ایمز ٹی وی (صحت) امریکی کینسر سوسائٹی کی رپورٹ میں انکشاف کیا گیا ہے کہ دو ہزارتیس تک پچپن لاکھ خواتین کینسر کے باعث جان سے ہاتھ دھو بیٹھیں گی۔ رپورٹ میں انکشاف کیا گیا ہے کہ دو دہائیوں سے بھی کم عرصے میں خواتین میں کینسر کی شرح میں ساٹھ فیصد اضافہ ہوا ہے۔

تفصیلات کے مطابق امریکی کینسر سوسائٹی کی رپورٹ میں انکشاف کیا گیا ہے کہ کینسر میں مبتلا زیادہ تر خواتین کا تعلق ترقی پذیر ممالک سے ہو گا جو غربت کی وجہ سے علاج نہیں کرا سکتیں۔ کینسر سے ہونے والی اموات میں اکثریت نوجوان اور درمیانی عمر کے لوگوں کی ہو گی۔ گلوبل ہیلتھ کی سینئر نائب صدر سیلے کوول کا کہنا ہے کہ دنیا بھر میں ہر سات میں سے ایک خاتون کینسر کا شکارہو جاتی ہے۔

پیرس میں ورلڈ کینسر کانگریس کو پیش کی گئی ایک رپورٹ میں کہا گیا ہے دو ہزار بارہ میں کینسر کے سڑسٹھ لاکھ کیس سامنے آئے اور دنیا بھر میں پینتیس لاکھ خواتین کینسر کی وجہ سے ہلاک ہوئیں۔ چھپن فیصد مریضوں اور چونسٹھ فیصد اموات کا تعلق ترقی پذیر ممالک سے ہے۔ دو ہزار تیس میں کینسر کے مریضوں کی تعداد ننا نوے لاکھ تک جا پہنچے گی جن میں سے پچپن لاکھ خواتین موت کے منہ چلی جائیں گی۔

ایمز ٹی وی (تعلیم /کراچی) گورنر سندھ ڈاکٹرعشرت العبادخان نے کہا ہے کہ عوام کو صحت عامہ کی سہولیات ان کی دہلیز پر فراہم کرنا حکومت کی اولین ذمے داری ہے۔

ان خیالات کا اظہار انہوں نے گورنر ہائوس میں اپنے فنڈ سے مختلف اسپتالوں کو 50 ڈائیلائسز مشینیں دینے کی تقریب سے خطاب کرتے ہوئے کیا۔

اس موقع پر صوبائی وزیر صحت ڈاکٹر سکندر میندھرو، مختلف یونیورسٹیز کے وائس چانسلر ، سیکریٹری صحت ڈاکٹر عثمان چاچڑ اور معروف صنعت کار بھی موجود تھے۔

انہوں نے کہا کہ جگر کی تبدیلی کے بعد اب ڈائو یونیورسٹی میں گردوں کی تبدیلی شروع کرنے کے اقدامات کئے جارہے ہیں۔

گورنر سندھ نے ڈائلائسیز مشینوں کی تقسیم کا ذکر کرتے ہوئے کہا کہ ان میں سے 10 لانڈھی میڈیکل کمپلیکس ، 10 عباسی شہید اسپتال، 10 اوجھا کیمپس، 5 شہید بے نظیر بھٹو میڈیکل یونیورسٹی لاڑکانہ ، 5 نذیر حسین اسپتال جبکہ 10 پاکستان رینجرز کے اسپتالوں کو دی جائیں گی۔

اس موقع پر صوبائی وزیر صحت ڈاکٹر سکندر میندھرو، جناح اسپتال کے ڈاکٹر طارق اور ڈائو یونیورسٹی کی ڈاکٹر رعنا مسعود نے بھی خطاب کیا۔

ایمزٹی وی(اسلام آباد)الیکشن کمیشن میں وزیر اعظم نواز شریف، ان کے داماد کیپٹن ریٹائرڈ صفدر، عمران خان، جہانگیر ترین اور لیاقت تراکئی کی نااہلی سے متعلق مختلف ریفرنسز کی سماعت ہوئی۔ عمران خان اور جہانگیر ترین کی نااہلی کے ریفرنسوں کی سماعت کے موقع پر ان کے وکیل حامد خان نے موقف اختیار کیا کہ آج ان کے موکلین کے خلاف پٹیشنر خود پیش نہیں ہوئے، اس لئے ریفرنس کو مسترد کیا جائے، جس پر چیف الیکشن کمشنر نے ریمارکس دیئے کہ بال ہماری کورٹ میں آگئی ہے، فیصلہ ہمیں کرنا ہے، عمران خان اور جہانگیر ترین کی حاضری ضروری ہے، دونوں کو نوٹس جاری کر رہے ہیں، کمیشن نے عمران خان اور جہانگیر ترین کی نااہلی سے متعلق 3 درخواستیں عدم پیروی پرخارج کردیں جب کہ اسپیکر کی جانب سے بھجوائے گئے ریفرنسز پر 16 نومبر تک جواب طلب کرلیا ہے۔

