Reporter SS
ایمزٹی وی(آزاد کشمیر) گلگت بلتستان حکومت کے وزراء سے گفتگو کرتے ہوئے وزیراعظم آزاد کشمیر راجہ فاروق حیدر خان نے کہا ہے کہ آزاد کشمیر اور گلگت بلتستان کے درمیان زمینی رابطے بحال کئے جائینگے اور آزاد کشمیر کے اعلیٰ تعلیمی اداروں میں گلگت بلتستان کے طلبا و طالبات کیلئے مختص کوٹے میں اضافہ کیا جائے گا۔
اقتصادی راہداری منصو بہ کی تکمیل سے گلگت بلتستان سمیت پورے خطے کی تقدیر بدل جائے گی۔ اقتصادی راہداری منصوبے میں کسی کو بھی رکاوٹ نہیں بننے دیا جائے گا ۔ گلگت بلتستان کو اپنے وجود کا حصہ سمجھتے ہیں ۔ گلگت بلتستان اور آزاد کشمیر کے درمیان تاریخی نظریاتی اور جغرافیائی رشتوں کو بحال کرکے نئی جہت دینگے
وزیراعظم راجہ فاروق حیدر سے گلگت بلتستان کے وزیر لوکل گورنمنٹ فرمان علی رانا اور وزیر جنگلات عمران وکیل نے ملاقات کی جنہوں نے وزیراعظم راجہ فاروق حیدر خان کو آزاد کشمیر کابینہ سمیت گلگت بلتستان کے دورے کی دعوت دی جو انہوں نے قبول کرلی ۔ وزیراعظم راجہ فاروق حیدر نے کہا کہ وہ جلد گلگت بلتستان کا دورہ کرینگے۔
وزیراعظم کا کہنا تھا کہ گلگت بلتستان کے عوام ہمارے بھائی ہیں ۔تاریخی نظریاتی اور جغرافیائی رشتوں کو مزید مستحکم کرینگے ۔ خواہش ہے کہ گلگت بلتستان اور آزاد کشمیر کے درمیان زمینی رابطہ جلدبحال ہو۔ اس مقصد کیلئے حکومت آزاد کشمیر اپنے تمام تر وسائل بروئے کار لائے گی۔ آزاد کشمیر کی یونیورسٹیوں میں گلگت بلتستان کے طلباء کے لئے کوٹے میں ضرورت کے مطابق اضافہ کیا جائیگا اور میڈیکل کالجز میں بھی کوٹہ مختص کرینگے ۔
ایمزٹی وی(آزاد کشمیر)پی ٹی آئی کشمیر کے صدر بیرسٹر سلطان محمود چوہدری نے کہا ہے کہ امریکہ مسئلہ کشمیر کے حل کے لئے اپنا کردار ادا کرے ۔ امریکہ نہ صرف ایک سپر پاور ہے بلکہ انسانی حقوق پر بھی اسکا بہترین ٹریک ریکارڈ ہے اور وہ پہلے بھی مقبوضہ کشمیر میں انسانی حقوق کی پامالی کی مذمت کر چکا ہے ۔
مقبوضہ کشمیر میں بھارتی مظالم بند کرانے کیلئے اقدامات کئے جائیں ان خیالات کا اظہار انھوں نے یہاں اپنی رہائشگاہ پر امریکی وزارت خارجہ کی افسر لیزا بوزینس کی قیادت میں ملاقات کرنے والے وفد سے بات چیت کرتے ہوئے کیا ۔بیرسٹر سلطان نے وفد کو بریفنگ دیتے ہوئے کہا کہ مقبوضہ کشمیر میں جاری مظالم و بربریت کا اس بات سے انداز لگایا جا سکتا ہے کہ حریت قیادت عرصہ سے گرفتار ہے ۔
ایمزٹی وی(صحت) سائنسدانوں نے ایک ایسا ٹوتھ پیسٹ تیار کیا ہے جو ایک طرف تو مسوڑھوں اور دانتوں کو صاف رکھتا ہے دوسری جانب فالج اور دل کے دورے سے بھی بچاتا ہے ۔ ماہرین کا کہنا ہے کہ ٹوتھ پیسٹ دانت صاف کرنے کے علاوہ بدن میں سوزش کو بھی روکتا ہے کہ یہ اس درجے کے قریب پہنچ جاتا ہے جہاں کارکردگی کے لحاظ سے دل کے دورے کی وجہ بننے والے کولیسٹرول کو روکنے والی ادویہ سے تھوڑا پیچھے ہے۔
