ایمزٹی وی(پشاور) ترقیاتی کام نہ ہونے، فنڈز نہ ملنے اور دیگر مطالبات پر کونسل ضلع ناظم سے ناراض ہو گئے ہیں اور عدم اعتماد کی تحریک لانے کی دھمکی دیدی ہے۔
تفصیلات کے مطابق ترقیاتی کام نہ ہونے، فنڈز نہ ملنے اور دیگر مطالبات پر ضلع ناظم اور کونسلروں کے درمیان عدم اعتماد کی فضاءپیدا ہو گئی ہے اور ناراض کونسلروں نے عدم اعتماد کی تحریک لانے کی دھمکی دی ہے۔

ناراض کونسلروں کے سربراہ افضل نےمیڈیا سے گفتگو کرتے ہوئے کہا کہ ضلع ناظم نے ڈیڑھ سال میں صرف 20لاکھ روپے کے فنڈزجاری کئے ہیں اور ہر علاقے میں ٹھیکیدار کام ادھورے چھوڑ کر جا چکے ہیں۔ ان کا کہنا تھا کہ تحریک عدم اعتماد کیلئے مطلوبہ 92 کونسلروں کی تعداد پوری ہے اور اگر وزیراعلیٰ نے ضلع ناظم تبدیل نہ کیا تو اپنا ناظم لانے میں آزادہونگے ۔

رحمان افضل نے کہا کہ گزشتہ روز ضلع ناظم نے 10 رکنی جرگے کے ساتھ ملاقات سے انکار کیا تھا اہم اب وزیراعلیٰ نے مذاکرات کیلئے ناراض کونسلروں کو منگل کے روز بلایا ہے۔ ملاقات کے بعد ہی مستقبل کا لائحہ عمل طے کریں گے

ایمز ٹی وی ( صحت) عالمی ادارہ صحت ڈبلیو ایچ او کا کہنا ہے کہ وہ تمام کام جو کوئی نارمل انسان باآسانی انجام دے سکتا ہے، انہیں کرنے میں کسی قسم کی رکاوٹ یا مشکل معذوری کے زمرے میں آتی ہے۔ اس لحاظ سے دنیا کی 15 فیصد آبادی یعنی ایک ارب افراد کسی نہ کسی قسم کی معذوری کا شکار ہیں۔

پاکستان سمیت دنیا بھر میں آج معذور اور خصوصی افراد کا عالمی دن منایا جارہا ہے۔

ان ایک ارب افراد میں سے 9 کروڑ سے زائد تعداد بچوں کی ہے۔

پاکستان میں مردم شماری نہ ہونے کے باعث معذوری کا شکار افراد کی صحیح تعداد بتانا مشکل ہے تاہم ایک اندازے کے مطابق پاکستان میں 50 لاکھ سے زائد افراد کسی نہ کسی قسم کی معذوری کا شکار ہیں۔ یہ تعداد ناروے، کویت، نیوزی لینڈ اور لبنان کی کل آبادی سے بھی زائد ہے۔

عالمی ادارہ صحت، عالمی بینک اور اقوام متحدہ کی رپورٹس کے مطابق دنیا میں غربت میں اضافے، صحت اور تعلیم سے محرومی، غیر محفوظ طریقے سے کام کرنے، آلودگی اور پینے کے صاف پانی سے محرومی سمیت دیگر سہولتوں کے فقدان سے دنیا بھر میں ذہنی و جسمانی طور پر معذور ہونے والے افراد کی تعداد میں اضافہ ہوا۔

دنیا کے کئی ممالک میں معذوروں اور خصوصی افراد کے ساتھ امتیازی سلوک روا رکھا جاتا ہے۔ انہیں تعلیم اور نوکری سمیت دیگر سہولیات میں کوٹے کے تحت مواقع فراہم کیے جاتے ہیں لیکن کچھ عرصہ قبل دنیا کے 45 مختلف ممالک نے معذور اور خصوصی افراد کا کوٹہ ختم کر کے انہیں عام افراد کی طرح مواقع فراہم کرنے کا قانون بنایا ہے۔

کچھ عرصہ قبل پاکستانی طبی محققین نے 30 ایسے جینز کی دریافت کی تھی جو ذہنی معذوری کا سبب بنتے ہیں۔

تحقیق میں شامل یونیورسٹی کے وائس چانسلر ڈاکٹر جاوید اکرم کا کہنا تھا کہ پاکستان میں خاندان میں شادی کے باعث ذہنی معذوری کی شرح دیگر دنیا سے نسبتاً بلند ہے۔ ’خاندانوں میں آپس میں شادیاں مختلف جینیاتی و ذہنی بیماریوں کا سبب بنتی ہیں‘۔