وزیراعظم نوازشریف کی نااہلی کے 4 ریفرنسوں کی سماعت پر چیف الیکشن کمشنر نے استفسار کیا کہ یہی کیس سپریم کورٹ میں بھی زیر سماعت ہے، کیوں نہ عدالت کے فیصلے تک سماعت روکی جائے، جس پر وزیراعظم کے وکیل سلمان بٹ نے سماعت روکنے کا مطالبہ کرتے ہوئے کہا ماضی میں نواز شریف اور بینظیر بھٹو کے کیسز میں سپریم کورٹ میں سماعت کے باعث ہائی کورٹ بھی سماعت روک چکی ہے، پیپلز پارٹی کے لطیف کھوسہ نے موقف اختیار کیا کہ ہم سپریم کورٹ میں فریق نہیں، عدالت نے الیکشن کمیشن کو سماعت سے نہیں روکا، الیکشن کمیشن اللہ اور عوام کے سوا کسی کے ماتحت نہیں ہے، وہی اہلیت کا فیصلہ کرنے والا مناسب فورم ہے۔

حامد خان نے بھی لطیف کھوسہ کے موقف کی تائید کرتے ہوئے کہا کہ سپریم کورٹ میں سماعت کے باوجود الیکشن کمیشن سماعت کا اختیار رکھتا ہے، سپریم کورٹ نے الیکشن کمیشن کو کارروائی روکنے کا حکم نہیں دیا۔

ایمز ٹی وی (تجارت) وفاقی وزیر خزانہ سینیٹر اسحاق ڈار نے پنشنرز کی جانب سے پنشن کے حصول میں مشکلات اور تاخیر کا نوٹس لیتے ہوئے اے جی پی آر کو پنشنرز کی شکایت دور کرنے اور پنشن کی بروقت ادائیگی کو یقینی بنانے کیلئے اقدامات کرنے کی ہدایت کر دی۔

گزشتہ روز وفاقی وزیر خزانہ اسحاق ڈار نے پنشنرز کی جانب سے بینکوں کی مختلف برانچوں میں پنشن کے حصول میں تاخیر اور مشکلات کا نوٹس لیتے ہوئے کہا کہ حکومت نے پنشنرز کو براہ راست ان کے بینک اکاؤنٹس میں پنشن کی منتقلی کاسسٹم کیا ہے ۔

انہوں نے اے جی پی آر کو ہدایت کی کہ سسٹم کو جلد از جلد فعال بنانے ،پنشنرز کی شکایات کو دور کرنے اور پنشن کی بروقت ادائیگی کو یقینی بنانے کیلئے اقدامات کیے جائیں۔ وزیر خزانہ نے کہا کہ حکومت بزرگ شہریوں بشمول پنشنرز کی فلاح و بہبود میں اضافے کیلئے پر عزم ہے ۔

ایمز ٹی وی ( تجارت) بلوچستان کی عوام کیلئے خوش خبری ہے کہ دو کمپنیاں صوبے میں پچاس میگا واٹ بجلی کے گیارہ پاور پلانٹس لگائیں گی جن میں چار پلانٹس کوئٹہ میں لگائے جائیں گے جن کی تنصیب سے صوبے میں بجلی کے بحران کا مسلہ حل ہوجائے گا۔

سرکاری حکام کے مطابق کہ انر ٹیک کویت انوسٹمنٹ اتھارٹی کی جانب سے بلوچستان میں 50پچاس میگا واٹ کے دس پاور پلانٹ نصب کئے جائیں گے، جن میں سے 3پاور پلانٹ کوئٹہ میں لگائے جا رہے ہیں، جبکہ نظام انرجی پاکستان کوئٹہ میں 50میگا واٹ کا پاور پلانٹ لگا رہی ہے۔

