ایمزٹی وی(لاہور) لاہور ہائیکورٹ کے 14نئے ججزنے آج اپنے عہدے کا حلف اٹھالیا، چیف جسٹس لاہور ہائیکورٹ جسٹس منصور احمد نے ان سے حلف لیا۔

تفصیلات کے مطابق 14نئے ججز کے حلف اٹھانے کے بعد لاہور ہائیکوٹ کی تمام خالی اسامیاں پوری ہوگئیں۔ تقریب میں ایڈووکیٹ جنرل پنجاب اہم وکلاءبھی شریک تھے۔

حلف اٹھانے والے ججز میں جسٹس اسجد، جسٹس طارق سلیم،جسٹس مجاہد سلیم،جسٹس عبداستار، جسٹس حبیب اللہ،جسٹس خالد عباسی، جسٹس بشیر،جسٹس چودھری عبدالعزیز،جسٹس جوادالحسن ، جسٹس احمد رضا،جسٹس طارق، جسٹس محمدعلی، جسٹس مزمل اختر شامل ہیں۔

ایمزٹی وی(کراچی) آرمی چیف جنرل راحیل شریف نے نیول ہیڈ کوارٹرز کا الوداعی دورہ کیا جہاں پاک بحریہ کے سربراہ ایڈمرل ذکاءاللہ نے ان کا استقبال کیا جس کے بعد پاک بحریہ کے چاق و چوبند دستے نے معزز مہمان کو سلامی پیش کی۔

اس کے بعد پاک بحریہ کے سربراہ اور آرمی چیف جنرل راحیل شریف کے درمیان ملاقات ہوئی جس دوران نیول چیف نے آرمی چیف کی خدمات کو سراہتے ہوئے انہیں خراج تحسین پیش کیا اور کہا کہ ضرب عضب کی کامیابیوں نے ملکی سلامتی اور ترقی پر گہرے اثرات چھوڑے، ضرب عضب کی کامیابیاں جنرل راحیل شریف کی مرہون منت ہیں ۔

اس موقع پر آرمی چیف نے آپریشن ضرب عضب میں پاک بحریہ کے بھرپور تعاون پر نیول چیف کا شکریہ ادا کیا اور کہا کہ سمندری سرحدوں کے دفاع میں پاک بحریہ کا کلیدی کردار ہے جبکہ بحری دفاع پاک، چین اقتصادی راہداری کی ترقی کیلئے ناگزیر ہے ۔

ایمزٹی وی(کراچی) کیماڑی میں کے پی ٹی آئل ٹرمینل میں لگنے والی آگ شدت اختیار کرگئی اور اب تک کی اطلاعات کے مطابق آگ سے جھلس کر ایک شخص جاں بحق ہوگیاہے , عینی شاہدین کے مطابق آتشزدگی کے بعد دھماکے سے فیول ٹینک کی چھت بھی اڑ گئی۔

مقامی میڈیا کے مطابق ایک ہزار ٹن فیول سے بھرے ایک آئل ٹینکر میں لگنے والی آگ پر قابو پانے کیلئے کے پی ٹی کی چھ اور کے ایم سی کی دوگاڑیاں امدادی کارروائیوں میں مصروف ہیں ، ایک مرتبہ کمی ہونے کے بعد آگ دوبارہ شدت اختیار کرگئی اور اب آگ پر قابوپانے کے لیے فوم اور کیمیکل کا استعمال کیاجارہاہے ۔

دوسری طرف آگ کے بڑھنے اور مزید پھیلنے کے خدشے کے پیش نظر امدادی ٹیموں کے علاوہ رینجرز اہلکار بھی موجود ہیں جنہوں نے علاقے کو گھیرے میں لے رکھاہے تاکہ امدادی کارروائیوں میں کسی بھی قسم کی رکاوٹ نہ آئے ۔

ایمزٹی وی(اسلام آباد) آرمی چیف جنرل راحیل شریف نے پاک فضائیہ کی پیشہ وارانہ صلاحیتوں کی تعریف کرتے ہوئے کہا ہے کہ پاک فضائیہ کے افسران کی پیشہ وارانہ صلاحیت اور عزم قابل تعریف ہے ،مشترکہ تعاون سے آپریشن ضرب عضب میں کامیابیاں ملیں۔

تفصیلات کے مطابق آرمی چیف جنرل راحیل شریف نے ائیر ہیڈ کوارٹرز کا الوداعی دورہ کیا جہاں پاک فضائیہ کے سربراہ ائیر چیف مارشل سہیل امان نے ان کا والہانہ استقبال کیا۔ ذرائع کے مطابق پاک فضائیہ کے چاق و چوبند دستے نے آرمی چیف جنرل راحیل شریف کے اعزاز میں گارڈ پیش کیا جس کے بعد پاک فضائیہ کے سربراہ اور آرمی چیف کے درمیان ملاقات ہوئی۔