ان کا کہنا ہے کہ ان کی ٹیم کا ارادہ ہے کہ حکومت پاکستان پر زور دیں کہ وہ شادی سے قبل چند جینیاتی ٹیسٹوں کو ضروری بنائیں اور اس کو قانون کو حصہ بنائیں تاکہ نئی آنے والی نسلوں کو مختلف ذہنی امراض سے بچایا جاسکے اور ان کی پیدائش سے قبل ان امراض کی روک تھام یا ان کا علاج کیا جاسکے۔

ایمزٹی وی(راولپنڈی) آرمی چیف جنرل قمر جاوید باجوہ اور بیگم قمر جاوید باجوہ نے گزشتہ روز ساڑھے چھ بجے آرمی گیسٹ ہاوس میں محفل میلاد کی شاندار تقریب کا اہتمام کیا جس میں بہت سے نعت خواں اور علما نے حصہ لیا۔

چیف آف آرمی اسٹا ف جنر ل قمر جاوید باجوہ نے محفل میلاد میں شرکت کے لیے اپنے دوستوں کو دعوت دی۔آرمی چیف کی جانب سے محفل میلاد کی پروقار تقریب کے اہتمام سے ان کے بارے میں گردش کرنے والی تمام افواہیں دم توڑ گئیں ۔واضح رہے کہ آرمی چیف قمر جاوید باجوہ پر الزام عائد کیا جا رہا تھا کہ وہ قادیانی ہیں

ایمز ٹی وی(مانیٹرنگ ڈیسک) روس نے اپنی نوعیت کا جدید ترین روبوٹ تیار کر لیا ہے جو نہ صرف چاند کی تسخیر کیلئے استعمال کیا جائیگا بلکہ انسانوں سے بھی مشابہت رکھتاہے۔

فیڈر نامی یہ روبوٹ چھ فٹ لمبا ہے اور160کلو وزنی ہے ۔ فیڈر بے پناہ صلاحیتوں کا مالک ہے جو ماہر ڈرائیور ہے اور گاڑی انتہائی مستعدی سے چلاتا ہے ۔

فیڈر بیس کلو تک وزن بھی با آسانی اُٹھا لیتا ہے اوراسکرو ٹائٹ سے لے کر دیگر پاور ٹولزکا استعمال بھی بخوبی جانتا ہے ۔

روسی ماہرین کے مطابق فیڈر کو آئندہ5سالوں میں بین الاقوامی خلائی اسٹیشن پر بھیجے جانے کا امکان ہے جس کا مقصد چاند کی زمین پر تحقیق ہے۔

ایمزٹی وی(تعلیم/ کراچی)سندھ حکومت نے طالب علم احمد کا امریکہ میں علاج کرانے کیلئے کوششیں تیز کر دی ہیں اور وزیراعلیٰ سندھ نے بچے اور اس کے والدین کیلئے امریکی ویزہ کی درخواستیں امریکی قونصل جنرل کے حوالے کر دی ہیں۔

تفصیلات کے مطابق وزیراعلیٰ سندھ سید مراد علی شاہ سے امریکی قونصل جنرل کی سربراہی میں وفد نے ملاقات کی۔

ذرائع کے مطابق ملاقات میں وزیر تعلیم سندھ، چیف سیکرٹری اور سیکرٹری ایجوکیشن بھی موجود تھے۔ وزیراعلیٰ سندھ نے لاڑکانہ کے طالب علم احمد کے ویزے کیلئے کاغذات امریکی قونصل جنرل کے حوالے کئے تو امریکی قونصل جنرل نے جلد از جلد ویزہ دینے کی یقین دہانی کرائی۔

ایمز ٹی وی(صحت) ہماری دنیا میں انسانوں کے مختلف بلڈ گروپس ہوتے ہیں، یعنی خون کے بنیادی عناصر تو یکساں ہوتے ہیں مگر اس میں کچھ مختلف چیزیں انہیں چار گروپس میں تقسیم کرتی ہیں۔

سائنسدان ابھی تک یہ جاننے کی کوشش کررہے ہیں کہ آخر انسانوں کے اتنے بلڈ گروپس کیوں ہیں مگر ان مختلف گروپس کا خیال نہ رکھنا جان لیوا ثابت ہوتا ہے۔

سائنسدانوں کے خیال میں یہ بلڈ گروپس لاکھوں برسوں سے انسانی جسم کا حصہ ہیں مگر ڈاکٹرز کو اس بارے میں 116 سال پہلے علم ہوا تھا۔

1900 سے قبل لتعداد افراد کی ہلاکت اس وجہ سے ہوجاتی تھی کیونکہ ان کے جسم میں دوسرے گروپ کا خون چڑھا دیا جاتا تھا۔

