin. https://t.co/irUO3Dtt0Q

— BilawalBhuttoZardari (@BBhuttoZardari) December 11, 2016

ایمزٹی وی(صحت)بلوچستان کےدور درازعلاقوں میں تعینات ڈاکٹروں کےالاؤنسزمیں110 فیصدتک اضافہ کردیاگیا ہے۔

صوبائی وزیرصحت میر رحمت بلوچ نے ایک تقریب میں بات چیت کرتے ہوئے کہا کہ بلوچستان کےدور درازعلاقوں میں تعینات ڈاکٹروں کےالاؤنسزمیں اضافہ عوام کو صحت کی سہولتوں کی فراہمی کیلئےکیاگیا ہے۔

ان کا کہناتھا کہ اندرون صوبہ ڈاکٹروں کی غیرحاضری کسی صورت برداشت نہیں کی جائےگی جبکہ صوبےکےتمام ڈسٹرکٹ ہیڈکوارٹراسپتالوں میں گائنا کالوجسٹ کی تعیناتی یقینی بنائی جارہی ہے۔

صوبائی وزیرصحت نے بتایا کہ اب تک صوبےکے24اضلاع میں گائناکالوجسٹ کی تعیناتی کردی گئی،اسی طرح تمام اضلاع کو ایمبولینسیں فراہم کردی گئی ہیں جبکہ

ایمزٹی وی(استنبول)استنبول میں ہونے ولے دھماکوں میں مرنے والوں کی نماز جنازہ ادا کردی گئی
صدر طیب اردوان نے شہید پولیس اہلکاروں کی نماز جنازہ میں شرکت کی۔

ترکی کا شہر استبول یکے بعد دیگرے ہونے والے 2 بم دھماکوں سے گونج اٹھا۔ پہلا دھماکہ فٹ بال سٹیدیم کے باہر ہوا جس کے تھوڑی دیر بعد قریبی پارک میں خودکش بمبار نے خود کو دھماکے سے اڑا دیا۔

دھماکوں کے نتیجے میں متعدد پولیس اہلکار بھی جاں بحق ہو گئے جن کی نماز جنازہ استنبول میں ادا کی گئی۔ ترک صدر طیب اردوان بھی نماز جنازہ میں شریک ہوئے۔ گاڑی سے ملنے والے شواہد کی بنیاد پر دس لوگوں کو حراست میں لیا گیا ہے۔

ابھی تک کسی نے دھماکے کی ذمہ داروی قبول نہیں کی تاہم اس سے پہلے ترکی میں ہونے والے دہشت گردی کے اکثر واقعات میں کرد علیحدگی پسند اور داعش ملوث رہے ہیں۔

ایمزٹی وی(اسپورٹس) فاسٹ باﺅلر محمد آصف نے کہا ہے کہ ٹیسٹ کرکٹ سمیت کوئی فارمیٹ نہیں چھوڑ رہا۔ میری عمر کو ایشو نہ بنایا جائے، مجھے یقین ہے کہ قومی ٹیم میں اپنی جگہ جلد حاصل کروں گا۔
تفصیلات کے مطابق محمد آصف نے کہا کہ ٹیسٹ کرکٹ سمیت کوئی فارمیٹ نہیں چھوڑ رہا اور نہ ہی میری عمر کو ایشو بنایا جائے کیونکہ ٹیم میں 40 سال سے بڑی عمر کے کھلاڑی کھیل رہے ہیں ۔ ان کا کہنا تھا کہ سلیکٹرز اس بات کو سمجھیں کہ ٹیم کو میری ضرورت ہے، ٹیم میں کوئی میری طرح نئی گیند سے بال کرانے والا نہیں۔

محمد آصف نے قائداعظم ٹرافی کے فائنل میچ میں واپڈا کی نمائندگی کرتے ہوئے پہلی اننگز میں 18.1 اوورز کرائے اور 29 رنز کے عوض 4 کھلاڑیوں کو پویلین کی راہ دکھائی۔ ان کی شاندار باﺅلنگ کی بدولت حبیب بینک لمیٹڈ کی ٹیم پہلی اننگز میں صرف 236 رنز پر آﺅٹ ہو گئی۔ انہوں نے ابتدائی اوورز میں ہی 3 کھلاڑیوں کو آﺅٹ کر کے مخالف ٹیم کو مشکل میں ڈال دیا۔