اس موقع پر پاک فضائیہ کے سربراہ ائیرچیف مارشل سہیل امان نے کہا کہ تینوں مسلح افواج کے درمیان ہم آہنگی کے فروغ میں جنرل راحیل کا کردار اہم رہا اور دہشت گردی کو جڑ سے اکھاڑنے میں بھی جنرل راحیل شریف کا اہم کردار ہے۔ انہوں نے مضبوط ملکی دفاع کیلئے آرمی چیف کی کوششوں کو سراہتے ہوئے کہا کہ آپریشن ضرب عضب میں پاک فوج اور فضائیہ نے یک جان دو قالب ہو کر کام کیا۔ ائیر چیف مارشل نے آرمی چیف جنرل راحیل شریف کیلئے نیک خواہشات اور جذبات کا اظہار بھی کیا۔

ذرائع کے مطابق آرمی چیف جنرل راحیل شریف نے پی اے ایف کی پیشہ وارانہ صلاحیتوں کی تعریف کرتے ہوئے کہا کہ پاک فضائیہ کے افسران کی پیشہ وارانہ صلاحیت اور عزم قابل تعریف ہے، مشترکہ تعاون سے آپریشن ضرب عضب میں کامیابیاں ملیں۔ ان کا کہنا تھا کہ پاک فضائیہ ملک کی فضائی سرحدوں کی بہترین نگہبان ہے ۔

ایمزٹی وی(گوادر)پاک چین اقتصادی راہداری (سی پیک) منصوبے میں روس کو شامل کرنے کا فیصلہ کر لیا گیا ہے اور پاکستان نے روس کو گوادر پورٹ کے ذریعے گرم پانی تک رسائی دینے پررضامندی ظاہرکردی ہے۔

روس اور پاکستان کے درمیان اسٹرٹیجک و معاشی تعلقات میں 14 سال بعد اہم پیشرفت ہوئی ہے اور روسی انٹیلی جنس فیڈرل سیکیورٹی سروسز (ایف ایس بی ) کے سربراہ الیگزینڈر بورٹنی کوو (Bortnikov Alexander) نے گزشتہ ماہ کے آخر میں پاکستان کا اہم دورہ کیا۔فیڈرل سیکیورٹی سروسز کے سربراہ نے دورہ پاکستان کے دوران انٹرسروسز انٹیلی جنس (آئی ایس آئی)کے چیف جنرل رضوان اختر سمیت انٹیلیجنس و دفاع کے افسران سے ملاقاتیں کیں اوردونوں ملکوں نے انٹیلیجنس،دفاع و دیگرشعبوں میں تعاون بڑھانے پرتبادلہ خیال کیا۔

مقامی اخبار کے مطابق پاکستانی حکام سے مذاکرات کے بعد روس کوپاک چین اقتصادی راہداری منصوبے میں شامل کرنے کا فیصلہ کیا گیا۔اس طرح روس کوگوادر پورٹ کے ذریعے گرم پانی تک رسائی مل جائے گی۔روس کیساتھ اقتصادی راہدای منصوبے کو تجارتی مقاصد کیلئےاستعمال کرنے کیلئے دونوں ملکوں کے مابین مستقبل میں باضابطہ معاہدے بھی کیے جائیں گے۔روسی انٹیلیجنس کے سربراہ کو پاکستانی ہم منصب کی جانب سے قیمتی پستولوں کاتحفہ بھی دیا گیا۔

ذرائع کے مطابق روس کو سب سے اہم خدشات سیکیورٹی کے حوالے سے لاحق تھے تاہم گزشتہ دنوں گوادر سے کنٹینرز کے قافلے کے بحفاظت مشرق وسطیٰ اور افریقی ممالک پہنچنے کے بعد روس کے خدشات دور ہوگئے اور اس نے حکومت پاکستان سے سی پیک میں شمولیت کی درخوست کی ہے۔ این این آئی کے مطابق عالمی طاقتوں کی پاک چین اقتصادی راہدری منصوبے میں دلچسپی بڑھ گئی ہے۔

نجی ٹی وی کے مطابق برطانیہ، جرمنی، اٹلی اور دیگر اہم ممالک سی پیک میں شامل ہونا چاہتے ہیں۔ برطانوی وزیر خارجہ کا دورہ بھی سیپیک سے استفادہ کیلئے ہے جبکہ آئندہ سال برطانوی وزیراعظم کے دورہ پاکستان سے قبل منصوبوں کو حتمی شکل دے دی جائے گی۔