مگر کیا چیز ہے جو کسی مخصوص بلڈ گروپ کو کسی کے لیے جان لیوا اور کسی کے لیے حیات بخش ثابت ہوتی ہے؟

ان چاروں بلڈ گروپس کو جو چیز ایک دوسرے سے الگ کرتی ہے وہ اینٹی جنز ہے یعنی ایسے پروٹین یا کاربوہائیڈریٹ جو خون میں شامل ہوکر اینٹی باڈیز بنانے کا عمل تیز کرتے ہیں۔

مثال کے طور پر اے بلڈ گروپ میں اینٹی جنز بھی اے ہوتے ہیں جبکہ بی بلڈ گروپ میں ٹائپ بی اینٹی جنز ہوتے ہیں۔

اگر اے اینٹی جنز اور بی اینٹی جنز کو ملایا جائے تو وہ جسم کے اندر ایک جنگ شروع کردیتے ہیں۔

ہمارے جسموں کے اندر بلڈ پلازما میں ایسے اینٹی باڈیز ہوتے ہیں جو کسی بھی انجان چیز کی روک تھام کرتے ہیں بشمول ان اینٹی جنز کے جو ہمارے بلڈ گروپ سے مطابقت نہیں رکھتے۔

جب جسم میں دوسرے گروپ کے اینٹی جنز داخل ہوتے ہیں تو یہ اینٹی باڈیز ان پر حملہ آور ہوجاتی ہیں جس کے نتیجے میں خون میں خرابی آنے لگتی ہے یعنی خون کی شریانیں بلاک ہوسکتی ہیں، دوران خون تھمنے کی وجہ سے موت کا خطرہ ہوتا ہے۔

کسی دوسرے گروپ کے خون کی چند ملی میٹر مقدار ہی جان لیوا ثابت ہوسکتی ہے یعنی اپنے بلڈ گروپ سے واقفیت بہت ضروری ہوتی ہے۔

ویسے تو سائنسدان خون کے گروپس کو 35 کی تعداد میں تقسیم کرتے ہیں (یعنی انسانوں اور جانوروں کے گروپس) مگر دنیا کی نوے فیصد انسانی آبادی 8 بلڈ گروپس کی حامل ہوتی ہے یعنی اے پازیٹو، اے نیگیٹو، بی پازیٹو، بی نیگیٹو، او پازیٹو، او نیگیٹو، اے بی پازیٹو، اے بی نیگیٹو۔

اے پازیٹو اور او پازیٹو ایسے بلڈ گروپس ہیں جو مجموعی طور پر 65 فیصد تمام انسانی بلڈ گروپس پر مشتمل ہیں جبکہ اے بی نیگیٹو سب سے زیادہ نایاب ہوتا ہے۔

ایمزٹی وی(تعلیم) بلوچستان بھر میں آج ہونے والا پانچویں جماعت کا پرچہ آوٹ ہونے کے باعث منسوخ کردیا گیا
تفصیلات کے مطابق چیئر مین امتحانات سعد اللہ توخئی کا کہنا ہے کہ بلوچستان میں پانچویں جماعت کا پرچہ آوٹ ہو گیا تھا جس کے باعث پرچے کو فوری طور پر منسوخ کرنے کا حکم جاری کردیا گیا ۔پرچے کی نئی تاریخ کا اعلان بعد میں کیا جائے گا۔

ایمز ٹی وی(ما نیٹرنگ ڈیسک) اگر تو آپ واٹس ایپ استعمال کرتے ہیں تو جان لیں کہ دنیا بھر میں کروڑوں فونز پر اب یہ ایپ کام نہیں کرسکے گی۔جی ہاں واٹس ایپ اب پرانے فونز میں کام نہیں کرسکے گی کیونکہ دنیا کے مقبول ترین میسنجر نے ایسی ڈیوائسز کے لیے سپورٹ ختم کرنے کا فیصلہ کیا ہے ۔

اس حوالے سے واٹس ایپ نے رواں سال کے شروع میں اعلان کرتے ہوئے کہا تھا کہ متعدد ڈیوائسز پر ایپ سپورٹ 2016 کے آخر تک ختم کردی جائے گی جس کے بعد ان پر اس چیٹ ایپ کو استعمال نہیں کیا جاسکے گا۔

اس میسنجر کی سپورٹ تمام بلیک بیری فونز، آئی فون تھری جبکہ کچھ نوکیا اور اینڈرائیڈ ڈیوائسز پر ختم کی جائے گی۔یہ سپورٹ دسمبر میں کسی وقت بھی ختم کردی جائے گی یعنی اب محض چند دن ہی رہ گئے ہیں۔واٹس ایپ کے اس فیصلے سے بلیک بیری کا ہر فون متاثر ہوگا چاہے اس میں نیا بلیک بیری 10 سسٹم ہی کیوں نہ موجود ہو۔