واضح رہ کہ ماہرین خبردار کرچکے ہیں کہ دانتوں اور مسوڑھوں کی خرابی دل کے امراض کی وجہ بن سکتا ہے ۔ امریکہ میں تیار کردہ یہ ٹوتھ پیسٹ روایتی پیسٹ کےمقابلے میں صفائی بھی زیادہ کرتا ہے جبکہ اسے فلوریڈا اٹلانٹک یونیورسٹی کے ماہرین نے تیار کیا ہے۔
ایمزٹی وی(مانیٹرنگ ڈیسک)سرکاری چینی اخبار ’’پیپلز ڈیلی‘‘ کے مطابق چین نے پاکستان کو 8 عدد ’’یوآن کلاس‘‘ آبدوزیں فروخت کرنے کا فیصلہ کرلیا ہے۔۔
پاکستان کو آبدوزوں کی فروخت کے مذکورہ معاہدے پر اپریل 2016 میں وزیرِاعظم پاکستان نواز شریف کے دورہ چین کے موقعے پر دستخط کیے گئے جس کے مطابق ان میں سے 4 آبدوزیں چین میں جب کہ باقی کی 4 کراچی شپ یارڈ (پاکستان) میں تیار کی جائیں گی۔ یعنی اس معاہدے میں ٹیکنالوجی کی منتقلی (ٹیکنالوجی ٹرانسفر) کی شق بھی یقیناً شامل ہے۔
ٹائپ 039/ ٹائپ 041 یوآن کلاس (Yuan-Class) کی ان حملہ آور آبدوزوں میں حرکت اور توانائی کے لیے ڈیزل انجن نصب ہوتا ہے۔ یہ سمندر میں 400 میٹر تک کی گہرائی میں رہتے ہوئے 20 ناٹ (37 کلومیٹر فی گھنٹہ) تک کی رفتار سے سفر کرسکتی ہیں
یہ بھی معلوم ہوا ہے کہ اس معاہدے کی لاگت 4 سے 5 ارب امریکی ڈالر کے مساوی ہے جس کے تحت پاکستان کو 2028 تک ایسی 8 آبدوزیں فراہم کردی جائیں گی۔ اس طرح یہ چین کے بڑے دفاعی برآمدی معاہدوں میں سے ایک ہے۔ پہلی 4 آبدوزیں جو پاکستان کو 2023 تک ملیں گی انہیں چین میں تیار کیا جائے گا جب کہ مزید 4 آبدوزیں 2023 سے 2028 کے درمیان کراچی شپ یارڈ میں مکمل کی جائیں گی۔
ایسی ہر آبدوز تقریباً 2300 ٹن وزنی اور چینی ساختہ YJ-2 بحری جہاز شکن میزائلوں کے علاوہ Yu-3 ایکٹیو/ پیسیو ہومنگ تارپیڈوز سے لیس بھی ہوگی۔ یوآن کلاس آبدوزوں کی سب سے خاص بات یہ ہے کہ ان سے بہت ہی کم شور پیدا ہوتا ہے اور اسی لیے یہ چینی بحریہ کی ’’خاموش ترین‘‘ آبدوزوں میں بھی شمار کی جاتی ہیں۔
اس کے علاوہ پاکستان اور ترکی کے درمیان جون 2016 میں بھی ایک اور معاہدہ طے پاچکا ہے جس کے تحت پاکستان کی 3 عدد ’’اگوسٹا 90 بی کلاس‘‘ (المعروف ’’خالد کلاس‘‘) آبدوزوں کو جدید پروپلشن نظاموں سے لیس کرتے ہوئے ان کی کارکردگی اور عمر، دونوں میں اضافہ کیا جائے گا۔
ایمز ٹی وی (انٹرٹینمنٹ ) مبئی ہائی کورٹ نے بھارتی اداکارہ پروین بابی کی وصیت ان کی موت کے 11 سال بعد منظور کرلی ہے جس کے تحت بھارتی اداراہ کی جائیداد میں سے 80فیصد جونا گڑھ میں ٹرسٹ کے کاموں پر خرچ کی جائے گی اور 20فیصد اداکارہ کےننھیال کے انکل کو دی جائے گی۔
بھارتی میڈیا رپورٹس کے مطابق مقدمہ اداکارہ کےپھوپھی زاد رشتے داروں کی جانب سے لڑ اجارہا تھا جنہیں ان کی دولت میں سے ایک روپیہ بھی نہیں ملا تھا ۔
ایک رپورٹ کے مطابق 2005 میں اداکارہ کی یہ وصیت ان کے ننھیالی انکل مراد خان بابی کی جانب سے پیش کی گئی تھی جس کے مطابق اداکارہ کی جائیداد میں سے 20فیصد انہیں اور 80 فیصد’ٹرسٹ‘کے کام پر خرچ کیا جانا تھا۔
اس وصیت کے منظرعام پرآنے کے ساتھ ہی اداکارہ کے پھوپھی زاد رشتے داروں نے اسے جعلی قرار دیکر مقدمہ دائر کردیا۔