ایمزٹی وی(اشک آباد)ترکمانستان میں عالمی پائیدار ٹرانسپورٹ کانفرنس میں خطاب کرتے ہوئے انہوں نے کہا کہ ایشیائی ترقیاتی بینک کے تعاون سے بنیادی ڈھانچے کی تعمیر جاری ہے ۔ان کا کہنا تھا کہ پاکستان ریلوے کی اپ گریڈ یشن پر کام جاری ہے،2030کے ترقیاتی ایجنڈ ے کے تحت سڑکوں کی تعمیر پر توجہ دے رہے ہیں،مربوط علاقائی رابطوں سے ترقی ممکن ہے ۔

وزیراعظم نے کہا کہ سی پیک وسط ایشیائی ممالک اور چین کے درمیان ایک رابطہ ہے ،اس منصوبے کے ذریعے ہمارے پورٹس تک رسائی آسان ہو گی ۔انہوں نے کہا کہ پاکستان خطے میں رابطے کی اہمیت سمجھتا ہے اس لیے ہمارے مختلف ملکوں کے ساتھ تجارتی راہداری کے معاہدے ہیں ۔

نواز شریف نے مزید کہا کہ ملک میں امن ،سیکیورٹی اور ترقی کے لیے ہم کو مل کر کام کرنا ہو گا ،پڑوسی ملک کے ساتھ امن کے بغیر ترقی ممکن نہیں ۔

ایمزٹی وی(کیوبا) کیوبا کے سابق صدر فیڈل کاسترو انتقال کر گئے ۔غیر ملکی خبر رساں ادارے کے مطابق کیوبا کے سابق صدر فیڈل کاستروطویل علالت کے بعد 90سال کی عمر میں انتقال کر گئے ۔ وہ 1959ءسے 1976ءتک کیوبا کے وزیر اعظم رہے اور 1976ءسے 2008ےءتک کیوبا کے صدر رہے ۔
کیمونسٹ رہنما فیڈل کاسترو نے 2008ءمیں اقتدار اپنے بھائی کو سونپنے سے پہلے کیوبا پر پچاس سال تک حکمرانی کی ۔ کیوبا کے لوگ انکی تعریف میں کہتے ہیں کہ فیڈل کاسترو نے عوام کو کیوبا واپس لوٹایا تاہم ناقدین کے خیال میں انکے دور میں اپوزیشن پر مظالم ڈھائے گئے ۔

فیڈل کاسترو 30 سال سے زائد عرصے تک کیوبا کے صدر رہے مگر وہ علالت کے باعث میڈیا اور دیگر تقاریب میں کم ہی دیکھے جاتے تھے ۔

ایمزٹی وی(اسلام آباد)نیا آرمی چیف کون ہوگا؟ اس سوال کا جواب آئندہ 24 گھنٹوں میں ملنے کا امکان ہے اور امید ہے کہ وزیراعظم نواز شریف آج ترکمانستان سے واپسی پر نئے آرمی چیف کے نام کی منظوری دے دیں گے۔ آرمی چیف کے علاوہ چیئرمین جوائنٹ چیفس آف اسٹاف کمیٹی جنرل راشد محمود بھی آج رٹائر ہورہے ہیں اور اس اہم عہدے پر بھی تقرری ہونا ہے۔

قبل ازیں خیال کیا جارہا تھا کہ آرمی چیف اور چیئرمین جوائنٹ چیفس آف اسٹاف کمیٹی ایک ہی روز ریٹائر ہونگے مگر اب فوجی حکام نے وضاحت کردی ہے کہ جنرل راشد محمود نے جنرل راحیل شریف سے ایک روز قبل عہدہ سنبھالا تھا، اس لئے وہ ایک روز قبل ریٹائر ہونگے۔
نئے چیئرمین جوائنٹ چیفس آف اسٹاف کمیٹی پیر کے روز عہدے کا حلف اٹھائیں گے جبکہ اس کے اگلے روز نئے آرمی چیف پاک فوج کی کمان سنبھالیں گے۔ اس کا مطلب ہے کہ وزیراعظم نئی تقرریوں کی منظوری کو اتوار سے آگے نہیں لے جاسکتے۔ اعلیٰ فوجی حکام نے نام ظاہر نہ کرنے کی شرط پر بتایا کہ چیئرمین جوائنٹ چیفس آف اسٹاف کمیٹی اور آرمی چیف کے عہدوں پر نئی تقرریاں اتوار کے روز ہی کی جائیں گی۔