اس طرح نوکیا S40، نوکیا S60، ہر وہ فون جو اینڈرائیڈ 2.1 یا 2.2 اور ونڈوز 7.1 پر چل رہا ہوگا اس پر بھی واٹس ایپ کی سپورٹ ختم ہوجائے گی۔

ان تمام ڈیوائسز کو استعمال کرنے والے صارفین کی تعداد کروڑوں میں ہے اور اس فیصلے سے وہ ضرور متاثر ہوں گے ۔

واٹس ایپ کا کہنا تھا یہ فونز استعمال کرنے والے صارفین سال کے ختم ہونے سے قبل نئی ڈیوائسز پر منتقل ہوجائیں۔کمپنی کے بقول اس فیصلے سے سروس میں مزید سکیورٹی ٹولز اور نئے فیچرز کا اضافہ کرنے میں مدد ملے گی۔

ایمز ٹی وی (مانیٹرنگ ڈیسک) نیشنل جیوگرافک نے اس سال آب و ہوا میں تبدیلی (کلائمٹ چینج) اور گلوبل وارمنگ سے وابستہ کئی اہم ایوارڈ یافتہ تصاویر جاری کی ہیں جو نہ صرف شاہکار کا درجہ رکھتی ہیں بلکہ اس ہولناک موسمیاتی تبدیلی کے خوفناک اثرات کو بھی ظاہر کرتی ہیں۔ ان میں سے بعض تصاویر کے لیے تو کسی عنوان کی ضرورت ہی نہیں تاہم ہر تصویر کے نیچے اس کی تفصیل جاری کی گئی ہے۔ نیشنل جیوگرافک کے اس مقابلے میں دنیا بھر سے درجنوں

فوٹوگرافروں نے اپنی تصاویرجاری کی ہیں۔

یہ تصویر ترکی میں زغروس کے اہم جنگلات کی تباہی کا منظر دکھارہی ہے۔ درختوں کی بے دریغ کٹائی سے ترکی کے یہ جنگلات 30 فیصد تک کم ہوکر رہ گئے ہیں۔

آئس لینڈ کے گلیشیئر بہت تیزی سے پگھل رہے ہیں۔ ماہرین کے مطابق 2000 کے بعد سے آئس لینڈ کے گلیشیئرپگھلنے کی رفتار میں غیرمعمولی اضافہ ہوا ہے۔ تصویر لینے والے فوٹوگرافر ٹام شائفینیلا کے مطابق 15 سال سے بھی کم عرصے میں آئس لینڈ گلیشیئر 12 فیصد تک پگھل چکے ہیں۔

بھارتی علاقے مغربی بنگال میں دریائے گنگا کی ایک تصویر، جہاں موجود خشکی کے ٹکڑے بہت تیزی سے دریا بُرد ہورہے ہیں۔ بپھرے ہوئے دریاؤں میں طغیانی سے اس کے کنارے چوڑے ہورہے ہیں اور زمینی کٹاؤ جاری ہے۔ یہ تصویر آرکا دتہ نے اتاری ہے۔

قطبین پر برف پگھلنے سے برفانی ریچھ شدید مشکلات کے شکار ہیں۔ اس تصویر میں ایک مردہ ریچھ دیکھا جاسکتا ہے جو اپنی طبعی عمر پوری کرنے یا پھر غذائی کمی کی وجہ سے مرا ہے۔ ماہرین کا خیال ہے کہ یہ خوراک کی قلت سے مرا ہے کیونکہ اس کے دانت کسی نوجوان ریچھ کی ہی طرح ہیں۔ گلوبل وارمنگ سے برفانی ریچھوں کی بقا کو شدید خطرات لاحق ہیں۔

یہ تصویر بنگلا دیش کے شہر جمال پور کے ایک مقام اسلام پور میں کھینچی گئی ہے۔ اس میں ایک خاتون بانسوں سے بنے تختے پر آگے بڑھ رہی ہیں۔ بنگلا دیش پہلے ہی سائیکلون، طوفان ، سیلاب اور دیگر قدرتی آفات کا شکار ہے۔

اس تصویر کا عنوان ہے ’’خود تباہی کا کینوس‘‘ جس میں انسانی لالچ اور تیل کے بے دریغ استعمال کے انسان اور زمین پر ہونے والے اثرات کو دیکھا جاسکتا ہے۔ انسانی جلد پر خود انسانی غلطیوں کے ہولناک نتائج کو اس تصویر میں دیکھا جاسکتا ہے۔