ایمزٹی وی(تعلیم/سندھ) سندھ پروفیسرز اینڈ لیکچررز ایسو سی ایشن کے وفد نے پروفیسر انعام احمد چیئرمین انٹر میڈیٹ بورڈ کراچی سےملاقات کی۔

سپلا کے وفد کی قیادت مرکزی صدر پروفیسر فیروزالدین صدیقی نے کی سپلا کے وفد نے پروفیسرانعام احمد کو ماضی کی طرح آئندہ بھی امتحانات کے انعقاد سے لیکر نتائج کی تیاری کے عمل میں شفافیت کے لیے اپنے ہر ممکن تعاون کی یقین دہانی کراتے ہوئے، بورڈ سے متعلق کالج اساتذہ کے مسائل بیان کیے ۔

سپلا کے وفد نے کہا کہ بورڈ کی کورسز کمیٹی کی فوری تشکیلِ نو کی جائے، چھوٹے امتحانی مراکز کے بجائے بڑے امتحانی مراکز کا قیام لایا جائے

ایمزٹی وی(تعلیم/ کراچی) صوبائی محکمہ تعلیم کے دو حصوں میں کئے جانے کے باعث سندھ کی سرکاری و نجی جامعات اور انسٹیٹیوٹس کی سینڈیکیٹ اور بورڈ آف گورنرز میں محکمہ تعلیم کی نمائندگی کا مسئلہ پیدا ہو گیا ہے۔

جامعات اور انسٹیٹیوٹس کے ایکٹ کے مطابق سیکرٹری تعلیم بربنائے عہدہ سنڈیکیٹ/بورڈ آف گورنرز کا رکن ہوتا ہے تاہم سیکرٹری تعلیم کا عہدہ ختم ہونے کے باعث اب یہ مسئلہ پیدا ہو گیا ہے کہ سینڈیکیٹ میں نمائندگی کون کرے، سیکرٹری کالج ایجوکیشن یا سیکرٹری اسکول ایجوکیشن۔ اس کے علاوہ وزیراعلیٰ ہائوس میں بھی تعلیم کا ایک شعبہ موجود ہے جو جامعات اور تعلیمی بورڈز کے معاملات دیکھتا ہے جسے سیکرٹری بورڈز و جامعات کہا جاتا ہے اس طرح عملی طور پر تعلیم کے تین محکمے ہو چکے ہیں اور صورتحال میں کون سا سیکرٹری، جامعات کی سینڈیکیٹ اور بورڈ آف ڈائریکٹرز میں نمائندگی کرے گا۔

جامعہ کراچی کے وائس چانسلرز ڈاکٹر قیصر نے کہا کہ ہم اس حوالے سے کنٹرولنگ اتھارٹی کو خط لکھ رہے ہیں کہ جامعہ کراچی کی سینڈیکیٹ کے اجلاس میں سیکرٹری تعلیم کو بلایا جائے کیونکہ اب سیکرٹری تعلیم کا عہدہ ختم ہو چکا ہے اور ایکٹ کے مطابق سیکرٹری تعلیم بربنائے جامعہ کراچی کی سنڈیکیٹ کا رکن ہوتا ہے۔

ملک کی پہلی لاء یونیورسٹی کے بانی وائس چانسلر ڈاکٹر جسٹس قاضی خالد نے میڈیا کو بتایا کہ اس معاملے کے لئے جامعات اور انسٹیٹیوٹس کے ایکٹ میں ترمیم ضروری ہے اسی طرح وفاقی ہائر ایجوکیشن کا رکن بھی سنڈیکیٹ کا رکن ہوتا ہے اس کی جگہ سندھ ہائر ایجوکیشن کا رکن بنانے کے لئے بھی ترمیم ضروری ہے محض نوٹیفکیشن سے کام نہیں چل سکتا۔

ایمزٹی وی(تعلیم/ کراچی)وفاقی اردو یونیورسٹی نے بی ایس اور ماسٹرز میں داخلوں میں توسیع کردی ۔

جاری کردہ اعلامیہ کے مطابق جامعہ اردو یونیورسٹی میں صبح بی ایس اور ماسٹرزمیں داخلہ لینے والے خواہشمند افراد 10دسمبر تک فارم جمع کراسکتے ہیں۔

ایمزٹی وی(تعلیم/ کراچی) اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے اعلان کیا ہے کہ انٹرمیڈیٹ سال اول کامرس پرائیویٹ اور ہوم اکنامکس کے سالانہ امتحانات برائے 2016ء کے نتائج کا اعلان بروز جمعرات یکم دسمبر2016ء کوکیا جارہا ہے۔