توقع ہے کہ وفاقی حکومت اتوار کی صبح نئے چیئرمین جوائنٹ چیف آف اسٹاف کمیٹی اور آرمی چیف کی تقرری کے حوالے سے نوٹیفکیشن جاری کرے گی مگر آج رات نوٹیفکیشن کے اجرا کے امکان کو بھی مسترد نہیں کیا جاسکتا۔ فوجی حکام نے تصدیق کی ہے کہ دونوں نئی تقرریوں کے لیے پاک فوج کے پانچ سینئر تھری اسٹار جرنیلوں کے ناموں پر مشتمل سمری وزیراعظم ہاؤس بھجوا دی گئی ہے۔

اس سے قبل معلوم ہوا تھا کہ4 سینئر تھری اسٹار جرنیل لیفٹیننٹ جنرل زبیر محمود حیات، لیفٹیننٹ جنرل اشفاق ندیم، لیفٹیننٹ جنرل جاوید اقبال رمدے اور لیفٹیننٹ جنرل قمر جاوید باجوہ چیئرمین جوائنٹ چیفس آف اسٹاف کمیٹی اور آرمی چیف کی دوڑ میں شامل ہیں مگر اب کور کمانڈر گوجرانوالہ لیفٹیننٹ جنرل اکرام الحق کا نام بھی فہرست میں شامل کرلیا گیا ہے۔

اس فہرست میں سے کسی کو بھی چیئرمین اور آرمی چیف کے عہدوں پر تعینات کرنا وزیراعظم کا صوابدیدی اختیار ہے۔علاوہ ازیں جوائنٹ اسٹاف ہیڈکوارٹرز میں جنرل راشد محمود کے اعزاز میں الوداعی تقریب کا اہتمام کیا گیا۔ آئی ایس پی آر سے جاری بیان کے مطابق جنرل راشد محمود پاک فوج میں 41 سال تک خدمات انجام دینے کے بعد آج ریٹائر ہورہے ہیں۔

اس موقع پر خطاب کرتے ہوئے جنرل راشد محمود نے کہا کہ انھیں پاک فوج کا حصہ رہنے پر فخر ہے اور فوج قومی سیکیورٹی چیلنجز سے نمٹنے کیلیے مزید آگے بڑھی ہے۔ انھوں نے درپیش چیلنجز سے نمٹنے کیلیے پاک فوج کے عزم و حوصلے کی تعریف کی اور فورسز کی صلاحیتوں پر بھرپور اعتماد کا اظہار کیا۔

ایمزٹی وی(مہمند ایجنسی) سیکیورٹی فورسز نے غلنئی کیمپ پر دہشت گردوں کا حملہ ناکام بناتے ہوئے 4 دہشت گردوں کو ہلاک کر دیا جب کہ فائرنگ کے تبادلے میں ایف سی کے 2 اہلکار شہید اور 14 زخمی بھی ہوئے۔
پاک فوج کے شعبہ تعلقات عامہ (آئی ایس پی آر) کے مطابق دہشت گردوں نے غلنئی کے علاقے میں سیکیورٹی چیک پوسٹ پر خود کش حملہ کرنے کی کوشش کی جسے ایف سی کے جوانوں نے ناکام بنا دیا، دہشت گردوں کے ساتھ فائرنگ کے تبادلے میں ایف سی کے 2 جوان شہید اور 14 ہوئے جب کہ جوابی کارروائی میں 4 دہشت گرد بھی ہلاک ہوئے۔

آئی ایس پی آر کے مطابق خود کش حملہ آور مسجد کو نشانہ بنانا چاہتے تھے جنہیں سیکیورٹی فورسز نے مسجد کے باہر ہی ہلاک کر دیا۔

ایمزٹی وی(اسلام آباد)قومی اسمبلی کے اسپیکر ایاز صادق نے سپریم کورٹ میں تحریک انصاف کے اراکین کے استعفوں سے متعلق جواب جمع کروا دیاہے ۔

تفصیلات کے مطابق ایاز صادق کا کہناتھا کہ عمران خان نے استعفوں کی تصدیق کو کھٹائی میں ڈالنے کیلئے مختلف حربے استعمال کیے ،جس انداز سے استعفے دیئے گئے وہ خود بخود منظور نہیں ہوتے ،اراکین نے براہ راست استعفے مجھے جمع نہیں کروائے،تصدیق کیلئے بار بار بلانے کے باوجود بھی استعفوں کی تصدیق کرنے کیلئے کوئی رکن اسمبلی نہیں آیا جبکہ ممبر اسمبلی کی جانب سے بھی پی ٹی آئی اراکین کی مسلسل غیر حاضری کیخلاف کوئی تحریک جمع نہیں کروائی گئی ۔

انہوں نے کہاکہ اراکین کی مسلسل 40روز تک غیر حاضری پر کارروائی قومی اسمبلی کے سپیکر کا اختیار نہیں ہے ۔