ایمز ٹی وی ( تجارت ) دستاویز کے مطابق وزیراعظم آفس کی جانب سے فیڈرل بورڈ آف ریونیو(ایف بی آر) کو لیٹر لکھا گیا ہے کہ آزاد جموں و کشمیر کے رہائشی ٹیکس دہندگان کی نان فائلر حیثیت کے بارے میں جلد ازجلد رپورٹ تیار کرکے وزیراعظم بھجوائی جائے کیونکہ اس سے قبل بھی لیٹر لکھا گیا تھا مگر رپورٹ نہیں بھجوائی گئی، جس کے باعث اب ریمائنڈر بھجوایا گیا ہے البتہ ایف بی آر حکام کا کہنا ہے کہ آزاد جموں وکشمیر میں ٹیکس ادا کرنے والے رجسٹرڈ ٹیکس دہندگان کو پاکستان میں نان ریذیڈنٹ پاکستانی کا درجہ حاصل ہے،آزاد جموں و کشمیر میں جو ٹیکس ڈپارٹمنٹ کی جانب سے ٹیکس اکٹھا کیا جاتا ہے تو وہ آزاد جموں و کشمیر کو ہی جاتا ہے اور ایف بی آر اس کی ان پٹ ٹیکس ایڈجٹمنٹ فراہم کرتا ہے اس لیے جو آزاد جموں و کشمیرکے رہائشی وہاں ٹیکس ادا کرتے ہیں وہ نان ریذیڈنٹ ٹیکس دہندگان کے زمرے میں آتے ہیں اور پاکستان میں اگر وہ ٹیکس اتھارٹیز کے پاس رجسٹرڈ نہیں تو نان فائلرز کہلاتے ہیں۔

حکام کے مطابق پاکستان اور آزاد جموں کشمیر کی ٹیکس اتھارٹیز کے لیے ایک دوسرے کے شہری نان ریذیڈنٹ پاکستانی و نان ریذیڈنٹ کشمیری کا درجہ رکھتے ہیں اور دونوں ٹیکس اتھارٹیز کے لیے ایک دوسرے کے ٹیکس دہندگان نان فائلرز ہیں جس کے باعث ان سے اضافی شرح سے ود ہولڈنگ ٹیکس کٹوتی کی جا رہی ہے۔ ذرائع کا کہنا ہے کہ پرال کی جانب سے الیکٹرانیکلی لنک نہ کیے جانے کے باعث ایف بی آر اور آزاد کشمیر ریونیو اتھارٹی کے درمیان ایک دوسرے کے شہریوں کو نان ریڈیڈنٹ و نان فائلرزقرار دے کر اضافی ٹیکس کٹوتی کی جا رہی ہے۔

اس تنازع پر اب وزیراعظم سیکریٹریٹ کی جانب سے رپورٹ طلب کی گئی ہے۔ ذرائع کے مطابق آزاد جموں و کشمیر کے رہائشی ٹیکس دہندگان کو پاکستان میں نان فائلرز قرار دینے سے متعلق ایف بی آر کی طرف سے رپورٹ مرتب کی جارہی ہے جو جلد وزیراعظم سیکریٹریٹ کو بھجوادی جائیگی جس کے بعد اس بارے میں کوئی فیصلہ ہوگا۔

ایمز ٹی وی (صحت ) ہمیں بچپن سے ہی ایک بات بار بار بتائی گئی کہ ہمیں دانت کب کب برش کرنے چاہئیں؟ یعنی رات کو سونے سے پہلے، صبح اٹھنے کے بعد اور بہت زیادہ میٹھی چیزیں جیسے کہ مٹھائی اور چاکلیٹ کھانے کے فوری بعد دانت ضرور برش کرنے چاہئیں۔

لیکن معلوم یہ ہواہے کہ ہمیں میٹھی چیزیں کھانے کے بعد دانت برش کرنے کے حوالے سے باتیں بتائی گئیں ، وہ ہرگز کوئی اچھا مشورہ نہیں تھا ۔ اس بات سے تو کبھی بھی کوئی اختلاف نہیں کرسکتا کہ دانتوں میں صفائی رکھنے سے وہ نہ صرف صاف ستھرے رہتے ہیں بلکہ مضبوط بھی ہوتے ہیں ۔