میڈیا کے نمائندے نتائج کی کاپی انٹربورڈ آفس کے کمرہ نمبر 28سے دوپہر دو بجے کے بعد حاصل کرسکتے ہیں

ایمزٹی وی(واشنگٹن) امریکا نے جنرل قمر جاوید باجوہ کو پاک فوج کا نیا سپہ سالار بننے پر مبارکباد دی ہے۔
نائب ترجمان امریکی محکمہ خارجہ مارک ٹونر نے اپنے بیان میں امریکا کی جانب سے جنرل قمر جاوید باجوہ کو پاکستان کا نیا آرمی چیف بننے پر مبارکباد دی اور ساتھ ہی پاکستان میں فوج کی کمان کی تبدیلی کا خیرمقدم بھی کیا ہے۔
واشنگٹن میں میڈیا بریفنگ کے دوران مارک ٹونر نے مزید کہا کہ دہشت گردی کے خاتمے کے لیے پاکستان کے ساتھ مل کر کام کر رہے ہیں جب کہ پاکستان بھی دہشت گردی کے خاتمے کے لیے تعاون کر رہا ہے۔

مارک ٹونر کا کہنا تھا کہ پاکستان نے دہشت گردوں کے ہاتھوں بہت نقصان اٹھایا ہے اور دہشت گردی کے خاتمے تک پاکستان کے ساتھ تعاون جاری رکھیں گے۔

ایمزٹی وی(واشنگٹن) امریکا کے نومنتخب صدر ڈونلڈ ٹرمپ کی تقریب حلف برداری میں شرکت کے خواہشمند افراد کے لیے پیکیج کا اعلان کر دیا گیا۔
افتتاحی تقریب کا کم سے کم ٹکٹ 25 ہزار ڈالر ( 25 لاکھ روپے) ہے۔ تقریب میں وی وی آئی پی شرکت کے خواہشمند کو 10 لاکھ ڈالر یعنی 10 کروڑ پاکستانی روپے خرچ کرنا ہوں گے۔
10 لاکھ ڈالر کا ٹکٹ لینے والے کو ڈونلڈ ٹرمپ اور میلانیا ٹرمپ کے ساتھ کھانے اور ٹرمپ کی کابینہ کے نامزد ارکان سے ملنے کا موقع ملے گا۔ ٹرمپ کی افتتاحی تقریب کمیٹی نے ساڑھے 7 کروڑ ڈالرکا ہدف مقرر کیا ہے۔

ایمزٹی وی(ہیوانا)کیوبا میں آنجہانی رہنما فیڈل کاسترو کی آخری رسومات میں متعدد عالمی رہنماؤں نے شرکت کی جن میں وینزویلا کے صدر نکولس مادورو، نکاراگوا کے صدر ڈانیئل اورٹیگا، بولیویا کے صدر ایوو مورالیس اور ایکواڈور کے سربراہِ مملکت رافائیل کوریعا بھی شامل تھے۔

مرکزی تقریب دارالحکومت ہوانا کے انقلاب چوک میں منعقد ہوئی۔ اس موقع پر لاکھوں شہریوں نے اپنے قائد کے حق میں نعرے لگاتے ہوئے اْنھیں خراج عقیدت پیش کیا۔ فیڈل کاسترو گزشتہ جمعے کی شام 90 برس کی عمر میں انتقال کر گئے تھے۔

ایمزٹی وی(اسلام آباد)وزیراعظم نواز شریف نے مشیر خارجہ سرتاج عزیز کو ہارٹ آٰف ایشیا کانفرنس میں شرکت کے لیے بھارت جانے کی ہدایت کردی ۔

میڈ یا رپورٹس کے مطابق وزیراعظم ہاوس میں مشیر خارجہ سرتاج عزیز نے نواز شریف سے ملاقات کی جس میں انہوں نے وزیراعظم کو ہارٹ آف ایشیا کانفرنس میں شرکت کے لیے مجوزہ دورہ بھارت پر بریفنگ دی ۔

اس موقع پر وزیراعظم نے سرتاج عزیز کو ہارٹ آف ایشیا کانفرنس میں پاکستان کی نمائندگی کی ہدایت دی ۔ذرائع کا کہنا ہے کہ ہارٹ آف ایشیا کانفرنس میں پاکستان خطے کی سیکیورٹی کو در پیش چیلنجز کا معاملہ اٹھائے گا اور مسئلہ کشمیر کے حل کے لیے مناسب اقدامات کرنے پر بھی بات کی جائے گی ۔