ان منصوبوں پر تمام سرمایہ کاری یہ دونوں کمپنیاں کریں گی جبکہ صوبائی حکومت معاونت فراہم کرے گی۔ اس ضمن میں وزیراعلیٰ سیکریٹریٹ میں منعقدہ تقریب میں حکومت بلوچستان اور دونوں سرمایہ کار کمپنیوں کے درمیان لیٹر زآف انٹرسٹ پر دستخط کئے گئے۔

انر ٹیک کویت انوسٹمنٹ اتھارٹی کی جانب سے کمپنی کے کنسلٹنٹ یاسر ملک جبکہ صوبائی حکومت کی جانب سے چیئرمین بلوچستان پاور ڈویلپمنٹ بورڈ و ایڈیشنل چیف سیکریٹری منصوبہ بندی و ترقیات محمد داؤد بڑیچونے لیٹرز آف انٹرسٹ پر دستخط کئے۔

ایمزٹی وی(حب)گڈانی شپ بریکنگ یارڈ میں کھڑے جہاز کے آئل ٹینک میں دھماکے کے نتیجے میں جاں بحق افراد کی تعداد 18 ہوگئی جب کہ متعدد افراد زخمی ہیں جن میں سے بیشتر کی حالت تشویشناک ہے۔

گزشتہ روز کراچی کے قریب بلوچستان کی بندرگاہ گڈانی کے شپ بریکنگ یارڈ میں کھڑے جہاز کے آئل ٹینک میں دھماکے کے باعث جاں بحق ہونے والے افراد کی تعداد 18 ہوگئی ہے جب کہ 70 سے زائد افراد زخمی ہیں جن میں سے بیشتر کی حالت تشویشناک ہے۔

ایدھی حکام کا کہنا ہے کہ زخمیوں میں سے 24 افراد بری طرح جھلسے ہوئے ہیں جنہیں سول اسپتال کراچی منتقل کیا گیا ہے اور دیگر زخمیوں کو فوری طور پر حب منتقل کیا گیا۔

دوسری جانب گڈانی شپ بریکنگ یارڈ میں ابھی بھی امدادی کارروائیوں کا سلسلہ جاری ہے اور جہاز میں لگی آگ بجھانے کی بھی بھرپورکوششیں جاری ہیں تاہم آگ کی شدت زیادہ ہونے کے باعث فائربریگیڈ حکام کو کام کرنے میں دشواری کا سامنا ہے۔

واضح رہے کہ گزشتہ روز گڈانی شپ بریکنگ یارڈ میں کھڑے جہاز کے آئل ٹینکر میں اس وقت دھماکا ہوگیا جب وہاں بڑی تعداد میں لوگ جہاز توڑنے میں مصروف تھے، دھماکا اس قدرشدید تھا کہ اس کی آواز کئی کلو میٹر دور تک سنی گئی، دھماکے کے بعد جہاز میں آگ لگ گئی، جس نے جہاز پر موجود لوگوں کو اپنی لپیٹ میں لے لیا۔

ایمز ٹی وی (تجارت) ہنڈرڈ انڈیکس نے 1650 پوائنٹس گرنے میں ہفتہ لگایا اور 1400 پوائنٹس سے واپسی صرف ایک دن میں کردی،سات دن کی کسر ایک دن میں پوری کردی۔

سات دن میں ساڑے 16سو پوائنٹس کی کمی کو ایک ہی دن میں 1400 پوائنٹس اضافے نے پورا کردیا ،عمران خان کے یوم تشکر منانے کے اعلان پر حصص بازار میں زبر دست تیزی رہی۔

وہ سرمایہ کار جو دھرنے کی خبروں پر محتاط ہوکر مارکیٹ سے باہر ہوگئے تھے، نئی خبرملنے پر پھر لوٹ آئے، سات روز میں ہنڈریڈ انڈیکس 1650 پوائنٹس گرا تھا، جسے واپس ہونے میں محض ایک خبر کا انجکشن ہی کافی رہا ۔

معاشی تجزیہ کار محمد سہیل کے مطابق عمران خان کی خبر کے ساتھ پاکستان کی ریٹنگ بہتر ہونے اور پاکستانی معیشت پر اعتماد کی خبر نے حصص بازار کے سرمایہ کاروں کو متحرک کردیا، کاروبار کے اختتام پر ہنڈرڈ انڈیکس 1406 پوائنٹس اضافے سے 41ہزار 300 پوائنٹس کی سطح پر بند ہوا۔