ایمز ٹی وی(مانیٹرنگ ڈیسک) کیا آپ اپنے اینڈرائیڈ اسمارٹ فون کو جادوئی چھڑی کی طرح استعمال کرنا پسند کریں گے؟
اگر ہاں تو گوگل نے واقعی آپ کے اینڈرائیڈ فونز کو کچھ جادوئی خصوصیات سے لیس کردیا ہے بس آپ کو ہیری پوٹر سیریز کے کچھ منتروں کو بولنا ہوگا۔
جی ہاں گوگل نے ایک بلاگ پوسٹ میں اعلان کیا ہے کہ ہیری پوٹر سیریز کے سیکوئل 'فنٹاسٹک بیسٹس اینڈ ویئر ٹو فائنڈ دیم' کے حوالے سے اس نے وارنر برادرز سے اشتراک کرتے ہوئے اینڈرائیڈ صارفین کے لیے ڈیوائسزمیں کچھ جادوئی خصوصیات کا اضافہ کردیا ہے۔
اس کے لیے آپ کو ' اوکے گوگل' کہنے کے بعد ' Lumos ' کے الفاظ دہرانے ہوں گے جس کے بعد فلیش لائٹ آن ہوجائے گی۔
اسے بند کرنے کے لیے ' Nox ' کہنا ہوگا، اسی طرح اوکے گوگل کے بعد ' Silencio ' کہہ کر آپ ڈیوائس کے نوٹیفکیشن کو ٹرن آف کرسکتے ہیں۔
یہ فیچرز فونز پر ایکٹیو کردیئے گئے ہیں اور ان کے لیے کسی قسم کی اَپ ڈیٹ کی ضرورت نہیں۔
ہیری پوٹر فلموں اور کتابوں میں ' Lumos ' کے ذریعے کردار اپنی چھڑیوں کو فلیش لائٹ میں بدل دیتے تھے جبکہ ' Silencio ' کے ذریعے لوگوں کو خاموش کیا جاتا۔
اس سے ہٹ کر گوگل نے اس فلم کے حوالے سے دیگر پراڈکٹس میں بھی فیچرز کو شامل کیا ہے۔
چونکہ یہ فلم 1920 کی دہائی کے نیویارک پر مبنی دکھائی گئی ہے لہذا گوگل اسٹریٹ ویو میں اسے دکھانے کا انتظام کیا گیا ہے جبکہ گوگل ایلو میں 'فنٹاسٹک بیسٹس' اسٹیکر پیک بھی رواں ماہ متعارف کرایا جائے گا۔
یہ فلم رواں ماہ 18 نومبر کو ریلیز کے لیے پیش کی جارہی ہے۔

ایمزٹی وی(اسلام آباد)وزیراعظم نواز شریف کی زیر صدارت وفاقی کابینہ کا اجلاس جاری ہے جس میں میری ٹائم پالیسی سمیت 25 نکاتی ایجنڈے کی منظوری دی جائے گی۔
وزیراعظم نواز شریف کی زیر صدارت وفاقی کابینہ کا اجلاس جاری ہے جس میں سانحہ کوئٹہ کے شہداء کے لئے فاتحہ خوانی اور میری ٹائم سیکیورٹی کی پالیسی سمیت 25 نکاتی ایجنڈے کی منظوری دی جائے گی۔

اجلاس کے آغاز میں وزیراعظم نواز شریف نے ریاست کی رٹ قائم کرنے میں قانون نافذ کرنے والے اداروں کے کردار کو سراہا جب کہ وزیر داخلہ چوہدری نثار نے اسلام آباد لاک ڈاؤن سے مؤثر طور پر نمٹنے پر پولیس اور ایف سی کی کوششوں کی تعریف کی۔ وزیر داخلہ کا کہنا تھا کہ وزیراعظم کی رہنمائی میں اپنا فرض ادا کیا جب کہ پولیس اور ایف سی کے جوانوں نے اپنی ذمہ داریاں بخوبی نبھائیں۔