لیکن مسئلہ وقت کا آیا ہے کہ دانت آخر صاف کس وقت کرنے چاہئیں ۔ کچھ بھی کھانے کے فوری بعد دانتوں کو برش کرنا ٹھیک نہیں اور خاص کر اس وقت جب آپ نے کچھ تیزابیت سے بھرپورغذا لی ہو ۔

ایسا کہنے کی بنیادی وجہ یہ ہے کہ جب آپ سٹرس فروٹ جیسے لیموں ، کینوں اور گریپ فروٹ کھاتے ہیں یا پھر ٹماٹر اور انرجی و مصنوعی ڈرنکس پیتے ہیں تو یہ سب چیزیں آپ کے دانتوں میں موجود انیمل کی تہہ کو نرم کردیتی ہیں اور جب آپ فوری طور پر دانتوں پر برش کرتے ہیں تو انیمل کی تہہ بتدریج ہٹتی چلی جاتی ہے اور یوں برش کا براہِ راست اثر دانتوں پر پڑتا ہے، جس کی وجہ سے وہ کمزور ہوجاتے ہیں۔

اس لیے اب دانتوں کے ڈاکٹرز مشورہ یہی دیتے ہیں کہ کچھ بھی کھانے یا پینے کے کم از کم 30 منٹوں تک دانتوں کو صاف نہ کریں بلکہ صبح اور رات کو دانت کرنا ہی مفید ہے ۔

ایمز ٹی وی(کراچی) وزیراعلی سندھ مراد علی شاہ نے محکمہ لوکل گورنمنٹ کے افسران کو وارننگ دیتے ہوئے کہا ہے کہ وہ اپنی کارکردگی کو بہتر بنائیں ورنہ کہیں اور کام ڈھونڈیں۔

کراچی میں وزیراعلی سندھ مراد علی شاہ کی زیرصدارت صوبے بھر میں میگا پروجیکٹس پر ہونے والی پیش رفت سے متعلق اجلاس ہوا، اجلاس میں سیکریٹری خزانہ، سیکریٹری بلدیات اوردیگر متعلقہ حکام شریک ہوئے۔

اجلاس میں وزیراعلی سندھ مراد علی شاہ نے خصوصی کراچی پیکج کے تحت تیار ہونے والے منصوبوں کے ٹینڈرز نہ ہونے پر شدید برہمی کا اظہار کرتے ہوئے کہا کہ یونیورسٹی روڈ کی کارپٹنگ اور اسنارکلز کی خریداری کے ٹینڈرز ابھی تک کیوں جاری نہیں ہوئے، یونیورسٹی روڈ کا منصوبہ بہت اہم ہے، تاخیر کا مطلب شہریوں کو مزید تکلیف دینا ہے، اگر ٹھیکے دینے کے کام میں میرٹ نظر انداز کیا گیا تو وہ کسی کو نہیں چھوڑیں گے، مجھے اگر کسی کے خلاف شکایت ملی تو وہ نوکری پر نہیں رہے گا۔

اجلاس میں وزیراعلی نے افسران پربرہمی کا اظہار کرتے ہوئے کہا کہ میں اکیلا ہر چیز پر نظر رکھتا ہوں لیکن آپ لوگوں سے صرف اپنے ڈیپارٹمنٹس میں کام نہیں ہوپارہا ہے۔ ان کا کہنا تھا کہ افسران اپنی کارکردگی کو بہتر بنائیں ورنہ کہیں اور کام ڈھونڈیں۔

وزیراعلی نے اجلاس میں چیف سیکریٹری صدیق میمن کوطلب کرتے ہوئے انہیں کراچی میگا پروجیکٹس کی پیش رفت پر نظر رکھنے کی ہدایت کردی۔ وزیر اعلی نے کراچی کے پروجیکٹس مستند ٹھیکیداروں کے ذریعے معیاری طریقے سے مکمل کئے جانے کی بھی ہدایت دی جب کہ شارع فیصل کی ایک لین بڑھانے اورفٹ پاتھ سمیت نکاس کو بہتر کرنے کا فیصلے سمیت بلوچ کالونی فلائی اوورکے اطراف کی سڑکیں بہتر کرنے کا بھی فیصلہ کیا گیا ہے۔