تاہم عدالت نے مراد خان کی پیش کردہ وصیت کے حق میں فیصلہ سنادیاہے۔ پروین کے انکل کا کہنا ہے کہ قانونی جنگ کبھی بھی پیسے کے لیے نہیں تھی یہ صرف اداکارہ کی آخری خواہش کے لیے تھی اور اب میں اس کی جائیداد کو ٹرسٹ کے قیام کےلیے استعمال کروںگا جو اسے ہمیشہ زندہ رکھے گا۔
ایمز ٹی وی (اسپورٹس) پاکستان کے رضوان اعظم اور پلوشہ بشیر نے اسلام آباد میں کھیلے جانے والےانٹرنیشنل بیڈ منٹن ٹورنامنٹ میں مردوں اور خواتین کے انفرادی اعزاز اپنے نام کر لئے۔
پلوشہ بشیر اور رضوان اعظم نے اپنے شاندار کھیل کی بدولت ماہ نور شہزاد اورعرفان سعید کو شکست دی۔
جبکہ مینز ڈبلز کیٹگری کا اعزازرضوان اعظم اور کاشف سلہری نے جیتا۔ گزشتہ روزلیاقت جمنازیم اسلام آباد میں کھیلے گئے فائنل رائونڈ میں خواتین سنگلز میں پلوشہ بشیر نے سخت مقابلے کے بعد ماہ نور شہزاد کو 2-1سے شکست دیکر خواتین کا ٹائٹل اپنے نام کر لیا۔
میچ میں دونوں پلیئرز نے بہترین کھیل پیش کیا تاہم پلوشہ بشیر نے پہلے سیٹ میں 13-21کی شکست کے باوجود باقی دونوں سیٹس میں 21-18 اور 23-21سے کامیابی حاصل کی۔
مردوں کے انفرادی مقابلے میں رضوان اعظم نے عرفان سعید کو اپنے شاندار کھیل کی بدولت 21-15اور21-18سے شکست دی ۔ مینز ڈبلز کیٹگری میں رضوان اعظم اور کاشف سلہری نے اپنے جارحانہ کھیل کی بدولے سعید بھٹی اور عظیم سرور کو 21-14اور21-13سے شکست دیتے ہوئے ڈبلز کا کرائون اپنے نام کیا ۔
خواتین ڈبلز کیٹگری میں پلوشہ بشیر اور صائمہ منظور نے سدرہ حماد اور خضرہ رشید کو 13-21,21-11اور21-16سے شکست دیتے ہوئے خواتین ڈبلز کا ٹائٹل اپنے نام کیا ۔
ٹورنامنٹ کی اختتامی تقریب کے مہمان خصوصی وفاقی وزیر بین الصوبائی رابطہ ریاض حسین پیرزادہ تھے جنہوں نے کھلاڑیوں میں انعامات تقسیم کئے جبکہ اس موقع پر پاکستان اسپورٹس بورڈ کے قائم مقام ڈائریکٹر جنرل ڈاکٹر وقار احمد، ڈپٹی ڈی جی آغاز امجد اللہ ، ڈائریکٹر پی ایس بی اعظم ڈار سمیت دیگر شخصیات بھی موجود تھی۔
ایمزٹی وی(اسپورٹس)ٹیسٹ ٹیم کے کپتان مصباح الحق نے پاکستان کی جانب سے زیادہ میچز میں کپتانی کا عمران خان کا ریکارڈ برابر کر دیا۔ویسٹ انڈیز کے خلاف ابوظہبی ٹیسٹ میں مصباح الحق نے 48 ویں ٹیسٹ میں گرین کیپس کی قیادت کے فرائض انجام دے کر عمران خان کا ریکارڈ برابر کردیا۔
ان کا کہنا تھا کہ ملک کی نمائندگی کرتے ہوئے ایک لیجنڈری کرکٹر کے برابر آنا میرے لئے بہت ہی اعزاز اور فخر کی بات ہے، میں اس قسم کے ریکارڈ کی طرف نہیں دیکھتا لیکن جب وقت کے ساتھ ساتھ آپ کے کیرئیر میں اس طرح کے بڑے لمحات آتے ہیں تو بہت خوشی اور راحت ملتی ہے۔
واضح رہے کہ مصباح الحق اب تک 66 میچز میں سے 48 ٹیسٹ میں قومی ٹیم کی نمائندگی کر چکے ہیں جس میں سے 23 میں فتح ان کا مقدر بنی جب کہ 13 میں انہیں شکست کا سامنا کرنا پڑا جب کہ اتنے ہی ٹیسٹ میچز میں عمران خان کو 14 میچز میں کامیابی اور 8 میں شکست کا سامنا کرنا پڑا۔ بطور کپتان مصباح الحق کی کامیابی کا تناسب 47.93 فیصد جب کہ عمران خان کی کامیابی کا تناسب 29.78 فیصد رہا۔