ایمز ٹی وی(ٹیکنالوجی) واشنگٹن اسٹیٹ یونیورسٹی کے ماہرین نے اسمارٹ فون سے منسلک ہونے والا ایک ایسا مختصراوردستی آلہ ایجاد کرلیا ہے جو مختلف اقسام کے سرطان (کینسر) کی تشخیص 99 فیصد درستگی سے کرسکتا ہے۔
یہ آلہ اسٹیٹ یونیورسٹی آف واشنگٹن کے چینی نژاد سائنسدان نے تیار کیا ہے اورانہیں امید ہے کہ پیداواری مرحلے پر پہنچنے کے بعد یہ آلہ صرف 150 ڈالرمیں دستیاب ہوسکے گا جو اس سے حاصل ہونے والے بہترین اورقابلِ بھروسہ نتائج کو مدنظر رکھتے ہوئے انتہائی کم خرچ ہے۔
اگرچہ یہ اسمارٹ فون کی مدد سے کینسرکی تشخیص کرنے کے قابل کوئی پہلا آلہ ہر گز نہیں لیکن اس لحاظ سے منفرد ہے کہ یہ کم خرچ اور تیز رفتار ہونے کے ساتھ ساتھ 99 فیصد درست نتائج دیتا ہے جو کسی مہنگی میڈیکل لیبارٹری ہی سے حاصل ہوسکتے ہیں۔ اس کی ایک اضافی خوبی یہ بھی ہے کہ اس سے ایک وقت میں 8 نمونوں کی جانچ پڑتال کی جاسکتی ہے۔
اس آلے میں نمونے رکھنے کے لیے ایک حصہ ہے جس میں 96 چھوٹے چھوٹے پیالہ نما خانے ہوتے ہیں جن کے ساتھ منشور (prism) بھی منسلک ہوتے ہیں جب کہ اس کے بالکل پیچھے خاص طرح کی روشنی خارج کرنے والا حصہ موجود ہوتا ہے۔ نمونوں سے گزرنے والی روشنی ان پیالہ نما خانوں سے گزرتے دوران مختلف رنگوں میں تقسیم ہوجاتی ہے جو ایک انکساری جالی (diffraction grating) سے گزرتی ہوئی اسمارٹ فون کے کیمرے تک پہنچتی ہے۔
رنگوں میں منقسم اس روشنی کا تجزیہ کرنے کے لیے اسمارٹ فون میں ایک خصوصی ایپ (app) انسٹال کی جاتی ہے جس کا مقصد (نمونوں سے آنے والی روشنی کی بنیاد پر) مخصوص مادّوں کی موجودگی یا عدم موجودگی کا پتا چلانا ہوتا ہے۔ ان میں ’’بایومارکر انٹرلیوکن6‘‘ (IL-6) بھی شامل ہے جس کی قدرے زیادہ مقدار میں موجودگی پھیپھڑوں، پروسٹیٹ، جگر، چھاتی، جلد اور ٹشوز میں سرطان کی اہم علامت سمجھی جاتی ہے۔

ایمزٹی وی(اسلام آباد/تعلیم)جی الیون کے قریب نجی یونیورسٹی کی بس کی ٹکر سے موٹر سائیکل سوار طالب علم جاں بحق جب کہ 30 طالبات زخمی ہو گئیں۔
ذرائع کے مطابق اسلامک یونیورسٹی کی بس تیز رفتاری کے باعث ڈرائیور سے بے قابو ہو کر جی الیون کے قریب ایک موٹر سائیکل سوار طالب علم کو کچلتے ہوئے ٹریفک سنگل پر لگے بجلی سے کھمبے سے ٹکرانے کے بعد گرین بیلٹ پر چڑھ گئی۔

حادثے کے نتیجے میں موٹر سائیکل سوار جاں بحق جب کہ یونیورسٹی کی 30 طالبات زخمی ہو گئیں جنہیں طبی امداد کے لئے فوری طور پر اسپتال منتقل کر دیا گیا۔
سیف سٹی کیمرے کی مدد سے حاصل ہونے والی ویڈیو میں واضح طور پر دیکھا جا سکتا ہے کہ سنگل بند ہونے کے باوجود نجی یونی ورسٹی کی تیز رفتار بس دیگر گاڑیوں کو بچاتے ہوئے موٹر سائیکل سوار پر چڑھ اور پھر بجلی کے پول سے ٹکرا گئی۔
اسلامک یونیورسٹی کی بس کے حادثے کے تھوڑی دیر بعد اسی سنگل پر پنجاب پولیس کی بس نے پیچھے سے ایک گاڑی کو ٹکر ماری اور پھر پولیس اہلکاروں نے باہر نکل کرگاڑی میں موجود شخص کو باہر نکال کر تشدد کا نشانہ بھی بنایا۔

ایمزٹی وی(اسلام آباد)انگریزی اخبار ڈان نیوز میں شائع ہونے والی متنازعہ خبر کی تحقیقات کے لیے کمیٹی کی سربراہی سول شخص کو سونپنے کا فیصلہ ہو گیا ۔وزیراعظم نواز شریف سے وفاقی وزیر داخلہ چوہدری نثار نے ملاقات کی جس میں فیصلہ کیا گیا کہ متنازعہ خبر کی تحقیقاتی کمیٹی کا سربراہ اعلیٰ افسر ہو گا ۔
وزیراعظم نواز شریف سے چوہدری نثار کی ملاقات ہوئی جس میں قومی سلامتی کے خلاف ڈان نیوز میں شائع ہونے والی خبر پرتحقیقاتی کمیٹی کے حوالے سے تبادلہ خیال کیا گیا ۔

ذرائع کے مطابق ملاقات میں فیصلہ کیا گیا کہ تحقیقاتی کمیٹی کی سربراہی سول شخص کو سونپی جائے گی اور اس کام کے لیے اعلیٰ افسر کا انتخاب کیا جائے گا ۔اس دوران متنازعہ خبر پر تحقیقات سے متعلق ٹائم فرئم پر بھی بات چیت ہوئی
واضح رہے کہ کچھ دیر بعد چوہدری نثا ر اہم پریس کانفرنس کریں گے جس میں اس کیس کے حوالے سے ٹائم فریم کا اعلا ن متوقع ہے جبکہ کمیشن کی سربراہ کے حوالے سے بھی اعلان کیا جا سکتا ہے ۔