ایمز ٹی وی(کراچی) وزیر اعلیٰ سندھ مراد علی شاہ نے کہا ہے کہ احتجاج کرنا ہر کسی کا حق ہے لیکن کسی کو قانون ہاتھ میں لینے کا حق نہیں۔

کراچی میں انسداد پولیو مہم کے افتتاح کے موقع پر میڈیا سے بات کرتے ہوئے مراد علی شاہ نے کہا کہ پیپلزپارٹی جمہوری اقدار کو برقرار رکھنا چاہتی ہے، ہم اپنے شہیدوں پر ناز کرتے ہیں، احتجاج کرنا ہر کسی کا حق ہے لیکن قانون ہاتھ میں لینے کا حق نہیں۔ انہوں نے کہا کہ اب تک صوبائی مالیاتی کمیشن کی تشکیل نہیں ہوسکی جس کے باعث بلدیاتی اداروں کو مالی مسائل درپیش ہیں، جلد ہی صوبائی مالیاتی کمیشن بنایا جائے گا۔

وزیر اعلیٰ سندھ نے کہا کہ اسپتالوں میں طبی و غیر طبی عملے اور ڈاکٹرز کی کمی سےمتعلق خامیاں ختم کرنا چاہتے ہیں، صوبے بھر میں بھرتیوں پر سے پابندی اٹھا لی گئی ہے، 3 سے 6 ماہ میں پیرامیڈیکل اسٹاف کی کمی ختم کی جائے گی۔

مراد علی شاہ نے کہا کہ پولیو موذی مرض ہے اور ہمیں اس کاخاتمہ کرنا ہوگا، وفاقی اور صوبائی حکومت مل کر پولیو کا خاتمے کرنا چاہتے ہیں، مہم کے دوران صوبے بھرکے 83 لاکھ بچوں کو پولیو سے بچاؤ کے قطرے پلانے کا ہدف مقرر کیا ہے جب کہ کراچی کے22 لاکھ بچوں کوپولیوسےبچاؤ کےقطرے پلائےجائیں گے، اس کے لیے 46 ہزار ورکرز کام کررہے ہیں۔

والدین سے درخواست ہےکہ 5 سال تک کے بچوں کو پولیو کے قطرے ضرور پلائیں۔ انہوں نے کہا کہ لوگوں کا اعتراض تھا پولیو ویکسین درست نہیں، لیڈی ہیلتھ ورکرزکو پولیو ویکسین کے رنگ سے متعلق بھی تربیت دی ہے کیونکہ اگر پولیو ویکسین کا رنگ تبدیل ہوجائے تو وہ مؤثر نہیں رہتی۔

ایمز ٹی وی (تعلیم/کراچی) جامعہ کراچی ایمپلائز ویلفیئر ایسوسی ایشن کے صدراور جنرل سیکریٹری اور ان کے دیگر ساتھیوں کو وائس چانسلرڈاکٹر قیصر کے ساتھ بدتمیزی کرنے اور ان کے خلاف مظاہرہ کرنے پر شوکاز نوٹس دے دئے گئے ہیں۔

جامعہ کراچی کے رجسٹرار کی جانب سے ۹ملازمین افتخار الدین، ضیا ء الحق، محسن الدین،کامران، شاہ زیب، عامر نعیم، منصور اشر،محمد صابر اور یاسر کو دئے گئے ہیں،

جامعہ کراچی کے رجسٹرار کے مطابق نظم وضبط کی خلاف ورزی کسی صورت میں برداشت نہیں کی جائے گی اور زمہ داروں کے خلاف سخت کارروائی ہوگی شوکاز نوٹس میں ملازمین سے کہا گیا ہے کہ وہ ایک ہفتے کے اندر اپنا جواب جمع کرادیں۔