ایمز ٹی وی ( تجارت )سیکیورٹیز اینڈ ایکسچینج کمیشن آف پاکستان نے ستمبر کے دوران 481 کمپنیاں رجسٹر کیں۔ گزشتہ روز جاری کردہ اعدادوشمار کے مطابق ستمبر میں رجسٹر ہونے والی کمپنیوں میں 87 فیصد پرائیویٹ لمیٹڈ، 11 فیصد سنگل ممبر جبکہ باقی پبلک ان لسٹڈ، غیرمنافع بخش ایسوسی ایشن اور غیر ملکی کمپنیاں شامل ہیں۔گزشتہ ماہ سب سے زیادہ کمپنیاں خدمات کے شعبے میں رجسٹرڈ ہوئیں جن کی تعداد 80 ہے، تجارت کے شعبے میں 62، انفارمیشن ٹیکنالوجی میں 43، تعمیرات میں42، سیاحت میں29‘ خوراک ومشروبات21، ریئل اسٹیٹ ڈیولپمنٹ17، ایندھن و توانائی 16، کارپوریٹ ایگریکلچرل فارمنگ اور ادویہ سازی میں 13، 13، تعلیم میں12، ٹیکسٹائل میں11، پاور جنریشن اور انجینئرنگ میں 10،10 اور 102کمپنیاں دیگر شعبوں میں رجسٹر ہوئیں۔
اس کے علاوہ 5 غیر ملکی کمپنیوں کا اسلام آباد، کراچی اور لاہور آفس میں اندراج ہوا جبکہ 37 کمپنیوں میں غیر ملکی سرمایہ کاری ہوئی، ان سرمایہ کاروں کا تعلق افغانستان چین فرانس جرمنی جاپان کرغزستان لبنان ملائیشیا سنگاپور سری لنکا ترکی اور برطانیہ سے ہے۔ یہ سرمایہ کار کمپنیاں کیمیکل، مواصلات، کارپوریٹ ایگریکلچرل فارمنگ، تعلیم، ایندھن و توانائی شیشے و چینی مٹی سے بنی مصنوعات، انفارمیشن ٹیکنالوجی، کان کنی، دوا سازی، پاور جنریشن، خدمات، تجارت، ٹرانسپورٹ اور دیگر شعبوں سے تعلق رکھتی ہیں، ستمبر میں سب سے زیادہ 175 کمپنیاں لاہور کے کمپنی رجسٹریشن آفس میں رجسٹر ہوئیں جبکہ 137 اسلام آباد، 103 کراچی ، 17 فیصل آباد‘ 28 پشاور، 16 ملتان اور 5 کمپنیاں کوئٹہ میں رجسٹر ہوئیں۔
ایمزٹی وی(انٹرٹینمنٹ) پاکستانی اداکارہ صبا قمر کا بالی ووڈ کیریئر شروع ہونے سے قبل ہی مشکلات کا شکار ہوگیا۔ایک رپورٹ کے مطابق پاکستان اور ہندوستان کے درمیان جاری حالیہ کشیدگی کے باعث صبا قمر کی فلم ہندی میڈیم کی شوٹنگ غیر معینہ مدت کیلئے ملتوی کردی گئی ۔
صبا قمر اس فلم میں اداکار عرفان خان کے ہمراہ جلوہ گر ہورہی تھیں ۔
ایمزٹی وی(کراچی)ایم کیو ایم لند ن کے رہنما حسن ظفر عارف کو رینجرز نے گرفتار کر لیا ۔ذرائع کے مطابق ایم کیو ایم لند ن کے رہنما پروفیسر حسن ظفر عارف کو رینجرز اہلکاروں نے پریس کلب کے باہر سے حراست میں لے لیا اور انہیں نامعلوم مقام پر منتقل کر دیا گیا ہے ۔وہ عبوری رابطہ کمیٹی لندن کے رکن ہیں۔
ذرائع کا کہنا ہے کہ ایم کیو ایم لندن کے رہنماﺅں کی آج کراچی پریس کلب میں پریس کانفرنس ہونا تھی اور رہنماﺅں کا انتظار کیا جارہا تھا تاہم پروفیسر حسن ظفر عارف کوپریس کلب میں دیکھ کر رینجرز اہلکار وں نے حراست میں لے لیا ۔
ذرائع نے مزید بتایا ہے کہ پریس کلب کے اطراف کی سڑکوں پر رینجرز کی بھاری نفری تعینات ہے اور گاڑیوں کی چیکنگ کی جا رہی ہے ۔ رینجرز اہلکار پریس کلب کے تین اطراف کے راستوں پر موجود ہے ۔