میچ کا پہلا دن ختم ہونے کے بعد گفتگو کرتے ہوئے محمد آصف نے کہا کہ ”میں نے گزشتہ میچوں میں بہت اچھی کارکردگی دکھائی ہے لیکن چونکہ آج فائنل میچ ہے اور یہ براہ راست نشر بھی کیا جا رہا ہے، میں صرف محظوظ ہو رہا تھا۔ میرے پاس ضروری ردھم موجود ہے اور یہ ایک بڑا میچ ہے اس لئے صرف بڑے کھلاڑی ہی ایسے مواقعوں پر کارکردگی دکھاتے ہیں۔ میں نے بہترین کھیل پیش کیا اور امید کر رہا ہوں کہ دوسری اننگز میں بھی ایسا ہی ہو گا۔“

قومی ٹیم میں واپسی سے متعلق گفتگو کرتے ہوئے محمد آصف نے کہا کہ ”میں وہی کر رہا ہوں جو مجھے کرنا چاہئے، باقی سب اللہ کے ہاتھ میں ہے اور اس کے بعد سلیکٹرز پر منحصر ہے۔ میں اپنی بہترین کوشش کر رہا ہوں اور اس سے زیادہ نہیں کر سکتا۔ بنیادی چیزیں اب بھی وہی ہیں جو میں بھولا نہیں اور میں بس محنت کر رہا ہوں۔ میں جانتا ہوں کہ میرے لئے اب بھی جگہ موجود ہیں جو اب تک کسی نے نہیں لی اور میں پراعتماد ہوں کہ میں جلد اپنی جگہ واپس لوں گا۔“

ایمزٹی وی(اسپورٹس)قومی ٹیم کے چیف سلیکٹر انضمام الحق کا کہنا ہے کہ آسٹریلیا کے خلاف کامیابی کے لیے یونس خان کو لازمی رنز کرنا ہوں گے جب کہ مصباح الحق کو کپتانی کا فیصلہ خود کرنا ہوگا۔

کراچی میں قائد اعظم ٹرافی کے فائنل کے موقع پر میڈیا سے بات کرتے ہوئے چیف سلیکٹر انضمام الحق نے کہا کہ قومی ٹیم نے آسٹریلیا الیون کے خلاف اچھا کھیل پیش کیا اور یہ پاکستان کی اچھی ابتدا ہے تاہم آسٹریلیا کے خلاف کامیابی کے لیے یونس خان کو لازمی رنز کرنا ہوں گے جب کہ نیوزی لینڈ سے ٹیسٹ سیریز میں شکست کی بڑی وجہ پریکٹس میچ نہ ملنا تھا۔

انضمام الحق کا کہنا تھا کہ ٹیسٹ کرکٹ میں کپتانی کرنے والے مصباح الحق کو اپنی کپتانی کا فیصلہ خود کرنا ہوگا جب کہ وکٹ کیپیر بیٹسمین کامران اکمل کی کارکردگی پر نظر ہے، اگر ٹیم میں ان کی ضرورت ہوئی تو انہیں ضرور قومی ٹیم کا حصہ بنایا جائے گا۔

ایمزٹی وی(اسلام آباد) ترجمان پی آئی اے نے حویلیاں میں حادثے کا شکار ہونے والے طیارے کے انجن میں پہلے سے خرابی سے متعلق خبروں کی سختی سے تردید کرتے ہوئے کہا ہے کہ اس قسم کی قیاس آرائیوں سے عوام غلط نتائج اخذ کر سکتے ہیں۔

ترجمان پی آئی اے نے حادثے کا شکار ہونے والے طیارے کے انجن میں پہلے سے کسی خرابی کی موجودگی کی خبروں کی تردید کرتے ہوئے کہا ہے کہ اس مرحلے پر یہ تاثر دینا کہ ایک انجن کا پنکھا اُلٹا چل رہا تھا جو حادثے کا باعث بنا قبل از وقت ہے، اس قسم کی قیاس آرائیوں سے عوام غلط نتائج اخذ کر سکتے ہیں۔ ان کا کہنا تھا کہ طیارے کے دونوں انجن ٹیک آف کے وقت بالکل ٹھیک کام کررہے تھے لہذا دورانِ پرواز کوئی مسئلہ ہوا جو حادثے کا باعث بنا جب کہ حادثے کی مکمل تحقیقات ایک خود مختار ادارہ سیفٹی انویسٹی گیشن بورڈ کر رہا ہے۔