ایمز ٹی وی (تعلیم/سندھ) جامعہ سندھ جام شورو میں ماسٹرزاور ایم ایس/ایم فل ڈگری پروگرامز 2017ءمیں داخلے کے لیے پری انٹری ٹیسٹ 29 اکتوبرکو جامعہ سندھ جام شورو اور اس کے کیمپسز میں منعقد ہوگا۔

جس کے لیے تیاریاں شروع کردی گئی ہیں۔ پری انٹری ٹیسٹ کے انتظامات کے جائزے کے لیے ایک اعلیٰ سطحی اجلاس شیخ الجامعہ سندھ پروفیسر ڈاکٹر محمد صدیق کلہوڑو کی زیر صدارت منعقد ہوا۔

اجلاس میں پری انٹری ٹیسٹ سے متعلق کمیٹیوں کے کنوینرز نے شرکت کی۔ پروفیسر ڈاکٹر محمد صدیق کلہوڑو نے ٹیسٹ کے دوران بہترین انتظامات کرنے اور اس سلسلے میں قائم کی گئی کمیٹیوں کے کنوینرز سے بالترتیب انتظامات، تیاریوں اور درپیش مسائل کے بارے میں تفصیلی معلومات حاصل کرتے ہوئے مطلوبہ ہدایات جاری کی۔

انہوں نے کنوینرز کو کو ایک دوسرے سے مستقل رابطے میں رہنے کی ہدایت بھی کی اور اس سلسلے میں ویب ایڈمنسٹریٹر کی جانب سے ایک ای میل گروپ قائم کرکے اس کے ذریعے مسلسل باہمی رابطے میں رہنے والی تجویز کو منظور کرتے ہوئے اس قدم کو سراہا۔

ڈاکٹر کلہوڑو نے مختلف کنوینرز کی دی گئی معلومات پر اطمینان کا اظہار کیا اور ان کی جانب سے کی گئی کوششوں کی تعریف کی۔ تفصیلات کے مطابق جامعہ سندھ میں ماسٹرز اور ایم ایس/ایم فل ڈگری پروگرامز2017ءمیں داخلے کے لیے پری انٹری ٹیسٹ 29 اکتوبر کو منعقد ہوگا۔

ایمز ٹی وی ( مانیٹرنگ ڈیسک) سائنسدانوں نے فیوچر کے بارے میں بنائی گئی ایک چونکا دینے والی رپورٹ میں انکشاف کیا ہے کہ 2116 میں ہماری دنیا میں نہ صرف آسمان کو چھونے والی عمارتیں بن جائیں گی بلکہ انسان پانی کی تہہ میں بھی رہنے کا سامان پیدا کر لے گا۔

سائنسدانوں نے ایک دلچسپ رپورٹ مرتب کی ہے، جس میں مستقبل کی دنیا کے بارے میں حیران کن انکشافات کئے گئے ہیں۔ سائنسدان ڈاکٹر میگی ایڈیرن کی اس رپورٹ میں بتایا گیا ہے کہ آئندہ 100 سالوں تک ہماری دنیا بالکل بدل جائے گی۔

ہمارے عام گھروں کی جگہ تھری ڈی پرنٹڈ گھر لے لیں گے۔ دنیا میں آبادی میں اضافے کی وجہ سے انسان نہ صرف آسمان کو چھونے والی عمارتیں بنا لیں گے بلکہ زیر زمین اور پانی کے اندر بھی اپنی رہائشگاہیں بنا لیں گے۔

رپورٹ میں کہا گیا ہے کہ دنیا میں موجود قدرتی وسائل اس قدر کم ہو جائیں گے کہ انسانوں کو اس کا متبادل ڈھوںڈنا پڑے گا۔

رپورٹ کے مطابق 2116ء میں دنیا میں موجود انسان اپنی ضروریات کیلئے پانی، گیس اور خوراک خود بنانے کے قابل ہو جائیں گے۔ توانائی کے حصول کیلئے شمسی توانائی کا استعمال عام ہو جائے گا۔

رپورٹ میں ایک اور دلچسپ بات کہی گئی ہے کہ دنیا کی بیشتر آبادی چاند اور مریخ پر آباد ہو جائے گی۔