ایمزٹی وی(لاہور)لاہورمیں پیپلزپارٹی کے یوم تاسیس کے جلسے سے خطاب میں بلاول بھٹوزرداری نے حکومت کو خوب آڑے ہاتھوں لیا، چیرمین پیپلز پارٹی کا کہنا تھا کہ ہم نے (ن) لیگ حکومت سے 4 مطالبات کیے ہیں جس کا انہوں نے ہٹ دھرمی کا مظاہرہ کرتے ہوئے جواب نہیں دیا، میں نے اپنی ذات کے لیے حکومت سے کچھ نہیں مانگا، صرف پارلیمنٹ کو طاقتور کرنے کی بات کررہا ہوں۔

انہوں نے کہا کہ حکومت ہمیں سڑکوں پر آنے پر مجبور نہ کرے، 27 دسمبر کو دما دم مست قلندرہوگا، پورالاہور سڑکوں پر ہوگا پھر آپ کو لگ پتا جائے گا جب سب مل کر تخت لاہورکی آمریت کو گرائیں گے۔
بلاول بھٹو زرداری کا کہنا تھا کہ پاناما اسکینڈل دنیا کا سب سے بڑا اسکینڈل ہے، یوسف رضا گیلانی کو صرف ایک خط نہ لکھنے پر نا اہل کیا گیا۔ انہوں نے کہا کہ نواز شریف کو تیسری بار وزیراعظم بنوایا گیا، اب اگلے الیکشن میں دھاندلی نہیں ہونے دوں گا، شیر نے بلی بن کر بھاگنے کی کوشش کی تو بھاگنے نہیں دیں گے، شہید بی بی کی طرح جمہوری طریقے استعمال کریں گے۔

انہوں نے کہا کہ ہم سے زیادہ آئین اور قانون کون جانتا ہے، ہم انصاف کے لیے جمہوری انقلابی اصلاحات لائیں گے، میں سندھ میں تبدیلی لے آیا ہوں، پارٹی میں تبدیلی لارہا ہوں، اگر میرا ساتھ دیا تو پورے ملک میں جمہوری انقلاب لاؤں گا۔
پیپلز پارٹی کے چیرمین نے کہا کہ ایجنڈے کے ذریعے نئی جمہوری اصلاحات کے لیے کوشش کریں گے، ہم نیا ایجنڈا لائیں گے جو پاکستان کے لیے مکمل عملی ترقی پسند پلیٹ فارم ہوگا۔ انہوں نے کہا کہ لاہورمیں آج نئی پیپلز پارٹی جنم لے رہی ہے، پورے ملک میں ضلعی تنظیم نو سے گزر رہے ہیں، پیپلز پارٹی آزاد کشمیر ،گلگت بلتستان اور چاروں صوبوں کی زنجیر ہے۔

ایمزٹی وی(اسلام آباد) قومی اسمبلی میں حکومت نے تسلیم کیا ہے کہ پاکستان میں خط غربت سے نیچے زندگی گزارنے والے افراد کی تعداد 5 کروڑ 30 لاکھ سے زائد ہے جو مجموعی آبادی کا تقریباً 30 فیصد ہے۔
آئی این پی کے مطابق گزشتہ روز وزیر منصوبہ بندی احسن اقبال کی جانب سے قومی اسمبلی میں جمع کرائے گئے تحریری جواب میں کے مطابق ملک کی 29.50 فیصد آبادی خط غربت سے نیچے زندگی گزار رہی ہے جو کہ تقریباً53 ملین افراد بنتے ہیں، اگر کوئی فرد ہر ماہ 3 ہزار 30 روپے سے کم آمدن رکھتا ہو تو وہ خط غربت سے نیچے تصور ہوتا ہے۔

محصولات وصولی میں 62 فیصد اضافہ ہوا، سرکاری ملازمین کیلیے ہاؤسنگ بلڈنگ ایڈوانس کی مد میں کم سے کم 50 لاکھ روپے مقرر کرنیکی کوئی تجویز زیر غور نہیں، کم تنخواہ والوں کو اگر اتنی رقم دی جائے تو اس کی ریکوری مشکل ہے۔

وزارت داخلہ کی جانب سے بتایا گیا نیشنل ایکشن پلان کے تحت ملک میں فوجداری انصاف کے نظام کو بہتر بنانے کے لیے اسٹڈی جاری ہے، عبوری رپورٹ جلد سامنے آجائے گی، ای میل یا فیکس کے ذریعے ایف آئی آر درج نہیں کی جا سکتی، افغان مہاجرین کی واپسی کے لیے پالیسی موجود نہیں، سندھ میں پاک بھارت سرحد پر دیوار تعمیر کرنیکی کوئی تجویز نہیں