ترجمان پی آئی اے نے کہا کہ جائے حادثہ سے ملنے والی تمام اشیاء بشمول کاک پٹ آلات تحقیقات میں اہم معلومات فراہم کرسکتے ہیں لیکن صرف چند اشیاء کی بنیاد پر حتمی رائے قائم کرنا گمراہ کن ہو سکتا ہے، سیفٹی انویسٹی گیشن بورڈ کو وزیراعظم کی جانب سے واضح ہدایات ہیں کہ تحقیقات کا عمل شفاف، غیر جانبدارانہ اور منصفانہ ہو اور سچ عوام کے سامنے جلد از جلد لایا جائے لہذا میڈیا سے درخواست ہے کہ تحقیقات مکمل ہونے تک اس کے بارے میں قیاس آرائیوں سے گریز کیا جائے۔ انہوں نے کہا کہ اے ٹی آر طیاروں میں دنیا کی معروف انجن ساز کمپنی Pratt & Whitney کے انجن استعمال کیے جاتے ہیں اور یہ کمپنی 1925 سے اب تک دنیا کی مشہور طیارہ ساز کمپنیوں کو 20 ہزار سے زائد انجن فروخت کر چکی ہے جن میں بوئنگ اور ایئر بس کے علاوہ ملٹری طیارے بھی شامل ہیں۔
واضح رہے کہ چند روز قبل چترال سے اسلام آباد جانے والی پی آئی اے کی پرواز ایبٹ آباد میں حویلیاں کے قریب گر کر تباہ ہوگئی تھی جس سے معروف نعت خواں جنید جمشید، ان کی اہلیہ، ڈپٹی کمشنر چترال، ان کی اہلیہ، بیٹی اور3 غیرملکیوں سمیت 47 افراد جاں بحق ہوگئے تھے۔

ایمزٹی وی(کراچی) وزیر ریلوے خواجہ سعد رفیق کا کہنا ہے کہ پاکستان کو بانیان پاکستان کے تصورات کے مطابق آگے نہیں بڑھا سکے لیکن پھر بھی اسلامی ممالک میں ہمارا پیارا وطن ایک مستحکم ملک نظرآتا ہے جب کہ ریاستی ادارے آئین پاکستان کے دائرے میں رہ کرکام کررہے ہیں۔

مزار قائد پر حاضری دینے کے بعد میڈیا سے بات کرتے ہوئے وزیر ریلوے خواجہ سعد رفیق کا کہنا تھا کہ پاکستان کے ریاستی ادارے آئین پاکستان کے دائرے میں رہ کرکام کررہے ہیں، جمہوریت کی موجودہ شکل ہماری منزل نہیں بلکہ ہمیں اس میں شفافیت لانی ہے۔ انہوں نے کہا کہ جمہوریت 4 بار ڈی ریل ہوئی لیکن اب راستہ نکل آیا ہے اوراب سیاسی جماعتوں میں بلوغت آ رہی ہے۔

کراچی سے متعلق پوچھے گئے سوال پر خواجہ سعد رفیق کا کہنا تھا کہ شہر پر چھائے آسیب کے سائے چھٹ رہے ہیں،فورسز اور سول حکومت نے کراچی کے امن و امان کے لئے بہت کام کیا اور کر بھی رہے ہیں، آنے والی نسل کو جلتا ہوا نہیں بلکہ روشن ، خوشحال اور مستحکم پاکستان دیں گے۔

ان کا کہنا تھا کہ پاکستانی قوم ایک پرعزم قوم ہے اس نے اپنا راستہ خود بنایا ہے، عوام اپنی امنگوں کے مطابق اپنے نمائمدوں کے فیصلے کرتے ہیں، وسائل نہ ہونے کے باوجود پاکستان ایٹمی طاقت بنا، پاکستان کوبانیان پاکستان کے تصورات کے مطابق آگے نہیں بڑھا سکے لیکن اس کے باوجود اگر اسلامی ممالک کی جانب دیکھیں تو پاکستان ایک مستحتم ملک نظرآتا ہے۔